Daniel 4 - Ohiatonhseratokénti

Nebuchadnezzar Tekeníhaton Sahotétshen

¹ Né ne Ronnontí꞉io Nebuchadnezzar roteriʼwaniehtonhátie. Kwáh tsi niaʼteiakahwentsiá꞉ke nonkwehshón꞉ʼa, tsi naionsohkoténhake, oh naiewennoténhake, ne tsi ionhwentsià꞉te: “Waʼtkwanonhweráton. Ne sewataʼkaritáhtshera kwáh iakaié꞉rike!

² Kwáh wakerienʼtí꞉ios nakonhró꞉ri ne iorihwanehrakwáhtenions ne Roʼshatstenhserowá꞉nen Rawenni꞉io rakerihotahshién꞉ni.

³ Tsi naʼteiotenonhianíhton ne ionehrákwaʼt, Rawenni꞉io shonkwarihotahshién꞉nihs! Tsi nikasatstenhserowá꞉nens ne iorihwanehrakwahténions tsi nihaieránions! Rawenni꞉io seʼ enhonontí꞉ioke tsi nén꞉we; kwáh tió꞉konte tsi raónha enthoniarotárhon!

⁴ “Í꞉i ne wakenontí꞉io kiʼteróntahkwe nakenontiioʼtserá꞉kon, tewakatará꞉kare tánon ne konhnhétie ne kowá꞉nen akatshoʼkowáhtshera.

⁵ Nók onkatétshen né iotetshenhserátteron tánon iotteronhtónnionʼs waʼkatkahthóhseron tsi náhe wakí꞉taskwe.

⁶ Iaʼkheiateriʼwaniéhten ratikwé꞉kon ne kanontiióʼtshera aonkweʼtaʼshón꞉ʼa né rontenʼnikonhrattókhaʼs ne Babylón꞉ke, nahontahón꞉ne akʼhén꞉ton, né naontónhsheke naionkró꞉ri nahò꞉ten neʼ kéntonhs kí atetshénhsera.

⁷ Eʼthó꞉ne káti ratikwé꞉kon ne shakonathiatonhseratkènse, tehontierónnionhs, niaʼtehotirí꞉wake, tánon né tsi iotsistohkwarónnion ronatewéienston tahonwatiiaʼténhawe, tánon waʼkhehró꞉ri nakwatetshénhsera, nok iáh kiʼ tehotikwénion naionkeʼnikonhraientahtén꞉ni.

⁸ Eʼthó꞉ne Daniel tahatáweiaʼte. (Ne Daniel Belteshazzar, rihsenná꞉wi né natiatón꞉ni riwenniióhstha raohsén꞉na.) Ne raoʼnikòn꞉ra né Rotokénhti Rawenni꞉io nikwé꞉kon, sók kiʼ wahihró꞉ri nahò꞉ten wakatetshénʼen. Wahienháhse:

⁹ Belteshazzar, shekowá꞉nen ne shakonathiatonhseratkénʼse, konhró꞉rihs nakatetshénhsera né tsi wakaterién꞉tare né raoʼnikòn꞉ra ne Rotokénhti Rawenni꞉io tsi senikwé꞉kon tánon ó꞉ni saʼnikonhraién꞉taʼs akwé꞉kon né ioteriʼwahséhton. Takró꞉ri nahò꞉ten kéntonhs ne wakatetshén꞉en.

¹⁰ “Tsi náhe wakí꞉tahskwe, waʼkatkáhtho teiorontanón꞉niaʼni shaʼteionhwentsí꞉hen iorón꞉tote shaʼteionhwentsíʼhen ne tsi ionhwentsià꞉te.

¹¹ Kwáh waʼkarontowánnha ó꞉ni waʼkarontéshaʼne tsi niió꞉re iahón꞉we tsi tiohtsiʼkerarónnion tánon iontòn꞉onʼ ne kwáh ohwentsakwé꞉kon aiontkáhtho.

¹² Naonerahtaʼshón꞉ʼa kwáh í꞉ken tsi kontkahthohtsherí꞉io, tánon akwah khitioʼrhó꞉ron ne káhik—iaʼtekaié꞉ri tsi ní꞉kon iohién꞉ton nonhwentsakwé꞉kon aiòn꞉iake. Kontírio ionatoríshen tsi iorahkwakwerhóston, otsiʼtenʼokón꞉ʼa konttsiʼnahkónnihs tsi ionhahtón꞉ton, tánon kwáh tsik ónhka ne iakónnhe iotòn꞉on naiòn꞉iake.

