Deuteronomy 9 - Ohiatonhseratokénti

Nonhkweshón꞉as Iáh Tehontewenhnarákwa

¹ “Sewatahónsatat, Israerʼró꞉nons! Ónhwa wenhniserá꞉te onenhthó꞉wa iatahisewahiá꞉iake ne Jordan Kaniataratátie tánon ne iahisewatiaʼtakwehní꞉ioste nonhóntsa ne nonhkweshón꞉a rahonáwenk ne sénha ronatiohkowá꞉nen ó꞉ni ratiʼshátstes tsi ní꞉se ní꞉ioht. Rotinatowá꞉nens, ne watenhenró꞉tons ne tehiokwataséhton ne rahotinátas iéwas ne tsi tkaronhiá꞉te.

² Nonhkweshón꞉as kwáh í꞉ken tsi ratinenhiésons ó꞉ni ratiʼshátstes; kwáh í꞉ken tsi ratikowá꞉nens, tánon sewariwarón꞉ken iáh ónhka tahiekwé꞉ni nahonwatisénhni.

³ Ók nón꞉wa akwáh í꞉se ensewatkátho né꞉tho Roiá꞉ner sewaNí꞉io kwáh sewahénton niénre tsi ní꞉ioht ne kwáh tehiotenonhianì꞉ton iotè꞉kha. Akwáh enshakosén꞉ni tsi nienhénsewe, ne káti ne kwáh ahieʼtsihiatínekenhwe tánon naieʼtsihiatónthe iostó꞉re, tsi ki nihorahrátston.

⁴ “Nó꞉nen ne Roiá꞉ner sewaNí꞉io sakohiaʼtinekénhen ne sewarihwá꞉ke, tó꞉sa sewénhron ne tsonháke tsi thatsisewahiaʼténhawe nahisewatié꞉nawatste kí꞉ken ionhontsá꞉ien tiorí꞉wa tsi tesewaténhtion. Iáh, ne Roiá꞉ner tsi enshakohiaʼtínekenhwe ki onhkweshón꞉a ne sewarihwá꞉ke tiorí꞉wa tsi nihononhkweʼtahétken.

⁵ Iáh ne tetiorí꞉wa tsi sewaiánere tánon thóh nisewahiéra né꞉tho Roiá꞉ner tsi sewariwá꞉wis nahisewatié꞉nawatste ne rahononhóntsas. Akwáh enshakohiaʼtínekenhwe ne tiorí꞉wa tsi nihonhnonkweʼtahétkens tánon ne tiorí꞉wa tsi ihré꞉re nahatié꞉nawatste tsi nishakorahratstén꞉ni ne sewasoʼtsheraokonhkén꞉en, nʼAbraham, Isaac, tánon ne Jacob.

⁶ Akwáh sewateriénhtarak né꞉tho Roiá꞉ner tsi iáh thetsisewá꞉wis kí꞉ken ionhontsí꞉io tiorí꞉wa tsi tahisewatenʼtsónhke. Iáh, sewanonhtsistaʼní꞉ron tsónhkwe.

Nowistanó꞉ron Tionónhskwaron Owí꞉ra

⁷ “Tó꞉sa nonhwén꞉ton sasewaʼnikónhren tsi nió꞉re tsi watsisewanaʼkón꞉ni ne Roiá꞉ner ne iahontsathèn꞉ke nónhwe. Ne kwáh sonthontenhniseratié꞉renhte nʼé:ren tontésewehte ne Egypt tsi nió꞉re ne kén꞉en weséhwawe, iáh tesewathontà꞉ton natsisewawenhnaráhkwen.

⁸ Shé꞉kon ó꞉ni ne tsi tionónhte ne Sinai watsisewanaʼkón꞉ni ki—iaʼtekaié꞉ri tsi nahonáhkwen naʼtsisewatónhtonke.

