Daniel 9 - Ohiatonhseratokénti

Daniel Wahshakoterennaiénhase Ne Raonkweʼtaʼshón꞉ʼa

¹ Darius né ne Mede nahanekwenhsó꞉ten, né ne Xerxes roʼníha, ne sahonwanontí꞉iohste ne Babylonia non꞉we.

² Ne shontontohseratiérenhte shihonontí꞉io, kateweienstháhkwe ne kahiatonhseratokénhti tánon onkeʼnikonrahién꞉taʼne ne tsáta niwáhsen niiohserá꞉ke nʼetho Jerusalem tsi nenkanatén꞉taʼne, entioianénhawe tsi nahò꞉ten ne Roiá꞉ner rohró꞉ri ne rotokenhséhakwe Jeremiah.

³ Onkentóntiehte, ká꞉iare waʼkatsheronniáʼton, tánon ne waʼkenhrontákwen wahkatathakenráh꞉ko. Tánon iaʼtewakonniá꞉ton wakaterénnaien riianitenhtá꞉se ne Roiá꞉ner Rawenni꞉io.

⁴ Wakaterénnaien raonhá꞉ke ne Roiá꞉ner Akeʼní꞉io ó꞉ni waʼakwarihwahní꞉rate tsi niionkwarihwané꞉ren. Waʼkí꞉ron “Saiá꞉ner Ní꞉io, tesatenonhianíhton, tánon kwakweniénhstha. Iorihwatóken ne sahrharatstátshera, ó꞉ni ne sanonronhkwáhtshera tánon tsi niiá꞉kon ne iesanorónhkhwa ó꞉ni iesawennaráhkwa.

⁵ “Ionkwarihwané꞉ren, teionkwaterienʼtawenriéʼon. Watkwawénneke tsi nihskwarihwatá꞉ti naʼionkwaióʼten tánon ionkwatahróntion tsi nihskwanaʼtón꞉ni ne tkarihwaié꞉ri.

⁶ Iáh teiakhiiatahonhsatá꞉ton ne sanhaʼtsheraʼó꞉kons ne rotitokenhséhahkwe, sahsén꞉nakon tsi tehatihthárhahkwe ne ionkhinontí꞉ioskwe, ó꞉ni ne ratikó꞉ras iakhishotonkonkénhens, tánon akwé꞉kon ne ón꞉kwe nʼetho nón꞉we niʼienákere.

⁷ Í꞉se Saiá꞉ner ne kaiá꞉neren, ók nonkwatiaʼkéshon tió꞉konte ne ionkwaró꞉ron ne iáh teiotkwéniens. Ne ki ne kwáh eʼtho ní꞉ioht tsi niiátion ne Judah tánon ne Jerusalem nón꞉we niiakwanákere tánon ratikwé꞉kon ne Israerʼró꞉nons tsi niká꞉ien ne aktéshon nón꞉we tionhontsaké꞉rons iaʼtehsheiareniá꞉ton, aktatiéʼshón꞉ʼa ó꞉ni ahinónhshons niió꞉re, ne tsi iáh tehotirihwatokén꞉ne ne sonhá꞉ke.

⁸ Ne onkwanontiióʼtsheras, ó꞉ni ne ionkihéntenʼse, tánon ne iakhisothokonʼkénhens thitkáhere naʼtehénhsera tsi nihotiieránion tánon wahatirihwanéraʼke tsi nokwá ní꞉se, Saiá꞉ner.

⁹ Í꞉se ne satanitenrátskon ó꞉ni tsisaʼnikónrhehns, iaweronhátien tsi iáh tekwawennaráhkwen.

¹⁰ Iáh tekwawennaráhkwen, O Saiá꞉ner ónkwa Ní꞉io, ne shaskwahró꞉ri ne aiakwáhsere tsi nitehskwá꞉wi ne kaianerénhseras tsi nitiawé꞉non ne sanhaʼtsheraʼokonʼkénhens ne rotitokenhséhakwe.

¹¹ Onkweʼtakwé꞉kon ne Israerʼró꞉nons tehotiiá꞉kon ne saianerénhsera tánon iáh tehonathontá꞉ton naiesatahónhsatate. Waʼakwarihwané꞉raʼke tsi nokwá ní꞉se, eʼthó꞉ne káti tahskwatenniéhten ne kahrewahtáhtshera tsi nikahiá꞉ton ne Mahís raoianerenhserá꞉kon, né ne sanhátshera.

