Deuteronomy 14 - Ohiatonhseratokénti

Ne Kariwáston Tsi Ninahié꞉ra Nahiontsiónhnion

¹ “Í꞉se ne tsónhkwe ne Roiá꞉ner sewaNí꞉io rahonkweʼtashón꞉as. Káti nó꞉nen enieʼtsihiatsiónhnionhse ne iakawehié꞉hion, tó꞉sa sewatatreniá꞉nion tó꞉sa ó꞉ni sewathatenónhkaron, tsi nihatihié꞉ra notiàkes.

² Roiá꞉ner sewaNí꞉io ní꞉se rahonkweʼtashón꞉as; raónha tsi sewahiatarákwen ní꞉se rahonkweʼtashón꞉as ahisewá꞉ton né꞉ne tsi nihiá꞉kon nonhontsà꞉ke ienákere.

Ne Kontitshénens Tsi Niká꞉ien Nahónton Ahiewà꞉rake Tánon Ne Tsi Niká꞉ien Ne Iáh Tahónton Ahiewà꞉rake

³ “Tó꞉sa othé꞉nen sewawárak tsi niká꞉ien ne Roiá꞉ner rotró꞉ri iáh tehionatkwéniens.

⁴ Ne kí꞉ken nikonhtihiaʼtó꞉tens enwá꞉ton nahisewahwà꞉rake: tionhnónhskwaron, teiotinaʼkaronhtón꞉ʼa, kaiaʼtákeras,

⁵ oskenónton, karakónha teiotinaʼkarontón꞉ʼa, karakónha kaiaʼtákeras, tó꞉ka ó꞉ni ne kahentaʼkéha oskenónhton—

⁶ ó꞉ni tsi niká꞉ien ne kontitshénens ne tehiotitsinarentó꞉ken tánon tsi niká꞉ien ne konhtiné꞉taks.

⁷ Ók iáh tehiówenk nahiewà꞉rake nek kók tó꞉ka ken tehiotitsinarentó꞉ken tánon ne konhtiné꞉taks. Iáh tehiówenk ne hioniakwáhere ahisewahwà꞉rake, tahonʼtané꞉ken, tánon ne tsikenekerehetshotárho. Ne konwatinaʼtónhkwa iáh tehionatkwéniens; kontiné꞉taks ók iáh ki tatehiotitsinarentó꞉ken.

⁸ Tó꞉sa sewahwà꞉rak ne kwés꞉kwés. Né꞉ne nónhne iáh tehonatkwéniens; tehotitsinarentó꞉ken ók iáh ki tehatiné꞉taks. Tó꞉sa sewahwà꞉rak kí꞉ken kontiʼtshénens tó꞉sa ó꞉ni iahetshiʼié꞉na nó꞉nen ronenhé꞉ion.

⁹ “Enwá꞉ton ne kwák tsi nikentsò꞉ten ahí꞉sewake né꞉ne tehatiwehióntons ó꞉ni rotitstarónhnion,

¹⁰ ók ne thé꞉nen nawenkéhsons kónhnes ne iáh tatehiotiwehióntons iáh ó꞉ni tehiotitstarónhnions iáh tehiówenk naiewà꞉rake; ne nénhne konwatinaʼtónhkwa iáh tehionatkwéniens.

¹¹ “Enwá꞉ton notsiʼténha asewà꞉rake.

^12-18 Ók ne kí꞉ken notsiʼténhas ne tó꞉sa sewahwà꞉rak: á꞉kweks, kwararó꞉ha, karakónha otsiʼténha, niwakweshotá꞉ha, akweksóhkon, akwekskó꞉wa, tsokaweʼkó꞉wa; skawirowaneʼkó꞉wa, tsohwátstakaʼwe, kawirakarénies, ohá꞉kwaron, otsiʼténha-wanitsató꞉rats, tsokaweʼkó꞉wa; tánon ne tsikeraʼwístiks.

