Deuteronomy 4 - Ohiatonhseratokénti

Ne Mahís Washakoretsiáron NÍsraerʼró:nons Nahontewenhnaʼráhkwahke

¹ Ethò꞉ne ne Mahís wasakawénhase nonhkweshón꞉ʼa, “Sewatewenhnaráhkwak akwé꞉kon ne kaianerénseras ne kwarihonhnién꞉nis, tánon enhtsónhnheke ó꞉ni ensewatié꞉nawatste nonhóntsa tsi niká꞉ien ne Roiá꞉ner, ne SakoʼNí꞉io ne ietsisothokonhkén꞉en, ne tetsisewá꞉wis.

² Tó꞉sa othé꞉nen iaʼsewáiest tsi nahoʼténsonhs kwaroriánions, tánon tó꞉sa othé꞉nen tatsónhnek. Sewatewénhnarat ne Roiá꞉ner raowenhnaʼsónhas ne sewaNí꞉io né꞉tho tkwá꞉wi.

³ Iatesewahià꞉ti wesewatká꞉tho tsi nahá꞉iere ne Roiá꞉ner ne tsi Tionónhte ne Peor. Kanenrahkwé꞉kon washakononhwarià꞉kon tsi konwasénhnaiens ne Baal ne nónhwe,

⁴ ók tsi nítsion ne sewariwató꞉ken rahonhà꞉ke ne Roiá꞉ner sewaNí꞉io shé꞉kon nitsónhnhe nónhwa wenhniserá꞉te.

⁵ “Akwé꞉kon ne kaianerénseras kwarihonhnién꞉ni, ne tsi nihatró꞉ri ne Roiá꞉ner AkeʼNí꞉io thóh nátiere. Sewaioʼténst ne tsi tiohontsá꞉ien ne ó꞉nen kwáh thóhwa iaietsihiatiaʼtónti tánon nahisewatié꞉nawatste.

⁶ Ioriwatokénhak tsi sewatewénhnarak, tánon ne kí꞉ken eniakaweʼnésten nonhkweshón꞉ʼa ne thihononhontsà꞉tes tsi nió꞉re tsi satenikonhraʼtókha. Nó꞉nen akwé꞉kon enhòn꞉ronhke kí꞉ken kaianerénseras, enhonhní꞉ron, ‘Tsi nió꞉re tsi ronhtenikonhraʼtókha tánon rotiʼnikonhraientátskon kí꞉ken rahtiʼshátste kentió꞉kwaien!’

⁷ “Iáh nó꞉ia ne thihononhontsá꞉tes, iawerohá꞉tien tohnahatiʼshátsteke, tehotiniʼioserá꞉ien ne thóh nió꞉re tsi ákta aʼrè꞉sehke nó꞉nen tehonwatonhontsó꞉ni tsi ní꞉ioht ne Roiá꞉ner OnhkwaʼNí꞉io nonhkwarihwà꞉ke. Theshonhkwariwaʼsehrakwén꞉nis ne kátke iaʼtsitewanà꞉ton nashonkwahié꞉nawaʼse.

⁸ Iáh nó꞉ia ne thihononhontsà꞉tes, iáh tewatsterístha thóh nahatiʼshátsteke, nahotihianerenseraiéntake thóh nió꞉re tsi ahontakaié꞉rike tsi ní꞉ioht né꞉tho waʼkwarihón꞉nien nónhwa wenhniserá꞉te.

⁹ Sewatatenʼnikónhraren! Oriwí꞉io tsónhni tsi iáh thahonsesehwaʼnikónhren, kwáh tsi nikarí꞉wes entsónhnheke, tsi nahó꞉ten wesewatkátho ne kwáh í꞉se sewakarà꞉ke. Ieʼtshiró꞉ri ne ietshiʼienhokón꞉as ó꞉ni ne ietsihiatereʼokónha

¹⁰ tsi nihioʼtónhne ne tewenhniserá꞉teʼkwe raohénton ne Roiá꞉ner waʼtesewá꞉taʼne ne sewaNí꞉io ne tsi tionónhte ne Sinai nó꞉nen sahá꞉kenhse, ‘Ietsihiaʼtaró꞉rok nonhkweshón꞉a naʼkénton. Tewakatonhontsóni nahonaʼthontè꞉ne tsi nahó꞉ten wá꞉tien nakí꞉ron, ne ká꞉ti ne kwáh ahatiweientéʼtaʼne naionkewenhnaráhkwe kwáh tsi nikarí꞉wes enhonʼnónhneke tánon ká꞉ti kwáh ashakotirihón꞉nien ne sakotihioʼonkónhas ne thóh nónhne nahatí꞉iere.’

