Ecclesiastes 5 - Ohiatonhseratokénti

Tó꞉sa Kasteríhenke Ne Thé꞉nen Asahráhratsthe

¹ Sehnikonhráhrat tsi ní꞉ioht tsi Ononsatokentíke nienhénse. Sénha ne ioiánere né thóh niáien nahiontéweiensthe tsi ní꞉ioht ne iahióntkaʼwe ne kariwihiosehokónhas tsi nihatiʼiérah ne thoʼnahthónnokʼthe né iáh tehonahteriénthare tsi natetsatʼthíhen ne wahétken tánon ne ioiánere.

² Nohénton ahontashatháti, tánon tó꞉sa kasterihénken né thén꞉nenh hatsiarahrátsten ne Rawenni꞉io. Karonhiá꞉ke né ténteron tánon níse ohontsáke tsíʼteron, káti tó꞉sa ishiʼnónhwe nasathá꞉ti tsi naʼtehiothonhontsióhon.

³ Né sénha tensathatenikonhráhren, sénha kíʼ ensahsehrentátsenhne, tánon né sénha ensahthá꞉ti, sénha kíʼ iotkathá꞉tse knahótenk enshí꞉ronh né tehiotenonhwaroríhthonthe.

⁴ Káti nónenh entsiarahrátsten ne Rawenni꞉io, orihwí꞉io sónhni tsi iatensótten. Asèken ne Rawenni꞉io iáh tehawerientí꞉ios tó꞉ka ne tsiakotónhnokthe enhiakoriwahnóron tsi nahó꞉ten iakorahrátston. Thóh kíʼ náhtser tsi nisahrahrátston.

⁵ Sénha ioiánere ne tó꞉sa asahráhratsthe tsi ní꞉ioht ne thé꞉nen asahráhratsʼthe tánon iáh tsiathashótten.

⁶ Tó꞉sa ne sahwénhna iahisahsárine ne kariwanerenhatʼtsheráke, né káti nasró꞉ri ne Rawenni꞉io rahonkwéta rokháres tsi iáh tsiatesonhniáthonʼne. Onhnihiotséren ne Rawenni꞉io tsi ahianáhkwahse? Onhnonhtséren tsi atseríhon nahariwáhthonthe tsi nahó꞉ten ne sahioténhen?

⁷ Iáh tewatsʼterístha thóh ní꞉ioht tsi ahisahtétʼtsen, thóh ní꞉ioht ne iáh othénenh tekariwáhstha ahisahióten, tó꞉ka ó꞉ni tóh níkonh tsi ahsahtháti, shé꞉kon kíʼ tehiotonhwenhtióhon natskwéniensthe ne Rawenni꞉io.

Tsi Iakónnhe Iáh Othénenh Tekariwástha

⁸ Tó꞉sa sahneráhko nónenh ensatkátho né kakórahse iakoronhiakéntha ne iakoténtha tánon tsiakototʼtakwénhni ne kariwahkwahrishión꞉tshera tánon ne tkariwaiéris. Iaʼtehionkwétahke ne ronahterihónton tsi thonwahthínes ónhkak ne sénha éneken ronahteríhonte, tánon ó꞉ni shé꞉kon tetsáronh thonwathínes né sénha éneken ronahterihóntons.

⁹ Shé꞉kon nònhne ne ronhnonhtí꞉io tsi né rahniahésen ne kaienthóhtshera.

¹⁰ Tó꞉ka swhistanorónhkwa, kwáh iáh nonhwénhton tsiahisheʼrienhtí꞉io; tó꞉ka saskáneks nahisakwáhsehne, iáh nonhwénhton tsiashiéna tsi naʼtahisathonwenhtsiohníhake. Kwáh iáh othénenh tekariwáhstha.

¹¹ Ne senhaʼsahkwàtshe, sénha iakotsiokowáhnen enshé꞉nonhthe. Tót khók níkon enhsaiéntaʼne nenhtí꞉son natʼthotkhátshera tsi sakwáhtshe.

¹² Né rathináhtsheras tó꞉ka nónhwa tó꞉ka ni ó꞉ni iáh tsiatekaiéri tsi nihothiʼkhwáhien ne tahonskáhon, ók thókʼkik níkon enhatiʼkwéni kasehrentí꞉io tsi ahothítawe. Ók né rothikwá꞉tshes, tsi né nihiótha, tsi niwéso rothíʼien iáh tewátons nahotí꞉tawe tehonahnikónhrahre.

¹³ Né kí꞉ken ne kariwahétken tsi niwakatkáton né kénʼen ionhontsáte: nonhkweshón꞉ʼa ronatʼtwistateweiénthon né nónenh tó꞉ka nónhwa ienkáhewe ne tahonahtonhontsióhse,

¹⁴ tánon ethòne akwékon ensohnáthonse né naʼteraswakʼsénhtshera entkarihón꞉ni tánon iáh othénenh tshiatetsothaténron nahonwenhnohétsthase ne sakothihiohokónha.

¹⁵ Entsitewahténhti né kénʼen ionwenhtsáien kwáh kíʼ tsi ní꞉ioht tsi tsionkwahtawehiá꞉thon tewanhéhonk thiʼkènhʼne—kwáh iáh othénenh tethewaháwihne. Tsi niʼiáwens kwáh tsi níkonh hionkwahioténʼen kwáh iáh othénenh tahónton niahitewá꞉hawe.

¹⁶ Kwáh iáh tetkariwaiéri! Éhren entsítewete kwáh kíʼ tsi ní꞉ioht tsi tsionkwatawehiá꞉ton. Hionkwahióte, tewahnikonhrahráhtie tsi iahó꞉the, tánon nahó꞉ten entewahiéna?

¹⁷ Thóh nónhwe nitsionnhétie ne tetsiókaras tánon kanikonhratsenhtsherákon, tehionkwahnikónhrahre, hionkwahnakwénhʼen, tánon hionkwanonhwáktani.

¹⁸ Kén nahó꞉ten wahkeriwaʼtshénri: né kwáh tsiohiá꞉nere né꞉ne tahitewaskáhon tánon tewanekíra tánon tewahthonnáh꞉ren tsi nahó꞉ten hionkwahioténʼen tsi nikaríwes khók tesonkwáhwi ne Rawenni꞉io nahitiónnheke; né kí꞉ken ne tenhionkwahteriwahsehráhkwahse.

¹⁹ Tó꞉ka ne Rawenni꞉io tesonkwáhwis natʼtsokowáh꞉tshera ó꞉ni kaienthá꞉tshera tánon sonkwahriwáwis nahitewathonhnárahkwe, ahó꞉wenk ne tahitewatenonhwerahthónsehke tánon ahitewathonnáhren tsi nahoténsons hionkwahioténhʼen. Kwáh seh Rawenni꞉io thesonkwáwis.

²⁰ Tsikʼsénha Rawenni꞉io sonhkwariwáhwi nahionkwatshenhnonhníhake, iáh sóhtsi tathahitewahthatenhnikonhráhren né tsík nitiónnhes.