Colossians 2 - Ohiatonhseratokénti

¹ Tóh kwaró꞉ri tsi nío꞉re tsi wakatatre꞉ne tsi nikwahʼiòtense ó꞉ni ne Laodicea nón꞉we tatinákere ó꞉ni ne ronatiakhéson ne iáh tehiontienté꞉ri.

² Ne ki aorì꞉wah tóh nitié꞉ra né꞉ne ahatiiatana꞉ne naotinikonrhaní꞉ra tánon ahonnitiokwaró꞉roke tóh kanoronkwatsherá꞉kon, tánon kwáh ahkanánon ahiokwastónhake ne kwáh orihwí꞉io tsi nitkáhas ne orihwí꞉io kanikonrahienthátshera. Ne ki thóh ní꞉ioht tsi enhonaterientá꞉rane tsi nihoriwahshéton ne Rawenni꞉io, né꞉ne Kerístos.

³ Raónha ne kanontónkwa í꞉ken ne kanontétshons akwé꞉kon ne wahshetánions atsiokowáhtsheras ne kariwakwarishióntshera ó꞉ni ne aʼthokhátshera.

⁴ Wahkonró꞉ri, káti, thósa ónhka sherí꞉hon naiesanikonráten ne onó꞉wen tahkariwakenáston, iáh tewasterístha tóh naontaiohianérehke.

⁵ Iawerohátien tsi iáh ethotiekes, onk ki iekwahnontónhnions, ó꞉ni wahkatonnáhereh tsi nikatkátos ioriwahní꞉ron teiahontaní꞉ron tsi ní꞉ioht tsi skat꞉ke isewáte tsi nititsisewetákwen ne Kerístos.

Tsi Niiokwátston Tsi Nirónhne Ne Kerístos

⁶ Tsi ó꞉nen tieriwahnirá꞉ti ne Kerístos Ié꞉sos tsi raónha ne Roiá꞉ner, tiónhnet tsi tetiateriwahsóntere.

⁷ Kwáh teshohsérast ne saterahshón꞉as ne raonháke, rahonháke nón꞉we nasahtiatón꞉ni, tanón kahsástet tsi tisetákwen, tsi niiesahrihonhnién꞉ni. Tanón kwáh tiatanahnónhak ne kanonweratóntsera.

⁸ Senikonráh꞉rat, káti, tóhsa ónhka aiesatenaskónniat tsi nitʼkáhas ne iáh té꞉nen tekariwásthas ne kanikonraton ne ónhkwe akonikonrowenhnahtsera, tsi nitsawénon tsi ronwahtirihonhnién꞉ni nonkweshón꞉a ó꞉ni tsi nikanikonró꞉tens ne tsi ionwentsá꞉te, tánon iáh Kerístos nón꞉we tetsawé꞉non.

⁹ Asè꞉ken rahonháke ne Kerístos nón꞉we niwenéston tsi niiokwást ne Rawenni꞉io raowehién꞉na tsi nironnheʼón꞉we,

¹⁰ tánon tiesáwi nakanahnónhake tsi ahsónnheke tsi natetiateriwahsóntere. Raónha ne rahiatakwení꞉io ne kwáh tsík nahoʼténhsons ne ionhnheʼón꞉we ó꞉ni ne kaianerénsera.

¹¹ Tsi tetiateriwahsóntere ne Kerístos iesawahrakwè꞉taron, iáh ónhkwe teiesawahrakwetá꞉ron, onk Kerístos iawahrakwè꞉taron, neh iehiokwékʼton tsi tsisatatewenniió꞉on tsi nokwáh ne kaʼsatsténhsera ne sariwahnerahatʼténni.

¹² Asè꞉ken ne sahsatenekwahéste, Kerístos skátke wahetsihiatátha, tánon natenekwaheʼthátsera kwáh ó꞉ni skátke ne Kerístos tsi saiesahkétsko neh tsi nitisetáhkwen tsi niiohiò꞉te ne Rawenni꞉io raosatsténhsera.

