Ecclesiastes 12 - Ohiatonhseratokénti

¹ Káti tsi sehwehiá꞉rak ne tsi nikáien tsi sehwahiathíson tsík sénhak shé꞉kon kén nitisewahiónha, nohénton tíken ionikonhráksat wenhnisehrathénions ó꞉ni iosehrahthénions nahónwe nónenh henshí꞉ron, “Iáh teskatenikonhró꞉ris tsi kónhnhe.”

² Nohénton ne karáhkwah ó꞉ni ne tsi teioswatʼthe ó꞉ni nasonhthenʼnékha karáhkwah ó꞉ni ne tsi iotsistokwahrónhnions tenhtewahkarásthonke tánon ensehwatʼsiatharónhnion nónenh iohkenhnoresehrenhthá꞉hon;

³ Ethòne ne sehnenhtsakésons, né tisaná꞉hon, tenhionwíhshonkwe, ó꞉ni ne tsi nakéshons, nónwa konhtishástsʼtes, enhiotitsihióhaʼne Sóhtsi kénk níkonh ensehsheʼnhotsó꞉take ne thasatskáhon, tánon sóhtsi skharátsenh nahiohkénhtonke nasatkató꞉sehke.

⁴ Tensahontákweke iáh tahisatʼthontésehke tsi nihiotʼtsaró꞉kwen ne kanathakónhson. Sonhronhkenéhak tensathontésehke ne tsi kaʼthétʼtha ionenhákare tó꞉ka ó꞉ni ne karenhnasónhas tsi karénhnothe, ók iekaníhare tsi nikonhtirénhnothe notsitenhokónha kwáh kíʼ eniesáhiethe.

⁵ Kwáh kíʼ enshetsanísehke kanónhwe ne é꞉neken tiótʼtes, tánon enhiotʼteronhthónhake ne thakésons niáse. Tsi sanonhkwísehrothe karáhken nenhiá꞉wenhne; kwáh tensnhióten sheronhkenéhak tsi nisaktsinhokátha, tánon akwékon naskanéktshera kenkʼtshiénwe. Thóh nón꞉we niahonkwenonhátie nonahkénka iéken naetewatoríhsen, tánon ehthò꞉ne kwáh enwatsiónhnionke ne kanatakónsons.

⁶ Ne kawistaráhken oronhkwáhsa tenwahtsáke, tánon ne owistanóron watʼthasehrothákwah enkaréhnienhne tánon tekárihne; ne tsioserihieténhton ne tsi tsionáwerothe kwáh tenwáhtsiake, tánon ne watnekaráhkwah kátʼtshe tenwatʼtó꞉ko.

⁷ Nonhkwahieronhtasónhas okènrah iensehwáton ne tsi ionhwenhtsáte, tánon nahonhnísehra ne tsi iakónhnhe kwáh nenhné꞉e Rawenní꞉ioke niénsehwe, tsi nikáien ne tesonhkwáhwi.

⁸ Iáh othé꞉nen tehioríhonte, iáh othé꞉nen tehioríhonte, ráton ne sakorihonhniénhni. Kwáh akwékon iáh othé꞉nen tehioríhonte

Tsi Nitkarihwaró꞉ron

⁹ Ók ne tsi nihatenikonhratʼtókha ne sakorihonhniénhni, iáh hakónhtakwe wasakorihónhnien nonhkweshón꞉ʼa tsi nahó꞉ten roteriéntare. Roteweiénstons nokarakáhions tánon kwáh toʼkénʼen tsi wahátkense tonihioriwí꞉io.

¹⁰ Ne sakorihonhniénhni wahateniénten nahatsénhri ne watewenhnaʼtsésens, ók nowenhnásonhs ne rohiathónhnions kwáh ohriwí꞉io íken.

¹¹ Tsi nihónen né ronhtenikonhratʼthókas kwáh thóh ní꞉hiot tsi nihiohiothí꞉ie nètho kanákare ne róntstha ne teiotinahkaronhtónha sakotinikónhrahre, tánon ne tkaró꞉ronhs nokarahkáhions thóh nikaríhwes iohiá꞉nere tsi ní꞉ioht ne kwáh íken ioníronh tsi kanónhwaroʼthe. Rawenni꞉io totkáwen, tsi nikáien ne tewakwékon sonhkwanikonhrahráties.

¹² Konhiénha ó꞉ia ó꞉ni nahó꞉ten ne kwáh teiotonhwenhtióhon nasatenhnikonhráhren. Iáh tsehiótʼthe nahiehiatónhsehke ne kahiatónhseras, tánon ne sóhtsi ahionhtéweiensthe enhiakonhóronhse.

¹³ Ethohʼsáne, énskak khók tsi nahó꞉ten aiaiéron: Etsenhnaiénsek ne Rawenni꞉io, tánon satewénhnarak ne raoriwahtátʼtsheras, tsioríhwa tsi né ahoríwah hionkhihiatishaháton.

¹⁴ Rawenni꞉io kwáh oriwakwékon tehahiatórehthe tsi nenhtewátiere, ahioianeréhake khóni nahonhetkéntahke, iehióhe tsi nahionkwatiérenhke nathaséhtonhke.