Deuteronomy 5 - Ohiatonhseratokénti

Noié꞉ri Nikaianerenserakes

¹ Mahís ratikwé꞉kon washakohiaʼtaró꞉rohke Israerʼró꞉nons tánon washakawénhase, “SewaʼIsraerʼró꞉nonhs, sewatahónshatat akwé꞉kon ne kaianerénseras nentkwawíhon nón꞉wa wenhniserá꞉te. Sewatéweienst tánon ioriwihióhak tsi sewatewén꞉narak.

² Ne tsi tionón꞉te ne Roiá꞉ner Onhkwaní꞉io wahaianerenhserón꞉ni,

³ iáh ietinihó꞉konhak kók skátke tè꞉ken, ók kwáh tewakwé꞉kon ne tiónhnhe nón꞉wa wenhniserá꞉te.

⁴ Thóh tsi tionónhte ne Roiá꞉ner waʼtsisewatháhraʼse kwáh tsi nitisewatierà꞉ton tsi iotòn꞉kote nón꞉we nonhtá꞉we.

⁵ Tsi naʼtesewátere ne Roiá꞉ner nón꞉we naʼtektà꞉ne ehnikahá꞉wi waʼkwahró꞉ri tsi nahó꞉ten rá꞉ton, tiorí꞉wa tsi nisewáteronskwe né꞉tho othónkwa tánon iáh tshiahisewanonhtá꞉raʼne. “Ne Roiá꞉ner wahèn꞉ron,

⁶ ‘Í꞉i ne Watiá꞉ner sewaNí꞉io, Í꞉i skwaʼniakèn꞉ton ne Egypt nón꞉we, tsi nón꞉we tisewanáskwakwe.

⁷ “‘Tó꞉sa sewashén꞉naien nó꞉ia ní꞉io akénhake kwáh ne kók Ní꞉i

⁸ “‘Tó꞉sa sewatatiaʼtonhniserón꞉nien ne thé꞉nen akénhake ne karonhià꞉ke tó꞉ka ni ó꞉ni nonwenhtsà꞉ke tó꞉ka ni ó꞉ni ne awénhke ne nà꞉kon ne tsi ionwenhtsá꞉te.

⁹ Tó꞉sa tesewaʼtiáket nahotihén꞉tons ne kahiatonhniʼsónhas tó꞉sa ó꞉ni ieʼtsishén꞉naien, asè꞉ken ne Roiá꞉ner sewaNí꞉io roteʼkéfen iáh teshakoteʼnikonrihióstha ne ronwáhsons. Tánon kherewá꞉tha tsi nihiá꞉kon ne iónkswenhs kwáh tsi nió꞉re ne áhsen tánon kaié꞉ri niaʼtewateresehráhseʼre.

¹⁰ Ók wakeʼnéston nakenoronhkwátshera né꞉ne niwenhniaweheʼtsherásen natewatereʼserà꞉sere; tsi nihiá꞉kon ne ionhkenorónhkwa ó꞉ni rontewenhnaráhkwa natianerénhseras.

¹¹ “‘Tó꞉sa ensátste naksén꞉na ne kariwahétken akarihón꞉ni, asè꞉ken, ne Roiá꞉ner Sewaní꞉io, kwáh ensakoré꞉waʼte nónhka enhiesenhnaiésaʼthe naksén꞉na.

¹² “‘Sewehiárak ne tsatákhaton nónhta sewenhniseratokéntist, ne tsi Í꞉i, ne Watiá꞉ner sewaNí꞉io, kwahró꞉ri.

¹³ Iá꞉iak nónhta sewenhniserá꞉ien nahisewahiò꞉ten ne sewahioʼténseras,

¹⁴ ók ki ne tsatákhaton ne wenhniserontákwen nahiontorí꞉shen Í꞉i ne akenhní꞉sera. Né꞉tho wenhniserá꞉te iáh ónhka tehiówenk nahiakohiò꞉ten—ne tsisewahiatatʼtsion akénhake, ietsiʼiohokónhas, ne sheʼwanatsheraó꞉kons, sewaʼtshenenhó꞉kons, tó꞉ka ni ó꞉ni ne tihononhontátes ne sewanakerahserá꞉kon ratì꞉teron. Ne shewanátsheras ó꞉nenk tsi enhontoríhsen kwáh ki tsi ní꞉ioht ne tsewatiake.

¹⁵ Sewehiárak tsi sewanáskwa kenʼne ne Egypt nónhwe, tánon Í꞉i ne Watiá꞉ner sewaNí꞉io, shakwahniá꞉kente ne wá꞉katste nakeshatstenserowaná꞉tshera ó꞉ni kaʼshatsténshera. Ne ki tiorí꞉wa tsi kwahró꞉ris iahisewehiá꞉rake ne tsatákhaton nónhta.

¹⁶ “‘Sheʼkwénienst ne iaʼníha ó꞉ni ne sanisténha, tsi Í꞉i, ne Watiá꞉ner sewaNí꞉io wakwahró꞉ri, ne kwáh ahioianeréhake ne sarihwà꞉ke tánon káti nahónton karí꞉wes ashón꞉nheke tsi ionhontsá꞉te ne tkonhiawí꞉re.

¹⁷ “‘Tó꞉sa shehiá꞉set.

¹⁸ “‘Tó꞉sa shatenaʼkwaié꞉sat.

¹⁹ “‘Tó꞉sa senénhsko.

