Deuteronomy 3 - Ohiatonhseratokénti

Ne Israerʼró꞉nons Wahonwasén꞉ni Ne Ronhnonhtí꞉io Og

¹ “Ethò꞉ne, othorè꞉ke nionsaiákwe né꞉ne tsi watonwénhtsaʼien ne Bashan, tánon ne ronhnonhtí꞉io Og tashakohiaʼténhawe ratikwé꞉kon ne rahonkweʼtashón꞉as nahiakwaterí꞉io ákta ne tsi kanatowanèn꞉ke ne Edrei.

² Ók ne Roiá꞉ner wahakénhase, ‘Tó꞉sa tsetshànik. Asè꞉ken ó꞉nen thihiá꞉wi ó꞉ni ratikwé꞉kon ne rahonkweʼtashón꞉as ó꞉ni ne rahononhóntsa ní꞉se satsanà꞉ke; tánon ó꞉nenk tsi entsenonhwarià꞉kon tsi ki niʼtierà꞉se ne Sihon sakononhtí꞉io ne Amorʼró꞉nons, ne raónha Heshbon nónhwe nihanákere.’

³ “Káti ne Roiá꞉ner ne ronhnonhtí꞉io Og ó꞉ni ne rahonkweʼtashón꞉as onhkwashatstenserá꞉kon nónhwe nashakótkaʼwe, tánon ratikwé꞉kon wahakhihiawénhtho.

⁴ Tánon iahakwakonhtà꞉kwe wahakwaienásehron akwé꞉kons ne raonataʼshón꞉as—iáh nénska ne iáh tshiaionkwáhake. Noriwakwé꞉kon wahakwaié꞉na iá꞉iak niwáhsen nikaná꞉takes—kwáh tsi niwatenáskwa ne Argob, né꞉ne tsi nónhwe ne ronhnonhtí꞉io Og nihotkoráston.

⁵ Akwé꞉kon kí꞉kens kanatowá꞉nens ne tekanatanáktons ne tiotonshontaté꞉nions, iotenhenrentónnion, tánon tekenrenʼwánions nakanienʼtá꞉roke tsi iotenhenrenʼtón꞉nions, tánon wé꞉so ne tsi kanataiéntons iáh othé꞉nen tewatenhenró꞉tons.

⁶ Akwé꞉kon wahakwariwenʼtósehron ne tsi kanatowá꞉nens tánon wahakhinonwariaʼkhón꞉nion ne ronhnónhkwe, konhnónhkwe, ó꞉ni ne ratikshaʼokónhas, kwáh ki tsi nihionkwaié꞉ren ne tsi kanatowá꞉nens ne ronhnonhtí꞉io Sihon raonataʼshón꞉as né꞉ne Heshbon nón꞉we.

⁷ Iahakihiatenhásehron ne kontiʼtshénens tánon wahakwanenskwehá꞉ton ne tsi kanatowá꞉nens.

⁸ “Tánon iahakwakónhtaʼkwe wahakhí꞉kwa thí꞉ken teʼnihiá꞉se Amorʼró꞉nons rontinonhtí꞉io nonhóntsa né꞉ne tsitkaraʼkwínekens nokwáhti iotohetstá꞉kwen ne Jordan Kaniataratátie, né꞉ne Arnon kaniataratátie tsiotáshawe tsi nió꞉re ne tsi tionónhte ne Hermon.

⁹ Ne tsi Ionónhte ne Hermon ne Sidonró꞉nons nahatihiaʼtó꞉ten Sirion konhwanaʼtónkwa, ók ne Amorʼró꞉nons Senir ne konwanaʼtónkwa.)

¹⁰ Akwé꞉kon niashakwá꞉kwa ne kanakerásheras ne ronhnonhtí꞉io Og ne Bashan nón꞉we: ne kanatakè꞉rons ne tsi tiotonhontsatón꞉nions nón꞉we, ne tsi iokwèn꞉rares ne Gilead ó꞉ni ne Bashan, kwáh tsi nió꞉re ne tsitkaraʼkwínekens nokwá꞉ti iotiéhton ne Salecah ó꞉ni ne Edrei.”

