Deuteronomy 34 - Ohiatonhseratokénti

Tsi Warenhé꞉ie Ne Mahís

¹ Mahís tsi kahentakwénhrare Moab nón꞉we tahahtén꞉ti tánon tsi tionón꞉te ne Nebo niahá꞉re, tánon iahanonhtárahne ne ononhthakéniathe ne Pisgah né꞉ne nà꞉kon nokwá꞉ti ne Jericho, tánon thóh nón꞉we ne Roiá꞉ner wahonaʼtónhase nohontsakwé꞉kon: né꞉ne tsi kanakerahserá꞉ien ne Gilead tsi nió꞉re ne othorè꞉ke nokwá꞉ti ne tsi kaná꞉taien ne Dan;

² kanakerahserakwé꞉kon ne Naphtali; tsi kanakerahserá꞉ien ne Ephraim ó꞉ni ne Manasseh; tsi kanakerahserá꞉ien ne Judah tsi nió꞉re ne tsi iaʼtewatshénthos ne Mediterranean kaniatarakeʼkó꞉wa;

³ nenhtiené꞉sons nokwá꞉ti ne Judah; ó꞉ni ne tsi kahenthakwénhrare ne iéwas tsi nió꞉re ne Zoar ó꞉ni ne Jericho, né꞉ne tsi kanatowanèn꞉ke ne ioneratésons ioteronhthón꞉ni.

⁴ Ethò꞉ne ne Roiá꞉ner wahawénhase ne Mahís, “Ne kí꞉ken ne iohontsá꞉ien ne khehiararatstén꞉ni ne Abraham ó꞉ni ne Isaac, tánon ne Jacob tsi enthekhéion tsi nienhontwatsí꞉rine. Wakonhríhon nasatkátho, ók iáh ki thakonhrí꞉hon ne thóh nón꞉we iáse.”

⁵ Sók ki ne Mahís, ne Roiá꞉ner rahoná꞉tshera, warenhé꞉ie tsi wathonwenhtsá꞉ien ne Moab, kwáh ki tsi niháwenh ne Roiá꞉ner tsi thóh nenhoiatháwen.

⁶ Ne Roiá꞉ner wahohiatháta ahonráhkwakon ne Moab, né꞉ne tehiotinátha ne Bethpeor, ók tsi nió꞉re nón꞉wa wenhniserá꞉te iáh ónhka tehiakoterièn꞉tare kwáh tsi nón꞉we nahahiathátake.

⁷ Ne Mahís enskatewenhniáwe tánon tewáhsen shatehahoserihià꞉kon sharenhé꞉ie; kwáh shé꞉kon thóh nihashátsteʼkwe ne tsi nitsiotónhne, tánon shé꞉kon sihakarí꞉io.

⁸ Nonhkweshón꞉as NʼIsraerʼró꞉nonske wahonwatsiónhnionhs né꞉ne áhsen niwáhsen niwenhniserá꞉ke nikarì꞉wes ne tsi iohontsakwénhrare ne Moab.

⁹ Joshua né꞉ne Nun roiénha kwáh rahiathanáhnon ne aʼthokhátshera, tiorì꞉wa ne Mahís raónha rohiatharákwenh ne tahonsahonaʼthákwen. Nonhkweshón꞉as nʼIsraerʼronónke wahonwawénhnaraʼkwe ne Joshua tánon wahonteweiénte ne karihwatà꞉tshera ne Roiá꞉ner theshakó꞉wi rahonhà꞉ke ne Mahís.

¹⁰ Kwáh iáh nonhwénton ne ónhka akénhake ne rotokénhse thóh nahahiatoténhake tsi ní꞉ioht ne Mahís; ne Roiá꞉ner tenhitháren kwáh tehiatatkonhsakánere.

¹¹ Iáh ónhka ne rotokénhse nonhwénton thé꞉nen nahoié꞉renhke ne iorihwanerákwat ó꞉ni ne ionerákwat né꞉tho tsi ní꞉ioht ne Roiá꞉ner tsi iehotheniénton ne Mahís tsi naháiere tsi nokwáh ne ronhnonhtí꞉io ne Egypt, ó꞉ni ne rahonkweʼtashón꞉as, tánon ne kanakerahserakwé꞉kon.

¹² Iáh ónhka ne rotokénhse nonhwénton tehokwénion ne iorihowá꞉nen tsi nahá꞉iere ó꞉ni ne ioteronhthénions né꞉tho tsi nihoié꞉ren ne Mahís rahotihéntons ne Israerʼró꞉nons.