¹¹ “Ieʼtsiró꞉ri ne ieʼtshihienʼokónhas tsi ní꞉ioht tsi iahí꞉sewe tánon iaʼtisewá꞉taʼne ne tsi iononhtaientà꞉on né꞉ne ioterorokstòn꞉ne ne ká꞉tens oʼtsá꞉tas ne kaienkwaraʼhóntsi tánon iotsiró꞉te tsi nióre ne tsiʼtkaronhiá꞉te.

¹² Ieʼtshiró꞉ri tsi ní꞉ioht ne Roiá꞉ner waʼtsisewathà꞉rahse ne tsi tiotè꞉kha, tsi ní꞉ioht tsi waʼtsisewawenhnà꞉ronhke ók iáh ki theʼtsisewá꞉ken ne kwáh tsiknahontahiotón꞉hake.

¹³ Waʼtsisewahró꞉ri tsi ní꞉ioht tsi ó꞉nenk tsi ensewateweiénton ne ateriwaʼseronhniá꞉tshera ne tsi sewasenhén꞉ni—ó꞉nenk tsi ensewatewenhnarà꞉kwe ne oié꞉ri nikaianerenserakes, tsi nónhwe nihohiatónhnion ne tekentstèn꞉rake.

¹⁴ Ne Roiá꞉ner wahakró꞉ri nakwarihón꞉nien akwé꞉kon ne kaianerénseras ne nahisewatewénhnarahkwe ne tionhontsá꞉ien ne ó꞉nenh thó꞉wa iahisewatiaʼtónhti tánon nahisewatié꞉nawatste.

Mahís Washaʼkoronhkáten Tó꞉sa Kahiatónhni Konhwasénhnaien

¹⁵ “Nó꞉nen ne Roiá꞉ner shaʼtsisewathárahse ne tsi ioʼtónkote ne tsi ionónhte ne Sinai, iáh tetsisewá꞉ken ne raónha. Asè꞉ken ní꞉se sewariʼwà꞉ke, káti, orihwihioʼtsón꞉ni

¹⁶ né tó꞉sa sewariwá꞉nerak nahisewatsiaʼtonhniserón꞉ni ne tsiknahioʼthónhake—tó꞉ka rónhkwe tó꞉ka ó꞉ni iónhkwe akénhake,

¹⁷ konhtiʼtsé꞉nen tó꞉ka ó꞉ni otsiʼténhas akénhake,

¹⁸ nonhontsà꞉ke konhtéseres tóka ni ó꞉ni ne kéntsonk.

¹⁹ Nó꞉nen iensatká꞉tho ne tsi karáhkware tó꞉ka ó꞉ni nashonthenhnékha karáhkwa tó꞉ka ni ó꞉ni ne tsi iotsistoʼkwarónhnions, tó꞉sa iesaʼnikonhrotá꞉ko ne tasaʼtshà꞉kete naseshén꞉naien. Asè꞉ken ne Roiá꞉ner saNí꞉io né꞉ne tesakó꞉wi nakoʼrénhson ne tsi ionwenhtsáte nakonhwatiʼshén꞉naien.

²⁰ Ók í꞉se kíʼ ne tsónhkwe ne tsi tsiʼsewaniakénton ne Egypt nónhwe, né꞉tho tehiotonʼkwanònhiani ioté꞉kha. Thatsisewahiaʼtínekenhwe natsiʼtsiónhnien ne raónha rahonkweʼtashón꞉a ahisewá꞉ton, tsi ki nónhwa ní꞉ioht nónhwa wenhniserá꞉te.

