Acts 9 - Ohiatonhseratokénti

Ne Saul Wahariwanírate Ne Ié꞉sos Tsi Roiá꞉ner

¹ Sékon káti ne Saul neh roriwahiotháties tsi naʼtehotenonhianíton sakohʼrahrastén꞉nis nasakósehthe neh tsi niháti ronwanonteráties ne Roiá꞉ner. Ratsihenstowánen wahotkénsera

² tánon wahariwanónton tòkahʼken thènen iahonwatihiatón꞉ni ne ronaterihónton ne Sitaeró꞉nons tsi ronterenʼnaientákwa tsi nòkwa ne raónha neh nónwe ne Damascus, neh káti tòkah ahatʼtsénri neh nónwe ónhka tsiakawetákwen ne rahosénnakon ne Roiá꞉ner, neh nahotheriwathénʼtiaʼse nasakoiéna, ne rohnónkwe tòkah ó꞉ni ne konʼnónkwe, tánon Jerusalem iensesakohiaténhaʼwe.

³ Ne Saul tsi ákta rawetontátie tsi kanatowánen ne Damascus, thontaʼiawéns꞉tsi waʼtsioswátʼtheʼne tsi karonhiáte watʼkatsirahrík꞉kon ne rahiatáktha.

⁴ Wahaʼhiatsiénenʼne tánon wahothónteʼne ronwahthará꞉ni, “Saul, Saul! Onhnihiotséren tsi takeronhiakéntha?”

⁵ “Ónhka níse, Saiáner?” wahariwanónton. “I꞉i ne Ié꞉sos, tsi nikáien ne etskenrenserónʼnis,” tsi wahʼhothónteʼne.

⁶ “Téstann tánon kanáthakon niaháse, thohʼnónwe enʼtiesaróri onhnénshieʼre.”

⁷ Ne ronʼnónkwe ne skátne ronatʼthaʼitákeʼne wahtatítaʼne, iáh neh tiowénʼna tahonníron; wahatiwennáronke nók iáh kíʼ ónhka tesakothíken.

⁸ Ne Saul thonsahátaʼne tánon thonsahatʼkakwarísi, nók kwáh iáh thènen tesʼsatkáthosʼkwe. Sók kíʼ wahonwanéntʼtsine tánon Damascus niahón꞉ne.

⁹ Nehne ásen niwenniseráke kwáh iáh thènen thesákenʼkwe, tánon thoʼnikaríwes kwáh iáh thènen tehawékon iáh ó꞉ni thènen tehonekíren.

¹⁰ Thóh ranákereʼkwe ne Damascus ne tawethákwen Ananias ronwáiats. Wahatʼkátho, tsi ní꞉ioht ne Roiá꞉ner tsi hiahonáton, “Ananias!” “Kén꞉en íkes, Saiá꞉ner,” watariwaseráko.

¹¹ Ne Roiá꞉ner wahawénhase, “Satateweienéntan tánon kanatakwení꞉ioke niaháse, neh tsi thohʼnónsote ne Judas tánon ehtseriwanónton ne rónkwe neh Tarsus nithawénon Saul ronwáiats. Roterén꞉naien,

¹² tánon neh sahóken ne rónkwe Ananias ronwáiats tahatáwehiate tánon wathonisnonsahéraʼse neh nahónton sékon ahonsahákenʼne.”

¹³ Ananias watariwaseráko, “Saia꞉ner, iakotiokowánen hionkʼróri tsi nókwa kí꞉ken rónkwe ó꞉ni tsi natehiotenonhianíton tsi nisakoiéraʼse ne sonkwetaʼsónhas ne Jerusalem nónwe.

¹⁴ Tánon Damascus nontáre tsi nithoʼsastenseráwi ne ratsihenstakweʼní꞉io nasakoiéna tsi niʼiákon ne iesasén꞉naien.”

¹⁵ Ne Roiá꞉ner wahawénhase, “Wáhs, tsioríhwa riʼhiatarákwen nahatiótense, nahakʼsennówanaʼte tsi nòkwa ne iáh tehatiʼsitaeʼrónons ó꞉ni ne Rontinontiʼiósons tánon ó꞉ni nonkwesónhas thóh nónwe ne Israeronónke.

