Deuteronomy 7 - Ohiatonhseratokénti

Ne Roiá꞉ner Ne Kwáh Raónha Rahonkweʼtashón꞉a

¹ “Ne Roiá꞉ner saNí꞉io akwáh ieniahiaʼténhawe ne tsi tiohontsá꞉ien nakwáh ienshatiaʼtakweʼní꞉ioste, tánon kwáh iakotiohkowá꞉nen enshakohiaʼtínekenhwe ne nón꞉we. Tsi neinhénsewe, tsáta nihononhontsá꞉kes enshakohiaʼtínekenhwe ronatiohkowá꞉nen ó꞉ni sénha ratiʼshátstes tsi ní꞉se ní꞉ioht: né꞉ne Hitró꞉nons, ne Girgashró꞉nons, ne Amorʼró꞉nons, ne Canaanites, ne Perizró꞉nons, ne Hivró꞉nons, tánon ne Jebusites.

² Nó꞉nen ne Roiá꞉ner saNí꞉io sashatstenhserá꞉kon nón꞉we nenhsakotkà꞉we kí꞉ken onhkweshón꞉a tánon ensheʼsén꞉ni, ó꞉nenk tsi ratikwé꞉kon ensenonhwarià꞉kon. Akwáh tó꞉sa thé꞉nen iatesewateriʼwá꞉iest ne ronónha tó꞉sa ó꞉ni thé꞉nen ietsinaʼtónhas nataniʼténron.

³ Tó꞉sa ónhka ne sewatateniákten, tánon tó꞉sa ó꞉ni ne ietsiʼienhokónhas né꞉ne ahotí꞉niake,

⁴ tiorí꞉wa ethò꞉ne ne ietsiʼienhokónhas étren ienhonwatihiatenháwiʼte raonhà꞉ke ne Roiá꞉ner ne enskonwasén꞉naien ne akò꞉ren niʼiohokónha. Tó꞉ka thóh nenhiawènhne, ne Roiá꞉ner entsisewanáhkwaʼse tánon óksak entsisewáhtonʼte.

⁵ Káti kwáh, sewariwénhtho ne tsi ratitsenharáhkwas, tesewarihtánion ne iotokénhtis onénhia ronatenawaható꞉tons, tesewahià꞉konhs ne tsi kaiatarón꞉nions ne kaiaʼtón꞉ni Asherah, tánon sewatsáhat ne rahotihiaʼtonhnisónhas.

⁶ Tó꞉ki naʼsewáhier ne tsi Roiá꞉ner sewaNí꞉io ní꞉se rahonkweʼtashón꞉as. Tsi nihiakotióhkwa nonhkweshón꞉as ne tsi ionwenhtsá꞉te í꞉se watsisewahiatará꞉ko ne kwáh ahionkweʼthatokénhake raonkwè꞉ta ahisewá꞉ton.

⁷ “Ne Roiá꞉ner iáh tetsisewanorónhkwakwe ók í꞉se watsisewahiaʼtará꞉ko tiorí꞉wa tsi í꞉se sewentiohkowá꞉nen tsi ní꞉ioht nakorénshon nonhkweshón꞉ʼa; í꞉se naonhà꞉a kenʼnítsonhkwe nonhontsà꞉ke.

⁸ Ók ki ne Roiá꞉ner tsi sewanorónhkwakwe tánon tehotonhontsóni nahakwénienste tsi nishakorahratstén꞉ni ne sewasotʼtsherahokonhkén꞉en. Ne ki tiorí꞉wa waʼtsisewanónhstate ne wà꞉ratste ne raoshatstenhserowaná꞉tshera tánon shatsisewatatewenhní꞉ioste tsi nitsisewanaskón꞉niskwe ne ronhnonhtí꞉io ne Egypt nón꞉we.