²¹ Í꞉se wesewarihón꞉ni ne Roiá꞉ner sewaNí꞉io rakenaʼkwáseʼne tánon kwáh oriwihioʼónwe tsi wahariwahní꞉rate tsi iáh tiaʼtatià꞉iake ne Jordan Kaniataratátie niakatawehià꞉te ne tsiohontsí꞉io tsi niká꞉ien ne tetsisewawì꞉re.

²² Kén꞉en tsi ionhontsá꞉ien nónhwe nenkí꞉heie tánon iáh nonhwénton tiaʼtatià꞉hiake ne kaniataratátie, ók ó꞉nenh ki thóhwa ní꞉se iatahisewahiá꞉iake tánon nahisewatié꞉nawatste ne iohontsí꞉io.

²³ Oriwí꞉io tsónhni tó꞉sa sasewaʼnikónhren nateriwaʼseronhniá꞉tshera ne Roiá꞉ner ró꞉son ne sewariwà꞉ke. Sewatewén꞉narak ne raoriwatà꞉tshera né꞉ne tó꞉sa othé꞉nen akénhake nahisewatatiaʼtonhniserón꞉nien,

²⁴ asè꞉ken ne Roiá꞉ner sewaNí꞉io thóh nihaiaʼtò꞉ten tsi ní꞉ioht ne iotòn꞉kote ne karihwahthontha; iáh teshakoteʼnikonrihióstha ne ronwáhsons.

²⁵ “Iawerohátien tsi ó꞉nen karí꞉wes thóh tsi iohontsá꞉ien sewanakerè꞉kwe tánon wesewawiraientà꞉seron ó꞉ni wesewatereʼsenhá꞉ton, tó꞉sa sewariwánerak tsi ahisewatatiaʼthonhniserón꞉nien ne kwák tsi naioʼthónhake. Kariwáksen kí꞉ken í꞉ken raohénton ne Roiá꞉ner, tánon enhonaʼkonhniá꞉te.

²⁶ Nón꞉wa wenhniserá꞉te kheriwanonhtón꞉nis ne tsi karonhiá꞉te ó꞉ni ne tsi ionhwentsá꞉te nahontenhnikónhraren tsi nisewatié꞉ra, tó꞉ka iáh taskwawenhnarà꞉kwe, kwáh ki iostó꞉re ensewahiaʼtáton ne tsi ionwenhtsà꞉te. Iáh thaiónhnise thahitsónhnheke nonhontsà꞉ke ne tahisewahià꞉iake ne Jordan tsi ó꞉nenh thóhwa iahisewatié꞉nawatste. Kwáh ki thóh kén꞉en tsi ensewahiatà꞉ton.

²⁷ Ne Roiá꞉ner kwáh ki tenhtsisewaréniate tsi nihatinakerénions ne tihononhontsà꞉tes, thóh nónhwe toʼkárat kók nítson iaʼtensewatá꞉tere.

²⁸ Thóh nón꞉we kwáh ienietsisén꞉naien ne nihioʼokónhas né꞉ne ónhkwe akotsána ioshahánion, ne nihioʼokónhas né꞉ne ó꞉iente nahó꞉tens ó꞉ni nonénhias nahoʼténsons, ne nihioʼokónhas né꞉ne iáh tekonhtí꞉kens iáh ó꞉ni teionathónhte, iáh thaʼtekonhská꞉hons iáh ó꞉ni tehiotíswahs.

²⁹ Thóh nón꞉we entsisewahiaʼtí꞉sake ne sewaNí꞉io, tánon tó꞉ka seweriaʼsakwé꞉kon sewatonhneʼtserakwé꞉kon tsi entsisewahiaʼtí꞉sake, entsisewahiataʼtshénri.

³⁰ Nó꞉nen tensewaʼnikónhraren tánon oriwakwé꞉kon tsi nensewahiatawénhseron, ethò꞉ne ki kwáh Roiá꞉ner nokwáh ientsí꞉sewe tánon entsisewawénhnaraʼkwe.

