Deuteronomy 21 - Ohiatonhseratokénti

Tsi Nikéntons Ne Iáh Tsatekariwaientà꞉on Ne Watataséhtons

¹ “Tó꞉ka shí꞉ken ónhkak kahentà꞉ke wahonwahiataʼtshénri ronwaséhton thóh tsi ionhontsá꞉ien ne Roiá꞉ner saNí꞉io thiawì꞉re, tánon iáh teshaterièn꞉tare ónhka ronhwanonhwarià꞉kon.

² Neiesenhéntenhse ó꞉ni ne ratiriwénhthas ó꞉nenk tsi thóh ienhón꞉ne tánon enhontenienténhnion tsi niwashì꞉take í꞉ken tsi naʼtetiátere tsi nón꞉we nahatiʼtshénri noierón꞉ta tánon ne kwáh ákta kanataiéntons.

³ Ethò꞉ne ki ne ratinatakweʼní꞉ios tsi niká꞉ien ne kwáh ákta í꞉ken tsi nón꞉we nahatiʼtshénri noierón꞉ta tenkonwaiaʼtaiestá꞉shion ne ken nitionaskwahiónha tionhnónskwaron né꞉ne iáh nonwén꞉ton tetiohioʼténhen.

⁴ Tho nón꞉we nienkonwaiaʼténhawe ne tiokwénrare ákta ne kahionhatátie né꞉ne iáh nonwén꞉ton tewástes tánon tsi nón꞉we ne iáh nonwén꞉ton teʼkentarakarà꞉thon iáh ó꞉ni teʼkaièn꞉thon, tánon tho nón꞉we naʼtenhkonhwaniá꞉riahke.

⁵ Ne levitical rotikhá꞉res thóh nónhne ienhón꞉ne, asè꞉ken ne Roiá꞉ner saNí꞉io ne shakohiaʼtarákwen nahonwateriwatsterísthase tánon nahatihiaʼtaté꞉riste raoshén꞉nakon ne Roiá꞉ner, tánon thóh ne raotiwenhnà꞉kon akwé꞉kon ne tekariwakenáston ó꞉ni ne tewatatkarewátons tsi enkariwaserónhnike.

⁶ Ethò꞉ne ratikwé꞉kon ne ratinaʼtakwehní꞉ios ne kwáh ákta í꞉ken tsi nón꞉we nihotiʼtshénrion ne ronwasèhton rónhkwe é꞉neken ne kaiaʼtà꞉ke ne iawenhé꞉ion tionhnónskwaron enshontsóhare

⁷ tánon henhonhní꞉ron, ‘Iáh í꞉i tehiakwasèhton kí꞉ken, tánon iáh tehionkwahterièn꞉tare ónhka thóh nihiakoié꞉ren.

⁸ Saiá꞉ner, shaseʼnikónhrens ne shonkweʼtashón꞉as Israerʼró꞉nons, tsi ronónha sheseniakénhton ne Egypt nón꞉we. Saskwaʼnikónhrens tó꞉sa í꞉i takwanonhtáhnak tsi ronwasèhton ne iáh othé꞉nen tehoniʼtsherá꞉ien.’

⁹ Tánon káti, tsi thóh nesewá꞉iere tsi nihariwanónhtons ne Roiá꞉ner, kwáh ki iáh í꞉se tahisewateriwahésthen ne ronhwaséhton.

Tsi Nakonhwaié꞉rase Ne Iónkwe Naterihioserá꞉ke Konhwaié꞉nen

¹⁰ “Nó꞉nen ne Roiá꞉ner saNí꞉io énthion natesenhniéntshera ne tsi waterí꞉io tánon enseié꞉na nasehnotónhnion,

¹¹ nonhtié꞉renk énsken thóh kaiá꞉tare ne kwáh watkathoʼtsherí꞉io iónhkwe nenhsenónweʼne tánon enséhre nahiseniʼniáke.

¹² Tsi tishanónhsote nionshatsaténhaf, thóh nón꞉we kwáh kanonhtsistakwé꞉kon enwatatenónhkaron; enwataʼtsiherià꞉ke,

¹³ tánon tewatathakwé꞉nion. Tánon sanónhskon kenʼterónhtak sewenhnì꞉ta nikarí꞉wes tánon iakotsónhnions ne konwaiénha né꞉ne sewenhnì꞉ta nikarí꞉wes; nenwatenhnitó꞉hetste, enwá꞉ton nahisenì꞉niake.