¹³ “Tsi náhe né kanonhtonniónkwas, tsi nahò꞉ten waʼkatkáhtho, raronhiaʼkehró꞉non wahí꞉ken tahoʼtsnenhtonhátie karonhiá꞉ke, kwáh rotateweiennentáʼonʼ ó꞉ni tehatkahthónnions.

¹⁴ Kwáh wahatewénnatehte, ‘Seróntiaʼk tánon tetsà꞉khon naoʼnenhraʼshón꞉ʼa; senerahtoskarónko tánon tesaréniaʼt naohikʼshón꞉ʼa. Sheiatékwahʼt ne kontírio ne karontó꞉kon ó꞉ni notsiʼtenʼokón꞉ʼa ne aoʼnenhraʼkéhshon.

¹⁵ Nók ethóke iotsinaʼahrótak ó꞉ni seristó꞉ten tánon seronkwahsánerenʼk. Thóʼiohniótak kahentà꞉ke ó꞉ni ohontó꞉kon. “‘Ó꞉nen kiʼ roʼáweiahst kí rón꞉kwe, tánon ó꞉ni kontírio skátne ratiʼteróntak ó꞉ni tsi nahò꞉ten tkàniohs.

¹⁶ Tsá꞉ta niiohserá꞉ke iáh eʼtho thaonsahoʼnikonhroʼténhake tsi ní꞉ioht nón꞉kwe, nók thoʼnenshoʼnikonhró꞉ten tsi ní꞉ioht ne kário.

¹⁷ Né kiʼ tsi nihonohétston nowennaʼshón꞉ʼa ne ratironhiaʼkehró꞉non tsi nihonatateweiennentáʼon tánon ratiʼnikón꞉rare. Ne iorihón꞉ni akwé꞉kon nonkwehshón꞉ʼa aiakoterién꞉taraʼne ne Roʼshatstenhserowá꞉nen Rawenni꞉io kwáh thishakowenní꞉io ne tsi kanontiiotsherakè꞉ron tsi ionhwentsá꞉te tánon ó꞉ni kwáh thenhanónhton nónhka aontahshakáwen ne kaʼshatsténhsera kwáh tsi nenthanón꞉weʼne—shé꞉kon ó꞉ni ne kwáh kenʼ naontaiehsennáhska.’”

¹⁸ Eʼthó꞉ne ne Ronnontí꞉io Nebuchadnezzar wahén꞉ron, “Né kí ne wakatetshé꞉nen. Ó꞉nen kiʼ, Belteshazzar, takró꞉ri nahò꞉ten kénton. Iáh ónhka tsi ní꞉kon wakonkwé꞉taien ne rontenʼnikonhrattókhas tehotikwénion naionkró꞉rike, nók í꞉se kiʼ enhskwé꞉ni, àseʼken né raotiʼnikonhraʼshón꞉ʼa ne rotiiaʼtatokenhtíshon thikaniiotsherá꞉te ratì꞉teron sonhà꞉ke.”

Daniel Wahanikonraién꞉tate Natetshénsera

¹⁹ Eʼthó꞉ne, Daniel, raónha ó꞉ni Belteshazzar ronwá꞉iats, tsi nontahatónʼneke iáh tehokwénion ne thé꞉non ahá꞉wenke. Ne ronnontí꞉io wahawénhahse, “Belteshazzar, tóhsa natetshénhsera ó꞉ni tsi nikénton tisatonʼnékten.” Belteshazzar tonsaharihwaʼserá꞉ko, “Sanontí꞉io, aiá꞉wens ne eʼtho atetshénhsera tánon tsi nikaʼnikonhraientáhtha né ne iesáhswenhs aiakotónheke nók iáh ní꞉se.

²⁰ Kí iorón꞉tote né wahsatkáhto, tsi niiorón꞉tes iéwahs ne tsi tiohtsikerarónnion, iotón꞉on nonkweʼtakwé꞉kon ne tsi ionhwentsià꞉te aiontkáhtho.

²¹ Tsi niwatkahthohtsherí꞉io naonerahteʼshón꞉ʼa, tánon iaʼtekaié꞉ri tsi ní꞉kon iohienʼtónhahkwe nonhontsakwé꞉kon aiontátenonte. Kontírio eʼtho aoʼnenhró꞉kon kontorishentáhkwahkwe, tánon notsiʼtenʼokón꞉ʼa aoʼnenhrá꞉ke konttsiʼnhakón꞉niskwe.