³¹ Kwáh í꞉ken tsi rotaʼnitenrátskon Ní꞉io. Iáh thatsisewatiaʼtontakwáhse iáh ó꞉ni thatsisewanonhwarià꞉kon, iáh ó꞉ni tahoʼnikónhren nateriwaʼseronhniá꞉tshera ne shakosenhèn꞉ni ne sewasoʼtsheraokonhkén꞉en.

³² “Sewariʼrísak tsi nitiawè꞉non, nohénton sehsewanakerà꞉te, thonió꞉re onà꞉ken shá꞉sewet né nó꞉nen ne Rawenni꞉io shasakohiaʼtón꞉ni nonhkweshón꞉as ne tsi ionwentsá꞉te. Kwáh ohontsakwé꞉kon tsi sewariwísak. Nonwenhtónken neknahò꞉tenk né nihiorihowánen nahiawénhon ne tiotierénhton? Nonwenhtónken nónhkak ahiakoriwarónhkenke né nataiotenonhianiʼtónhake tsi ní꞉ioht kí꞉ken?

³³ Ónhkak ken nónhkwe ahiakónhneke nó꞉nen sahonathónhteʼne ne Rawenni꞉io tsi teshakothará꞉ni notsenhó꞉kon, tsi ní꞉se ní꞉ioht?

³⁴ Ónhkak kén ne ní꞉io nonhwénton roteʼniénten niá꞉re tánon iashakoʼnónhke nónhkwe ne thihononhontsá꞉te tánon raónha rahonkwè꞉ta ashakaʼón꞉ni, tsi né nihoié꞉ren ne Roiá꞉ner sewaNí꞉io ne Egypt nón꞉we? Kwáh tesewakaʼnerá꞉kwe tsi wà꞉ratste ne raoshatstenhserowaná꞉tshera ó꞉ni ne kaʼshatsʼténshera; tahá꞉hawe ne kanaratarinétsheras ó꞉ni aterihiósera, tsi wahohiò꞉ten neioriwaneraʼkwaténions ó꞉ni ne ionerákwahs, tánon wahronhniá꞉nion ne kaʼteróntsheras tsi naiawénhseron.

³⁵ Ne Roiá꞉ner tsi sewanathón꞉ni kí꞉ken, natsisewariwaní꞉raʼtse tsi raonhatsíwak ne Ní꞉io í꞉ken tánon kwáh iáh ónhka nakò꞉ren akénhake.

³⁶ Wahtsisewaríhon naʼtsisewawenhnáronhke tsi karonhiá꞉ke nonhtá꞉we ne ká꞉ti natsisewarihón꞉nien; tánon kén꞉en ohontsà꞉ke waʼtsisewarí꞉hon nahisewatká꞉tho ne iotokénhti raotónhkwa, tánon thóh nón꞉we nonhtá꞉we tsi watsisewatháhraʼse.

³⁷ Tiorí꞉wa tsi shakonorónhkwa ne ietsisothonkonʼkén꞉en, í꞉se waʼtsisewahiataráko, tánon rahónʼa raoshaststenserowanáhtshera waʼrátste tsi tontatsisewahiaʼtí꞉nekenhwe ne Egypt.

³⁸ Tsi niahí꞉sewe, thontashakohiaʼtí꞉nekenhwe ne kentiohkowá꞉nens tsi ronanitiohkonhniá꞉nions tánon sénha ratiʼshátsʼtes tsi ní꞉ioht ní꞉se, ne ká꞉ti naónton iaʼtsisewahiaʼtiniónhte tánon nahontahtshítson ne raononhontsaʼshón꞉as, ne nohóntsa shé꞉kon í꞉se sewákwenk.

³⁹ Ká꞉ti sewehiárak nón꞉wa wenhniserá꞉te tánon tó꞉sa nonhwénton sasewaʼnikónhren: Ne Roiá꞉ner tsi Rawenni꞉io ne karonhià꞉ke ó꞉ni nonhwenhtsà꞉ke. Iáh nó꞉iah teká꞉ien ne ní꞉io.