¹⁹ “Konhtikwé꞉kon ne otsinónhwas ne tekontenerahontsónhtons tsi iatehionatkwéniens; tó꞉sa sewahwà꞉rak

²⁰ Enwá꞉ton nahisewarahke notsinónhwa ne ionatkwéniens.

²¹ “Tó꞉sa sewahwà꞉rak ne kárhio ne thihiawehé꞉ion. Ne ietsirí꞉hon ne thihononhontsá꞉te ne skátke sewanákere ratiwà꞉rak, tó꞉ka ó꞉ni né꞉ne ó꞉ni ne thihononhontsá꞉te ietsihiaʼtenhní꞉nons. Ók ní꞉se Roiá꞉ner sewaNí꞉io rahonkweʼtashón꞉a; í꞉se ne rahonkweʼtashón꞉a. “Tó꞉sa sewahwará꞉rit ne ken nitsonaskwahiónha ne teiotinakaronhtón꞉a tó꞉ka ó꞉ni ne kaiaʼtákeras ne konhwaʼnisténha aonónhta ahí꞉sewatste.

Tsi Nikaianerenhseró꞉ten Nahiontaié:iesthe

²² “Tsiónhkwe nʼIsraerʼró:nons, iatehioserá꞉ke ákthe naʼsewá꞉ien énska ne oierí꞉haton nihiorì꞉wake ne sewahétakons ensewaientwá꞉ko.

²³ Ethò꞉ne iaʼsewáhaf noierí꞉haton ié꞉ken ne sewanátsias, nonenharaʼtasehontsherá꞉keri, tánon ne iakeniewátha kén꞉ie, tánon ne tiotierénhton ionatewì꞉raien ne tionónhskwarons, teiotinaʼkarontón꞉a, tánon ne kaiaʼtákeras, Ísewak kí꞉ken kákhwa ó꞉ni noʼwá꞉rons ne tsi nihietsiʼiawénhton ne katshénens ne nón꞉we. Ne kí꞉ken ensewarihónhnien ne tió꞉konte atsisewakweniénstake ne Roiá꞉ner sewaNí꞉io.

²⁴ Tó꞉ka shó꞉tsi ahinonhnió꞉re ítken ne tsi nón꞉we nisewénhteron ne iahisewáhawe tsi nahoʼténhsons nahontesewá꞉ieste tsi nisewaientwákwen né꞉tho Roiá꞉ner tsi sewahiatateríston né꞉tho, ethò꞉ne ken naʼsewáier:

²⁵ Sewatenhní꞉non ne sewaientwákwen tánon iaʼsewáhaf noʼwísta tsi nón꞉we tionterenhnaientákhwa.

²⁶ Tánon ne sasewaní꞉nont kwáh tsi nahó꞉ten ahisewérehke né꞉ne tionónhskwaron, teiotinakarontón꞉a owí꞉ra, onenharataʼsehontsherá꞉keri, ionekaní꞉ron, tánon thóh nón꞉we, rahohénton ne Roiá꞉ner sewaNí꞉io, í꞉se tánon ne sewahwá꞉tsire natensewatskáhon ó꞉ni ensewateʼnikonhró꞉ri.

²⁷ “Tó꞉sa ietsihiaʼtanikónhren ne Levites ne sewanatákons ratinákere; iáh thahó꞉ten tehotihientaʼtserá꞉ien.

²⁸ Ne ienwatésha nasénhaton nieioserá꞉ke tasewáhaf nahisewakarià꞉ke ne sewaienthótsheras tánon sewaná꞉takons sewathaʼkweniá꞉nien.

²⁹ Ki kákhwas né꞉ne Levites raotirì꞉wake, ne tsi iáh thahó꞉ten tehotihientaʼtserá꞉ien, ó꞉ni ne thihononhontsá꞉tes, tehontonhnakárias, ó꞉ni ne ionateré꞉hons ne sewanatákons konhtì꞉teron. Enthatikóha kwáh tsi nahó꞉ten tehonatonhontsó꞉ni. Tóh ki naʼsewáier, tánon ne Roiá꞉ner sewaNí꞉io entsisewahiataté꞉riste kwáh tsi nensewatiére.