²² “Kí karòn꞉ta, Sanontí꞉io, né ne í꞉se! Sakowanhà꞉on ó꞉ni saʼshatstenhserowannhà꞉onʼ. Ne tetsitsatié꞉ren ne kwáh karòn꞉tes ne iekaníharaʼs ne tsi tiohtsikerarónnion. Tánon ne saʼshatsténhsera tsik nonwéhshon non ne tsi ionhwentsiá꞉te iekaní꞉haraʼs.

²³ Í꞉se, Ó Sanontí꞉io, tsi nikarí꞉wes tehskánerahkwe, raronhiaʼkehró꞉non karonhiá꞉ke tahátsnenhte tánon rá꞉ton, ‘Seròn꞉tiaʼk tánon tésriht, nók eʼtho iotsinaʼahró꞉tak nonhontsà꞉ke. Otsinaʼahrákta seristó꞉ten tánon seronkwahsánerenk, tánon tho ohontó꞉kon iohnióʼtak. Tánon roʼáweiahst kí rón꞉kwe, ó꞉ni eʼthoʼ ratikwekón꞉hak ne kontírio tsá꞉ta niiohserá꞉ke nikarí꞉wes.’

²⁴ “Né ki tsi nahoʼténshon kéntonhs, Sanontí꞉io, ó꞉ni ne ki tsi nahò꞉ten ne kwáh Roʼshatstenhserowá꞉nen Rawenni꞉io iaʼthorihwaién꞉taʼse tsi nensaiá꞉tawen.

²⁵ Eniesanakerákwahte tsi nón nihón꞉nes nonkwehshón꞉ʼa tánon kontírio skátne entsiʼsewakwekonhatié꞉sheke. Tsá꞉tak niiohserá꞉ke óhonte khók ensesékʼsheke tsi ní꞉ioht ne teiotiná꞉kares tionhónskwaront ó꞉ni kenʼk nón꞉we tsi iówerare non nenhsanonhwétsheke, thoʼ ó꞉ni nón꞉we nensaʼáweiahste. Tsi niaʼtenhsókten ne tsá꞉ta niiohserá꞉ke enhserihwahní꞉rate ne kwáh Roʼshatstenhserowá꞉nen Rawenni꞉io tehshakoniarotárhon onkweʼtakwé꞉kon tsi nón꞉we ne kanontiioʼtsherakéron tsi ionhwentsià꞉te tánon ó꞉ni kwáh thenhanónhton ónkha ahshakoiaʼtará꞉ko naiontenontí꞉iohste.

²⁶ Ne raronhiaʼkehró꞉non wahaténnhaʼne né tho aiotsinaʼahró꞉take nonhwentsià꞉ke, ne kí karihwahní꞉rats tsi shé꞉kon ensehsatenontí꞉iohste, né nó꞉nen enhserihwahní꞉rate tsi Rawenni꞉io seʼ rahsharí꞉ne ne tsi ionhwentsià꞉te.

²⁷ Eʼtho káti, Sanontí꞉io, tsé꞉na tsi nenkoniatenʼnikónron. Sáhtkawh tsi nisarihwanerenenhátieʼs, ne tho nátser ne tkarihwaié꞉ri, ó꞉ni saiéntak natanitén꞉ron tsi nonkwá꞉ti ne iakó꞉ten. Eʼtho꞉ne ienwatahshónteren naesaianeráhsten.”

²⁸ Né kí norihwakwé꞉kon tsi nihoiatawénhseron ne Ronnontí꞉io Nebuchadnezzar.

²⁹ Tsóhsera ohnaʼkènke tsi náhe thotetshén꞉enʼ, tehoteʼkhahahkwenhátieskwe tsi nón꞉we ne ioteronhkweʼnakwaríhsion tsi karonhkweʼnáhere ne tsi ronónhsote ne raonontiioʼtsherá꞉kon ne Babylon.

³⁰ Ne ronnontí꞉io wahén꞉ron, “Sewatkáhtho tsi niionatatshà꞉ni ne Babylon! Ne wakonniá꞉ton nʼakanatakweʼní꞉ioke naweʼnéhston nʼakesatsténhsera ó꞉ni teiotenonhianíhton, nʼakerenhsarónhtshera ó꞉ni kahsennowá꞉nen.”

