Daniel 1 - Ohiatonhseratokénti

Ne Kaká꞉ra ne Daniel Tánon ne Rontenroʼshón꞉ʼa (1.1–6.28) Ne Nithotiiónsa Iehatì꞉teron Nebuchadnezzar Raonontiioʼtsherá꞉kon

¹ Ne ahsénhaton shiiohseratátie raónha ne Jehoiakim shihonontí꞉io ne Judah, Ronnontí꞉io Nebuchadnezzar ne Babylonia iashakotiaʼtón꞉ti ne Jerusalem tánon waʼthanatánhake.

² Ne Roiá꞉ner wahoríhon naʼhoié꞉na ne Ronnontí꞉io Jehoiakim tánon iaháhawe tóhkaraʼ ní꞉kon ne ohwistanó꞉ron ne ononhsatokenhtí꞉ke aʼówenk. Tóhka niʼ ó꞉ni nihá꞉ti wahshakoié꞉na tánon ionsahshakoiaʼténhawe tsi thonterennaientáhkhwa ne raoʼniioʼó꞉kon nón꞉we ne Babylon, tánon tsi ní꞉kon ronenhskwenhátie ne ohwistanoronʼshón꞉a, tsi rontahkweniaientáhkhwa ne ononhsatokenhtí꞉ke nón꞉we iahatakweniá꞉ien.

³ Ne ronnontí꞉io wahaónnien Ashpenaz, ne raonkwé꞉ta ne rentiohkwakweʼní꞉io, tahshakoiaʼtaiehstáhsi tsi nihá꞉ti ne thonwatiiaʼtinekénhen ne Israeronónke, ken nithotiión꞉sa né ne kanontiióʼtshera nón nithonathwatsirí꞉non, ó꞉ni ne ratihsennowá꞉nenʼs raotihwá꞉tsire.

⁴ Tánon né ne kwáh rontkahthotsherí꞉ios, ronteʼnikonhrattókha, ne kwáh karihonnién꞉ni né ne rotiweientehtàtskon, kwáh ni ó꞉ni iahatiiaʼtaié꞉rike, né ne ahatikwé꞉ni aʼhonwaioʼténhse ne ronnontí꞉io. Ashpenaz enhshakorihónnien ne ahatiwennahnóthake tánon ne ahatihiatónhsheke ne Babyloniaró꞉non raotiwén꞉na.

⁵ Ne ronnontí꞉io ó꞉ni wahshakorihónten ne kwáh niaʼtewenhniserá꞉ke né shaʼkákhwa ahonwatinonténhsheke ó꞉ni ahonwatihnekanonténhsheke ne otsì꞉tsa tsi ki ní꞉ioht ne ronnontí꞉io raonkweʼtaʼshón꞉ʼa. Tsi ienwatéhsa ne áhsen niiohserá꞉ke tsi enhonwatirihónnien raohén꞉ton ne ronnontí꞉io iaʼtenshatí꞉taʼne.

⁶ Tsi nihá꞉ti ne ronwatiiaʼtarákwen Daniel, Hananiah, Mishael, tánon Azariah, ratikwé꞉kon eʼtho nón꞉we nithoné꞉non tsi tkenʼtá꞉raien ne Judah.

⁷ Ne rentiohkwakweʼní꞉io à꞉se sahshakohsennawíhon: Belteshazzar, Shadrach, Meshach, tánon Abednego.

⁸ Daniel wahatenʼnikonhrí꞉sa tsi iáh thahataterenʼnháten ne thatahatatiaʼtáʼtsonhste nahráksheke ó꞉ni nahahnekírhake ne otsì꞉tsa tsi eʼthó꞉ne nihatiweiennò꞉ten ne Babylonia ne tsi tehatí꞉iaʼks ne Sitaeró꞉non raotiianerénhsera, sók ki Ashpenaz wahoriʼwanóntonhse ne aʼhoié꞉nawaʼse ne tóhsa thé꞉nen tahatatiaʼtáʼtsonhste tsi nikakò꞉ten aʼréksheke ó꞉ni nahahnekírhake.

⁹ Tánon ne Rawenni꞉io wahaónnien ne Ashpenaz nahorì꞉wawaʼse ne Daniel.

