Deuteronomy 25 - Ohiatonhseratokénti

¹ “Tó꞉ka shí꞉ken teʼnihiáse Israerʼró꞉nons tsi teiehiatoreʼtákhwa niaháne nahonateriwasehrón꞉nien tsi natehotiriwatí꞉ronhte, tánon saiá꞉ta wahé꞉nene iáh tehoníhkon ók ne saiáta roníkon nénhne.

² Tó꞉ka ne roníkon wahonwariwénhte nahonwanonwenhserário, ne rariwénhtha enhahón꞉nien nahatsatiónhnite tánon ohontsà꞉ke tiahakonshaiéntake tánon ókwire ahonwanonwáreke. Ne entewanón꞉ton thóh nihiorì꞉wake enhonwanonwáreke ne tsi ní꞉ioht tsi ahoní꞉kon.

³ Aónton ne kaié꞉ri niwáhsen nihiorì꞉wake ahonwanonhwáreke, ók iáh ki nisiʼnón꞉we takénhake; ne sénha ishiʼnón꞉we enhá꞉thehen tsi nòkwah ne kanénhrake.

⁴ “Tó꞉sa skwenhtórok ne tehonakáres tionhnónskwaron nó꞉nen tiatanihiónte tsi swáheks nonátsa.

Tsi Nihioterihwí꞉son Tsi Nòkwah Ne Rawenhé꞉ion Athatekénhsera

⁵ “Tó꞉ka ne iathateʼkenhénha skátke nì꞉teron ne tsi kaientaʼtsherá꞉ien tánon saiáta warenhéie, tánon iáh tehonekenhterontieraientà꞉on, ethò꞉ne ki ne ronekén꞉en iáh ónhka ne átste nakawatsí꞉rate thahonsahiónake; ne ki ne rawenhé꞉ion iathateʼkénha roteriwaién꞉ni nahonshahotí꞉niaʼke.

⁶ Nentewatié꞉renhte enhotinekenhterontsheraién꞉taʼne ne ki enkenthónke tsi né꞉ne rawenhé꞉ion roiénha í꞉ken, ne káti ne rahowá꞉tsire kwáh ienkakónhtaʼkwe tsi enhkatátse ne Israerʼró꞉nonhke.

⁷ Ók ki tó꞉ka ne rawenhé꞉ion iathatekénha iáh tèrehre naónha ahotiniáke, kaná꞉takon ki ienhénwe tánon rotikstenhokón꞉a enhiakokʼkénhsera tánon enhiakohró꞉ri, ‘Ne tehiakeniterónhtakwe iathateʼkénha iáh tehariwaié꞉rits tsi nihoteriwaién꞉ni; iáh té꞉rehre nahowatsirón꞉nien ne iathatekenhkénhen tsi ratinákere ne Israerʼró꞉nons.’

⁸ Ethò꞉ne ki ne rotikstenhokón꞉as iienhonwenhnónke tánon enhonwatháhraʼse. Tó꞉ka shé꞉kon roterahiatákwen nahotiniáke naónha,

⁹ ne iathateʼkénha ró꞉nekwe ne ioteréhons rahohénton ienhénwe rahotihénton ne rotikstenhokón꞉as ne tsi kaná꞉taien, skáti tenhorátasi, rakónhsake enhonitskeroserawe, tánon enkénhron, ‘Thóh ki nihoiatháwenhs ne rónhkwe ne iáh tehathóntats nahowatsirón꞉nien ne iathatekenhkénhen.’

¹⁰ Ne rahowá꞉tsires thóh ní꞉ioht tsi enhonwatihienté꞉rike ‘ne rahowá꞉tsire né꞉tho rónhkwe ne tehonwaratáshion.’

Nohiáson Kaianerénhseras

¹¹ “Tó꞉ka teʼnihiáse ronaterí꞉io tánon skahiáta ne ró꞉ne ahonteʼniénten nahosnié꞉non ne ró꞉ne tsi iatenhonénhia nó꞉ia rónhkwe,

¹² tó꞉sa sehnésten nataniténron; shatiániak.

^13-14 “Tó꞉sa sehnikónhrat nó꞉nen skonhtierihára ó꞉ni shatenienténhons.

¹⁵ Ne í꞉shats ne tkariwaié꞉ri iekonhtieriharákhwa ó꞉ni ne ionhtenientenstákhwa, ne káti nahónton ahión꞉nise ashónnheke ne tsi ionhontsá꞉ien ne Roiá꞉ner saNí꞉io thiawì꞉re.

¹⁶ Ne Roiá꞉ner shakóhsons nónhka ienikonhrátha.

Tsi Niwathenhnà꞉on Nahonwatinonhwarià꞉kon Ne Amalekró꞉nons

¹⁷ “Shasewehiáran tsi nihieʼtsihié꞉raʼse ne Amalekró꞉nons ne Egypt shathontesewenonhátie.

¹⁸ Kwáh iáh thahó꞉ten tehonwatsániskwe ne Rawení꞉io, sók ki sehwasónhne nonhtahón꞉ne tsi iahetsihiatiaʼtón꞉ti nó꞉nen satesewawishenhé꞉ion ó꞉ni sewathonróktha, tánon washakotinonhwarià꞉kon nonáhken thontahotihiaʼtenthónsere.

¹⁹ Káti thóh, nó꞉nen ne Roiá꞉ner sewaNí꞉io tetsisewá꞉wi nohóntsa tánon skén꞉nonk thatsitiónhni tsi nòkwah ne tesewatà꞉tions ne sewahiatakthóntie ratinakerénion, kwáh iorihwí꞉iok tsi iétsi nonhwariaʼkón꞉nion ne Amalekró꞉nons, ne káti ne tó꞉sa ónhka nonhwénton ahonshahonwenehiárake. Kwáh tó꞉sa sewaʼnikónhren!