Colossians 1 - Ohiatonhseratokénti

¹ Kór ki non nitiawé꞉non, ne tsi nithonikonriió꞉on ne Rawenni꞉io nahoteriwahnót꞉thase ne Kerístos Ié꞉sos, tánon ó꞉ni nón kwatatekénha Timothy nónhne non nitiawénon—

² Ne Rawenni꞉io rahonkweʼtashónha thóh nón꞉we ne Colossae, ronónha ne kwáh rohtiriwahthó꞉ken nonkwatorohserashónhas tsi tehonateriwasóntere ne Kerístos: Aiá꞉wens ne Rawenni꞉io Sonkwaní꞉ha ahontáhion ne kenténrat ó꞉ni skén꞉non.

Naterén꞉naient Ne Tahiontenonwerá꞉ton

³ Tiotʼkonhónwe tetsitewahnonwerá꞉tons ne Rawenni꞉io, Rahónha ne Kaʼní꞉sera í꞉ken tsi nokwáh ne Sonkwaiáner Ié꞉sos Kerístos, nó꞉nen enkwaterennaiénhase.

⁴ Asè꞉ken wahakwáronke tsi thetsisewetákwen ne Kerístos Ié꞉sos ó꞉ni tsi kwáh ratikwé꞉kon ietʼtsinorónhkwa ne Rawenni꞉io rahonkweʼtashónhas.

⁵ Nó꞉nen ne orihwí꞉io naterihwanothátsera, ne karihwí꞉ios, thontiérente wesewahiatoren꞉ne, wesewahrónke tsi nitiakó꞉wis narahratʼtshera. Káti tsi tisewetákwen ó꞉ni ne sewahnoronkwátshera ne kakenserákwen tsi nahóten ne sewaskáneks, karonhiá꞉ke neh nón꞉we tewahtheweiénton ne sewahriwà꞉ke.

⁶ Noriwahtokénti kwáh tiokontákwen taiohahátie ne kahiataterí꞉tsheras ó꞉ni tehioreniatonháties tsi nonwéhsons ne tsi ionwentsiáte, kwáh tsi nihioié꞉ren ne tsi natesewáhtere neh kwáh sontontsérente wesewáhronke ne Rawenni꞉io rahoténrat tánon wesewahriwaiénterane ne kwáh tsi niiohrihóthen.

⁷ Né꞉ne Epaphras etʼtsisewahrihotasién꞉ni ne Rawenni꞉io rahoténrat, onkwatenó꞉ron skát꞉ke ionkwahiò꞉the, né꞉ne kwáh rohriwahtó꞉ken tsi Kerístos rohiòtense nonkwariwáke.

⁸ Sonkwaró꞉ri tsi nithetsisewáwi ne kanoronkwáhtsera ne Ronikonrí꞉ioston.

⁹ Asè꞉ken kwak sakwasennáronke neh iorihonní꞉hon tsi kwáh tió꞉konthe kwaterennaién꞉ni. Wahsakwariwahnóntonse ne Rawenni꞉io neh ahtsisewahiatanáh꞉ne atthokhátshera tsi nih thóh nikonrihió꞉on, kwáh akwé꞉kon natenikonrowanhatsera ó꞉ni ne kanikonraientátsera tsi nitewetha ne rahosasténsera.

¹⁰ Eʼthò꞉ne káti khók enskwé꞉ni nasónnheke tsi natehontonwentióni ne Roiá꞉ner tánon ó꞉ni thóh nénhsere tsi nahó꞉ten ne rawerientiióstha. Tsi tiónhne niaté꞉kon tsi ní꞉ioht tsi enwehiá꞉ron ne kahiotenserí꞉ios, tánon kwáh ensatehiá꞉ron tsi nentseriwahientérane ne Rawenni꞉io.

^11-12 Neh ahisasasténseron tsi thóh nón꞉we akwé꞉kon nitewétha tsi nihionerákwat ne rahosasténsera, ne káti nahiotón꞉on oriwahkwé꞉kon asatakástathe tsi naisanikonrihioʼke. Tánon tetienonwerá꞉ton ne Kaʼní꞉sera, tsi raónha iaweiennentá꞉on nasatiatáren tsi nahó꞉ten ne Rawenni꞉io sakonónstati ne rahonkweʼtashón꞉a tsi tkanakerahserá꞉ien ne tsi tetioswátʼte.

¹³ Sesonkwaniakénton tsi nokwáhnahosasténhsera ne tetiò꞉karas onk kwáh skén꞉non tsi thontashonkwahiaténhawe rahonakeraserá꞉kon ne tsi nihonorónkwa ne Roiénha,

¹⁴ né꞉ne rahonháke nón꞉we nitsitewahtatewenní꞉io, ne tsi, skanikonrén꞉en nonkwariwahneraháktsera.

Tsi Nironkwetó꞉ten Tanon Ne Raohioténsera Ne Kerístos

¹⁵ Kerístos ne kwáh rohiatáken teskaierontáre ne iáh tehohiatáken Ní꞉io. Raónha ne tohenton rawenhnakeraton tsi nahoʼténsons kasahánion.

¹⁶ Asè꞉ken rahonhá꞉ke nón꞉we ne Rawenni꞉io orihwakwé꞉kon nihosahánion ne tsi karonhiá꞉te ó꞉ni nonwentsiá꞉ke, ne ióken tanon nahóten ne iáh teiókens, thóh í꞉kare ne kariwiiostóntsera ahosasténseras, Rotiʼianers, ratikorásons, tánon ne karíhtons. Rawenni꞉io kwáh orihwakwé꞉kon rahonhá꞉ke non rosahánion ne tsi karonhiá꞉te ó꞉ni ne tsi ionwentsiá꞉te tanon rahónha rahoriwà꞉ke.

