Deuteronomy 12 - Ohiatonhseratokénti

Enskák Kók Tsi Nón꞉we Nenhionterienhnaientáhseke

¹ “Ne kí꞉ken ne kaianerénhseras nahisewatewenhnarákwake né꞉ne kwáh tsi nitsónhnhes ne tsi ionhontsá꞉ien né꞉tho Roiá꞉ner, ne Sakoní꞉io ne sewasoʼtsheraó꞉kons, ne tetsisewá꞉wis. Ietsihiaʼtahónsatat!

² Ne tsi ionhontsá꞉ien ne sewatienawatstà꞉ne, sewariwáktont tsi nonhwé꞉sons nonhkweshón꞉as nikonhwatisén꞉naienskwe ne raoní꞉ioʼs ne onotoharakéhsons, ne tsi ionhniarónhnions, tánon ne tsi iorakwaweróhserons ne karontonkónhsons.

³ Sewarishión꞉ko ne ratitienharáhkwas tánon tesewaʼtó꞉kwat ne iotokénhti rahotinawahataʼsónhas. Sewátsahat ne tsi kahiatarón꞉nion ne raotiní꞉io Asherah tánon sewarenientánion ne raotihiaʼtonhnisónhas, káti né꞉ne tóhsa shé꞉kon thóh nón꞉we nahonsahatisenhnaiénhseke.

⁴ “Tó꞉sa tóh nihiotónhak tsi atsisewasén꞉naien ne Roiá꞉ner sewaNí꞉io tsi ní꞉ioht tsi ratisénhnaiens kí꞉ken onhkweshón꞉as ne raotiní꞉ios.

⁵ Thóh tsi kanakerahserá꞉ien kanenrahkwé꞉kon ne sewentióhkwa ne Roiá꞉ner énska natenátha enharáhko tsi nón꞉we nonhkweshón꞉as nahontahón꞉ne tsi nón꞉we nenhenʼterón꞉take nahonwasénhnaien.

⁶ Thó꞉nonhwe niensewátkaʼwe ne kariwihiosehʼokón꞉as né꞉ne ahontsahathónhake ó꞉ni noiáhsons sewáwenk ne kariwihiosehokón꞉as, sewawístas tánon ne sewaienʼtóhseras, nahtatawí꞉tsheras ne tsiararatstén꞉ni ne Roiá꞉ner, tánon ne kwáh tsi nitesenónhwes niasátkaʼwe, tánon nentewatiérenhte enhontewì꞉raien ne tionónhskwaron ó꞉ni ne teiotinakaronhtòn꞉a.

⁷ Thóh rahohén꞉ton ne Roiá꞉ner sewaNí꞉io, tsi raónha tsi sewahiatateríston, í꞉se tánon ne sewahwá꞉tsires kwáh tensewatská꞉hon tánon ensewanonwè꞉ne ne ioiáneres tsi nisewahioʼténhen.

⁸ “Nó꞉nen ienkáhewe, iáh tehiówenk ne thóh nahonsehsewá꞉iere tsi nisewahié꞉rahkwe. Tsi nió꞉re nón꞉wa kwáh sewakwé꞉kon sewaterénhnaienskwe tsi nenhtisewanónhweʼne,

⁹ Tiorí꞉wa tsi arè꞉kok tietsonhontsará꞉hon né꞉tho Roiá꞉ner sewaNí꞉io tsisewawì꞉re, tsi nón꞉we nenhwá꞉ton ne skénhnonk tahisewanákerehke.

¹⁰ Nó꞉nen tesewaniaʼtarihiá꞉ke ne Jordan Kaniataratátie enkwahríhon nahisewatié꞉nawatste nonhóntsa tánon thó꞉nonhwe nahisewanákereʼke. Kwáh ki entsisewahiaʼtanonhstáthe tsi nokwáh ne tesewatà꞉tsonhs, tánon ki skén꞉nenk tsi ensewenhterón꞉take.

¹¹ Ne Roiá꞉ner kwáh sewatenatá꞉kok tsi nón꞉we nenhará꞉ko né꞉ne tsi nón꞉we nahonwasenhnaién꞉seke, tánon thóh nón꞉we akwé꞉kon entisesewáhawe tsi nikwahró꞉ri: né꞉ne sewariwihiosehʼokónhas nahontsahaʼtónhake tánon noiáhsons ne sewariwihiosehʼokón꞉as, ne sewawístas ó꞉ni ne sewaienthó꞉tsheras, tánon ne sewatokenstánions ne tsi sewarahratstén꞉ni ne Roiá꞉ner.