¹⁰ Ashpenaz, tsi niióhtha, rotshà꞉niskwe ne ronnontí꞉io, sók kiʼ wahohró꞉ri ne Daniel, “Ne ronnontí꞉io iaʼthorihwaién꞉taʼse tsi nahò꞉ten ahséksheke tánon nahsnekírhake, tánon tókaʼ iáh eʼtho thaeʼsataʼkarí꞉teke tsi ní꞉ioht ne ronátiaʼke ne kenʼnithotiión꞉sa, oh nontiérenʼk enhianonhwariákhon.”

¹¹ Sók ki ne Daniel eʼtho niaháre tsi í꞉trate ne shakónonhne tsi nihoríhonte ne Ashpenaz ne ahshakotenʼnikónraren ne raónha tánon ne áhsen nihá꞉ti rontenroʼshón꞉a.

¹² Wahén꞉ron ne Daniel, “Oié꞉ri niwenhniserá꞉ke nikarì꞉wes takwateʼniénten. Né takwánont ne aseʼshón꞉ʼa tánon ohnékanohs aʼiakhwahnekì꞉ra.

¹³ Eʼthó꞉ne ó꞉nen ne tenhskwá꞉ren thí꞉ken nithotiiòn꞉sa tsi nihónneks ne kanontiióʼtshera aóʼkhwa, tánon eʼtho nón꞉we naʼserátahst tsi tenhshiaʼtórehte tsi nen iakwatkahthotsherò꞉ten.”

¹⁴ Iaʼthorihwaién꞉taʼse tsi wahshakoríhon oié꞉ri niwenhniserá꞉ke enhonteʼniénten.

¹⁵ Tsi ó꞉nen ionsakáhewe, waháttoke tsi sénha ronnonnhí꞉ioʼs ó꞉ni ratiʼshátste tsi ní꞉ioht tsi niká꞉ien ne kanontiióʼtshera aóʼkhwa roné꞉kon.

¹⁶ Eʼtho katiʼ iahontáhsawen ne ranónhne washakoríhon ne iahontahshónteren ne iáh teiokhwákste ahónneke tsi ní꞉ioht ne ronnontí꞉io shakonóntenhskwe.

¹⁷ Rawenni꞉io tahshakáon ki kaié꞉ri nihá꞉ti kenʼnithotiión꞉sa ne karihonnienníhtshera ó꞉ni ne ahotirenʼnháon ne ahatihiatónsheke, ó꞉ni ne kaʼnikonhraientáhtshera iahawénhtate, tsi taháon ne Daniel ne ahorennʼhaʼónhake ne ahaʼnikonhraientáhthake nahò꞉ten ienharì꞉waken ó꞉ni ne atetshénhsera.

¹⁸ Tsi iahontòkten ne áhsen niiohserá꞉ke tsi nihoteʼnienténhston ne ronnontí꞉io. Ashpenaz ratikwé꞉kon iashakoiaʼténhawe ne kenʼnithotiión꞉sa raohén꞉ton ne Nebuchadnezzar.

¹⁹ Ne ronnontí꞉io kwáh ratikwé꞉kon tsi wahshakohthárhaʼse, tánon ne Daniel, Hananiah, Mishael, tánon ne Azariah kwáh í꞉siʼ nón꞉we tsi nontahoʼnikonhratihéntho tsi ní꞉ioht ne roná꞉tiaʼke. Eʼ tho ki nontá꞉we tsi wahontiá꞉taren ne kanontiioʼtsherá꞉kon.

²⁰ Iáh tewatsterístha oh nahò꞉ten ne ronnontí꞉io enhariʼwanónton tókaʼ ó꞉ni nahò꞉ten tahoʼnikonhrhá꞉rake, kí kaié꞉ri nihá꞉ti oié꞉ri naʼtekaiá꞉sere sénha ratirihwaienté꞉ris tsi ní꞉ioht ne shakonathiatonhseratkénse, tókaʼ ó꞉ni né kwáh rotiʼnikonhrowá꞉nens ne kwáh tsi nikanakeráhsera.

²¹ Daniel eʼ tho renteróntahkwe kanontiioʼtsherá꞉kon tsi niió꞉re ne Cyrus, ne ronnontí꞉io ne Persia, wahshakoʼshén꞉ni ne Babyloniaró꞉nons.