¹² Wahsatatewennaiérite tsi ní꞉sen ne tsi nenhskwaié꞉raʼse tánon ó꞉ni ne ionkhikoráhshon. Wahsréwahte ne Jerusalem sénha waoteʼserowanáhten tsi ní꞉ioht ne aktéshon nón꞉we nikanataién꞉tons nonhwentsià꞉ke.

¹³ Tsi táhstion akwé꞉kon ne kahrewahtáhtshera tsi ní꞉ioht tsi kahiá꞉ton ne Mahís raohianerenhserá꞉kon. Shekiʼnón꞉ne, O Saiá꞉ner onkwá꞉wen Ní꞉io, iáh teionkwateniénten naontakwaʼnikonhraié꞉rite né ne taonsaionkwatkarhaténion tsi nokwá nonkwarihwanerenʼáktshera tó꞉ka ó꞉ni ne aionkwáhseron ne sawennatokénhti.

¹⁴ Í꞉se, O Saiá꞉ner, onkwá꞉wen Ní꞉io, saweiennentaʼón꞉ne naskwahréwahte, ó꞉ni eʼtho náhsiere, ne tsi tió꞉konte né ne tkarihwaié꞉ri ne thé꞉nen nénhsiere, ók iáh tekwawennaráhkwen.

¹⁵ “O Saiá꞉ner, onkwá꞉wen Ní꞉io, seʼnéhston ne saʼshatsténhsera tsi tahsheiaʼtínekenhwe ne sonkwé꞉ta ne Egypt, tánon ne saʼshatsténhsera shé꞉kon niiakwé꞉iare. Ionkwarihwané꞉ren; teionkwaterientawenrié꞉on.

¹⁶ O Saiá꞉ner, tsi nitiawé꞉non seriwahnirá꞉ti ne sarihwatokenhtíhtshera ne Israerʼró꞉non, ne katiʼ aorì꞉wa nasathontátsheke ne táhstaʼne tsi shenaʼkhwáse tsi rotinátaien ne Jerusalem. Í꞉se saná꞉ta, tánon ne sanonhsatokénhti. Akwé꞉kon ne thihotitiohkwaténion niakwaiaʼtaktóntie ratinakerénion ratikenhrón꞉ni ne saná꞉ta, tánon ó꞉ni ne sonkweʼtaʼshón꞉ʼa ne tsi nihotirihwanéren nonkwahsótshera ó꞉ni nonkwatiaʼkéshon.

¹⁷ O Saiá꞉ner Onkwaʼní꞉io, sathóntek nakwaterénnaient tánon tsi konianiténhtase. Sasenonhsahserón꞉ni ne sanonhsatokenhtiʼkó꞉wa, tsi naʼtekahríhton; saskwatá꞉ko ehʼnaontáwe onkwétakwe aiakoterién꞉taráʼne tsi í꞉se ne Ní꞉io.

¹⁸ Takwatahónhsatat, O Sewenní꞉io; takwakenʼén꞉ion ó꞉ni satkáhtho tsi natekanikónrhare tsi non níiakwe tánon tsi niiotkenhrenserón꞉ni ne kanatowá꞉nen ne saná꞉ta. Iséʼke nón꞉we niionkwaterénnaien ne tsi sanitenráhtskon, iáh né té꞉ken tó꞉ka ken ne tsi ionkwatonkweʼtakwaríhshon.

¹⁹ Saiá꞉ner, takwathóntek; Saiá꞉ner, saskwaʼnikónrhens. Saiá꞉ner, takwathóntek, ó꞉ni tsi thé꞉nen knátiere! Onhnaiá꞉wenʼne onkweʼtakwé꞉kon aiakotókense tsi í꞉se ne Sawenní꞉io, tóhsaʼ satenʼnískwat! Kí kaná꞉taien tánon ne ienákere í꞉se sáwenk.”

Kabriér Wahaʼnikonhraiéntahte Tsi Neniawénhseron

²⁰ Iaʼkatahshónteren tsi wakaterénnaien, kerihwahní꞉rats nakerihwanerenʼáktshera ó꞉ni ne raotirihwanerenʼáktsheras nakonkweʼtaʼshón꞉ʼa Israerʼró꞉non ó꞉ni riianitenhtá꞉se ne Roiá꞉ner Akeʼní꞉io naonsahanonhsahserón꞉ni ne raononhsatokenhtiʼkó꞉wa.