⁴⁰ Sewatewén꞉narak akwé꞉kon ne raoianerénseras tsi nonhtà꞉tion nón꞉wa wenhniserá꞉te, tánon akwé꞉kon tshienioiánerenhne ne sewarihwà꞉ke ó꞉ni tsi nenhsewatwaʼtsí꞉rine. Iensewakonhtà꞉kwe tsi thóh ensewanákereke ne tsi ionhontsá꞉ien ne Roiá꞉ner sewaNí꞉io tsisewawì꞉re nahisewawenkónhweke tsi nénhwe.”

Ne Tsi Kanatowá꞉nens Ne Ionhtasehtá꞉kwa Nà꞉kon Nokwá꞉ti Ne Jordan

⁴¹ Ethò꞉ne ne Mahís áhsen nikaná꞉takes wahará꞉ko né꞉ne nà꞉kon nokwá꞉ti ne Jordan kaniataratátie

⁴² thóh nón꞉we naónton ne ónhkwe iahionteʼkwásen tánon kwáh skennenʼkó꞉wak thakénhake tó꞉ka iáh tehoʼnikonhrón꞉ni ónhkak washakononhwarià꞉kon né꞉ne iáh thaʼtehiatà꞉tsons. Aónton ne kák niká꞉ien ne kí꞉ken áhsen nikaná꞉take nón꞉we iahateʼkwásen tánon iáh tahonwanonhwarià꞉kon.

⁴³ Nétsi ratiʼtá꞉raien ne Reuben thóh né kaná꞉takon ne Bezer, né꞉ne iahonwentsathèn꞉ke tiotonhontsá꞉tes nónhwe; ne tsi ratiʼtá꞉raien ne Gad thóh ne nón꞉we Ramoth, né꞉ne tsi kanakeraserá꞉ien ne Gilead; tánon ne tsi ratiʼtá꞉raien ne Manasseh thóh ne nón꞉we Golan, ne tsi kanakeraserá꞉ien ne Bashan.

Mahís Tahatásawen Wahathá꞉raʼkwe Ne Rawenni꞉io Raoianerénseras

⁴⁴ Mahís tasaká꞉wen ne Rawenni꞉io raoʼianerénseras ó꞉ni ne karihonnienhní꞉tsheras ne Israerʼró꞉nons.

^45-46 Ne nó꞉nen satethotihiaʼkén꞉en ne Egypt tánon thóh nón꞉we nihón꞉neskwe nà꞉kon nokwá꞉ti nahonráhkwakon ne Jordan Kaniataratátie, tehiotiná꞉ta ne Bethpeor, ne tashaká꞉wen kí꞉ken kaianerénseras. Thóh ki nón꞉we ne kanakeraserá꞉ien né꞉ne ronhnonhtí꞉io Sihon rahowenhkén꞉en né꞉ne Amorʼró꞉nons nahaiaʼtó꞉ten, raónha rakó꞉raʼkwe ne tsi kaná꞉taien ne Heshbon. Mahís tánon Israerʼró꞉nons ronhwasénhnion sathontahatihiaʼkén꞉en ne Egypt.

⁴⁷ Wahontié꞉nawatsʼte ne raonhóntsa tánon ne raonhóntsa ne ronhnonhtí꞉io Og ne Bashan nón꞉we, ne nó꞉ia Amorʼró꞉nons ronhnonhtí꞉io ne nón꞉we nihanákerekwe nà꞉kon nokwá꞉ti ne Jordan.

⁴⁸ Kí꞉ken ohóntsa iéhio tsi nió꞉re ne tsit kaná꞉taien ne Aroer, ne tsi iéhio ne Arnon kaniataratátie, kwáh tsi nió꞉re ne othorè꞉ke tsi tionón꞉te ne Sirion, né꞉tho né꞉ne, tsi ionón꞉te ne Hermon.

⁴⁹ Káti ó꞉ni thóh í꞉kare kanakeraserakwé꞉kon ne nà꞉kon nokwá꞉ti ne Jordan Kaniataratátie kwáh tsi nió꞉re ne entiè꞉ne nokwá꞉ti né꞉ne Dead Sea tánon ne nà꞉kon nokwá꞉ti tsi iaʼtewashì꞉taien ne ionhnónte Pisgah.