Deuteronomy 24 - Ohiatonhseratokénti

Ne Tehiakoteʼkháshion Tánon Tiakóniaks

¹ “Tó꞉ka shí꞉ken rónhkwe wahotiʼniá꞉ke ne iónhkwe tánon ishiʼnonwéha iatoriwaiéntaʼse iáh ó꞉nen tateshatonhontsó꞉ni, tiorì꞉wa tsi knahò꞉tenk washakoriwaʼtsénhriase ne iáh tehanónhwes. Sók ki tehiontekhashía꞉tha wahahiatonhserón꞉ni, tánon thá꞉ron, tánon wahatékwahte tsi ronónhsote.

² Ethò꞉ne tó꞉ka shí꞉ken ó꞉ia rónhkwe sahotiniáke ne iónhkwe,

³ tánon raónha ó꞉ni iathoriwaiéntaʼse iáh thaseshatonhontsó꞉ni, raónha ó꞉ni tehionthekhashiátha wahahiatonserón꞉ni, tánon thá꞉ron, tánon wahatékwahte ne tsi ronónhsote. Tó꞉ka ó꞉ni shí꞉ken ne tekeníhaton ró꞉ne warénheie.

⁴ Kák niká꞉ien ne nahorihó꞉ten, ne tiotierénhton tioniakón꞉ne iáh thaónton ne shé꞉kon aónha ahonshahotiʼniá꞉ke; thóh ní꞉ioht tsi tehahiató꞉rehte tehiohiatátion. Tó꞉ka shé꞉kon aónha enshotiniá꞉ke, enhonwaʼnikonhrakaré꞉wahte ne Roiá꞉ner. Tó꞉sa ne natehioʼtenonhianì꞉ton nasheriwanérake ne tsi ionhontsá꞉ien ne Roiá꞉ner SaʼNí꞉io thiawì꞉re.

Tikaianerenseraténions

⁵ “Nó꞉nen ne rónhkwe ón꞉wa kók roniákon, iáh tiahonwaténiehte nahaterihió꞉sera tó꞉ka ó꞉ni ne ó꞉ia nikahioʼtensehró꞉ten ahonwánhane, kwáh ki tsóshera nikarì꞉wes tsi enhonwahiaʼtontáko ne thé꞉nen ahonshahaterihónten, ne káti naónton tsi ronónhsote ahenʼteróntake tánon ne tení꞉teron nahontashakoʼnikonhraié꞉riʼte.

⁶ “Nó꞉nen knahó꞉tenk ónhkak aséhni, tó꞉sa ienhénshawe ne tehatinatiaritákhwa rahotinenhiasónhas nahontkaraién꞉taʼkwe. Né꞉ne enshé꞉kwah ne kawátsire né꞉ne róntstha tsi ronhteʼkhón꞉nis tsi ahonhnón꞉neke.

⁷ “Tó꞉ka ónhkak tsi nítsion ne thaieʼtsihiatákwen ne Israerʼró꞉nons tánon naieʼtsihiatenaskonhniáthe tó꞉ka ó꞉ni iahonsaieʼtsihiatenhní꞉non nahonwatinaskonhniáthe, ó꞉nenk tsi eniesanonwarià꞉kon. Thóh ki neniá꞉wenhne ne sewentiókwa tsi étren énwete ne kariwahetkénhsera.

⁸ “Nó꞉nen ne saronhiakéntha ne iothenratʼtheron ne shanehón꞉ne, kwáh orihwí꞉io tsi thóh nátser tsi nahó꞉ten ne levitical rokhá꞉res enhiaró꞉ri; ittier ne karihonhnienhní꞉tsheras tsi nitkonhiáwi.

⁹ Sasehwehiára ne Roiá꞉ner saNí꞉io tsi nihoié꞉raʼse ne Miriam tsi tatonhtesewenonhatsene ne Egypt.

¹⁰ “Nó꞉nen ne thé꞉nen ónhkak knahò꞉tenk aséhni, tó꞉sa ienhsatáwehiaʼte ne rahonónhskon ne iásko naʼtsherón꞉niat ne thiawì꞉re nahontkaraiéntaʼkwe,

¹¹ átste saterhárat tánon raónha enʼthiahawíten.

