Amos 6 - Ohiatonhseratokénti

Ne Israel Aoriwahiesáhtshera

¹ Ionikonráksat tsi nihiá꞉kon ne tsakoterákare ne Zion nón꞉we, tánon tsi niiá꞉kon ne ihiénhreh iakontaní꞉ron ne tsi Ionónhte ne Samaria, í꞉se ne sewasenhnowá꞉nens ne ietsihénthenhse ne kí꞉ken kentiohkowá꞉nen Nisraeró꞉nonke, tionháke nieiéntha nonhkweshón꞉as naieʼtsiié꞉nawaʼse!

² Iatetsá꞉hiat ne Calneh, tánon satkáto; thóh hionhsahsathénti kanatowanénhke ne Hamath nionhsáse; ethò꞉ne thóh hionhsahsathénti Gath nionhsáhse né꞉ne Philistiaró꞉nons ratotinatowanénhke. Sénha ken ne ioiáneres tsi ní꞉ioht kí꞉ken kanakeráhseras? Khés í꞉se ken sénha sanakerahserowá꞉nen tsi ní꞉ioht ne rahotinakeráhsera,

³ O í꞉se ne iáh tesathóntats nasehrihwanirá꞉te ne tewenhniserónhte ne kakahronhniá꞉tshera tsi tá꞉wese, tánon ákta iawetonhátie nahontsiaʼtakwení꞉ioste ne iáh othé꞉nen tahonsakanakerahseraiéntake?

⁴ Iakothentásehre tsi niiá꞉kon ne kanáktake iehiatiónhni ne kanakarahrá꞉ken nahóthen ionhniáton, tánon tsiakoteráhkare nakonitskwáhrane, tánon teiotinakaronhtónha rotiwarákon ne ronónha ronatawénkton, tánon ne tionhnónskwahron owí꞉ra ne ionarésens;

⁵ Shonwéskwahni nahserennarasthánion nasaterenhnó꞉ten ne karenhsotáron onowakó꞉wa, kwáh kí tsi nihiotónhne ne Táwit teharihwákwahkwe tánon raterenhnotʼthakwe;

⁶ Sathetsetateniáton shanekirenháties nonenharákeri, tánon ne satatsiatokástha ne kwáh tewenhserá꞉kons iontsiatakonhonstháhkwa, ók iáh kí nenhné꞉e tesanikonrátsens tsi nihiorihwenhtáhon ne Israerró꞉nonhke!

⁷ Káti í꞉se enteshiatié꞉rente nahsenakeráhko. Káti tsi nisateʼnikonhró꞉ris tánon tsi nisathenhnió꞉tha watót꞉tane.

⁸ Né Roiá꞉ner Rawenni꞉io kwáh rothaterihwaniráti (rá꞉ton ne Roiá꞉ner rotokénti): Ít꞉sons tsi nihontatónhni nonhkweshón꞉as Nisraeró꞉nonke tánon ít꞉sons tsi nihotinonsí꞉ios; tánon kwáh enkatsakwaríhshi ne kanatowá꞉nen tánon akwé꞉kon ne nón꞉we niká꞉ien.

⁹ Tóh꞉ka shí꞉ken oié꞉ri nihionkwè꞉take ietéron ne kanónskon kwáh kí enhiaiéheie.

¹⁰ Tánon tó꞉ka saiá꞉ta ne rontatenónkwe ne ahatsenhónhni nahatsáhate nawenhehiónta thá꞉rahkwe nahontahahiákenwe ne kanónskon, tánon kwáh ensakawénhase nónhkak shé꞉kon iatahiakotatenhrón꞉ke shé꞉kon kanónskon ahieterónhtake, “Ónhkak ken skát꞉ne senikwé꞉kon?” Thentserihwaʼserá꞉ko, “Iáh.” Eʼthó꞉ki ne iatatenónkwe enhénron, “Saktasathatónhni! Iáh tehió꞉wenk nahitenináton ne raoshén꞉na Roiá꞉ner.”

¹¹ Satkáto, ne Roiá꞉ner rathénhnas, tánon ne kwáh tkanonsowá꞉nen kwáh kí thenwanitstsataróko, tánon ne kenk nikanonsáha thenwaktóko.

¹² Ne koshá꞉tens kontsakarónhtses ken nosthénrakes? Ónhka ken ietarakarát꞉tos ne kaniatarakeʼkowáhne ne tehotikákeres tionhnónskwahron ahónste? Ók kí ní꞉se ne washón꞉niate ne kaianéren kanonkwahtserát꞉sen hiahónton tánon ne karihwakwahrihshóntshera ne kahontátsen iahónton—

¹³ Tesathaterénhsaron tsi wasié꞉na ne kanatowanénhke, sáton, “Iáh ken í꞉ih ónhkwah shatsténhsera tehionkwátston tsi wetewaiénhna ne Karnaim kwáh iationkwahiátiste?”

¹⁴ Kwáh thóh kén꞉en tsi waktsironhnihátie niakwahtsatónhti ne tiónkwe, O Israerʼró꞉nons, rá꞉ton ne Roiá꞉ner, né꞉ne Rawenni꞉io rotokénhti, tánon kwáh thenieshonhnarikʼkon Lebo-Hamath nón꞉we nénhtewe kwáh tsi nió꞉re ne Wadi Arabah.