Daniel 10 - Ohiatonhseratokénti

Daniel Wahotétshen Tsi Kaniataratátie Ne Tigris

¹ Ne ahsénhaton shiiohserakehátie, né ne Cyrus shihakó꞉ra ne Persia, wahonwarihotáhshien ne Daniel, raónha ó꞉ni Belteshazzar ronwá꞉iats. Norí꞉wa kwáh í꞉ken, tsi tó꞉kenhske í꞉ken ók iohní꞉ron naiakoʼnikonhraién꞉taʼne. Atetshenhserá꞉kon tsi wahonwaʼnikonhraientáhten.

² Neʼtho shikahá꞉wi í꞉i, Daniel, áhsen niiahiakserá꞉ke shiwakatshonniónhkwen.

³ Iáh thé꞉nen tewaké꞉kon ne iokhwáreʼsens iáh ó꞉ni tewakeʼwahrá꞉kon, iáh ó꞉ni tewaknekí꞉ren notsì꞉tsa, iáh ó꞉ni tewakatkerothíhen tsi niió꞉re iahontóhetste náhsen niiahiaʼkserá꞉ke.

⁴ Ne tewáhsen kaieríhaton shiwenhniserakéhaton ne shontontenhniʼtatiérenhte, kaniatarákta iktáhkwe ne Tigris.

⁵ Waʼkatahrakétsko tánon ónhkaʼk waʼkhéken ne kwáh waniaʼtarí꞉io iakothseronniá꞉ton ó꞉ni iakotiaʼtánhen ne kwáh kahwistanoronʼtsherí꞉io.

⁶ Ne raieròn꞉ke éhthoh ʼnaʼteiohstaráthe tsi ní꞉ioht ne kwáh kanenianó꞉ron. Ne rakonhsà꞉ke tho nateiohswáthe tsi ní꞉ioht nó꞉nen tewaniʼneʼkaraʼwánions, tánon ne rakahraʼkéshon tsi ne ní꞉ioht nótsire. Ne ranentshaʼkéshon ó꞉ni ne rahsinaʼkéshon teiohstaráthe tsi ní꞉ioht nó꞉nen tekahstarathé꞉ton ne kwénnis, tánon tsi róhthare ne teskaieróntare tsi shí꞉ken ní꞉ioht ne kwáh iakotiohkowá꞉nen.

⁷ Kwáh akonhá꞉a khók wahí꞉ken. Tsi nihá꞉ti ne skátne iákwesʼkwe kwáh ne iáh thé꞉nen tehonatkáhthon, nok tsi nahonateronhiénhten wahonté꞉ko tánon wahontáhsehte.

⁸ Akonhà꞉ak khók iaʼtesewakatatén꞉ron, wakerihwanehrakó꞉on tsi tekká꞉nere. Kwáh iáh thé꞉nen teséksta, tánon watkatskennennatón꞉ten iáh tó꞉ka ónhka thaonsaiontién꞉tereʼne.

⁹ Shahiwenná꞉ronke, onhwentsià꞉ke watiaʼtaién꞉taʼne onkeʼnikonhráhton thiekkonhskárhate tsi ietiá꞉taien.

¹⁰ Ónhkaʼk kahtsaʼnà꞉ke iaontié꞉na tánon tonsaionkentshó꞉ten; shé꞉kon niwatiaʼtishónhkwa.

¹¹ Ne raronhiaʼkehró꞉non wahakénhase, “Daniel, ianorónkhwa ne Rawenni꞉io, téstaʼn tánon kwáh ákta tsi satahónhsatat tsi nahò꞉ten enkí꞉ron. Sonhà꞉ke taionkató꞉ri.” Ne né shahèn꞉ron, tonsáktaʼne shé꞉kon niwatiaʼtishónhkwa.

¹² Eʼthó꞉ne sahén꞉ron, “Daniel, tóhsaʼ sáhteron. Ne Rawenni꞉io wahothón꞉teʼne ne saterénnaienʼt kwáh shontontenhniseratiérenhte ne shiaʼtesarihwaién꞉taʼse ne ehtà꞉ke wahsatatón꞉ni eʼtho naontáwe aesaʼnikonhraién꞉taʼne. Né tákhawe ne tekarihwaʼserákwen ne saterénnaienʼt.

¹³ Ne raronhiaʼkehró꞉non ne tehshakónhes tsi kanakerahserá꞉ien ne Persia tewáhsen énska niwenhniserá꞉ke wahatioʼtátshe. Eʼthó꞉ne Wíshe, raónha ó꞉ni nohén꞉ton ié꞉rate ne ratironhiaʼkehró꞉non, tá꞉re wahatié꞉nawaʼse, né tsi iaʼtewatiatístonʼne ne Persia nón꞉we.

¹⁴ Tá꞉ke nakonʼnikonhraientáhten tsi nenhotiiá꞉tawen ne sonkweʼtaʼshón꞉ʼa ne tsi nienhénwe. Ki atetshénhsera né ne watró꞉ris tsi nahoténshon tá꞉we.”

¹⁵ Tsi né shahén꞉ron, onhwentsià꞉ke thiaʼtewakkahrotá꞉on iáh tesewakkwénion naonsonkatá꞉tike.

¹⁶ Eʼthó꞉ne ne raronhiaʼkehró꞉non, ne teskaieróntare nón꞉kwe, tontaháhtsatate iahaié꞉na ne tsikshaká꞉ronte. Wahiiénhase, “Sénhshie, ki atetshénhsera kwáh í꞉ken tsi waktsiʼiohátha tánon iáh tewahtkàwahs tsi watiaʼtiʼshónhkwa.

¹⁷ Ne teskatatierontáhrha tsi ní꞉ioht ne ranáhskwa raohén꞉ton í꞉rate ne raokóswe. Oh ní꞉ioht tsi akonhthárhase? Iáh thé꞉nen tesewakeʼshatstenhserá꞉ien iáh ó꞉ni tesewakonriserá꞉ien.”

¹⁸ Shé꞉kon énska ionsaká꞉ienhte ionsahatié꞉na, ó꞉ni waʼkáttoke sakeʼshátstenʼne.

¹⁹ Wahén꞉ron, “Ianorónhkhwa ne Rawenni꞉io, tóhsa kátiʼ thé꞉nen tesatateʼnikonrhá꞉ren tóka ni ó꞉ni aesahterónhkwen.” Ne né shahén꞉ron, ó꞉nen sénha sakeʼshátstenʼne ók waʼkí꞉ron, “Sénhshie, takró꞉ri tsi nahò꞉ten íhsehre ahsí꞉ron. Kwáh í꞉ken tsi sahskonnhaserón꞉ni.”

^20-21 Wahén꞉ron, “Saterién꞉tare ken onhnontiéren tsi kén꞉en tá꞉ke? Ne nakonrihotáhshiaʼse tsi ní꞉ioht tsi kahiatónnion ne kahiatonhserá꞉kon norihwiioʼón꞉we. Nón꞉wa ónenk tsi eʼtho iénske tánon eniaʼtiaterí꞉io ne raronhiaʼkehró꞉non ne ránonhne ne Persia. Eʼthó꞉ne ne nónwa ne raronhiaʼkehró꞉non ne ránonhne ne Greece enshatotáhsi. Kwáh iáh ónhka tewátien nahionkshnié꞉non kwáh né khók ne Wíshe, né ne Israerʼró꞉non shakónonhne.