⁹ Sewehiá꞉rak né꞉tho Roiá꞉ner sewaNí꞉io tsi rahonhatsí꞉wak kók ne Ní꞉io tánon tsi roriwató꞉ken. Enhateweiénton ne raohianerénhsera tánon enrè꞉neste ne ioriwató꞉ken raonoronhkwátshera ne tewenhniaweheʼtseráhsen natewaterehsehránes ne tsi niʼiá꞉kon ronhwanorónhkwa tánon iontewenhnaráhkwa ne raoriwaʼtá꞉tsheras,

¹⁰ ók iáh tahatiaʼtakenhé꞉iate nasakoré꞉wahte ne ronwáhsonhs.

¹¹ É꞉tho káti, sewatewénhnarak tsi nahó꞉ten ietsirihonhnién꞉ni; sewatewénhnarak akwé꞉kon ne kaianerénhseras né꞉tho takwawí꞉hon nón꞉wa wenhniserá꞉te.

Ne Kahiaʼtaterítsheras Ne Ionhtewenhnaráhkwa

¹² “Tó꞉ka enshatahónshatate kí꞉ken kariwatà꞉tsheras tánon ensatewén꞉narahkwe naioriwatokénhake, ethò꞉ne ki ne Roiá꞉ner saNí꞉io ienhakón꞉taʼkwe enhateweién꞉ton ne ateriwaʼseronhniá꞉tshera tsi naʼtetiátere tánon enhianatónhase ne ioriwató꞉ken rahononronhkwá꞉tshera, tsi ki nishakorahratstén꞉ni ne ietsisoʼthonkonhkén꞉en.

¹³ Akwáh enhianó꞉ronhkwe ó꞉ni enhiaiaʼtaté꞉riste, káti né꞉ne akwáh ahisewentiohkowá꞉nen ó꞉ni wé꞉so ahisewawiraién꞉taʼne; enhaiaʼtatériste tsi sahenthaké꞉rons, ne káti nahónton nahishanatsaiéntaʼne, onenharataʼsehontsherá꞉keri, tánon ne iakeniewáhtha kénhies; tánon tsi enhiaiaʼtaté꞉riste ne tsi nénhthion ne tionhnónskwarons ó꞉ni ne teiotinakaronhtón꞉a. Akwé꞉kon énthion kí꞉ken kaiataterí꞉tsheras ne tsi nishakorahratstén꞉ni ne ietsisoʼthonkonhkén꞉en tsi énthion.

¹⁴ Iáh ónhka nonhkweshón꞉as ne tsi ionwenhtsá꞉te thóh tahiakohiaʼtateristónhake tsi ní꞉ioht ní꞉se. Iáh ónhka tsi nítson ó꞉ni ne sewatsheʼnenhókonhs ne iáh thaónton nahiotiwiraién꞉taʼne.

¹⁵ Ne Roiá꞉ner enhiaiaʼtanónhstate tsi nokwáh ne kanonhwakténtsheras, tánon iáh tahontahá꞉hawe thé꞉nen ne tehiohranónhianis tsi ne sewahiá꞉tawen ne Egypt nónhwe, ók ki akwé꞉kon tesewatà꞉ʼtsons enteshaká꞉wen.

¹⁶ Ieʼtsihiátont ratikwé꞉kon ne niatehononhontsá꞉kes ne sewashatstenhserá꞉kon nónhwe ne Roiá꞉ner nenshakotʼkà꞉we, tánon tó꞉sa othé꞉nen ietshinaʼtónhas nataniténron. Tó꞉sa ietshisén꞉naien ne rahotiní꞉ios, asè꞉ken ne ensewáriote.

¹⁷ “Tó꞉sa ne sewanonhtonniónhek thí꞉ken onhkweshón꞉as ne ronatiohkowá꞉nen tsi ní꞉se ní꞉ioht tánon iáh tahisewakwéni naieʼtsihiatínekenhwe.

