Amos 2 - Ohiatonhseratokénti

¹ Né kí꞉ken aorihwá꞉ke rá꞉ton ne Roiá꞉ner: Asè꞉ken áhsen nieioterátston iorihwanéren ne Moab, tánon ki ne kaieríhaton iáh nenhnè꞉e thaʼtaonsonkaterihwaténien ne kahrewahtáhtshera; tiorí꞉wa tho niió꞉re tsi wahonwatiaʼtátshaʼahte kenʼtarakeríhton iahón꞉ton ne raostsienʼshón꞉as ne ronnontí꞉iohkwe ne Edom.

² Ó꞉tsire ienkatenniénhten ne Moab, tánon kwáh enwátshaʼahte tsi watenʼènhró꞉tons ne Kerioth, tánon ne Moab kwáh enkénheie thóh shaʼtekanenhrí꞉hen tsi nateiakohenréhtha, thóh tsi satekanenhrihen tsi tehiakohenréhtha tánon tsi nikontiwèn꞉note ne iehonrawatstáhkhwa;

³ Enhinonhwarià꞉kon ne rakó꞉ra ne Moab nón꞉we, ó꞉ni kwáh enkhenonhwarià꞉kon ratikwé꞉kon ne ronaterihón꞉tons skátne ne raónha, rá꞉ton ne Roiá꞉ner.

Waʼkonwarí꞉wenhte Ne Judah

⁴ Ne katíʼ aorí꞉wa ne Roiá꞉ner rá꞉ton: Asè꞉ken áhsen nieioterátston iorihwaneraʼáts꞉kon ne Judah, tánon ne kaieríhaton, kwáh ki nenhnè꞉e iáh thaʼtaonsonkaterihwaténien ne kahrewahtáhtshera; tiorí꞉wa tsi wahatikèn꞉ron ne raoianerénhsera ne Roiá꞉ner, tánon iáh tehonatienawáhston ne raorihonnienníhtseras, ók ne wahonathaharákwahte ne kwáh ne shá꞉ka nonó꞉wens tsi ní꞉ioht ne shakotihsothonkonhkén꞉en rotiioʼtén꞉ʼen.

⁵ Katíʼ kwáh ó꞉tsire ienkatenniéhten ne Judah, tánon ne enwatshaʼáhte ne tsi watenʼenhró꞉tons ne tekanatahnáktonʼs ne Jerusalem.

Waʼkonwarí꞉wenhte Ne Israel

⁶ Né katíʼ kí꞉ken aorí꞉wa ne Roiá꞉ner rá꞉ton: Asè꞉ken áhsen nieioterátston iorihwanéren ne Israel, tánon ki ne kaieríhaton iáh nenʼneʼeh thaʼtaonsonkaterihwaténien ne kahrewahtáhtshera; tiorí꞉wa tsi shakonatenhní꞉nons ne tionkweʼtaié꞉ris kahwistará꞉ken ronwatikariákʼtén꞉nis, tánon ne iakotenhténion tsoiá꞉na áhta neʼ tehontatawístha tsi shakonatenhní꞉nons—

⁷ Tehshakonahskwahserónkwas ne iakó꞉ten tsi sí꞉ken ní꞉ioht noʼkenhrà꞉ke ratiratátieʼs, tánon iehshakotí꞉reks ne iakotenhténion é꞉ren ahón꞉nehte; ne iatatienʼénha tehiattenihá꞉tha tsi iá꞉rats ne kahnhá꞉tshera ión꞉kwe, tánon katíʼ kwáh teionkhsennaʼtsónhstha.

⁸ Enhontiaʼtión꞉nite ákta ne ietsenhahrahkwà꞉ke ne ronatsheronniá꞉ton ne iakotenhténion shakotíhkhwen ne iakotkaraientahkwèn꞉ne; tánon tho raonónhskon ne raotiní꞉io rotihnekí꞉ren nonenharákeri ne rotihninón꞉ton tsi nihshakotikaraièn꞉ni.

⁹ Tshiehská꞉te kheiahtón꞉ton ne Amorʼró꞉nons ne raotihén꞉ton, tho nihatinenhié꞉sonskwe tsi ní꞉ioht ne onenʼtakwenhténhtshera iorón꞉tote, tánon thóh nihatiʼshátsteʼskwe tsi ní꞉ioht ne karíhton karón꞉ta; wakerihwahtón꞉ton ne raohikshón꞉ʼahs, kwáh waktehrohtshiónkwen ne tsi keríhtonskwe.

¹⁰ Kwáh ó꞉ni tetkoniaʼtinekénhen ne tsi tiohontsá꞉ien ne Egypt, tánon waʼkonhén꞉teʼse kaié꞉ri niiohseráhsen nikarí꞉weʼskwe ne iaonhwentsathenhá꞉ke, ne naesawenkhón꞉weke tsi rononhontsá꞉ien ne Amorʼró꞉nons.

¹¹ Tánon tsi waʼkheiehiá꞉ron ótiaʼkeʼs ne ietshiioʼokón꞉ʼa ne rotitokénhse ahón꞉ton tánon ótiaʼkeʼs ne kenʼnithotiión꞉sa ne Naziritró꞉non nahatiiaʼtoʼténhake Iáh kwáh eʼthó té꞉ioht, O Israel? rá꞉ton ne Roiá꞉ner.

¹² Ók waʼetshiiónnien ne nazirites nahatihnekí꞉ra noʼnenharákeri, tánon waʼetshihnhaʼne ne rotitokénhse, sewatónnions, “Tóhsa iaʼsewarí꞉waken.”

¹³ Káti, kwáh tenkonnènhstiaʼke tsi nón꞉we níhses, kwáh tsi ní꞉ioht ne kaié꞉ri niiokahkwèn꞉tonte wenníseres ne nó꞉nen kwáh thitewennekerá꞉here.

¹⁴ Shé꞉kon ne kwáh tehotí꞉kaʼs iáh kí thahatiʼniá꞉kenʼne, tánon ne ratiʼshátsteʼs kwáh kíʼ enhonteʼshatstenhseró꞉kten, iáh ó꞉ni ne ronterí꞉ios thahatikwé꞉ni nahontatenónhstate;

¹⁵ Ne ronʼennénhawe iáh kíʼ thahatí꞉take nonhontsá꞉ke, tánon tsi nihá꞉ti ne tehotí꞉kaʼs iáh kíʼ thahatikwé꞉ni nahontatenónhstate khehs tsi nihá꞉ti ne kohsá꞉tens rotihsá꞉tens iáh kíʼ thahatinónhstate tsi ronnónhnhe;

¹⁶ Né꞉tho entewenhniserá꞉teke ne shé꞉kon ne kwáh thoʼnikonhratshátste ne raterí꞉ios enhó꞉senʼse ne rateriiohstáhkhwa tánon raoiaʼtóskon tsi enhaté꞉ko, rá꞉ton Ne Roiá꞉ner.