Deuteronomy 2 - Ohiatonhseratokénti

¹ kharehó꞉nen thonsahiakwatʼkarahté꞉ni tánon iohontsathèn꞉ke niahà꞉kwe, né꞉ne tsi nihiothahí꞉non tsitʼkanéksker ne Aqaba, kwáh ki tsi niháwenh ne Roiá꞉ner, tánon kwáh í꞉ken tsi karí꞉wes waʼtsiakwahtawénhrie tsi iononhtaʼrón꞉nions ne Edom.

² “Ethò꞉ne ne Roiá꞉ner wahakró꞉ri

³ tsi iaʼtekaié꞉ri tsináhe ó꞉nen thóh shiʼiákwehs né ki iononhtaʼrón꞉nions tánon káti othorè꞉ke nokwáh nieiákwe.

⁴ Wahakró꞉ri nahontakwá꞉ion né kén꞉en iotiè꞉ton noriwaʼshónhas ‘Kwáh onenthó꞉wa iahí꞉sehwe ne tsi tiononhtaʼrón꞉nions ne Edom, né꞉ne raonatinakeraʼsehrá꞉kons ne íhnon tsi ní꞉ioht tsi sewatatenónhkwe, né꞉ne Esau raowátsires. Kwáh ki enietsitshà꞉nike,

⁵ ók tó꞉sa ki tasewatáshawen ne thé꞉nen naterihiósera ne rononhà꞉ke, tiorí꞉wa tsi kwáh iáh tahontátion shé꞉kon ne sewashí꞉ta nahónske nathaiotokerónhteke ne raononhóntsa. Né Edom nónhwe né꞉ne Esau rahowátsire tekheiáwi.

⁶ Enwá꞉ton né ronónha ahetsikhwaʼní꞉non ó꞉ni noné꞉kanos.’

⁷ “Sehwehiá꞉rak tsi ní꞉ioht ne Roiá꞉ner sewaNí꞉io tsi eʼtsisewahiataʼteríston né kwák tsi nahisehwatiérake. Waʼtsisewatenhnikònhraren tsi watesewatawénhrie tsi niahí꞉sehwe ne kén꞉en ne tehiotenonhianì꞉ton ahonwenhtsiathèn꞉ke. Sehwakwekonʼhátieskwe né꞉ne kaiéri-niwáshen nihioserà꞉ke nikarí꞉wes, tánon akwé꞉kon niesehwaiéntaʼkwe tsi natesehwatonhontsóni.

⁸ “Sók ki sénhak wetewataʼhí꞉ta tánon wetewahtahontá꞉ko tsi nieiawé꞉non ne tsit kaná꞉taien ne Elath ó꞉ni ne Eziongeber tsi nió꞉re ne Dead Sea, tánon wetewakarenhrá꞉ko né꞉ne othorè꞉ke ne tsitkaraʼkwínekens nokwáhti nieiawé꞉non ne Moab nónhwe.

⁹ Ne Roiá꞉ner wahakró꞉ri, ‘Tó꞉sa teietsiʼnikónhraren nonhkweʼshón꞉ʼas ne Moab nónhwe, né꞉nenʼne ne Lot raowátsires, tó꞉sa ó꞉ni tasewatáshawen naterióshera ne rononhà꞉ke. Ronónha né tekhehiá꞉wi ne tsi kanatowá꞉nen ne Ar, tánon iáh thahontakwá꞉ion ne thé꞉nen akénhake ne raononhóntsa.’”

¹⁰ Tehonatenonhianì꞉tons tsi nihatikowá꞉nens ratiʼtá꞉raien né꞉ne Emim ronwatí꞉iats né꞉ne Ar nónhwe nihatinakerè꞉kwe. Thóh nihatinenhié꞉sonhkwe tsi ní꞉ioht ne Anakim, ne nó꞉ia ratiʼtá꞉raien ne ratikowá꞉nens.

¹¹ Tsi ní꞉ioht ne Anakim thóh ní꞉ioht tsi ronhwatihienʼté꞉riʼne né꞉ne Rephaim, ók né Moabites Emim wahonwatinaʼtónkwe.

¹² Ne Horites Edom né nónhwe nihatinahkerè꞉kwe, ók ne Esau sakoiohokónhas wahonwatihiaʼtínekenhwe, wahonwanà꞉tonhte tsi ratiʼtá꞉raien, tánon ronónha thóh nónhwe nonsahonʼtatì꞉teron, kwáh ki tsi ní꞉ioht ne Israerʼró꞉nons oʼnakénhke wahonwatirékwahthe ne tehontátsions tsi iohontsá꞉ien ne Roiá꞉ner teshakó꞉wi.)

