Deuteronomy 30 - Ohiatonhseratokénti

Katokenstá꞉nion Tsi Ahonshakasheronhní꞉hake Ne ó꞉ni Ne Kaiataterí꞉tsheras

¹ “Ó꞉nen takwá꞉ion nahisewataterakwáhse kak niká꞉ien kaiataterí꞉tshera khés ne karewatà꞉tshera. Nó꞉nen kí꞉ken orihwakwé꞉kon thóh nenhsewahiatákwen, tánon skátke sewanákeres nonhkweshón꞉as tsi nón꞉we ne Roiá꞉ner sewaNí꞉io iathetsisewareniáton, ensewehiá꞉rake tsi nitkwá꞉wi nahisewathaterakwén꞉ni.

² Tó꞉ka ní꞉se tánon tsi niensewatwatsí꞉rine tenhtsisewatkahraté꞉ni tánon Roiá꞉ner nòkwah nientsísewe tánon kwáh seweriasakwé꞉kon tsi ensewatewénhnaraʼkwe ne rahoriwatà꞉tsheras ne tkwá꞉wis nón꞉wa wenhniserá꞉te,

³ ethò꞉ne ne Roiá꞉ner sewaNí꞉io kwáh entsisewéntenhre. Thentetsisewahiaʼténhawe ne tsi tienakeré꞉nion nonhkweshón꞉a tsi nón꞉we niatetsisewareniáton, tánon kwáh shé꞉kon ensehtsisewakwahtsésten.

⁴ Iekaní꞉hare tó꞉ka thóh nón꞉we iatetsisewareniáton ne kwáh í꞉non ítken ne tsi iatekahiosáien ne tsi ionhwentsáte, ne Roiá꞉ner SewaNí꞉io enhsehtsisewahiaʼtaró꞉roke ne tahonthatsisewahiaʼténhawe.

⁵ Ne káti nahónton shé꞉kon thóh nón꞉we nahonseʼsewatié꞉nawatste ne tsi ionhwentsáte ne ietsisoʼthonkonhkén꞉en ratinákereʼkwe. Tánon kwáh sénha í꞉se entsisewakwatsésten tánon sénha ensewenhtiohkowanénhke tsi ní꞉ioht thónhne ne ietsisoʼthonkonhkén꞉en.

⁶ Ók ki ne Roiá꞉ner SewaNí꞉io kwáh enhakwahtháko ne seweriánes ní꞉se ó꞉ni tsi niensewatwatsí꞉rine natsisewawenhnaráhkwake, ne káti ne kwáh seweriasakwé꞉kon tsi atsisewanorónhkwake ó꞉ni sewatonhnetserakwé꞉kon, ne káti ne iahisewakón꞉taʼkwe ne tho nón꞉we nihiohontsá꞉ien ahisewanákereʼke.

⁷ Kwáh ki akwé꞉kon tenshakaraté꞉ni kí꞉ken karewatà꞉tsheras né꞉ne tesewatà꞉tsons nòkwah nienhá꞉hawe, tsi niká꞉ien ne ietsísonskwe ó꞉ni ietsironhiakéntakwe,

⁸ tánon káti shé꞉kon ensetsisewawénhnaraʼkwe ó꞉ni ensewateweiénton akwé꞉kon ne rahoriwatà꞉tsheras ne tkwawí꞉hons nón꞉wa wenhniserá꞉te.

⁹ Ne Roiá꞉ner kwáh orihwakwé꞉kon tsi enhahianerásthe tsi nenshahiò꞉ten; kwáh wé꞉so ensawiraiéntake ó꞉ni wé꞉so ensanaskwaiéntake, tánon ne sahethashón꞉as kwáh í꞉ken tsi iawetowá꞉nen enshientwáko. Kwáh thóh nenhatsenhnón:ni tsi enhiakwasésten tsi ki nishakokwasestén꞉ni ne ietsisoʼthonkonhkén꞉en,

¹⁰ ók ó꞉nenk ki tsi entsisewawénhnaraʼkwe ó꞉ni ensewateweiénton ne rahorihwatà꞉tsheras ne kén꞉en kahiatónhnion ki kahiatonhserá꞉kon ne rahorihonnienhní꞉tsheras. Ó꞉nenk tsi rahonhà꞉ke nienhtsí꞉sewe kwáh seweriashakwé꞉kon kénhak.

