Ecclesiastes 3 - Ohiatonhseratokénti

Rawení꞉io Rarakwenhátons Oriwaʼkwékon Tsi Niewatkwenrarons

¹ Orihwahkwékon tsi niʼiawénsherons kíʼken iowentsiáte né nónen ne Rawenni꞉io iatenhorihwahiéntase né naiawénhne.

² Ratokénstha nónen ienkáhewe nahionʼnákerate ó꞉ni nónen nahiaiéheie, tsi niekáhes nahieiéntho tánon tsi nienkáhewe nahieientʼtkwáko,

³ tsi nienkáhewe nahionthatenonhwarhiákon tánon tsi nienkáhewe nahonsahionthatetiénthe, tsi nienkáhewe nakariwénhthonke ne kanahtowánens tánon tsi nienkáhewe nahonsakakwahtakwénhke.

⁴ Rahtokénstha nónen aʼhiakonikonrákʼsen tánon tsi nienskáhewe nónen aʼhonshaiontʼtsennónni, tsi nienkáhewe naʼiontʼtsiónnion tánon tsi nienskáhewe tahonshaienónniaʼkwe,

⁵ tsi nienkáhewe ne tahionthateʼnóronhkwe tánon tsi nienkáhewe nónen iáh tathahiontatharó꞉ton, tsi nienskáhewe ne tahonsháiontatenoronkwahniónton tánon tsi nienkáhewe nónen iáh thataʼiontatenoronkwahniónton.

⁶ Rakwahthá꞉kwas nónen thén꞉nen ahietʼtshénri tánon tsi nienkáhewe nahiakótonse, tánon nónen ne iáh thén꞉nen tahiakótonse, tsi nienkáhewe naʼienónstathe tánon nienkáhewe ne í꞉seh iaʼhiakóti,

⁷ tsi nienkáhewe nakarahtiónkwen tánon nienskáhewe nahonsakaníkʼkhonke, tsi ienkáhewe ne sák takénhake tánon tsi ienkáhewe nahonshahiontáti.

⁸ Iekáhes nónen nonhkweshón꞉ʼa tenhiontatenóronkwe tánon ó꞉ni iekáhes nónen kwáh íken tsi ronatswénhskon; tsi nienkáhewe nahonteriʼioserahkétskwen tánon tsi ienskáhewe nónen skénnon ensehwáton.

⁹ Nahòten tethewatentsáhas tsi nòkwa nonkwaioténshera?

¹⁰ Wahkateriéntare tsi niʼiorhienáksthe ne Rawenni꞉io shón kwáh kethá꞉ton.

¹¹ Kwáh akwékon tkariwaiéris tsi ní꞉ioht tsi rokwahtakwaʼniónhkwen. Teshonkwáwi nahetewaskanékseke nahionkwateriéntarahne tsi niaʼhawenonhátie, ók iáh nonwénton tetheshonkwáwis né kwáh ahionkweriení꞉io nahionkwahnikonraiéntaʼne tsi nihatiérah.

¹² Káti wahkenikonraiéntas tók tihionkwakwénion né꞉ne ahionkwahtsennonníhake tánon iatethewahtátʼtsahat tsi nahionkwakwénionke tsi náhe shé꞉kon tiónnhe

¹³ Kwáh tewahkwékon tehiotonhontióʼon ne taetewastsʼkáʼon ó꞉ni naʼetewahnekírah ó꞉ni nahitewatsenhnónhniaʼte tsi nahoténshon ne ionkwahiotén꞉en. Né seh ne Rawenni꞉io rahotathawítshera.

¹⁴ Wahkateriéntare kwáh tsi nahoténshons ne Rawenni꞉io kén nienháiere tsi nénwe tsi enʼioianeréhake. Iáh taskwéni ne iáshesʼthe tóka niʼó꞉ni nahontashatókʼthaʼkwe. Tánon tioríhwa tsi nihaiérha ne Rawenni꞉io né tsi ashontiónnien tatsitewarensahrónhsehke.

¹⁵ Tsi neniáwenne tóka niʼó꞉ni tsi nahʼiáwenne ónenk éhʼtho nitiawénhen. Rawenni꞉io thetatʼnanetáhas ne shé꞉kon thóh nahonshaiáwenne.

Ne Iáh Tehioteriwahkwaríshion Tsi Ionwenhtsáte

¹⁶ Ne sénha nisiʼnónhwe, Wakátʼtoʼke ne kénʼen ionwenhtsáte ensetʼtsénri kariwaneraháktshera káien tánon thoʼnónhwe né꞉ne kariwakwarishióntshera ahówenk akaiéntake.

¹⁷ Wakatʼtatró꞉ri, “Rawenni꞉io ensakoríwenhthe ne tionkwetaiéri tánon ne ionhkwetahétken satenhiotónhake, tsioríhwa oriwahkwékon, tsi nihioteriwahtséren, kwáh et nenhiáwenhne tsi nikakwahthákwenh ne iakáhewe.”

¹⁸ Iatewakeriwaiénthaʼse ne Rawenni꞉io tsi sonkwatenientʼtha, tsi iáh sénha óia tethewahiató꞉tens tsi ní꞉ioht ne konhtitshénens.

¹⁹ Ethohʼsáne, kwáh nesàka tsi nihiakohiátawenhs nonhkweshón꞉ʼas thóh kíʼ nónhne nihiotihiátawens ne konhtitshénens. Kwáh eh nikonhnihéions tsi ki ní꞉ioht nótsiakes. Akwékon né shá꞉ka tsi ronhthónries, ne rónhkwe iáh sénha oiatèhiot tsi ní꞉ioht ne konhtitshénens, tsioríhwa tsi ronónhnhe iáh nónhne thénenh tekéntons.

²⁰ Ratikwékon né sahonákʼtha tsi niahonenonhátie—né nokenhráhke. Tetsáron thóh nónhwe nithonénon; tenitsáronh kíʼ thohniénsʼne.

²¹ Ónhka naiekwéni noriwí꞉io ahiakoteriéntarahke nónhkwe akotónnhets éneken niewétha karonhiáke ók ne konhtitshénens ahonatónnhets okenró꞉konh nènhne niewétha?

²² Káti wakátʼtoke né kwáh tsoiánere tsi nahitewáhiere né tewatonhnáhren tsi nahoténsons ionkwahioténhʼen. Iáh nóhia tahó꞉ten tahitewahkwéni nahitewáhiere. Iáh tehióien nahionkwateriéntahrahne onhnenhiáwenhne nónen entewénheie.