Colossians 3 - Ohiatonhseratokénti

¹ Tiesakétskwen tiesonnhéton skátke ne Kerístos, káti thóh nón nasewáhien ne sewé꞉ris ne karonhiakékha aoriwahsónha, tsi nón꞉we ne Kerístos tenskwáhereh ne raonitskwaratsheratokéntike né꞉ne saweientetákwen nokwá꞉ti ne Ní꞉io.

² Sewahtenikonraserón꞉ni ne thóh nón꞉we tioriwahsónhas, iáh ne tsi nahorihoʼténhsons ne kén꞉en onwentsiá꞉ke.

³ Asè꞉ken senhé꞉ion, tánon ne satónhnhets wahshéton rahonháke ne Kerístos ne rahohén꞉ton ne Ní꞉io.

⁴ Ne kwáh í꞉se satónhnhets né꞉ne Kerístos tánon nó꞉nen enhathotáshion, skátke tsi entiatotáshon ó꞉ni ensatiatáren ne rahohiatanerakwatserá꞉kon!

Naká꞉ion Atónhnhets Tánon Ná꞉se

⁵ Ó꞉nenk tsi ensewéntho, é꞉thoh káti, ne owentsiakékha askanéktsheras tsi iohiotáties ne tionhákes, né꞉ne kentéhseras kanakwaieshátshera, iáh teiotʼkwéniens, tahiontathaskanék꞉se, kariwáksen askanéktsheras, tánon iakotetʼtsien (né꞉ne satetiotʼte ne kahiatón꞉ni akonwashén꞉naien).

⁶ Tiorì꞉wa ne nikarihó꞉tens ne Rawenni꞉io raonakwáhtshera enhotihiatorén꞉ne tsi ní꞉iakon ne iáh tehonwawenhnaráhkwa.

⁷ Iehioteratsʼton kwáh iatesewahiá꞉ti thóh ní꞉ioht tsi tiónhnhekwe ne niwaskanektsheroténskwe, né꞉ne ronónha siʼthohtiniarotarón꞉ne ne tsi tiónhnhe.

⁸ Onk ó꞉nenk ki tsi kwáh orihwakwé꞉kon ensahtiakwaríhsi ki nahorihoʼténhsons: naiakonakwen, kanakwáhtsera, tánon ahsehsónseke. Tóhsa thé꞉nen ne ahsenikonrátsate tóhsa ó꞉ni nonhwén꞉ton ne kawennakʼsens ahsatatiáte ne tiakéhsons.

⁹ Tóhsa tesewahtatenowénten, asè꞉ken ó꞉nen ahé꞉ren skahawí꞉tons tsi niseweienhnotén꞉ne noweiennaká꞉ions

¹⁰ tánon ó꞉nen oweién꞉nase tsi nisehseweiennó꞉tens. Ne kí꞉ken ne á꞉se tiotasawáhkwen tsi nokwáh ne Rawenni꞉io, ne Rohsahánion, kwáh tiokontákwen á꞉se srónnis kwáh tsi ní꞉ioht ne raónha, ehnahontáwe kwáh iakaié꞉rike tsi ahtsheriwaienteráh꞉ne.

¹¹ Tsi niateionéhnon, iáh ó꞉nen thé꞉nen taʼtestsiatʼthí꞉en tsi naʼtehón꞉tere ne iáh Tehatisitaeró꞉non tánon ne Sitaeró꞉nons, nahonwatiwahrakweráron tánon ne iáh tehonwahtiwarakweráron, tihononhontsá꞉tes, ratirahkonró꞉nons, ratináskwas, tánon ne rontatewenní꞉ios, nok Kerístos seh norihwakwé꞉kon, Kerístos seh tsehahiatakwení꞉io.

¹² I꞉se ne Rawenni꞉io rahonkweʼtashón꞉a; wahʼhianó꞉ronkwe tánon waʼhiaiatará꞉ko ne rahonhatsí꞉wa rahonkwè꞉ta ahsáton. Kwáh káti, ó꞉nenk tsi ne ensewahiatóronke ne weriasí꞉io, ahontesewariwahié꞉rike, ataniténron, tóhsa sewahní꞉ronk, tánon sewahnikonkástet.