¹³ “Ethò꞉ne ó꞉nen watiakwaniatarí꞉iake ne Zered kwáh ki tsi nishonkwaró꞉ri ne Roiá꞉ner.

¹⁴ Ne kí꞉ken ne áshen-niwáhsen shaʼtékon nihiosherá꞉ke tsi náhe éhren tionhkwéton ne Kadesh Barnea. Ratikwé꞉kon ne ronhterí꞉ios nétho sonhtakenhá꞉wi ronenhé꞉ion, kwáh ki tsi niháwenh ne Roiá꞉ner tsi thóh nenhiáwenhne.

¹⁵ Ne Roiá꞉ner iahakontákwe tsi sakorewaʼtáwe kwáh tsi nió꞉re ratikwé꞉kon wahonhníheie.

¹⁶ “Nó꞉nen ratikwé꞉kon shihonenhé꞉ion,

¹⁷ ne Roiá꞉ner wahakénhase,

¹⁸ ‘Ónhwa wenhniserá꞉te iaʼtetsonhontsí꞉iak ne Moab rahononhontsà꞉ke né꞉ne tsi niehiawé꞉non ne Ar.

¹⁹ Ethò꞉ne kwáh ákta iensehwè꞉sehke tsi ronatonwenhtsá꞉ien ne Ammonró꞉nons, né꞉ne tsi tahawatsiratátie ne Lot. Tó꞉sa ki ieʼtsiritstón꞉nien tó꞉sa ó꞉ni tasewatáshawen ne ihsewaterí꞉io ne ronónha, tiorí꞉wa tsi kwáh iáh othé꞉nen tahontátion nohóntsa ne thekhehiá꞉wi.’” (

²⁰ Kí꞉ken kanakeráshera thóh ní꞉ioht tsi kaienterè꞉on né꞉ne Rephaim raononhóntsa, thóh nahothisenhnoʼténhne ne thóh ratinákereʼkwe; ne Ammonró꞉nons ne ronwatinahtónkwa ne Zamzummim.

²¹ Thóh nihatiʼnenhié꞉sonhskwe tsi ní꞉ioht ne Anakim. Ronatioʼkowanénhne, tánon ratiʼshátstekwe. Ók ki Roiá꞉ner shakotòn꞉ton, ne káti nahónton ne Ammonró꞉nons ahatiʼié꞉na ne raononhóntsas tánon thóh nónhwe nahontená꞉taien.

²² Ne Roiá꞉ner kwáh nónhne thóh nishakoiéraʼse ne Edomites, né꞉ne tsi nitotwatsirì꞉non ne Esau, ne thóh nónhwe nihanákerekwe tsi iononhtaʼrón꞉nions ne Edom. Raónha shakotòn꞉ton ne Horites, ne káti ne Edomites ahatiʼié꞉na ne raononhóntsas tánon thóh nónhwe nahontená꞉taien, tánon shé꞉kon nónhwa thóh nónhwe nihatináhkere.

²³ Nohóntsas ne ió꞉seron ne Mediterranean atiaʼthónties thóh nónhwe nihonatenaʼtón꞉ni nonhkweʼshón꞉ʼas ne Crete nithoné꞉non. Ronónha ronwanaʼthónton ne Avvim, né꞉ne thatinakerehónwekwe, tánon akwé꞉kon ronatienawáston ne raononhóntsas kwáh tsi nió꞉re nentiè꞉ne nokwáhti iotohesthákwen ne tsi kanatowá꞉nen Gaza.)

²⁴ “Shahakwatóhetsʼte ne Moab, ne Roiá꞉ner wasonhkwaró꞉ri, ‘Ó꞉nen, Iaʼsehwatáshawen tánon tesewaiá꞉iak ne Arnon kaniataratátie. Thóh entsién ne kaʼshatsténshera shohà꞉ke Sihon, né꞉ne Amorʼró꞉non Rononhtí꞉io ne Heshbon nónhwe, kenikwé꞉kon ne raonhóntsa. Iaʼtsisehwatiaʼtónti, tánon tasehwatáshawenh sewatié꞉nawast ne raohóntsa.

²⁵ Kén꞉en ienwatáshawen kwáh tsit nonhwéson tsi enkheión꞉nien nonkweʼshón꞉ʼas naiesatsaní꞉sehke. Onhkweʼtakwé꞉kon tsi enhotihiatiʼtshónkwe tsi nenhotiʼterónhne nenieshasenhnà꞉ronhke.’