¹⁶ Óni Í꞉i enhinatónhase tsi niwéso enharonhiáke nakeriwáke.”

¹⁷ Sók kíʼ ne Ananias thóh wárete, hiahatáwehiaʼte tsi nónwe ténteron ne Saul, tánon hiatonʼnisnonsahéraʼse. “Tiathatéken Saul,” wahénron, “Roiá꞉ner rakathoʼrihátie nehne kwáh raónha—Ié꞉sos, tsi nahiathoʼtáshiaʼse nowaháke neh kén꞉en shonʼthesenonhátie. Tahakatóri nehne ahónton sékon ahonsáskenne ó꞉ni nashiàtanaʼne ne Ronikonratokénti.”

¹⁸ Kwáh óksak tsi ní꞉ioht ne kéntionk òstas tonsénne ne Saul rakarákes, tánon ónhton sahákenʼne. Thonsahátaʼne tánon wahatenekwáhesʼte;

¹⁹ tánon sahakʼkwéntaʼne, saronhniione. Ne Saul tokara nonta Damascus nonwe nonsaonisko skatne ne tonhnetaskewen.

Ne Saul Damascus Nónwe Nasakoteriwanóthaʼse

²⁰ Kwáh hiahatʼthakwaríshate nonʼnonsatokentíke tánon tahatásawen wahateriwanóten nètho Ié꞉sos tsi Rawenni꞉io roiénha.

²¹ Tsi niʼiákon wahonwawennáronke wahakoneráko tánon waheriwísake, “Iáh ken raónha tèken neh Jerusalem sakononwariákonsʼkwe nónka ne ronwasénnaiensʼkwe nètho rónkwe Ié꞉sos? Tánon iáh kén neh tehioríhwa tsi kén꞉en nithawénon nasakoiéna nonkwesónha tánon ratsihenstowanénʼke niahonsahsakohiaténhaʼwe?”

²² Nók neh Saul tsi rateriwanót꞉tha ónen sénha rosastenʼenhátie, tánon rariwaníratsʼkwe nètho Ié꞉sos tsi raónha ne Kerístos tánon thóh nióre tsi hiasakonikonrénhaʼwe ne ratiʼsitaeʼrónons neh thóh non nihatinákere ne Damascus iáh teiotónʼon nahonwatenowénton.

²³ Ónen kwáh tóhka nónta sitsiothohétston, wahontʼkenʼnísa ne Sitaeró꞉nons tánon wahontenikonrón꞉ni nahonwanonwariákon ne Saul,

²⁴ nók wahariwáronke tsi nihonatenikonrón꞉ni. Tsi niwenʼníseres ó꞉ni nasontʼthénʼne tsi wahʼthonwanenraiénhaʼse tsi iotenhenrentón꞉nion ne kanátakon neh nahónton nahonwanonwariákon.

²⁵ Nók énskat tsi niwasóntes ne Saul rontenrosónhas hiahonwahiaténhawe tánon tsi hiokáronte nasontáke nónwe tahonwahiatatsʼnéntaʼkwe ahterákon rahiatitáke.

Saul Jerusalem Niaháre

²⁶ Saul Jerusalem niaháre ó꞉ni wahateniénten ne ahsakotsiátaraʼse ne ratikweʼkónne. Nók iáh tethonwetákwen tsi rateriwanót꞉tha, tánon ratikwékon ronwatsiánisʼkwe.

²⁷ Etʼthóhʼne Barnabas sahohiatáko tánon thóh niahohiaténhawe tsi thónʼnes ne ratikweʼkónne. Waʼsakonikonraientáten tsi ní꞉ioht ne Saul róken ne Roiá꞉ner nowaháke tánon ó꞉ni ne Roiá꞉ner tsi iahowénnaraʼne. Óni wasakoróri ne Saul tsi kwáh thoʼnikonrakontákwenʼne tsi nahateriwanóten thóh rahosénnakon ne Ié꞉sos neh nón꞉we Damascus.

²⁸ Tánon kíʼ ne Saul wasakotiatʼthóntʼthase ó꞉ni akwékon nontahónnehte ne Jerusalem, kwáh thoʼnikonrakonthákwen tsi nihotiriwahnóte rahosénʼnakon ne Roiá꞉ner.

