Deuteronomy 10 - Ohiatonhseratokénti

Ne Mahís Shé꞉kon Sahaié꞉na Ne Oié꞉ri Nihakwénhnakes

¹ “Ethò꞉ne ne Roiá꞉ner wahakénhase, ‘Tekentstèn꞉rake sistenhrakwétar tsi ní꞉ioht ne tiotierénhton tánon oskwénhkare shenorokón꞉ni ne thóh ashetárion. Tsi kén nonhtáse ne tsi ionónhte nón꞉we,

² tánon thóhʼnon nenkhiatón꞉nion nostèn꞉rakes tsi nahó꞉tens wakhiatón꞉nionhkwe ne tesenhstenhrarí꞉tons, tánon ethò꞉ne oneróhkwakon setárion.’

³ “Káti wakatenorokón꞉ni né꞉ne acacia nakaienʼtóten wákatste tánon tekenstèn꞉rakes watkweʼtarón꞉ko kwáh ki tsi nihiotónhne ne tiotierénhton tánon tsi tionónhte niahákhawe.

⁴ Ethò꞉ne ne Roiá꞉ner é꞉tho ostèn꞉rakes wahahiatón꞉nion kwáh ne sakawénhnas tsi nitiotónhne ne tiotierénhton, ne oié꞉ri nikaianerenserákes tetsisewá꞉wi nó꞉nen shatsisewathá꞉rase ne tsi tiotè꞉kha ne sonhtontié꞉renhte sehsewatiaʼtaró꞉roke ne tsi iononhtáhere. Ne Roiá꞉ner tahá꞉kon nostèn꞉ras,

⁵ tánon thonsakatkahraté꞉ni shakanonhtátsnenhte. Ethò꞉ne, kwáh ki tsi nihakenhà꞉on ne Roiá꞉ner, oneróhkwakon waʼkethárion ne wakateʼnorokwí꞉son—tánon thóh náhe thóh sí꞉wa.” (

⁶ NʼIsraerʼró:nons tsi tiohnáwerote tahonhtén꞉ti né꞉ne Jaakanró꞉nons rahotiʼnáweras, tánon Moserah niahón꞉ne. Thóh nón꞉we ne Aaron iarénheie tánon wahonwahiaʼtáta, tánon ne roiénha Eleazar raónha tesahonaktá꞉kwen tsi rokhá꞉res í꞉ken.

⁷ Thóh ionsahonhtén꞉ti Gudgodah nionshahón꞉ne tánon ethò꞉ne Jotbathah nionhsahón꞉ne, ne thóh nón꞉we wé꞉so kahionhaténions.

⁸ Ne tsi tionónhte ne Roiá꞉ner washakohiaʼtarakwenhá꞉ton ne ronhnónkwe né꞉ne tsi ratiʼtá꞉raien ne Levi nahontenhnikónhraren nateriwaʼseronhniá꞉tshera oʼneró꞉kwa, né꞉ne tsi ahonwahiò꞉tenhse tsi rotikhá꞉res í꞉ken, tánon nahatirihowanáhthake ne kaiataterí꞉tsheras rahosénhnakon. Tánon shé꞉kon nón꞉wa thóh nihotihioʼtenhseró꞉ten.

⁹ Ne káti aorì꞉wa ne tsi ratiʼtá꞉raien ne Levi iáh othé꞉nen tehotiʼienà꞉on nohóntsa tsi ne ní꞉ioht ne ronatià꞉kes ratiʼtaraiéntons; tsi nahó꞉ten wahatiʼié꞉na ne tsi Roiá꞉ner ronhwaioʼténhse tsi rotikhá꞉res í꞉ken, kwáh ki tsi nihorahrátston ne Roiá꞉ner.)

¹⁰ “Tsi tionónhte iékesʼkwe né꞉ne kaié꞉ri niwenhniseráhsen ó꞉ni niwasonhtásen, kwáh ki tsi niwatié꞉ren ne tiotierénhton. Ne Roiá꞉ner shé꞉kon énska ionhsonterátste wahakatahónsatate tánon wahariwanónwehne tsi iáh tatsisewá꞉tonhte.

