Ecclesiastes 1 - Ohiatonhseratokénti

Ne Tsi Iakónhnhe Iáh Othènenh Tehiorihowá꞉nen

¹ Né kí꞉ken ne raowenhnasónhas ne sakorihonhniénhni, Táwit roiénha, rahónʼa ronhnonhtí꞉iokwe ne Jerusalem.

² Kwáh iáh othènenh tehiorihowá꞉nen, iáh othènenh tehiorihowá꞉nen, ráton ne sakorihonhniénhni. Tsi iakónhnhe iáh othénen tehioríhonte, akwékon iáh othénen tekástha.

³ Tsi nishón꞉nes sathatioténston, sharonhiáken, tánon nahó꞉ten sáien naséhnestʼte?

⁴ Tsi iewahtsirahthá꞉tie thohnénonh nitsakawénon tánon ne tsi iewahtsirahthá꞉tie nienhéntien, ók ne tsi ionwenhtsáte kwáh tó꞉ken nènhne tsi ní꞉ioht.

⁵ Né karáhkwah tkarakwínekens, tánon shé꞉kon ieskaráhkwenhs, kwáh iostore thoʼnionsaiawenonhatse tsi nonwe tiotasawen.

⁶ Entiéne niewetha, ehthone othoréke ni꞉enhenwe—tehiokwahtasehátie tánon sokʼáhre tentewahthásahwen.

⁷ Kwáh niatekaniataráhke tsi kaniatarahkhekówahne niehiawenonhátse, ók ne kaniatarahkhekówah iáh arehkhók tekanáhnon. Nonékanos thóh niesewéhtha tsi nónhwe ne kaniátara tsiotásahwenh, tánon sók áre shé꞉kon tethewatásahwen.

⁸ Oriwahkwékon thóh nieiawénon ne kawisenhehiontsherákon—ne kawisenhehióntshera sótsi tehiotenonhianíton nahiewenhnónhthaʼkwe. Né tewahkaráhkes iáh nonhwénhton tsiatahioiérise nahiawerientí꞉io; né tsi hionkwathonthétha iáh nonhwénhton tsiatahioiérise tsi níkonh ahiotʼthóntene.

⁹ Tsi nitsawénhen ne tsiotserénton shé꞉kon kíʼ ehnenhtsáwenhne. Tsi nikahioténhen ne tsiotserénton shé꞉kon kíʼ enskahioténhen. Kwáh iáh othénen tehioríhwahse ne tsi ionhwenhtsáte.

¹⁰ “Satká꞉tho” rónhton, “kén knahótenk ioríwahse!” Ók iáh kíʼ akwékon ehnitsawénhen tsiotserénton, sénha tkaríwes nohénton sahitewahrahkeráhte.

¹¹ Iáh ónhka tehiakéhiare tsi nahiawénhen ne tsiotohetsthá꞉nion, tánon iáh ónhka ne táwe nenhnísehras tahiakehiárahke tsi nenhiawénhne tsi natetsátere nónhwa tánon né thóhʼne.

Né Rateriwahnótʼtha Roriwaienteráhon

¹² Í꞉i, kherihonhniénhni, wakenonhtí꞉iokwe ne lsraero꞉nonhke né꞉ne Jerusalem nónhwe.

¹³ Iewakenikonhrakonhthá꞉kwen tsi entkenhenhion ó꞉ni enkatéweiensthe oriwahkwékon tsi nikahioténhen ne kénʼen ionwenhtsáte. Rawenni꞉io rokèron ne ioteríhonkok tsi nahionkwahiátawen.

¹⁴ Oriwahkwékon wakatʼkáhton tsi nikahioténhen né kénʼen ionwenhtsáte, tánon wakonhró꞉ri, kwáh akwékon iáh othénen tehioríhonte. Kwáh thóh ní꞉ioht tsi ní꞉ioht nowèra akonhwásehre.

¹⁵ Iáh taskwéni nasthakwahrísi nahó꞉ten ne tehiotʼtsáton; iáh taskwéni nashá꞉sehte nahó꞉ten ne iáh éhtho tekáien.

¹⁶ Wakatatró꞉ri, “Wakonhkwethowaná꞉hon, sénha katenikonhratʼthó꞉kha tsi ní꞉ioht nónhka rotkoráston ne Jerusalem nohénton í꞉i. Wakateriénthaʼre nahó꞉ten natʼtokhátshera ó꞉ni ne karihonniennítshera kwáh íken.”

¹⁷ Iewakerikonhrakonhthá꞉kwen nakeweientétaʼne tsi natetsatʼtíhen ne karihonniennítshera ó꞉ni ne tehiotenonwaroríthonte, natʼtokhátshera tánon ne kanahkwáhtshera. Ók kíʼ wakeriwatsénri tsi sénha ioiánere owèra áksehre.

¹⁸ Né sénha satenikonhratʼtó꞉kha, sénha kíʼ tensathatenikonhráhren; ne sénha seriwahientéri, sénha iononwákʼte.