²¹ Tsi nikarí꞉wes wakaterénnaien, ne Kabriér, tsi niká꞉ien rí꞉ken ne tiotierénhton tewakatetshén꞉en, tontahatá꞉senhte tsi nón꞉we níkeskwe. Eʼtho shikahá꞉wi tsi nihotirenhaʼón꞉ne ne oʼkarahsnéha katshé꞉nen enkonwatsiaʼtátshaʼahte.

²² Wahaʼnikonhraiéntaste, “Daniel, kénʼen nontá꞉ke nakonsniénon naesaʼnikonhraién꞉taʼne tsi neniawénhseron.

²³ Shontahsatáhsawen, watshaniténhten ne Rawenni꞉io, waʼthiarihwaʼserákwaʼse. Ianorónhkhwa ne Rawenni꞉io, né kátiʼ aorì꞉wa kénʼen nontá꞉ke naʼontakonhroriá꞉na nahò꞉ten kénton. Kwáh satahónhsatat tsi nenkeʼnikonhraiéntahte natetshénhsera.

²⁴ “Tsá꞉ta niiorì꞉wake ne tsá꞉ta niwáhsen niiohserá꞉ke nikarí꞉wes ne Rawenni꞉io roteʼnienténhston ensehshakohnerénhsi ne sonkweʼtaʼshón꞉ʼa tánon ne sanatatokénhti tsi nihotirihwané꞉ren tánon tsi nihonnonkweʼtahétken. Enskaʼnikonrhén꞉en ne karihwané꞉ren tánon enskakwatákwen ne karihwakwarihshóntshera tsi nén꞉we, eʼtho naontá꞉we ne atetshénhsera tánon ne iekarí꞉waken né naiá꞉wenʼne, ó꞉ni ne ononhsatokenhtiʼkó꞉wa enskarihwatokénhston.

²⁵ Satenʼnikón꞉raren kí꞉ken tánon saʼnikonhraiéntaʼn tsi nikahá꞉wi naontontáhsawake naonsakahserónnike ne Jerusalem tsi niió꞉re iénrawe tsi niká꞉ien ne Rawenni꞉io roiataráhkwen, tsá꞉ta niiorì꞉wake ne tsá꞉ta niiohserá꞉ke enwatóhetste. Eʼthó꞉ne enskakwatákwen ne Jerusalem tsi tekanatokenhá꞉tons ó꞉ni enhatiʼshátsteke naontahontaténhe, ó꞉ni eʼtho nenióhton né ne tsá꞉ta niiorí꞉wake ne iá꞉iaʼk niwáhsen tékeni niiohserá꞉ke, ók né ne entkáhawe ne taionʼnikonrhá꞉ren.

²⁶ Ne nó꞉nen ienwatókten enhonwário ne Rawenni꞉io raonkwé꞉ta ne kwáh iáh thé꞉nen thahonhí꞉kon. Ne kanatowá꞉nen ó꞉ni ne ionterennaientáhkhwa tenkaríhton ne tsi enhshakonenhrénhten tsi niká꞉ien ne Rawenni꞉io roiatarákwen nákte non nithawé꞉non ne kwáh roʼshatstenhserowá꞉nen rakó꞉ra. Ne tsi ienwatókten eʼtho neniá꞉wenʼne tsi ní꞉ioht nawenhnó꞉ton, tsi enwaterí꞉ioke ó꞉ni ne karihwaiesátshera tsi eʼtho ní꞉ioht tsi rokwatákwen ne Rawenni꞉io.

²⁷ Ne iénwawe ne tsá꞉ta niiohserá꞉ke nétho rakó꞉ra ioianerenhserahní꞉ron tsi enʼhonterihwahserón꞉ni nonkwehshón꞉ʼa. Ahsén꞉non nienhawé꞉non enharihwáhtonte akwé꞉kon ne tsi nonkwá ne karihwiioseʼokónʼa ó꞉ni tsi ní꞉ioht tsi ratiró꞉roks tsi nithonwá꞉wis ne Rawenni꞉io, tánon ók knahò꞉tenʼk tsi nateiotenonhianíhton kariwahétken ienhá꞉ren ne kwáh è꞉neken tiótte ne tsi ionterennaientáhkhwa, tánon eʼtho entká꞉rake tsi niió꞉re ne Rawenni꞉io è꞉ren enhoiaʼtenháwihte ne tsi niká꞉ien ne eʼtho iehóhere kwáh tsi nihoteʼnikonhríson.”