¹¹ (Ne Ronhnonhtí꞉io Og raónha nonaʼkènkha iaʼtehotaténron tsi tahatiwatsiraʼtátie ne Rephaim. Ne raorónhto, onén꞉ia nahó꞉ten ionhnià꞉ton, iá꞉iak niwashì꞉take naʼtewataká꞉ron tánon kaié꞉ri iawénhre niwashì꞉take ní꞉ions, tioianénha tsi nikatokénston natenienʼténtsheras. Shé꞉kon enwá꞉ton naiontká꞉tho ne tsitkaná꞉taien ne Ammonró꞉non né꞉ne Rabbah nón꞉we.)

Nohóntsa Tekahià꞉kon Ne Ná꞉kon Nokwá꞉ti Iotohetstákwen Ne Jordan Kaniataratátie

¹² “Nó꞉nen sahakwaʼtié꞉nawatste nonhóntsa, né꞉ne Reuben tánon ne Gad nahotiʼtaró꞉tens takhé꞉ion né꞉ne kanakerá꞉sehra nothorè꞉ke nokwá꞉ti tsi kaná꞉taien ne Aroer ákta ne Arnon Kaniataratátie tánon iowénhte ne tsi ionónhte ne Gilead, tshiewakwé꞉kon ne kanataʼsónhas.

¹³ Ashénhnon tsi nihotitiókwa ne Manasseh taʼkhéhion ne ken iotiè꞉ton ne Gilead, tánon ó꞉ni ne Bashan, thóh nón꞉we ne Og nihakó꞉raʼkwe, né꞉ne ieiokwékʼton ne Argob iokwèn꞉rahre.”

¹⁴ Ne Jair, né꞉ne Manasseh nahoʼtaró꞉ten, kwáh ohontsakwé꞉kon wahatié꞉nawatste ne Argob, né꞉ne, Bashan nónhwe, kwáh tsi nió꞉re tsit karistatátie ne Geshur ó꞉ni ne Maacah. Ne tsi nihosenhnò꞉ten né wahanà꞉tonkwe ne tsi kanataién꞉tons, tánon shé꞉kon ne konwatisenhnaienté꞉ris tsi kanataién꞉tons ne Jair.)

¹⁵ “Ne Gilead né꞉ne taʼkhé꞉ion ne Machir nahotiʼtaró꞉tens né꞉ne Manasseh rahotitioʼkò꞉tens.

¹⁶ Tánon ne rahothiʼtiókwakons ne Reuben ó꞉ni ne Gad né꞉ne taʼkhé꞉ion ne tsi kanakeraʼsehrá꞉ien ne Gilead tsi nió꞉re ne Arnon tkaniataratátie. Ne kwáh satekaniaʼtarí꞉hen thóh nónhwe ne entiè꞉ne nokwá꞉ti iotiè꞉ton nihonateristatátie, tánon nothorè꞉ke nokwá꞉ti iotiè꞉ton ronateristatátie né꞉ne Jabbok Kaniataratátie, thóh íhkare ne tsikaristatátie ne Ammonró꞉non karistatátie.

¹⁷ Ne tsi iaʼtewatsénthos nokwá꞉ti iotohetsʼtákwen ne rahotinakerásehra ié꞉was ne Jordan Kaniataratátie, Tsi Kaniá꞉taro ne Galilee tiotá꞉shawen tsi nió꞉re ne othorè꞉ke nió꞉re niehiawé꞉non né꞉ne Dead Sea nentiè꞉ne nokwá꞉ti iotohetstákwen tánon ne tsi iaʼtewashì꞉taien ne tsi Ionónhte ne Pisgah né꞉ne nà꞉konh nokwá꞉ti iotohetstákwen.

¹⁸ “Tánon óksak, Wakheró꞉ri ne ronhnónkwes ne Reubenʼró꞉nonhs, Gadró꞉nonhs, tánon ne shaʼtehotitiohkwí꞉hen ne Manasseh: ‘Ne Roiá꞉ner ónhkwa Ní꞉io thaʼtsisewáwi kí꞉ken ohóntsa ne nà꞉kon nokwá꞉ti iotohetstákwen ne Jordan nahisewatié꞉nawatste. O꞉nen taieʼtsí꞉ion ne ionterihiostákwas ne tionkweʼtashón꞉as ronhterí꞉ios tánon iaihtsihiaté꞉niet tehatihiáiak ne Jordan ohén꞉ton ne otià꞉kes kentió꞉kwas ne Israerʼró꞉nons, naieʼtsisnié꞉non nahontié꞉nawatste nohóntsa.