¹⁷ Kerístos ó꞉nenk sirónnhe nohénton sontakontáhsawen noriwahkwé꞉kons, tánon tsi tehionkwateriwasóntere ne raónha kwáh orihwakwé꞉kon tkaié꞉ri tsi ní꞉ioh tánions.

¹⁸ Raónha nonóntsi í꞉ken ne ononsatokénti né꞉ne raierónke; raónha ne tiotasawákwen tsi iónhne natónnhets. Raónha ne takowá꞉nen Roiénha, tsi sonwahkéskwen ne kenheiat꞉ne, ehnahontáwe rahonhatsí꞉wak khók ohénton ahkénhake norihwakwé꞉kons.

¹⁹ Asè꞉ken kwak khók Rawenni꞉io iatehoriwahiéntase né꞉tho roiénha rahonháke non niká꞉ien kwáh tsi niʼorihó꞉ten ne Rawenni꞉io.

²⁰ Rahonhá꞉ke ne Roiénha, káti non, ne Rawenni꞉io iathoriwahiéntase orihwakwé꞉kon ahonsahariwaseronhni ne rahónha raorihwà꞉ke. Kaiá꞉sake raonekwénsake ne Roiénha non skén꞉non wahrón꞉ni ne Rawenni꞉io, tánon káti orihwakwé꞉kon rahonhà꞉ke nón꞉we nathontáwe, kenikwé꞉kon nonwentsiá꞉ke oni ne tsi karonhiá꞉te.

²¹ Iehioteratston ainon nió꞉re tisewéskwe rahonháke ne Rawenni꞉io tánon tesewahtatʼtiónskwe tiorì꞉wah tsi nikariwáksens tsi nisewahtiéren ó꞉ni tsi nisewahnonthonnión꞉on.

²² Nok nón꞉wa, tsi niateioné꞉non ne raierónke tsi rawenhé꞉ion ne Roiénha, Rawenni꞉io wahiónʼnien sehʼsewatenró꞉ne, neh nahónton ahontesáhawe, iotokénti, sariwahtokénhak, ó꞉ni thosa thé꞉nen aisaní꞉kon, ne rahohénton.

²³ Ní꞉se ó꞉nenk, tsi kwáh, iensatashonthéren thóh non naisariwahtokénhake tsi nónh꞉ne ioriwahní꞉ron ó꞉ni orihwí꞉io tsi tekensténrote, tánon tóhsa saʼthóntat ne taisanikonratokén꞉ne tsi nokwáh narahratʼtsera satiestén꞉ni nó꞉nen sesatʼthón꞉tene ne oriwahtokénti. Ne sekí꞉ken oriwahtokénti ne I꞉i, Kór, wahkatenatserónni—kí꞉ken oriwahtokénti tsi nihonwahnateriwanotáni nohontsakwé꞉kon.

Tsi Niohiotenseróten Ne Kór Tsi Ranátsera Nononsatokentí꞉ke

²⁴ Onk ó꞉nen sewahkatʼtsennón꞉ni neh tsi nikwaroniá꞉kense, Asè꞉ken ne kéntons tsi niwakeroniáken ne tierónhke kastsnié꞉nons tsi nahóten sehkon iotaténron ne iakáshon tsi nihoronhiakén꞉on tsi nokwáh ne Kerístos raierónke, né꞉ne ononsatokénti.

²⁵ Tánon Rawenni꞉io rahkenahtserón꞉ni tsi nokwáh ne tiakawetákwen, raónha taká꞉wi kí꞉ken kahiò꞉tense nahontió꞉ten ne sewahriwáh꞉ke. Né꞉ne kahioténsera kwáh akananónhake ahontroriháke ne rahoteriwahnotátsera,

²⁶ Ne tsi nisakoriwahshetén꞉ni nonkweʼtakwé꞉kon tsi nitsawé꞉non onk ó꞉nen wahsakorihotásien ne rahonkweʼtashónha.

²⁷ Tsi nihotenikonrónni ne Rawenni꞉io né꞉ne asakoronkáten ne rahonkweʼtashónha tsi nihoriwahshéton, kí꞉ken kakwákston ó꞉ni ioriwahnerákwak kariwahshéton neh nonkweʼtakwé꞉kon akoriwáke. Tánon ne kariwahshéton né꞉tho Kerístos tsi senikwé꞉kon, ne kéntons tsi ensatiatáren thóh rahohiatanerakwatserá꞉kon ne Ní꞉io.

²⁸ Káti kwáh onkweʼtakwé꞉kon tsi iakhiiateriwahnotánis tsi nokwáh ne Kerístos. Nahiotónʼon ne kariwahkwarisióntsera nahiakironkáten ó꞉ni nahiakirihónnien nahiontón꞉on nahontahiakihiaténhawe rahohénton ne Rawenni꞉io nahatiriwahienterí꞉hake tsi tehonateriwahsóntere ne Kerístos.

²⁹ Nakáshon kí꞉ken wahtióte ó꞉ni tewakniotátie, wahkatstónhatie ne kasatstenhserowá꞉nen ne Kerístos takáwis tánon akonhá꞉ke nón꞉we niiohiò꞉te.