²⁰ “‘Tó꞉sa satshokenhtónni nasanowénhten nakóren aiontʼkaronhni.

²¹ “‘Tó꞉sa sehiaskà꞉nek nakò꞉renh rón꞉kwe ró꞉ne; tó꞉sa saská꞉nek ne tsi ronónhsote, raonhóntsa, rahonà꞉tsheras, rahotshenenó꞉konhs tioronhnónskwarons, raotshenenhó꞉kons tewahòn꞉tes, tó꞉ka ni ó꞉ni nohiásons nahó꞉ten roién꞉ton.’

²² “Ne kí꞉ken natiawenhrátseras ne Roiá꞉ner sewakwé꞉kon thetsisewá꞉wi ne shisewatiaʼtaró꞉ronhne ne tsi tionónhte. Nó꞉nen sahatá꞉ti ne kwáh kawenhnowá꞉nen tsi iotòn꞉kote nón꞉we nonhtá꞉we ó꞉ni katsiʼkerá꞉tens nón꞉we nonhtá꞉we, tahatkà꞉we kí꞉ken owenhnaʼsónhas tánon iáh nó꞉ia tè꞉ken. Ethò꞉ne ó꞉nen tekenstèn꞉rake nón꞉we nahaiatón꞉nion ó꞉ni tahá꞉kon.

Nonhkweshón꞉a Wahakoʼteròn꞉ne

²³ “Nó꞉nen ononhtakwé꞉kon sihiotè꞉kha tánon wesewathonhtè꞉ne nowén꞉na tsi tetiò꞉karas nonhtá꞉we, ne ieʼtsihéntenhse ó꞉ni ne ratikowá꞉nens ne tsi sewenhtháraiens wahontiaʼtó꞉renhne

²⁴ tánon wahonhní꞉ron, ‘Ne Roiá꞉ner Onhkwaní꞉io washonkwanaʼtónhase ne raoshatstenserowanátshera ó꞉ni ne raohiaʼtanerakwáhtshera nó꞉nen sahonkwaʼthóntehne tsi nithó꞉thare ne tsi ioʼtónkote! Nón꞉wa wenhniserá꞉te wahakatkátho tsi iothónhon nonhkweshón꞉a niahionthasónhteren nahiakónhnheke, iawerohá꞉tien ne Rawenni꞉io tsi washakotháhraʼse.

²⁵ Ók nonhtié꞉ren tsi shé꞉kon ateʼsénhna tahitewatʼká꞉neren tsi ahionkinonhwarià꞉kon? Né꞉tho tehiotsenhanònhiani enhionkwathónte. Orihwí꞉io iontsón꞉ni tsi eniakwénheie tó꞉ka enhionkwathónhteʼne ne Roiá꞉ner Onhkwaní꞉io shé꞉kon enshatá꞉ti.

²⁶ Ónhka kén nónhkwe nonhwén꞉ton shé꞉kon ahiakónhnheke nó꞉nen iakothontè꞉hon ne rónhnhe Rawenni꞉io ahontahatá꞉ti ne tsi ioʼtékha?

²⁷ Wás thóh nionhshá꞉se, Mahís, tánon shatahónsatat orihwakwé꞉kon né꞉tho Roiá꞉ner Onhkwaní꞉io rathónhnions. Ethò꞉ne tontáhse tánon saskwaró꞉ri tsi nahó꞉ten wahiaró꞉ri. Kwáh eniakwatahónshatate tánon enhiakwatewénhnaraʼkwe.’

²⁸ “Nó꞉nen ne Roiá꞉ner shahothónteʼne kí꞉ken, wahakénhase, ‘Onkathónteʼne tsi nahó꞉ten nonhkweshón꞉as wahonhní꞉ron, tánon thatiʼié꞉rits.

²⁹ Tó꞉ka shí꞉ken tió꞉konte ki é꞉tho nahonhnonhoténhseke! Tó꞉ka shí꞉ken tió꞉konte aiontkweniénstake tánon akwé꞉kon ahontewenhnaráhkwake nakeriwatà꞉tsheras, káti norihwakwé꞉kon tsiahioiánerenhne ne raotirì꞉wake ó꞉ni tsi nienhontwatsí꞉rine tsi nénhwe.

³⁰ Wás tánon sehró꞉ri raonaʼtosehrá꞉kon nieshón꞉ne.

³¹ Ók ní꞉se, Mahís, kén꞉en shé꞉sek skátke nʼi꞉i, tánon akwé꞉kon entkónion natianerénhseras ó꞉ni nakerihonhnienhnítsheras. Serihón꞉nien nonhkweshón꞉a, ne káti ne kwáh ahontewénhnaraʼkwe ne tsi nón꞉we tiohontsá꞉ien ne tekhehiawì꞉re.’

³² “Israerʼró꞉nons, kwáh orihwí꞉io kénhak tsi akwé꞉kon thóh nenhsewá꞉iere tsi niháwen ne Roiá꞉ner sewaNí꞉io tsiʼnítsi sewahró꞉ri. Tó꞉sa othé꞉nen sewatewenhnónti ne raoianerénhseras.

³³ Akwé꞉kon sewatewénhnarak, ne káti norihwakwé꞉kon tsiahioiánerenke ne sewarihwà꞉ke tánon káti kwáh niahisewakónhtà꞉kwe thóh ahisewenhterónhtake ne tsi iohontsá꞉ien nenhsewatié꞉nawatste.