Ne Israel Wahonwasénhni Ne Ronhnonhtí꞉io Sihon

²⁶ “Ethò꞉ne iakheiaʼténiehte ne ratiriwakarénies tho nontahonhne iahonwentsiatʼtenhake ne Kedemoth raonhà꞉ke ne ronhnonhtí꞉io Sihon, raónha rakó꞉raʼkwe ne tsi kanatowá꞉nen ne Heshbon, riró꞉ris nétho rahonkweʼtashón꞉as ó꞉ni ní꞉i ontionhkweʼtashón꞉as iáh tehió꞉wenk nahonterí꞉io tsi naʼtehonterè ne iononhterátie ne skén꞉non:

²⁷ ‘Thakwaríhon nahiakwató꞉hetste ne sanakerahserá꞉kon. Kwáh ienhiakwataʼkwaríshate iáh ó꞉ni étren thaiakwè꞉te ne tsi iohatátie.

²⁸ Enhiakwakarià꞉ke tsi teniakwatská꞉hon ó꞉ni noné꞉kanos tsi enhiakwaʼnekí꞉ra. Ne kók teionkwatonhontsó꞉ni ne ahiakwató꞉hetste ne sanakerasehrá꞉kon,

²⁹ tsi nió꞉re iateniaʼkwahiá꞉iake ne Jordan Kaniataratá꞉tie tsi nienhiá꞉kwe ne tsi tiohontsá꞉ien né꞉tho Roiá꞉ner ónhkwa Ní꞉io sonhkwawì꞉re. Tsi nitotwatsirì꞉non ne Esau, ne Edom nónhwe nihanakerè꞉kwe, ó꞉ni ne Moabites, né꞉ne Ar nónhwe nihatináhkere, wahonkhirí꞉hon nahiakwató꞉hetste ne raotinakeraʼsehrá꞉kon.’

³⁰ “Ók ki ne rononhtí꞉io Sihon iáh ne teshonkwariwá꞉wi nahiakwató꞉hetste ne raonakeraʼsehrá꞉kon. Ne Roiá꞉ner sewaní꞉io wahononhtsistaʼní꞉rate ó꞉ni wahaterihioseranonhwè꞉ne, ne káti nahónton nashakwaʼsén꞉ni tánon aiakwatiénawatste ne raonakeráhsera, tánon shé꞉kon ki nihionkwatienawáston.

³¹ “Ethò꞉ne ne Roiá꞉ner wahakénhase, ‘satkátho, Wahiʼiónhnien ne rononhtí꞉io Sihon tánon ne raohóntsa iáh othé꞉nen takastaʼtónhke ne sewahénton; iaʼsewáhaf ne rahohóntsa tánon sewatiénawast.’

³² Ne Sihon tashakohiaʼténhawe ratikwé꞉kon ne rahonkweʼtashón꞉as nahiakwaterí꞉io ákta ne tsi kanatowanènhke ne Jahaz,

³³ ók ki ne Roiá꞉ner ónhkwa Ní꞉io onkwashatstenserá꞉kon nónhwe nahotkà꞉we, tánon washakwanonhwarià꞉kon, ne shakoioʼokónhas, ó꞉ni ratikwé꞉kon ne rahonkweʼtashón꞉as.

³⁴ Tánon iaʼtsiakwariwaiéstaʼkwe wahakwaiéna ó꞉ni wahakwanaʼtèn꞉ton há꞉ton kwáh tsi niatekaná꞉takes, tánon kwáh niateionkwè꞉take tsi wahakhihiawénhtho, ronhnónhkwe, konhnónhkwe, ó꞉ni ratikshaʼokónhas. Kwáh iáh othé꞉nen tsiaʼtehionkwénhron.

³⁵ Iahakhihiaʼténhawe ne kontiʼtshénens tánon wahakwanenskwenhá꞉ton ne kanatakónhsons.

³⁶ Ne Roiá꞉ner ónhkwa Ní꞉io washonkwahríhon naiakwaiéna akwé꞉kon ne kanatowá꞉nens né꞉ne Aroer tontáshawen, ne tsi ieiò꞉te ne Arnon Awenhrá꞉kwakon, tánon ne kanatowanénhke ne kwáh asénhnon í꞉ken nahonráhkwakon, kwáh tiahónwe ne Gilead. Iáh ne skaná꞉ta tiaʼtekaié꞉ri tsi nahiotenhenraʼní꞉ronhke nonkwahrì꞉wake.

³⁷ Ók ki iáh ákta tieionkwè꞉non ne raotinakeraʼsehrá꞉kon ne Ammonró꞉nons iáh ó꞉ni natsakʼthónties ne Jabbok Kaniataratátie iáh ó꞉ni ne tsi kanataiéntons ne tsi tiononhtaʼrón꞉nions iáh ó꞉ni naktè꞉shon nonhwésons tsi nónhwe ne Roiá꞉ner ónhkwa Ní꞉io shonkwahró꞉ri ne tó꞉sha iahiàkwe.