Deuteronomy 17 - Ohiatonhseratokénti

¹ “Tó꞉sa othé꞉nen tsi sewateskóntas ne Roiá꞉ner sewaNí꞉io ne tionónskwahron tó꞉ka ó꞉ni ne teiotinakarontón꞉a ne thé꞉nen ahiotinonwaktaníheke; ne Roiá꞉ner kwáh í꞉ken tsi ráshons ne thóh nikontihiaʼthó꞉tens.

² “Tó꞉ka shí꞉ken waseriwà꞉ronke kak tsi ní꞉kon ne sewanatákons otià꞉kes ne ronhnónkwe tó꞉ka ó꞉ni konhnónkwe wahatirihwánerake tsi nokwáh ne Roiá꞉ner tánon waʼthatí꞉hiake ne rahoteriwaʼseronhniá꞉tshera

³ tsi ne konhwatisénhnaiens ó꞉ni tekonwatiriwásniese ne oiáhsons nihioʼokónhas tó꞉ka ó꞉ni ne tsi karáhkware tó꞉ka ó꞉ni nasonhthenʼnékha karáhkwa tó꞉ka ó꞉ni ne tsi iotsistoʼkwahrón꞉nions, oianahatí꞉iere tsi ní꞉ioht tsi rotró꞉ri ne Roiá꞉ner.

⁴ Tó꞉ka thé꞉nen ahseriwá꞉ronhke ne thóh nikarihó꞉ten, ethò꞉ne ki kwáh ioianeréhak tsi serihwísak. Tó꞉ka tós꞉ke thóh ní꞉ioht né꞉tho kí꞉ken kariwahétken tsi thóh nahá꞉wenhne ne Israerʼró꞉nonhke,

⁵ ethò꞉ne ki átste naʼkanatháti niasehiaʼténhaf tánon senenhióhiak tsi senonhwarià꞉kon.

⁶ Ók ki, onhwáton nahonwatinonhwarià꞉kon tó꞉ka teionkwè꞉take tó꞉ka ó꞉ni sénha iakotiohkowá꞉nen ahieriwahní꞉rate tsi nokwáh ne ronónha; tó꞉sa ki ronhwatinonhwarià꞉kon tó꞉ka tsonkwè꞉ta kók ieriwahní꞉rats.

⁷ Ne ratiriwahní꞉rats ne enʼthontié꞉renhte ienhotinenhiónti, tánon ethò꞉ne ne otiaʼkéshons ronhwatinenhióiak; thóh ki nenhiá꞉wenhne tsi éhren ensewahawite ki꞉ken kariwahétken ne sewentsiokwahkon.

⁸ “Ók tó꞉ka nón꞉wa otià꞉kes ne oriwasónhas sóhtsi wateriwenhtó꞉res ne thóh ratinákeres ne ratiriwénhtha ne tahatihiató꞉rethe, né꞉ne tsi ní꞉ioht ne kaienʼtátsheras tó꞉ka ó꞉ni ne iakohiaʼtakwarátson tó꞉ka ó꞉ni ne athataséhton tánon ne sewateriwatewáhton. Nó꞉nen kí꞉ken ehnenhiá꞉wenhne, tsi ionterenhnaientáhkwa niaháse né꞉ne tsi nón꞉we nihoʼráhkwen ne Roiá꞉ner saNí꞉io,

⁹ tánon iaʼsehriwaiénhas ne sariwaʼsónhas ne Levitekes rotikhá꞉res ó꞉ni ne ratiriwénhthas ne thóh enhonaterihónthake ne nenkaháwike, tánon ietsirí꞉hon ne ronónha tehatihiaʼtó꞉rehte norí꞉wa.

¹⁰ Enʼthontkà꞉we ne rahotihiaʼtoretátshera, tánon ki kwáh thóh nátser tsi nenhiesahró꞉ri.

¹¹ Iashanékwat ne rahothihiaʼtoretá꞉tshera tánon iʼtser tsi nahonhní꞉ron.