¹⁹ Ne kók ne sewaniákonhs, ratiksahokónhas, ó꞉ni ne sewatshenenhó꞉kons—Wakaterièn꞉tare tsi wé꞉so sewanaskwahiéntons ne konhtiʼtshé꞉nens ken né꞉he enkonhnè꞉seke ne kanatá꞉kons ne tkawíhon.

²⁰ Ieʼtsisnié꞉non ne otià꞉kes NʼIsraerʼró꞉nonhs tsi nió꞉re ienhontié꞉nawatsʼte nohontsaʼshón꞉a ne Roiá꞉ner enteshakowí꞉hon né꞉ne tsi iaʼtewatshénthos nokwá꞉ti iotohetsʼtákwen ne Jordan tánon ne tsi nió꞉re ne Roiá꞉ner enshakorí꞉hon ne skén꞉non tsi ahatiʼterón꞉take, tsi ó꞉nen thóh ne nihoié꞉ren ne kén nónhwe ne sewariwà꞉ke. Ken ienwatásawen, enwá꞉ton ne kén꞉en tsi iohontsá꞉ien natahonʼté꞉sehwe né꞉tho ohóntsa tkwá꞉wi.’

²¹ “Ethò꞉ne wahiró꞉ri ne Joshua: ‘Akwé꞉kon satká꞉ton ne Roiá꞉ner tsi nisakohierà꞉se ne thí꞉ken teʼnihiá꞉se ronhtinonhtí꞉ios, Sihon tánon ne Og; kwáh tsonhkwetátion tsi thóh nenhsakoierà꞉se ne ieienʼtsinenhrénhten ne rahononhontsà꞉ke.

²² Tó꞉sa ietsitshanísek, asè꞉ken ne Roiá꞉ner sewaNí꞉io raónha entsisewaterí꞉iose.’

Ne Roiá꞉ner Iáh Tehoriwá꞉wi Ne Mahís Iahataweià꞉te Ne Wahrarátston Ohóntsa

²³ “Kwáh thóh nikahá꞉wi kwáh í꞉ken tsi takenikonhrakonhtà꞉kwe waʼkaterén꞉naien,

²⁴ ‘O Saiá꞉ner Ní꞉io, wakaterièn꞉tare tsi niskenaʼtón꞉ni né꞉ne tiotasawáhkwen ne iorihowá꞉nen ó꞉ni ioriwanerakwaʼténions tsi nensheráhnion. Iáh nó꞉ia tekanioserá꞉ien ne karonhià꞉ke tó꞉ka ó꞉ni nonhwentsà꞉ke nahakwé꞉ni tonahá꞉iere ne tehiotenonhianiʼté꞉nions tsi ní꞉se nishé꞉ra!

²⁵ Takerí꞉hon ne Takeniaʼtarí꞉hiake ne Jordan, Saiá꞉ner, tánon nakatká꞉tho ne iohontsí꞉io ní꞉se nakaniatará꞉ti, ne watkaʼtotsherí꞉ios iononhtaʼrón꞉nion ó꞉ni ne Lebanon Iononhtaʼrón꞉nions.’

²⁶ “Ók í꞉se ki tsónhkwe wesewarihón꞉ni ne Roiá꞉ner wahakenáʼkwahse tánon iáh tehakatahonsatá꞉ton. Khé꞉kók, wahèn꞉ron, ‘Thóh iaʼtekaié꞉ri! Tó꞉sa shé꞉kon sasthá꞉rak!

²⁷ Kwáh ononhtakèn꞉iate ne Pisgah niahá꞉se tánon othorè꞉ke nòkwah iasatkátho tánon nentiè꞉ne nokwáhti, nà꞉kon nokwáhti ó꞉ni ne tsi iaʼtewatshénthos nokwáhti. Kwáh ákta tsi satenhnikónhraren nahó꞉ten ensatkátho, asè꞉ken iáh nonhwén꞉ton tsiatashíá꞉hiake ne Jordan.

²⁸ Tserihónten ne Joshua. Seshatsʼtén꞉seron ne rahohiatoreʼtátshera, asè꞉ken enshakohéntenhse nonhkweshón꞉ʼa niatahatihiá꞉iake niahontié꞉nawatste nonhóntsa ne satkáthos.’

²⁹ “Káti thóh iakwenterónhtaʼkwe nahonráhkwakon ne teiotiʼná꞉ta ne Bethpeor.”