¹² Tó꞉ka rotentónha, tó꞉sa nahonsonhtihià꞉khon nahishatienawatstónhake;

¹³ ionsaʼtsawíten niatehiokaratserá꞉ke, ne káti naónton né꞉ne ahrátste tsi ahó꞉tawe. Ethò꞉ne ki kwáh í꞉ken tsi tenhatenonwerá꞉ton, tánon ne Roiá꞉ner saNí꞉io kwáh í꞉ken tsi enhawerientí꞉io tsi nokwáh ní꞉se.

¹⁴ “Tó꞉sa senikonhráhten ne iakotenhthén꞉nion ó꞉ni ne tehiontonhnakháras ienhátsheras, né꞉ne tó꞉ka ken Israerʼró꞉nons akénhake tó꞉ka ó꞉ni tihononhontsá꞉tes né꞉ne sewanatá꞉kons ratinakerénion.

¹⁵ Ne niaʼtewenhniserá꞉ke nohénton iakaráhkwenhne sehkhárias tsi nahotihiò꞉ten ne wenhniserá꞉te; asè꞉ken tehonatonhontsó꞉ni noʼwísta ne ratiniahésen. Tó꞉ka iáh thasehkáriaʼse, iatenhotihénrehte raonhà꞉ke ne Roiá꞉ner tsi nokwáh ní꞉se, tánon ensanonthánake ne kariwanéren.

¹⁶ “Ne iakowiraiéntons iáh tahonwatinonwarià꞉kon ne ronhwatihioʼhokónhas tsi nahonatié꞉renhke tsi nokwáh ne sewateriwatewáton, tánon ó꞉ni ne ratikshaokónhas iáh nónhne tahonwatinonhwarià꞉kon tsi nahonatié꞉renhke ne rotiksténha; nonhkweshón꞉a iaʼtehatíhiati kók enhonwatinonhwarià꞉kon tsi nahonatié꞉renhke ne sewateriwatewá꞉ton.

¹⁷ “Tó꞉sa shenikonhráhten ne tihononhontsá꞉tes ó꞉ni ne tehontonhnakárias tsi nahotihianerenseraiéntake; tánon tó꞉sa ienshá꞉we ne ioteréhons ahotsherón꞉niat nahontkaraiéntaʼkwe tsi enswístani.

¹⁸ Shasewehiáren tsi sewanáskwa kén꞉en ne Egypt nón꞉we tánon ne Roiá꞉ner sewaNí꞉io sehtsisewahiatotaríhson; ne káti aorì꞉wa takwá꞉ion kí꞉ken kariwatà꞉tshera.

¹⁹ “Ne nó꞉nen enshorónhko ne saienʼthótsheras tánon ensariwanó꞉ron nahontáshionʼte ne sanatsihiákon, tó꞉sa thóh ieséhse nahonsaskóha; né꞉ne tihononhontsá꞉tes ronhwanarakwén꞉ni, tehotonhnakárias, ó꞉ni ne ionaterehons, ne káti ne Roiá꞉ner saNí꞉io kwáh enhiaiaʼtatériste ne kwáh tsiknahoʼténhsons tsi nenshá꞉tiere.

²⁰ Nó꞉nen enshahiaʼnihiontakwenháton ne sáhiks ne iakeniewátha énskak kók iewatérats, tó꞉sa toienséhse ne shé꞉kon ahonshasahiáko ne iothaténrons; ne nénhne ne tehononhontsá꞉tes raotirì꞉wake, ó꞉ni ne ionateréhons.

²¹ Nó꞉nen shahiákwen ne shanenharaʼsónhas énskak kók iewatérats, tó꞉sa toiésehse ne shé꞉kon ahonshasahiáko ne tiotaténrons; ne nénhne ne tehononhontsá꞉tes raotirì꞉wake, tehontonhnakárias, ionateréhons.

²² Tó꞉sa nonhwénton sewaʼnikónhren tsi sewanáskwa kén꞉en ne Egypt nón꞉we; ne tiorì꞉wa takwá꞉ion kí꞉ken kariwatà꞉tshera.