¹² Nón꞉ka naiénre ne tó꞉sa ahiontewénhnaraʼkwe ó꞉ni tsi nokwáh ne ratiriwénhthas tó꞉ka ó꞉ni ne rotikhá꞉res ne thóh rotihiò꞉te kwáh enhonwatinonhwarià꞉kon; thóh ki ní꞉ioht tsi é꞉ren ensewaháwithe ne kariwahétken ne Israerʼró꞉nonhke.

¹³ Ethò꞉ne kwáh onhkweʼtakwé꞉kon tsi enhionrón꞉ke tánon enhiakoʼterónhne, tánon iáh ónhka thahonsá꞉ienre ne thóh nahonshaié꞉iere.

Mahís Washakohró꞉ri Nonhkweshón꞉as Onhní꞉ioht Tsi Ahonwahiaʼtará꞉ko Ne Ronnhtí꞉io

¹⁴ “Ne nó꞉nen sewatienawáston ne ohóntsa né꞉tho Roiá꞉ner sewaNí꞉io thetsisewá꞉wi tánon thóh nón꞉we nisewathatì꞉teron, ethò꞉ne tensewahiató꞉rete tsi tesewathonwenhtsóni nahisewanonhtihioʼtsheraién꞉take kwáh ki tsi ní꞉ioht ne tesewatonhontsaneʼkhánions nonhwéson.

¹⁵ Iorihwihióhak ne rónhkwe entsisewahiaʼtará꞉ko nahatenonhtí꞉iosthe ne ki tsi niká꞉ien ne Roiá꞉ner rohiatarákwen. Ó꞉nenk tsi ne shesewanekwénhsa akénhake; tó꞉sa ne thihahontsá꞉te ne atsisewanonhtí꞉ioste.

¹⁶ Ne ronhnonhtí꞉io iáh tehiówenk ne wé꞉so ahonaskwaiéntake ne koshátens ne raotióhkwakon ne ronhterí꞉ios, tánon iáh tehohianerenhserá꞉ien ne Egypt nón꞉we iashakoténiehte nonhkweshón꞉a nahatinaskwaʼninónhra ne koshátens, tiorí꞉wa ne Roiá꞉ner tsi ráwen iáh nonhwénton nonhkweshón꞉as thóh tiahonsahón꞉ne.

¹⁷ Ne ronhnonhtí꞉io iáh tehiówenk ne wéso ahoniákonhke, tiorí꞉wa tsi ne enkarihón꞉ni nahateʼnikonhranentáshion tsi nokwáh ne Roiá꞉ner; tánon iáh tehiówenk nahataʼkwatsésten ne kawistará꞉kens ó꞉ni ne owistanoronhsónhas.

¹⁸ Nó꞉nen enhatenonhtí꞉ioste, ó꞉nenk tsi enhohiatonhseraiéntake tsi nikahiatón꞉nion ne Rawenni꞉io raohianerénhseras ó꞉ni ne raorihonhnienhní꞉tsheras né꞉ne kwáh kahiathakwení꞉io tsi nitkáson tánon né꞉ne Levites rotikhá꞉res ronateweiénton.

¹⁹ Kí꞉ken kahiatónhsera rahiatákta nón꞉we tió꞉konhte nakénhake tánon nahawenhnanót꞉thake kwáh tsi nirónhnes, ne káti nahaweientè꞉taʼne nahokweniénsthake ne Roiá꞉ner tánon nahatewenhnarákwahke ahoriwatokénhake orihwakwé꞉kon tsi niwakró꞉ris né꞉tho.

²⁰ Ne kí꞉ken enhonónstate ne tó꞉sa ne ahanonhtónhnionwe tsi sénha raónha roiánere tsi ní꞉ioht nakorénsons NIsraerʼró꞉nons tánon ne iáh tahowénhnaraʼkwe ne Roiá꞉ner tsi niháwen ne kwáh tsinahontahiotieraʼtónhake. Ethò꞉ne ki kwáh enhiónhnise tsi enhonhnonhtí꞉ioke, tánon tsi nienhatwatsí꞉rine kwáh ronónha enhatikó꞉rake ne Israerʼró꞉nonhke né꞉ne wé꞉so tsi wahatinekwenhsatátie.