¹⁸ Tó꞉sa ietshiʼtshà꞉nisek; sewehiá꞉rak nahó꞉ten ne Roiá꞉ner sewaNí꞉io tsi nihoié꞉raʼse ne ronhnonhtí꞉io ne Egypt nónhwe tánon ratikwé꞉kon ne rahonkweʼtashón꞉a

¹⁹ Sewehiárak akwé꞉kon thí꞉ken tehiotenonhianì꞉tons kannratarinétsheras né꞉tho sewatkathó꞉serons ne kwáh í꞉se sewakahrà꞉kes, ne ioriwanerakwahténions, tánon ne kaʼshatstenhserowá꞉nen ó꞉ni kaʼshatsténhseras tsi nihótston ne Roiá꞉ner tsi tsisewanerénhshion. Kwáh thóh ní꞉ioht tsi shakoʼtòn꞉ton ne Egyptró꞉nons, akwáh enshakothón꞉te kí꞉ken onhkweshón꞉as ne nónhwa ietshiʼtshà꞉nis.

²⁰ Tó꞉ka nón꞉wa enhonteʼniénten nahonshaieshaʼniákenhse tsi ahontaʼséte, ók ki ne Rawenni꞉io akwáh enshakahón꞉nien nahatihiaʼtá꞉nane nahonateronhniénthen ók ki ratikwé꞉kon enshakononhwarià꞉kon.

²¹ Káti tó꞉sa ietshiʼtshà꞉nik kí꞉ken onhkweshón꞉a. Ne Roiá꞉ner sewaNí꞉io sewakwé꞉kon ki; rashatstenserowá꞉nen Ní꞉io tánon iatehahiá꞉ti ahó꞉wenk nahonwatiaʼní꞉sheke.

²² Ken nihioré꞉sehre tsi enshakohiaʼtínekenhwe kí꞉ken onhkweshón꞉as ne tsi nienhénsewe. Iáh thahisewakwé꞉ni ne ratikwé꞉kon óksak ahietsihiaʼthónte, asè꞉ken, tó꞉ka thóh nenhsewá꞉iere, tsi nenhonatiohkowaná꞉ne ne kontí꞉rhios tánon enioʼterontónhake ne sewarihwà꞉ke.

²³ Ne Roiá꞉ner ne tesewatà꞉tsons sewashatstenhserá꞉kon nónhwe nenhsakotʼkà꞉we tánon ensakahón꞉nien nahotiʼterónhseke tsi nió꞉re akwáh ienhonwanáhtonʼte.

²⁴ Ne rahotinontihió꞉tsheras sewashatstenhserá꞉kon nónhwe nenshakótkaʼwe. Akwáh í꞉se enieʼtsinonhwarià꞉kon, tánon kwáh enhonwatihiataʼnikónhren. Iáh ónhka tahiekwé꞉ni ne taietsí꞉taste; akwáh ratikwé꞉kon tsi enieʼtsinonhwarià꞉kon.

²⁵ Sewátsahat ne raotihiaʼtonhnisónhas. Tó꞉sa sewaská꞉nek ne kawistará꞉kens ó꞉ni nowistanó꞉rons ne ionatstánions, tánon tó꞉sa í꞉se iaʼsewáhaf. Tó꞉ka thóh nenhsewá꞉iere, né꞉ne kwáh iakorióktha, tiorí꞉wa ne Roiá꞉ner tsi ráshons ne kahiatonhniʼsónhas.

²⁶ Tó꞉sa othé꞉nen ne kí꞉ken kahiatonhniʼsónhas ne iahisewahiónte ne sewanonskónhsons, tó꞉ka kwáh ne shà꞉ka ne karewatà꞉tshera ensewaʼrà꞉ne tsi ní꞉ioht ne ronónha. Ó꞉nenk tsi kwáh ensewáshon tánon ensewakèn꞉ron kí꞉ken kahiatonhniʼsónhas, tiorí꞉wa tsi Roiá꞉ner sakorewá꞉ton.