²⁹ Kwáh ó꞉ni wathatitháren ó꞉ni watatiriwathirónten ne Greek nehne rorónkas ne Sitaerononké꞉ha, nók kíʼ wahontheniénten nahonwanonwariákon.

³⁰ Neh nónen ne thoʼnethákwens sahatiriwatʼtsénri, Caesarea non niahonwahiaténhawe ne Saul ó꞉ni Tarsus nónwe hiahonwaténienʼte.

³¹ Thóh káti nontáwe neh rothiriwiʼióstons wahothiʼiéntaʼne ne skénnen neh nónwe ne Judea, Galilee, ó꞉ni ne Samaria. Ne tsi wasakoiénawaʼse ne Ronikonratokénti wahatisátsʼtenne ó꞉ni wahonatiokowánahne, tánon thóhʼnon nihononʼnhétie kakweniensthatserákon ne Roiá꞉ner rahoriwáke.

Tiér Lydda Tánon Joppa Non Niaháre

³² Tiér kwáh tsík nónwe niaháre, tánon iahónteratsʼte hiasakonatarénase ne Rawení꞉io rahonkwetaʼsónhas thohʼnónwe ne Lydda.

³³ Etʼthónon iaʼthiatátken ne rónkwe Aeneas ronwáiats, rohiatakenʼhéion tánon ónen satékon nihioseráke kanakʼtháke sihahiatión꞉ni iáh tewáthonskwe nahonsahatkhétsko.

³⁴ “Aeneas,” ne Tiér wahawénhase, “Ié꞉sos Kerístos enshiátsienʼte. Téstann tánon satenakʼtónni.” Kwáh óksak ne Aeneas wahatʼkhétsko.

³⁵ Kwáh onkwetaʼkwékon ne Lydda ó꞉ni ne Sharon non niʼienákere wahonwáken, ó꞉ni tahonwétaʼkwe ne Roia꞉ner.

³⁶ Joppa nónwe skatʼiáta tiotonwísen Tabitha konwáiats, tánon tiawetakwen. (Nahosenhna ne Greek Dorcas ne ne kentons “oskenonton.”) Tiotʼkonhónwe ne iohióte ne tkariwaiéri ó꞉ni iakosniénons ne rotíten.

³⁷ Thóh nikaháwi wahononwákten tánon wakénheie. Wakonwahiatóhare tánon kanotiohárake hiakonwahiáthare.

³⁸ Ne Joppa iáh aínon tatetsátere ne Lydda, tánon nónen ne thonetákwen sahatiriwáronke ne Tiér Lydda nónwe ítʼres, tenihiáse hiahonwanatóri nianiriwénhawe, “Asatʼthontátʼtseke taiʼsasteríhen ken nontáse.”

³⁹ Sók kíʼ ne Tiér wahatateweienéntaʼne sahontenrósen. Siaháraʼwe, kanotióharake niahonwahiaténhawe, nehne kontikwékon ne ionateréʼons tehonwanenrónni, tekonséntʼtos tánon ronwanathonniónʼnis akwékon natiátawis ó꞉ni ne watiatawitserowánens iohsahánion tsi náhe iónʼnhekwe ne Dorcas.

⁴⁰ Tiér akwékon átste nonsontáti hiahóti, tánon waʼtatentʼtsióten wahaterénnaien; etʼthóhʼne tonsahatʼkaraténi thoʼnionsahatiérate tsi non nikahiatáhere tánon wahénron, “Tabitha, satʼkétsko!” Thonsontʼkakwarísi, tánon nónen sahóken ne Tiér sonnitskóten.

⁴¹ Tiér hiatanentʼtsátate tánon wahasniénon tonsakátaʼne. Ehʼthóhʼne ratikwékon hiasakónonke ne thoʼnetákwens, tóhkahiátare ne ioterèhons, tánon kontikwékon tonsahsakoteróseron.

⁴² Kwáh tsi niwatenáskwa ne Joppa tsi watewateriwaréni, tánon iakotiokowánen tahonwétakwe ne Roia꞉ner.

⁴³ Tiér thóka nónta thóʼnon꞉we Joppa nihenteróntaʼkwe skátke ne ranakensahserónnis Simon ronwáiatskwe.