¹³ Ieioterátston kwáh senheiónhne ne tsi nihsariwahné꞉ren tánon ne aorì꞉wah ne tsi iáh tesitaeró꞉non iáh ó꞉ni tesahianerenseraiéntakwe. Onk ó꞉nen sahiónnhete ne Rawenni꞉io skátke ne Kerístos. Rawenni꞉io akwé꞉kon shohnikonrén꞉en nonkwáh riwahneraháktsheras;

¹⁴ saharáh꞉kewe tsi nihionkwasennatʼsáthakwe ne hionkwatʼkarotákwe tsi nihkanerenstónhne ne kaianerénhseras tánon kwáh aʼhé꞉ren wahahá꞉wite tsi niahanonwahró꞉ten ne kaiásake.

¹⁵ Tánon thóh ne kaiásake nón꞉we ne Kerístos sahatatiathotaríhsi tsi nokwáh ne raotisatsténhseras ne ratinikonrátsens ó꞉ni ne ratikoráhsons; tánon onhkwè꞉ne nón꞉we niasakohiaténhawe nahonwahnateró꞉roke tsi sí꞉ken ní꞉ioht ne ratinóton sakosarí꞉ne tsi rotkwenionhátie.

¹⁶ Kwáh káti tóhsa ónhka iesaianerenserónhnien nahóten asekʼséke tóhka ó꞉ni nahóten asnekirá꞉ke tóhka ó꞉ni ne iawentatokentíhsons tóhka ó꞉ni tsi natehontenonwérons nó꞉nen tsiorahkwará꞉on nasonhthenhné꞉kha tóhka ó꞉ni nawentatokentí꞉ke.

¹⁷ Ne nahorihoténhsons kwáh né꞉ne khók tsi iotasátare tsi niahawenonhátie; ne kwáh tokénhske í꞉ken né꞉ne Kerístos.

¹⁸ Tóhsa ónhka ieʼtsirí꞉hon naieʼtsihiatʼkónten tsi rónton thóh nathonkwetáthe tiorì꞉wah tsi kentokénston rohnatetʼtsens ó꞉ni iehotikontákwen tsi nihotinó꞉wens nahontahotiriwahié꞉rike tánon tsi nisakotishén꞉naiens ne ratironhiakeró꞉nons. Asè꞉ken iáh thé꞉nen satekéna tè꞉ken, ne niionkweʼtó꞉ten kwáh ronthonriótha tsi nihonhnonkwethó꞉ten tsi ronhnonthónnions

¹⁹ tánon ronatʼkáwen tsi Kerístos ronwahniahésen, tsi raónha nonóntsi iéken noierónta. Tsi Kerístos toniarohtáron noierontakwé꞉kon ne nahókwah ó꞉ni tehionatatsenawákon tsi tehiostonteron꞉nion ó꞉ni notsinonhiatonsónhas, tánon wahtehiárons tsi natehotonwentióni ne Rawenni꞉io nahontehiá꞉ron.

Naiaiéheie Tánon Naiakónhnheke Skátke Ne Kerístos

²⁰ Skátke senihé꞉ion ne Kerístos tánon áhre tsi satatewenhniió꞉on tsi nihiorihoʼténhsons tsi nokwáh ne tsi ionwentsá꞉te. Nontié꞉ren, káti, thóh ní꞉ioht tsi sonhnhétie tsi sí꞉ken ní꞉ioht ne tsi ionwentsá꞉te ní꞉se ahonkwè꞉ta? Nontié꞉ren tsi satewenhnaráhkwa ne nikaianerenhseró꞉ten

²¹ “Tóhsa sasté꞉rist kí꞉ken,” “Tóhsa satekonhonserátkens né꞉tho,” “Tóhsa ken niahátier nohiáson”?

²² Oriwahkwé꞉kon kí꞉ken iáh thé꞉nen teskás꞉tas nó꞉nen wastáhson; kwáh ónkwe khók akoianerénhseras ó꞉ni akorihonnienní꞉tseras.

²³ Nok ki né꞉tho kaianerénhseras thóh ní꞉ioht tsi karatáston né꞉ne kariwahkwarisiontserá꞉kon nahiontatónnien nahonwahtishén꞉naien ne ratironhiakeró꞉nons, tánon ne rotinó꞉wens nahontahotiriwahié꞉rike, tánon konwahroniakéntha noierónta; nok kwáh iáh thé꞉nen sateké꞉na tè꞉ken nahotiién꞉take nahontahatiniarotároke ne tsi iakónhnhe ne kanoronkwahtserá꞉kon.