¹² Sewatsenhnonhníhak thóh rahohénton, skátke ne ietsihiohokónhas, sewanátsheras, tánon ne Levites nahatihiaʼtó꞉tens ne thóh sewanatá꞉kon ratinákere; sewehiárak né꞉tho Levites tsi iáh othé꞉nen tahononhontsaiéntaʼne nahonawenhkón꞉weke.

¹³ Kwáh tó꞉sa ietsihiateskónhten ne sewatshenenó꞉kons ne tsiknónhwe nahisewè꞉reke;

¹⁴ kwáh thóh kók nón꞉we tsi nón꞉we ne Roiá꞉ner nenhará꞉ko ne tsi kanakerahserá꞉ien ne énska sewenhtió꞉kwa. Tót꞉kok nón꞉we nenhietsihiateskónhtake ne sewatshenenhó꞉kons tánon ne sewateriwaténhtiat tsi nikwahró꞉ri.

¹⁵ “Onk sewatatewenhní꞉io naietsinonhwarià꞉kon tánon nahisewá꞉ke noʼwá꞉ron ne sewatshenenhó꞉kons kwáh tsi nón꞉we nisewanákeres. Enwá꞉ton ne kwáh wé꞉so ahisewá꞉ke tsi nenhtitsí꞉tion ne Roiá꞉ner. Sewakwé꞉kon, né꞉ne sehioriwaká꞉ion ronatkwé꞉niens tó꞉ka ó꞉ni iáh tehonatkwé꞉niens, enwá꞉ton nahónhnheke, kwáh ki tsi ní꞉ioht ní꞉se ná꞉seke ne oskenón꞉ton oʼwá꞉ron khés ne kahentaʼkéha oskenónhton oʼwá꞉ron.

¹⁶ Ók tó꞉sa ki sewahnekíra ne rahotinekwénhsa; ó꞉nenk tsi ohontsá꞉ke enteshá꞉weron tsi ní꞉ioht nohné꞉kanos.

¹⁷ Iáh thahó꞉ten ne astatʼtse ne Roiá꞉ner nahisewá꞉ke tsi nón꞉we nisewanákere: tsi ní꞉ioht ne iahisewátkaʼwe ne sewanátsas, ne sewané꞉ka ne onenharataʼsehontsherákeri, ne sewá꞉wenk kén꞉ie ne iakeniewá꞉tha, tó꞉ka ó꞉ni nentewatié꞉renhte enkonhtewí꞉raien ne sewatshenenhó꞉kons tionónhskwarons tánon ne teiotinakaronhtòn꞉a, nathatawí꞉tsheras ne tsi sewarahratstén꞉ni ne Roiá꞉ner, ne thikánionk atatawí꞉tsheras, tó꞉ka ó꞉ni ne oiáhsons natatawí꞉tsheras.

¹⁸ Í꞉se tánon ne ietsihienʼokón꞉as, skátke ne sewaná꞉tsheras tánon ne levites ne sewanatá꞉konhs ratinákeres, ne enhón꞉neke kí꞉ken kariwihiosehʼokónhas thóh ne kók rahohénton ne Roiá꞉ner sewaNí꞉io, nénska kók tsi nón꞉we nenhonwasénhnaien tsi nihoráhkwen ne Roiá꞉ner sewaNí꞉io. Tánon thóh nón꞉we tsi ensewatsenhnonhníhak orihwakwé꞉kon tsi nisewahiotèn꞉en.

¹⁹ Orihwí꞉io kénhak, káti ó꞉ni, tó꞉sa ietsihiataʼnikónhren ne Levites, kwáh tsi nikarì꞉wes entsónhnheke ne tionhontsà꞉ke.

²⁰ “Nó꞉nen ne Roiá꞉ner sewaNí꞉io enshakowanà꞉te ne sewanakeráhsera, tsi ki nihorahrátston, enwá꞉ton nahisewahwá꞉rake ne kwáh tsiknón꞉we akénhake tsi nenhséwere.

²¹ Tó꞉ka ne tsi nón꞉we nikaráhkwen nahonwasénhnaien sóhtsi ahí꞉nonh ítken, ethò꞉ne ki, nó꞉nen ensewè꞉re, enwá꞉ton ne kwáh tsik niká꞉ien ne kaʼtshé꞉nen ahisewanonhwarià꞉kon tó꞉ka ó꞉ni teiotinakaronhtòn꞉a tsi niká꞉ien ne Roiá꞉ner tsi sewanaskwá꞉wi, tánon enwá꞉ton ne tsi sewanónhsote ahisewahwá꞉rake, tsi nikwahró꞉ri.