¹³ Sewahnikonkástet tsi natesewáhtere tánon tonsasewatatenikonrenséhek tsi natesewátere nó꞉nen nónhkak té꞉nen wahontateriwakatáttshe. Ó꞉nenk tsi tentsisewahtatekirónrense kwáh tsi ní꞉ioht ne Roiá꞉ner tsi sianikonrénseh.

¹⁴ Tánon norihwakwé꞉kon kí꞉kens iasewáiest kanoronkwáhtshera, ne kanerénston norihwakwé꞉kon tsi nitkariwaié꞉ri tsi teionatatsenawákon.

¹⁵ Tsi nihtatʼkáwas ne skén꞉non ne Kerístos neh naisaié꞉nawahse tsi ahisáhawe tsi ní꞉ioht tsi tensiatoretánion; asè꞉ken ne kí꞉ken ne skén꞉non ne Rawenni꞉io tsi skát꞉ke ietsisewaná꞉ton enkat ieiotón꞉on noierón꞉ta. Tánon tesewahtenonweratónsek.

¹⁶ Ne Kerístos raoteriwanotátshera neh tsi nihió꞉kwats kwáh ioteriwí꞉son ne sewerianéson nón꞉we nakenteróntake; tánon tesewahtaterihónnien tsi natesewáhtere orihwakwé꞉kon isewatst ne kanikonrowanahtshera. Tesewahriwakwánion, ne teieriwahkwataokónhas, ó꞉ni ne orennatihokónhas; thetsisewahriwákwas ne Ní꞉io neh kanonweratontsherá꞉kon ne sehwarianésons.

¹⁷ Kwáh tsik nahorihoʼténhsons tsi naisewáhtiere tóhka ó꞉ni thé꞉nen aisewénron, é꞉tho káti, naiá꞉wenhne rahoshén꞉nakon ne Roiá꞉ner Ié꞉sos, tsi rahonhà꞉ke tensatenonwerá꞉ton ne Rawenni꞉io ne Kaʼní꞉sera.

Akahonhatsí꞉wa Tehiakoteriwahsóntere Náse Atónnhets

¹⁸ Tsi sewatʼthonwí꞉sens ne sewahniatʼkons, ietsiwennarákwak ne sewahniatʼkons, Asè꞉ken thóh nisewahteriwaién꞉ni naisewáhiere ne tsi sewahriwiióstons.

¹⁹ Ne sewaskenrakétes, ieʼtsinorónkwak ne sewahniatʼkons tánon thóhsa tahó꞉ten naieʼtsiiatniráttshe.

²⁰ Sewaksaokónhas, tsi sewariwiióstons kwáh sewateriwaié꞉ni ne tiótʼkonhón꞉we aieʼtsiwenhnaráhkwake ne iaʼní꞉ha ó꞉ni ne saʼnisténha, asè꞉ken ne rawerentihióstha ne Rawenni꞉io.

²¹ Kaʼní꞉seras ó꞉ni kaʼnisténhseras, tóhsa ieʼtsisénten ne ieʼtsiienokónhas nontié꞉renk enhonnikonrókʼten.

²² Sewahnáskwas, kwak tsi nahorihoʼténhsons tsi ieʼtsiwenhnarákwak ne ronónkwes ne ieʼtsí꞉nas, iáh nek khók nó꞉nen ieʼtsinikónrare tiorì꞉wa tsi í꞉sewehre taisewahténtia ne rahotiriwahniratʼtshera; kwáh sewehriasihióhat tsi nensewá꞉hiere tiorì꞉wah tsi eʼtsisewariwahkweniénstha ne Roiá꞉ner.

²³ Kwáh tsi nensewáhtiere, kwáh sewehriasakwé꞉kon tsi iatesewahtatʼtiahat, tsi sí꞉ken ní꞉ioht ne Roiá꞉ner etʼtsi sewahiò꞉tense tánon iáh ki ónhkwe teietʼtsihiò꞉tense.

²⁴ Sewehiá꞉rak tsi Roiá꞉ner then tsi sewahriwaserá꞉kwase tsi nisakorahratstén꞉ni ne rahonkweʼtashón꞉a. Asè꞉ken Kerístos ne kwáh rahiatakweʼní꞉io neh tsioténse.

²⁵ Tánon ratikwé꞉kon ne ratihiotenserátsens ensonatʼkharátse tsi natehonaterentawenré꞉on tsi nihonatié꞉ren, tiorì꞉wah ne Rawenni꞉io kwáh nénhne satetiotʼthe tsi tesakohiatorétha.