¹¹ Ethò꞉ne wahatró꞉ri ne hiáke tánon ne kwáh enkwahéntenhse, ne káti nahónton niahisewatié꞉nawatste ne tsi tiohontsá꞉ien ne tsi ni shakorahratstén꞉ni ne ietsisoʼthonkonhkén꞉en enhteshaká꞉wen.

Tsi Nahó꞉ten Ne Rawenni꞉io Rariwanónhtons

¹² “Ó꞉nen, ne tsónhkwes ne Israerʼró꞉nonhke, sewatahónshatat tsi nahó꞉ten ne Roiá꞉ner sewaNí꞉io tsi sewariwanonhtón꞉nis: Tsi sewasénhnaien ne Roiá꞉ner tánon thóh naʼsewá꞉ier tsi nihatró꞉ris. Tsi sewanó꞉ronk, tsi sewahiótenhs kwáh seweriaʼsakwé꞉kon,

¹³ tánon akwé꞉kon sewatewénhnarak ne raohianerénhseras. Ne tkwawíhons nón꞉wa wenhniserá꞉te ne ní꞉se sewahiatakeʼná꞉tshera.

¹⁴ Raónha ne Roiá꞉ner rahó꞉wenk shé꞉kon ne kwáh è꞉neken ítken ne karonhià꞉ke; tsi ionhontsáte ó꞉ni raónha rahó꞉wenk, tánon tsi nahó꞉ten ne kahawánion.

¹⁵ Ók ne Roiá꞉ner rahonoronhkwátshera tsi nikashátsteʼkwe tsi nokwáh ne sewasoʼtsheraokonhkén꞉en í꞉se watsisewahiaʼtará꞉ko tsi ní꞉ioht ne akóren nonhkweshón꞉a, tánon nón꞉wa shé꞉kon ki í꞉se rahonkweʼtashón꞉as í꞉ken.

¹⁶ É꞉tho káti, kén꞉en ienwatáhsawen tsi sewawenhnarákwak ne Roiá꞉ner tánon kén꞉en ienwatáhsawen sewátkaf tsi nisewanonhtsistaʼní꞉ron.

¹⁷ Ne Roiá꞉ner sewaNí꞉io raónha ne kwáh thóh shatstenhserowá꞉nen tsi nokwáh ne nihioʼokón꞉as ó꞉ni tsi nokwáh ne raotishatsténhseras. Tehoshatstenhseranónhiani, tánon ó꞉nenk tsi enhonwawénhnaraʼkwe. Iáh ká꞉neka teʼthariwaráhkwa, akwé꞉kon ne raoiatoreʼtá꞉tsheras tsi tkariwaié꞉ri.

¹⁸ Orihwí꞉io rón꞉nis ne tehontonhnaká꞉rias ó꞉ni ne ionaterè꞉ons ioiánere tsi takonhwatiriwásnieʼse; shakonorónhkwa ne thihononhontsá꞉tes ne skátke ratinákeres nonhtionhkweʼtashón꞉a, tánon shakonónhtens ó꞉ni shakotaʼkweniá꞉wis.

¹⁹ É꞉tho káti, sewè꞉nest ne sewanoronhkwátshera rononhà꞉ke ne thihononhontsá꞉tes, tiorí꞉wa tsi í꞉se ó꞉ni thitionhontsatekén꞉en ne Egypt nón꞉we.

²⁰ Skweniénstak ne Roiá꞉ner saNí꞉io tanon rahonhatsí꞉wak kók entsenhnaiénseke. Sariwatokénhak ne raonhà꞉ke tánon nensaráhratste rahoshén꞉nakon kók kénhak.

²¹ Teʼtsenonhweratónsek—raónha ne Ianí꞉io, tánon kwáh í꞉se sewakárake sewatkáton ne tehiotenonhianiʼténions ó꞉ni iorihwanerakwaʼténions tsi nihoieránion ne sewarihwà꞉ke.

²² Nó꞉nen ne ietsisoʼthonkonhkén꞉en Egypt shiahón꞉ne, tsáta kók nihatihiathásen nihátikwe. Ók ki nón꞉wa ne Roiá꞉ner sewaNí꞉io thóh nió꞉re tsi sewenhtioʼkowanáston tsi ní꞉ioht ne tsi iotsistohkwarón꞉nions ne tsi karonhiá꞉te.