²² Ónhka akénhake, né꞉ne sihioriwaká꞉ion sihonatkwé꞉niens khés ne iáh tehonatkwé꞉niens, enwá꞉ton nahatiʼwá꞉rake, kwáh ki tsi ní꞉ioht nahatiʼwá꞉rake noskenónhton tó꞉ka ó꞉ni ne kahentaʼkéha oskenónhton.

²³ Nek kók tó꞉sa sewahwárat ne shé꞉kon nihiotenekwénhsa, asè꞉ken onekwénhsa tiówis nahontónhetste ne iónhnhe. Tánon káti ní꞉se iáh tehiówenk nasèhke ne iónhe noʼwá꞉ron.

²⁴ Tó꞉sa onekwénhsa satekhón꞉niat; khékok, onhwenhtsà꞉ke sawé꞉ron tsi ní꞉ioht nohné꞉kanos akénhake.

²⁵ Tó꞉ka enshatewénhnaraʼkwe kí꞉ken kariwatà꞉tshera, ne Roiá꞉ner enhawerientí꞉io, tánon akwé꞉kon tshienioiánerenhne ne sariwáhke ó꞉ni tsi nenhsatwatsirì꞉ne.

²⁶ Iahásaf ne shatatawí꞉tsheras ó꞉ni ne shaienʼthótsheras tsi nón꞉we nikaráhkwen nahionterenhnaiénhseke tsi ki nitiarahratstén꞉ni ne Roiá꞉ner.

²⁷ Thó꞉nonhwe iahástat ne kariwihiosehʼokónhas né꞉ne kwáh ahonteskónhtake ne Roiá꞉ner rahotsenharáhkwake. Káti ó꞉ni iahástat thí꞉ken kariwihiosehʼokónhas tsi niká꞉ien ná꞉sehke noʼwá꞉ron tánon nonekwénhsa ietienharáhkwake tasawé꞉ron.

²⁸ Tasethakwénhak tsi satewénhnarak orihwakwé꞉kon tsi nikonhró꞉ri, tánon akwé꞉kon tshienhioiánereʼke ne sarihwá꞉ke ó꞉ni tsi niensatwatsirì꞉ne ne tsi nénhwe, tiorí꞉wa tsi thóh nénhshiere tsi nahó꞉ten ne tkariwaié꞉ri ó꞉ni rahwerientiióstha ne Roiá꞉ner saNí꞉io.

Tó꞉sa Sehsénhnaien Ne Iáh Othé꞉nen Tekonhtenonwenhserástha Nihiohʼokón꞉as

²⁹ “Ne Roiá꞉ner saNí꞉io enshakothónte nonhkweshón꞉as tsi ieieʼtshinenhrénhten ne rahononhontsá꞉kes, tánon ensewatié꞉nawatste ó꞉ni thóh nón꞉we nenhsewatená꞉taien.

³⁰ Nó꞉nen ne Roiá꞉ner enshakothónthe thí꞉ken onhkweshón꞉as, orihwí꞉io tsón꞉ni ne tó꞉sa sewá꞉ser tsi nikarihótens ne rahotiriwihiostóntsheras, tiorí꞉wa tsi ne ensewariò꞉te. Tó꞉sa sewateʼniénten nahisewariwaʼtshénri tsi ní꞉ioht tsi konhwatiʼsénhnaiens ne rahotiní꞉ios, ne káti nahónton kwáh nonhní꞉se thóh ní꞉ioht tsi aietsisén꞉naien.

³¹ Tó꞉sa thóh ní꞉ioh thónhak tsi atsisewasénhnaien ne Roiá꞉ner sewaNí꞉io tsi nihatiʼié꞉ra tsi konhwasén꞉naiens ne rahotiní꞉ios, asè꞉ken tsi ratisénhnaiens ne rahotiní꞉ios akwé꞉kon é꞉tho nihatiʼié꞉ra ne ioteriwatehaʼsónhas né꞉ne tsi nahoʼténhsons rariwáhsons ne Roiá꞉ner. Iekaní꞉hare shakonatiaʼtatsahátha ne shakotihioʼokón꞉as tsi iotè꞉kha ne tsi ratitsenharáhkwas.

³² “Akwé꞉kon thóh naʼsewáier tsi nakwahró꞉ri; tó꞉sa othé꞉nen iaʼsewáiest tó꞉sa ó꞉ni thé꞉nen tasewatókʼtat.