Deuteronomy 26 - Ohiatonhseratokénti

Ne Kaienʼthótshera Iahióntkaʼwe

¹ “Ne nó꞉nen ensewatienawastónhake ne ohóntsa né꞉tho Roiá꞉ner sewaNí꞉io entetsí꞉tion tánon thóh nón꞉we nensewanákereʼke,

² tsi sewahiatà꞉tions ó꞉nenk tsi athé꞉rakon ensewátha nentewatié꞉renhte ensewaienkwáko tánon tsi tionhterenhnaientákhwa niaʼsewáhaf.

³ Thóh niahasewe né꞉ne ratsihénstatsi ne roterihónte ne nenhkahá꞉wi tánon tsi sewahró꞉ri, ‘Ó꞉nen wahiriwaniratʼtse ne Roiá꞉ner Akení꞉io tsi ó꞉nen wahakwahtáwehiaʼte ne tsi ionhontsá꞉ien ne iakisoʼthonkonhkén꞉en shakorahratstén꞉ni henteshón꞉tion.’

⁴ “Ne rokhá꞉res enhiákwa ne á꞉there tánon ohénton ne tsiratienharáhkwa ne Roiá꞉ner saNí꞉io enháien.

⁵ Ethò꞉ne, rahohénton ne Roiá꞉ner ensheshirón꞉nion kí꞉ken owenhnaʼsón꞉as: ‘Ne ratsotkénʼen ronatenháwiskwe Aramró꞉non, ne rahowá꞉tsire Egypt nieshakohiaʼténha thóh nón꞉we ieshatinákereʼkwe. Iáh teshonatioʼkowanénhne ne nón꞉we shahón꞉ne, ók sahonatiohkowá꞉nen tánon sahatishatstenhserowá꞉nah.

⁶ Ne Egyptró꞉nons wahonkhihiaʼteniakatstá꞉tie tánon wahonkhihioténsthe tsi ní꞉ioht ne ratináskwas.

⁷ Ethò꞉ne ki iatsionhkwahénreʼte rahonhà꞉ke ne Roiá꞉ner, ne Sakoní꞉io ne iakhisoʼthonkonhkén꞉en. Washonkwathónhtene tánon wahatkátho nonkwaronhiakénhsera, ioronhiákenk, ó꞉ni tehioʼnikónhriat.

⁸ Ne tsi nihoshatstenhserowá꞉nen ó꞉ni kaʼshátste shashonkwaniá꞉kenhte ne Egypt nón꞉we. Ioriwanerakwahté꞉nions tsi nahaieránion ó꞉ni ioriwanerákwat, tánon waharihonhniá꞉nion ne ioteriwaʼtérons tsi nahiawénhseron.

⁹ Kén꞉en nonhthashonkwahiaʼténhawe tánon thashón꞉tion kí꞉ken iókwats ó꞉ni iohontsí꞉ios.

¹⁰ Káti nón꞉wa tahihawí꞉ten ne Roiá꞉ner ne thontié꞉renhte kaientwákwen ne thaká꞉wi.’ “Ethò꞉ne ó꞉nen eʼtà꞉ke wátsien ná꞉there rahohénton ne Roiá꞉ner tánon thóh nón꞉we nakaterén꞉naien.

¹¹ Teshatenonhwerathónset tsi nihioiáneres né꞉tho Roiá꞉ner saNí꞉io thiawíhon ó꞉ni ne shawá꞉tsires; tánon ieʼtsiríhon ne Levites ó꞉ni ne thihononhontsá꞉tes ne skátke sewanákeres naietsihiatiaʼtháhrase tsi ensewateʼnikonhró꞉ri.

¹² “Tió꞉konte nashén꞉haton nihiohserakehá꞉ton tashé꞉ion—noieríhaton iéken ne saienʼthótsheras—né꞉ne Levites, ne thihononhontsá꞉tes, ó꞉ni ne ionateréhons, ne káti nahónton ne kwáh tsi niateienekeraserá꞉kes nahiakoiéntake nahó꞉ten ahón꞉neke.

¹³ Tsró꞉ri ne Roiá꞉ner, ‘Iáh othé꞉nen ne iotokénhtis noieríhatons iéken tetsiothaténrons nakenónskon, tekhehiawí꞉hons ne Levites, ne tihononhontsá꞉tes, ne tehontonnakhárias, ó꞉ni ne ionateréhons, tsi ki nisetró꞉ri tsi nátiere. Iáh tekonwenhnónhtion iáh ó꞉ni othé꞉nen tesewakeʼnikonhrén꞉en tsi ní꞉kon takerihónte tsi nokwáh ne oieriháton iéken tsi ahontátiesthe.

¹⁴ Iáh thahó꞉ten tewakékon ne siwakaʼtión꞉nion; iáh thahó꞉ten tewatsiakén꞉en nakenónhskon nó꞉nen ne kwáh í꞉ken sahtewatiathátion; tánon iáh ó꞉ni thé꞉nen tethewatiéston tsi nokwáh ne iakawenhé꞉ion aoriwá꞉ke. Konhwenhnarákwen, O Saiá꞉ner; kwáh akwé꞉kon é꞉tho niwatiéren tsi nisetró꞉ri tsi nokwáh ne ahontaiéiesthe noieríhaton iéken.

¹⁵ Tasatkátho tsi nón꞉we teshì꞉teron ne iotenathatokénhti ne karonhiá꞉ke tánon sehiathatérist ne shonkweʼtashón꞉as Israerʼró꞉nons; tiathatérists nónhne ne iohontsarésen ó꞉ni iohonhtsí꞉io né꞉tho teskwá꞉wi, tsi nisehiararatstén꞉ni ne iakisoʼthonkonhkén꞉en.’

Ne꞉ne Kwáh Roiá꞉ner Rahonkweʼtashón꞉a

¹⁶ “Nón꞉wa wenhniserá꞉te ne Roiá꞉ner sewaNí꞉io tsi sewahró꞉ris nahisewatewénhnaraʼkwe akwé꞉kons ne raohianerénhseras; káti sewatewénhnarak tewethakwenhtsérakon kwáh seweriasakwé꞉kon kénhak.

¹⁷ Ón꞉wa wenhniserá꞉te wesewarihwaní꞉rate tsi Roiá꞉ner sewaNí꞉io í꞉ken; wesewarahrátste tsi entsisewawénhnaraʼkwe, nahisewatié꞉nawatste akwé꞉kon ne raohianerénhseras, tánon akwé꞉kon thóh nenhsewáhiere tsi nenhtsisewahró꞉ri.

¹⁸ Ón꞉wa wenhniserá꞉te ne Roiá꞉ner watsisewaié꞉na tsi kwáh raónha rahonkweʼtashón꞉as í꞉ken, kwáh ki tsi nitsisewarahratstén꞉ni; tánon tsi sewahró꞉ris akwé꞉kon sewatewénhnarak ne raohianerénhseras.

¹⁹ Ne Roiá꞉ner kwáh onhkweʼtakwé꞉kon raónha shakohiatí꞉son, ók ki kwáh í꞉se entsisewakowaná꞉the ne tsi nihá꞉ti, tánon ensewahawá꞉ke ne kanonhwerathóntsheras ó꞉ni ne kakwenienstátsheras ne raoshén꞉nakon. Kwáh í꞉se rahonkweʼtashón꞉a enkénhake, tsi ki nihorahrátston.”