Deuteronomy 13 - Ohiatonhseratokénti

¹ “Tó꞉ka sí꞉ken Rotokénhse tó꞉ka ó꞉ni ne tehariwathétha nateʼtsénhseras enhoké꞉tote tánon rá꞉ton tsi orihwí꞉io ró꞉ien ne ioriwanerákwat tsi nenhiáwenhne.

² Ne nahónton naieʼtsihéntenhse nahisewaterén꞉naien tánon ne taieʼtsiriwásniese noiáhsons nihioʼokón꞉as né꞉ne iáh nonwénton tetisewashén꞉naien. Iawerohatiénhak tsi nahó꞉ten ronarahrátston tsi é꞉tho nenhiáwenhne,

³ tó꞉sa othé꞉nen thaieʼtsiriwásnies. Ne Roiá꞉ner sewaNí꞉io ne shakotstonhátie naʼtsisewateʼnién꞉ten, nahatkátho tó꞉ka ken seweriasakwé꞉kon tsisewanorónhkwa.

⁴ Tsi sewáser ne Roiá꞉ner tánon tsisewakwénienst; tsi sewawénhnarak ó꞉ni sewateweiénton ne rahoriwatà꞉tsheras; tsi sewasenhnaiénsek tánon sewariwatokénhak ne rahonhà꞉ke.

⁵ Ók ietsinonhwarià꞉kon ónhka ne tehatiriwathétha natetshénseras tó꞉ka ó꞉ni ne rotitokénhse ne ieʼtshiró꞉ris ne tó꞉sa atsisewawénhnaraʼkwe ne Roiá꞉ner, tsi raónha setsisewaniakénton ne Egypt nón꞉we, tsi thóh nónwe nisewanáskwa kén꞉en. Né꞉tho onhkweshón꞉as kwáh ronhnonhkweʼtahétkens ó꞉ni ronhtenièn꞉tha naieʼtsihiatahará꞉kwaʼthe tsi nitsónhe ne Roiá꞉ner tsi nitsisewahró꞉ri nahitsónhnheke. Ó꞉nenk tsi enhonwatinonhwarià꞉kon, ne naónton nahisewá꞉ti kí꞉ken kariwahetkénhsera.

⁶ “Iekaní꞉hare ne sewathatekenʼokón꞉as tó꞉ka ó꞉ni ne sewanekenʼterasónhas tó꞉ka ó꞉ni ne sewahiataseʼtserasónhas tó꞉ka ó꞉ni kwáh ákta sewatenroʼsónhas otsohónskwakon tsi aieʼtsinikonhrà꞉reke ne ahisewashén꞉naien ne tikanihioserá꞉tes, né꞉ne nihioʼó꞉kons ní꞉se tánon ne ietsisoʼthonkonhkén꞉en iáh nonhwén꞉ton thetisewashén꞉naien.

⁷ Otià꞉kes enieʼtsinikonhrà꞉reke naieʼtsishén꞉naien ne rahotinihioʼokón꞉as nonhkweshón꞉as ne aktatieʼsón꞉as ratinákeres tó꞉ka ó꞉ni ahinónhson nón꞉we tatinakerénion.

⁸ Ók tó꞉sa ieʼtsirí꞉hon ónhka tsi nihá꞉ti naiesaʼnikonhrá꞉reke; tó꞉sa ó꞉ni shé꞉kon nek kók naieʼtsihiatahónsatate. Kwáh tó꞉sa othé꞉nen ietsinaʼtónhas nataniténron tó꞉ka ó꞉ni ne taieʼtsihiaró꞉ton, tó꞉sa othé꞉nen taieʼtshí꞉ne.

⁹ Ietsinonhwariaʼkónhnion! Í꞉se tasewatiérent naietsinenhió꞉iaʼke, tánon ethò꞉ne ieʼtsirí꞉hon nakorénhsons nahonwatinenhió꞉iaʼke.

¹⁰ Ietsinenhió꞉iaʼke tsi nió꞉re iaʼtensewakónhten! Wahonteʼniénten né꞉ren aieʼtsihiatenhá꞉wi raonhà꞉ke ne Roiá꞉ner, tsi raónha tsi sewaʼniakénhton ne Egypt nón꞉we, tsi thóh nón꞉we thisewanáskwakwe.

¹¹ Ethò꞉ne onhkweʼtakwé꞉kon nʼIsraerʼronónke kwáh enhón꞉ronke tsi nahá꞉wenhne; kwáh enhotiʼterón꞉ne, tánon iáh ónhka nonhwénton shé꞉kon ne thóh nahonsahatí꞉iere ne kariwahétken.

¹² “Nó꞉nen thóh nón꞉we nenhsewanákereʼke ne tsi kanatowá꞉nens ne Roiá꞉ner sewaNí꞉io entetshítson, nonhtiérenk ensewà꞉ronke

¹³ né꞉tho otià꞉kes ne iáh othé꞉nen tehionkweʼtastathé꞉nion ne sewentióhkwakon wahonwanatahará꞉kwahte nonhkweshón꞉as ne rahotiná꞉takons né꞉ne akonwashén꞉naien ne nihioʼokón꞉as né꞉tho iáh nonhwénton teʼkonhwashén꞉naien ne tiotierénhton.

¹⁴ Tó꞉ka thé꞉nen ensewarihwá꞉ronke ne karihontienónties, kwáh tokén꞉en sewarihwísak; tánon tó꞉ka tó꞉kenske í꞉ken kí꞉ken karihwahétken é꞉tho nihiawénhen,

¹⁵ ethò꞉ne ki onhkweʼtakwé꞉kon ietsinonhwariaʼkón꞉nion né꞉tho kanatowanén꞉ke ó꞉ni akwé꞉kon ne rahotiʼtshenenhó꞉kons. Kwáh tokén꞉en sewarihwáthont né꞉tho kanatowá꞉nen.

¹⁶ Akwé꞉kon tasewáhaf ne raotihientátsheras nonhkweshón꞉as né꞉tho ratinakerè꞉kwe tánon sewenhstokó꞉ten thóh kanénthen. Ethò꞉ne sewatenonhkwéntaf ne kanatowá꞉nen ó꞉ni kwáh tsi nahó꞉ten né꞉tho akaiéntake né iahátstats ne Roiá꞉ner saNí꞉io. Kwáh iekarihwaiésat tsi nén꞉we tánon iáh shé꞉kon nonhwénton nahonsakanatonhníhake.

¹⁷ Tó꞉sa othé꞉nen sewathateweientónhas tsi nahó꞉ten ne í꞉se iewátion nahontkarón꞉ni, tánon ethò꞉ne ne Roiá꞉ner tensatkaraté꞉ni tsi nihonaʼkhwén꞉en tánon ataniténron ensnianaʼtónhase. Kwáh enshienténhre tánon entsitsónhnien nahisewentioʼkowá꞉na, tsi ki nishakorahratstén꞉ni ne ietsisoʼthonkonhkén꞉en,

¹⁸ Tó꞉ka akwé꞉kon enshatewénhnaraʼkwe ne rahoriwatà꞉tsheras ne tkwá꞉wis nón꞉wa wenhniserá꞉te, tánon thóh naʼsewá꞉iere tsi nihariwanónhtons.