⁹ Iáh kenonhtaráhne natié꞉na nosténras ne thó꞉nonh nikahiaʼtón꞉nion ne ateriwaʼseronhniátsheras né꞉tho Roiá꞉ner ne tsi sehwasenhén꞉ni. Thóh iekiʼteróntakwe né꞉ne kaié꞉ri niwenhniseráhsen tánon niwahsontá꞉sen iáh ó꞉ni thé꞉nen tewakékon iáh ó꞉ni tewatnekí꞉ren.

¹⁰ Ethò꞉ne ne Roiá꞉ner tahá꞉kon ne tekenstèn꞉rakes róston né꞉ne thóh nónh nihohiaʼtón꞉nion ne kwáh raónha ratsaʼnáke né꞉ne tsi nahó꞉ten tsisewahró꞉ri ne tsi iotè꞉kha nitsawé꞉non né꞉ne tewenhniserá꞉tehkwe ne sehsewatiaʼtaró꞉roke ne tsi tionónhte.

¹¹ Hen, sonhtó꞉hetste ne kaié꞉ri niwenhniseráhsen ó꞉ni niwasonhtáhsen ne Roiá꞉ner tahá꞉kon ne tekentstèn꞉rakes né꞉ne tsi nón꞉we nihohiatón꞉nion nateriwaʼseronhniá꞉tshera.

¹² “Ethò꞉ne ne Roiá꞉ner wahakénhase, ‘Wás shasanonhtátsnent ó꞉nenhk, tiorí꞉wa ne shonkweʼtashón꞉as, tsi ronónha tetesehiaʼtinekénhen ne Egypt, wahonhnonkweʼtahétkenhne tánon karihwahétken ken niohotiʼié꞉ren. Ó꞉nenk ronatswaténion tsi nahó꞉ten kheró꞉ri tsi nahatí꞉iere, tánon wahontatiaʼtonhniserón꞉nien.’

¹³ “Ethò꞉ne ne Roiá꞉ner shé꞉kon sahakénhase, ‘Wakhaterièn꞉tare tsi nihotinonhtsistaʼní꞉ronhs kí꞉ken onhkweshón꞉a.

¹⁴ Tó꞉sa shateʼniénten ne tasektáste. Kwáh wakateʼnikonhrón꞉ni nakhehiátonte ne káti ne iáh ónhka nonhwénton nahonsahonwenhnehiá꞉rake. Ethò꞉ne ki í꞉se ne kaní꞉sera enkonhión꞉ni ne kentiohkowá꞉nen ó꞉ni sénha ratiʼshátstes tsi ní꞉ioht ne ronónha.’

¹⁵ “Káti wakʼkatkahraté꞉ni tánon sakanonhtátsnenʼte, khawinónhtie ne tekenstèn꞉rakes né꞉tho nónh nikahiaʼtón꞉nion ne ateriwaʼseronhniá꞉tsheras. Tiotònhkote notsíre ne tsi ionontáhere.

¹⁶ Wakatkátho tsi ó꞉nenk sewatewenhnóntion natiawenhrá꞉tsheras ne Roiá꞉ner tetsisewá꞉wi, tánon thóh nón꞉we ne sewariwaneráhke tsi nokwáh ne raónha ne tsi wesewataʼtsathonhniserón꞉nien ne karístatis nahó꞉ten ne tetewateʼnienténhston ne tionónhskwaron rátsinn owí꞉ra.

¹⁷ Káti thóh sewahénton watkateʼsénhniate ne osténras tánon watewaʼtó꞉ko.

¹⁸ Ethò꞉ne ki á꞉re ohontsà꞉ke tieʼkhonskaráhthe tsi wakatiaʼtié꞉nenhte rahohénton ne Roiá꞉ner né꞉ne kaié꞉ri niwenhniseráhsen ó꞉ni niwasontáhsen nikarì꞉wes tánon iáh othé꞉nen tewakékon iáh ó꞉ni tewatnekí꞉ren nohné꞉kanos. Ne kí꞉ken aorì꞉wa thóh nátiere ne tsi wesewariwané꞉rake tsi nokwáh ne Roiá꞉ner tánon watsisewanaʼkón꞉ni.

