Ecclesiastes 9 - Ohiatonhseratokénti

¹ Karíhwes tsi wakanonhtónhnionwe tánon ioníron noriwahkwékon kí꞉ken tánon wakatkátho tsi Rawenni꞉io seh toʼniarótaron tsi nihatiweiennhótens ne ronhtenikonhratʼthó꞉kas ó꞉ni ne tionkwetaiéris, iekaníhare ne rahotinoronhkwáhtsheras ó꞉ni ne raotiswénhtsheras. Iáh ónhka tehiakoteriéntare ne tsi niahawenonhátie.

² Iáh othé꞉nen thaʼthetsatʼthíʼen. Kwáh satèhiot tsi iakohiathórens ne tionkwetaiéri tsi kíʼ ní꞉ioht ne rononhkwetahétkens, ne iakoiánere tánon ne ionkwetáksens, né rothiriwiʼióstons tánon ne iáh tehothiriwiʼióstons, tánon tsi nihiá꞉kon iehié꞉tats ne thé꞉nen ahiontienkwarónhniathe tánon ne tsi niháti ne iáh othé꞉nen tsehatítats nahontsenkwahrónhniathe. Ne iakoiánere iáh sénha tehiakoianerasténhnis tsi ní꞉ioht ne iakoriwáhneren; nónhka ne tehionhnisnonhsahéra nahieriwahnírahthe iáh sénha tehiakoianerasthénnis tsi ní꞉ioht ne iáh thaʼtehionhnisnonhsahérhah né thé꞉nen nahieriwahnírahthe.

³ “Tewahkwékon ne sháka tsi ní꞉ioht tsi hionkwaráhre-né꞉ne kenhéiat!” Tánon kwáh eh niwahétken tsi ní꞉ioht nóia nahoténsons ne kénʼen ionwenhtsáte. Tsi nikaríwes enhiakónhnheke nónhkwe, nakonikónhra titkáhere ne wahétken tánon kanahkwáhtshera, tánon thontahiawénhstsi wahahéheʼie.

⁴ Ók kíʼ nónhka ne shé꞉kon iakónhnhe ne tsi ionhwenhtsáte iakorahratseráhien kíʼ; nérhar ne shé꞉kon rónhnhe sénha kíʼ ne roteraswí꞉io tsi ní꞉ioht ne kénreks ne rawenhéion.

⁵ Hén, ne ronhnónhnhe ronateriénthare tsi roniheiónhsehre, ók ne ronenhéion iáh nen꞉né꞉e thé꞉nen tehonateriénthare. Iáh ishiʼnónhwe tatashahonateriwahseráhkwahse; kwáh toh kénʼen ronwatinikónhrenhe.

⁶ Né rahotinoronhkwáhtsheras, ne rahotiswenhtsherasónhas, ne rahononhwehsénhtsheras, ronónhake kíʼ ieiawenhehiá꞉thon. Kwáh iáh shé꞉kon nonhwénhton ne thé꞉nen tahonsahontsiátaren tsi niʼiawénhsehrons ne kénʼen ionhwenhtsáte.

⁷ Wáhs satatʼthén꞉test—tesatskáhon tánon satonnhárak; snekíra ne sanèka otsiatsa tánon satʼtsenhnonhnihák. Thóh seh nihotenikonhrónhni ne Rawenni꞉io nashé꞉re.

⁸ Tiotkonhónwe thóh nashiatoténhak nahisatʼtsenhnonhníhake ó꞉ni ahisathonhnárahke.

⁹ Satenikonhró꞉ri tsi sónhnhe skátke tsi nikáien ne sehnorónhkwa, asèken ne kí꞉ken ne Rawenni꞉io thiá꞉wi tsi nikaríwes nahisahióten ne hioiotensehrahníron ne kén ionhwenhtsáte.

¹⁰ Iasátrek kwáh tsi nahó꞉ten ahisahióten, asèken iáh othé꞉nen tehioteriwahtiéren, iáh thaʼhóten tahonhnonthonhniónheke, iáh thahóten thakariwisákonhke, iáh tahó꞉ten thakarihonhniénhnike ne tsi tionhwenhtsáien ne kenhéion—tánon thóh nónhwe niahisenonhátie.

¹¹ Shé꞉kon óia nahorihóten sakátʼtoʼke, né kénʼen ionhwenhtsáte né kwáh tehotíkas iáh kíʼ tiókonhte tehonatkwénion nónen tenhonréron, tánon ne rotinikonhratʼtsáni iáh tiókonhte tehontkwénies ne tsi waterí꞉ios. Ne rontenikonhratʼthó꞉khas iáh tiókonhte tatehonténhtsahas tsi nihatítkhwa, ne iontenikonhratʼthókha iáh tiókonhte tehiakokwáhses, tánon ne rahtiriwahientéris iáh tiókonhte tetsiotenáktate tsi nónhwe nahonterihónten. Akwékon niehiakoteraskwátsenhs.

¹² Iáh nonhwénton tesateriéntare kátke iekáhewe níse sariwáhke. Tsi ní꞉ioht notsitenhokónhas hioteiatotaréhon tsi waterístaien, tsi ní꞉ioht ne kéntsionk roiathotaréhon tsi wataháro, entewahiatotárehne né nónen kwáh iáh othé꞉nen tetsionkwárahre.

Nanonhthonhniónhtshera Tsi Nòkwah Ne Atʼtokhátshera Tánon Ne Tehiotenonhwaroríthonte

¹³ Knahótenk ó꞉ni ó꞉ia nahó꞉ten wakatkátho, kwáh ioiánere tsi tethewatenienténston tsi ní꞉ioht natʼtokhátshera tsi konhwariwahkweniénstha ne kénʼen ionhwenhtsáte.

¹⁴ Nikanahthá꞉ha kanahthaiéntakwe iáh teiakotsiokowáhnen eh teienákerekwe. Roshastsʼtenserowánen Ronhnonhtí꞉io iasahkotsathónti. Wahtanahthá꞉nahke tánon wahathatewehienéntaʼne ne iatahasonhtótkaʼwe tsi watenhénroʼthes.

¹⁵ Ónhkak thóh ienákerekwe kwáh íken tsi tehiontkárhiaskwe, ók kíʼ tsi nióre tsi rahthókhakwe ahionthónhon nahononhsthá꞉thonke ne kanátha. Ók kíʼ kwáh iáh ónhka tehonwehiaráhʼon.

¹⁶ Tsiókonhte ne wáhken ne attokhátshera sénha ne ioiánere tsi ní꞉ioht ne kashastsʼténsera, ók iáh kíʼ ónhka tehiontatenonhthónhnionse ne tehiontkárhias nahiontenikonhratʼtókhake tó꞉ka ó꞉ni nahiontenhnikonhráhren nahó꞉ten rónhton.

¹⁷ Ók sénha ne ioiánere nahonwanathahónsahthate ne kwáh sak thíken ne rahotiwenhnasónhas ne ronhtenikonhratʼtókhas tsi ní꞉ioht ne rosakawénhthe rakóra iesakónonhs ne tonathónnhokʼthe nahonwaiénawase

¹⁸ Nattokhátshera sénha ne wéso karihonthákwas tsi ní꞉ioht ne hionteriʼiosthakwasónhas, ók saiáta roriwáhneren enhakwéni iawetowáhnen hahonsahariwáhthonthe ne ioiáneres.