¹¹ “Ne kariwatà꞉tshera ne tkwá꞉wis nón꞉wa wenhniserá꞉te iáh sóhtsi tewateriwenhtó꞉res iáh ó꞉ni ahí꞉non nió꞉re tetkáien.

¹² Iáh tsi karonhià꞉te nón꞉we tseká꞉ien. Iáh thatehiothonhontsó꞉hon nashisewariwanónhton, ‘Ónhka iaierà꞉then karonhià꞉te tánon nahontahionkhihiaksnenthákwahse, ne káti nahónton nahiakwatahonshatáte tánon nahontahiakwéthakwe?’

¹³ Iáh ó꞉ni í꞉se nakaniatará꞉ti ne kaniatarakeʼkó꞉wa tsekáien. Iáh thatehiotonhontsó꞉hon nahisewariwanón꞉ton, ‘Ónhka iathaiehniatarihiáke naiekóha nonhkwariwá꞉ke, ne káti nahónton nahionkwathón꞉teʼne tánon nahiakwatewénhnaraʼkwe?’

¹⁴ Iáh, nowén꞉na kwáh í꞉ken tsi tsaʼták꞉ta ká꞉ien, tsá꞉kon í꞉wa tánon seriáhsakon káti ó꞉nen sewariwanó꞉ronk.

¹⁵ “Ón꞉wa wenhniserá꞉te tkwá꞉wis nahisewathaterákwase kak niká꞉ien né꞉ne ioiánere khés ne kariwahétken, kak ki káien né꞉ne iónhne khés ne kenhéion.

¹⁶ Tó꞉ka ensewatewénhnaraʼkwe ne rahoriwatà꞉tshera ne Roiá꞉ner sewaNí꞉io, tsi niká꞉ien ne tkwá꞉wis nón꞉wa wenhniserá꞉te, Tó꞉ka tsi sewanorónhkwa, tsi sewawénhnarak ki, tánon orihwakwé꞉kon sewateweiénton ne raoianerénhseras, ethò꞉ne káti ensewahianerásten tánon ne ensewá꞉ton nonhkweshón꞉as ne ronatiohkowá꞉nen. Ne Roiá꞉ner SewaNí꞉io kwáh entsisewahiaʼtaté꞉riste ne tsi ionhwenhtsá꞉ien né꞉tho ó꞉nen thó꞉wa iahisewatié꞉nawatste.

¹⁷ Ók tó꞉ka iáh tahisewatewénhnaraʼkwe tánon iáh thahisewaʼthóntate nahisewatahónshatate, tánon enietsihiaʼténhawe nahisewashén꞉naien nó꞉ia nihioʼokón꞉as,

¹⁸ kwáh ki enieʼtsihiathón꞉te—wakwahronkáten ne kén꞉en tánon nón꞉wa. Iáh thahitionhnhésonke ne tsi tiohontsá꞉ien ní꞉se nowáhti ne Jordan né꞉tho ó꞉nen thó꞉wa iahisewatiaʼtakwehní꞉ioste.

¹⁹ Ó꞉nen tkwá:wis nahisewatateráhkwase kak niká꞉ien atónnhets khés ne kenhé꞉ion, tsi naʼtetiátere ne Rawenni꞉io rahohiaʼtaterí꞉tshera tánon ne rahorewahtátshera, tánon iakhenáhton ne tsi karonhià꞉te ó꞉ni ne tsi ionwenhtsáte nah kenirihwahní꞉rate tsi nenshahtatheráhkwase. Atónnhets shahtatheráhkwas.

²⁰ Tsi sewanorónhkwak ne Roiá꞉ner sewaNí꞉io, tsi sewawénhnarak tánon sewariwatokénhak ne rahonhà꞉ke, tánon ethò꞉ne ní꞉se tánon tsi niensatwatsí꞉rine kwáh entionhnhésonhke ne tsi tiohontsá꞉ien né꞉tho tsi sewarahratstén꞉ni nahontashaká꞉wen ne ietsisoʼthonkonhkén꞉en, Abraham, Isaac, tánon ne Jacob.”