¹⁹ Waktéronskwe ne Roiá꞉ner ne tehiotenonhianì꞉ton raonahkwá꞉tshera, tiorí꞉wa tsi iaʼtehkaié꞉ri tsi nihotenakwawenhrá꞉ti ne naʼtsisewá꞉tonhte; ók shé꞉kon ki á꞉re ne Roiá꞉ner sahakatahónshatate.

²⁰ Ne Roiá꞉ner iaʼtehkaié꞉ri nónhne tsi nihotenakwawenhrá꞉ti nahononwarià꞉konke ne Aaron, sók ki iaʼtiéstakwe wahihiaterenhnaiénhase nónhne ne Aaron.

²¹ Iahá꞉khawe né꞉tho kariwaneraháktshera ne sewáhson—né꞉tho karístatsi ne tionónhskwaron rátsinn owí꞉ra—tánon otsirà꞉ke iakʼkatesenhniate. Ethò꞉ne waʼtekritánion, kwáh okénra waʼkón꞉ni, tánon nokénra tsi kahionhatátie iahonká꞉ti né꞉ne tsi tionónhte nitiotnawí꞉non.

²² “Káti ó꞉ni tsisewanakonhní꞉hon ne Roiá꞉ner sewaNí꞉io ne Taberah, Massah, tánon Kibroth ne Hattaavah shí꞉tisewes.

²³ Tánon nó꞉nen ne Roiá꞉ner thatsisewaiaʼtínekenhwe ne Kadesh Barnea tsi watsisewahró꞉ri thóh niahí꞉sewe niahisewatiaʼtakweʼní꞉ioste ne tiohontsá꞉ien ne tsi sewawì꞉re, iáh tetsisewawenhnaráhkwen; iáh tetetsisewethákwen iáh ó꞉ni tetsisewawenhnaráhkwen.

²⁴ Wesewateraiá꞉takwe tsi nokwáh ne Roiá꞉ner né꞉ne kwáh sonhtakwaienteráhne tsi thóh sisewahiató꞉ten.

²⁵ “Káti hohontsá꞉ke tieʼkonskaráhthe rahohénton ne Roiá꞉ner né꞉ne kaié꞉ri niwenhniseráhsen ó꞉ni niwasontáhsen, tiorí꞉wa ne Roiá꞉ner tsi rá꞉wen entsisewá꞉tonhte.

²⁶ Tánon ki rahonhà꞉ke ne Roiá꞉ner iakaterénhnaien, ‘O Saiá꞉ner Ní꞉io, tó꞉sa sehiá꞉tont ne kwáh í꞉se shonkweʼtashón꞉a, tsi ronónha sheseniakénhton thóh sashatstenʼserá꞉kon, ronónha tethesehiaʼtinekénhen ne Egypt ne wáshatste ne kaʼshatsténhsera ó꞉ni ne sashatstenhserowaná꞉tshera.

²⁷ Shehiehiárak ne shaná꞉tsheras, Abraham, Isaac, tánon ne Jacob; tó꞉sa othé꞉nen karí꞉wa sónhniat tsi nihotinonhnistaʼní꞉ron ki onhkweshón꞉a, ó꞉ni tsi nihonhnonkweʼtahétkens, ó꞉ni ne raotiriwaneraháktsheras,

²⁸ Tó꞉sa neʼok, ne Egyptró꞉nons nahonhní꞉ron iáh teshakwé꞉nion nia sehiaʼténhake ne shonkweʼtashón꞉as ne tsi tiohonhtsá꞉ien ne sehierahratstén꞉ni. Tánon ne tiorí꞉wa tsi nishakósonhskwe, thashakoiaʼtí꞉nekenhwe nashakononhwarià꞉kon ne iahonwenhtsathèn꞉ke nón꞉we.

²⁹ Asè꞉ken ronónha ne kwáh í꞉se shonkweʼtashón꞉as, ronónha ne teteseiaʼtinekénhen ne shátston ne kaʼshatstenhserowá꞉nen ó꞉ni ne sashatstenhserowaná꞉tshera tánon tsi nateshatewehiakaráhwen.’