³¹ Nʼohén꞉ton nʼiahatewennókten, karonhiá꞉ke nontá꞉we ne Rawenni꞉io wahén꞉ron, “Sanontí꞉io Nebuchadnezzar, satahónhsatat tsi nahò꞉ten enkonhró꞉ri. Ó꞉nen waʼkónhkhwa ne sashatsténhsera tsi nón꞉we nisatenontiióhston.

³² Eniesarékwahte tsi ratí꞉teron nonkwehshón꞉ʼa, kontírio ientsisewakwekónhake, ó꞉ni óhonte ensehsonʼnhéhkwen né tsá꞉ta niiohserá꞉ke tsi ní꞉ioht ne tiohnhónskwaron teiotinà꞉kares. Eʼthó꞉ne enhserihwaní꞉rate ne Roʼsatsthenhserowá꞉nen Rawenni꞉io tsi raoʼshatsthénhsera í꞉kate tsi kanontiioʼtsheraké꞉ron tsi ionhwensià꞉te tánon raónha enthanónhton ónhka ahshakoiaʼtará꞉ko naiontenontí꞉iohste.”

³³ Kwáh óksak eʼtho naʼá꞉wenʼne tsi nithonwahró꞉ri. Nebuchadnezzar wahonwanakerákwahte tsi nón꞉we niienákere nonkwehshón꞉ʼa ne tsi ionhwentsià꞉te tánon ó꞉ni óhonte wà꞉rake tsi ní꞉ioht ne tiohnhónskwaron teiotinà꞉kares. Wahoʼáweiahste ne raiaʼtá꞉ke, tánon wahononhkwiseré꞉shaʼne tsi ní꞉ioht ne à꞉kweks ohsthóseri ó꞉ni waʼthatsiʼeré꞉shaʼne tsi ní꞉ioht ne otsiʼtén꞉ʼa tsi tewaʼehtóntons.

Nebuchadnezzar Wahosénnaien Ne Rawenni꞉io

³⁴ “Shontóhetste ne tsá꞉ta niiohserá꞉ke,” wahén꞉ron ne ronnontí꞉io, “Iaʼkatkáhtho ne tsi tiohtsíkerare, tánon kwáh ionsakeʼnikonhraié꞉riʼne. Wahihsénnaien ne Roshatsthenhserowá꞉nen Rawenni꞉io ó꞉ni wahikwénienhste tánon ne raoiaʼtanehrakwáhtshera tsi niká꞉ien ne ronnheʼón꞉we. Kwáh tsi nén꞉we enhawenní꞉ioke, tánon ó꞉ni ne raonakeráhsera tsi nén꞉we enkátake.

³⁵ Ne ronnonhwentsakehró꞉non kwáh iáh thé꞉nen karí꞉wa té꞉ken tsi tehshakoká꞉nere; ratironhiaʼkehró꞉non tánon ne ronnonhwentsaʼkehró꞉non kwáh ratikwé꞉kon raónha tehshakoniarotárhon. Iáh ónhka thaiekwé꞉ni ne tahonwátahste, tókaʼ ó꞉ni ahonwariʼwanóntonhse onhnihatiérha.

³⁶ “Né shaʼtontakeʼnikonhraié꞉riʼne, Rawenni꞉io tontahá꞉kon né kakwenienstáhtshera, nʼakenontiióʼtshera ó꞉ni naoiatanehrakwáhtshera. Nakonkweʼtaʼshón꞉ʼa ó꞉ni ne ratihsennowá꞉nenʼs tonsaionkwarhó꞉ton, ó꞉ni tontaión꞉kon né kanontiiòhtshera aoʼshatsthénhsera, tánon ó꞉ni sénha kowá꞉nen né kakwenienhstháhtshera tsi nitiohtónʼne.

³⁷ “Ó꞉nen káti, í꞉i, Nebuchadnezzar, enhihsénnaien, tenhirénhsaron, ó꞉ni enhiiatanehrákwahte né Ronnontí꞉io né Karonhià꞉ke Thèn꞉teron. Kwáh tsik nenhá꞉iere akwé꞉kon tkarihwaié꞉ri ó꞉ni thoriwaié꞉ri, tánon ó꞉ni enhakwé꞉ni ne tahshakawentshó꞉ten ónhka ne iontatón꞉ni.”