¹⁴ Ihsiʼnonhwéha, tó꞉ka iáh ó꞉nen tateseshatonhontsó꞉ni, kwáh ki skenénstsi tsi shasát꞉kaf. Ne tsi nikarí꞉wes washatéhaʼte.

Tsinenhaié꞉na Ne Kaientà꞉tshera Ne Thakowá꞉nen Roskenrakéhte Iakowiraientà꞉on

¹⁵ “Tó꞉ka shí꞉ken ne rónhkwe tékeni tehoniákon tánon tekenitsáron rotiskenrakéhte wahotiwiraiéntaʼne, ók ne thakowá꞉nen iáh ne tehonwaiénha ne shakonónhwes ró꞉ne.

¹⁶ Ók nó꞉nen né꞉tho rónhkwe tehahiaʼtó꞉rete tsi ní꞉ioht tsi tenshakokʼkáshiase ne raoienʼtátshera ne sakohioʼokónhas, iáh tehiówenk narè꞉neste nahontahoriwaré꞉kwen tsi nokwáh ne shakonónhwes ró꞉ne ronhwaiénha tsi ne ahontaháwenh tsi nihó꞉wenk ne thotierénhton rawenhnakerá꞉ton roiénha.

¹⁷ Ó꞉nenk tsi tenhaià꞉seren tsi nentháwen ne rahoientà꞉tshera ne thotierénton rawenhnakerá꞉ton roiénha, iawerohátien tsi iáh ne tehonwaiénha ne shakonónhwes ró꞉ne. Ne rónhkwe ó꞉nenk tsi enhorihwaní꞉ratse ne thakowá꞉nen roiénha tánon tháwen tsi nihioterihwí꞉son nahaié꞉na.

Tsi Ne Nenhohiatháwen Ne Iáh Tehatewenhnarákhwa Ronhwaiénha

¹⁸ “Tó꞉ka shí꞉ken ónhkak iakonekenʼteronhtsherá꞉ien ne rononhtsistaʼní꞉ron tánon iáh tehatewenhnarákhwa, né꞉tho ranekèn꞉teron iáh teshakowenhnarákwa ne ronhwaiénha, iawerohátien tsi ronwarewátha.

¹⁹ Ne ronwaiénha ienhonwahiaʼténhawe rahotihéntons ne shakotihenténse né꞉ne tsi nón꞉we nihatinákere ne kaná꞉takon tánon ronónha enhonhiónhnien ne tahonwahiaʼtó꞉rehte.

²⁰ Ken ní꞉ioht tsi enhonwatiró꞉ri, ‘Ne shakenihiénha ronontsistaʼní꞉ron tánon iáh tehatewenhnarákhwa tánon iáh tehathóntats nasonhtiatahónsatate; ratwistatieshá꞉tha tánon rahnekakástha.’

²¹ Ethò꞉ne ne rotikstenhokónhas ne ratinatakonró꞉nons enhonwanenhióhiaʼke tsi nió꞉re iatenhatikón꞉ten, tánon ne káti nahisewathonse ne kariwahétken. Onhkweʼtakwé꞉kon ne Israerʼró꞉nonke enhieriwà꞉ronke tánon enhiakoterón꞉ne.

Tsi Naʼtekontihánions Ne Kaianerénhseras

²² “Tó꞉ka shí꞉ken ónhkak ionhtatenonhwarià꞉kon ne kariwáksen iorihonhní꞉hon tánon ne oierónhta karontà꞉ke iakohiaténton,

²³ iáh tehiówenk ne thóh ahonsonhtí꞉hiake. Ó꞉nenk tsi ne sahenhní꞉sera enkaiathátenke, tiorí꞉wa nonka neh iakohiaténton ne karontà꞉ke neh tsi Rawenni꞉io sakorewáthon. Sewahià꞉tata noierón꞉ta, ne káti ne tó꞉sa tahisewénhtsonste nonhóntsa né꞉tho Roiá꞉ner sewaNí꞉io tetsisewawì꞉re.