Acts 8 - Ohiatonhseratokénti

¹ Saul wahariwanírate tsi ronwaséhton ne Stephen. Kwáh neh sahenʼnísera neh Jerusalemró꞉nons thonʼtásawen wahathironhiáken. Akwékon ne tiakawetákwens tsiatehonarénion nahotonhontsiáke ne Judea ó꞉ni ne Samaria.

Saul Waharihón꞉ni Ne Tiakawethákwens Naieronhiáken

² Tóhka niháti ne rohtiriwiʼióstons ronʼnónkwe wahonwahiatátha ne Stephen, kwáh rothitsithówas tánon tsehotiwenʼnakethótha tsi nihonwanátens.

³ Nók neh Saul wahatheniénten nasakóthonte nonkwesónhas; kwáh wahanonshásehte, wasakohiatísere tsi tasakohiatínekenwe ne thonetákwens, teʼtsáron ne ronónkwe ó꞉ni ne kohnónkwe, tánon tsi iontatenothónkwa iasakohiatón꞉ni.

Ne Kariwí꞉io Onteriwanóten Ne Samaria Nónwe

⁴ Ne thonetákwens tsi nikáien ne tehonarénion kwáh tsík nonkwéson niahón꞉ne, ronateriwanothátie ne ateriwanothátsera.

⁵ Philip kanatakwení꞉ioke niaháre neh꞉ne Samaria tánon wahoteriwanóten ne Kerístos nonkwéʼthake neh nónwe.

⁶ Nonkwesónha kwáh íken tsi ákta wahontahónsathaʼte tsi nahóten ráthonkwe ne Philip, tánon tsi nihonwatahónsate ó꞉ni wahontʼkátho ne ioriwanerakwaténions tsi naháiere.

⁷ Kwáh tehotihenrétha ne ratinikonratsens tsi sakonwatiʼiatiʼnekenwe tsi sakonatsennine nonkwesónhas, tánon hiakotiokowánen ne iakohiatakenhéion ó꞉ni ne iáh tèiens sahiontatétsente.

⁸ Kwáh káti kowánen nathonnharátsera wakaiéntaʼne neh nónwe nikanátaien.

⁹ Saiátat ne rónkwe ne nónwe nihanákere Simon ronwáiats, ónen kwáh thoʼtsinikaríwes ne Samariaró꞉nons sihotinerákwasʼkwe tsi nihorenʼnáhon ne tahatieronnionháton. Thóh nihonikonróhtenʼne tsi kwàse raʼsenhnowánen,

¹⁰ tánon kwáh tsi niateʼionkwétake ne thóh kanátakon, onhʼnahiakonkwetoténhake, kwáh ákta tsi ronwanikonráhrakwe. Wahonʼníron, “Kí꞉ken rónkwe nehne Iotokénti konwanatónkwa ‘Kasastenserowánen.’”

¹¹ Neh kíʼ aoríhwa kwáh ákta tsi ronwanikonráhrakwe neh tsi karíwes sakonikonrotákwasʼkwe tsi natehatieronʼnionhátonskwe.

¹² Nók kíʼ sontahonʼnétakwe ne Philip rahoteriwanothátsera tsi nòkwa ne kariwí꞉ios ne Rawení꞉io rahonakeraserákon ó꞉ni tsi nòkwa ne Ié꞉sos Kerístos, wahontenekwáheste, ronónkwe ó꞉ni ne konhnónkwe.

¹³ Rahóna ó꞉ni ne Simon tarétakwe; tánon neh sahatenekwáheste, kwáh ákta tsi wahoʼtiathóntʼthase ne Philip tánon tsi nahoriwaneráko ne sahatʼkátho ne kowánens ioriwanerakwathénions tsi nahawénhseron.

¹⁴ Ne ratikweʼkónʼne thoʼnónwe ne Jerusalem wahatiriwáronke Samariaró꞉nons wahatiʼiéna ne Rawenni꞉io rahowén꞉na, sók kíʼ Tiér tánon Sáwatis iahonwanatóri.

¹⁵ Shahánewe, wahonwanaterennaiénhaʼse neh thonʼnetákwens neh nahónton ne Ronikonratokénti hasakohiatóren꞉ne.

¹⁶ Asèken ne Ronikonratokénti iáh àrok ónhka teshakotsién꞉ni; ónhwak khók neh tsi ronatenekwahéston thóh rahosénnakon ne Roiá꞉ner Ié꞉sos.

¹⁷ Ehʼthóhʼne ne Tiér tánon ne Sawátis wathonwananisnonsahérase, tánon ne Ronikonratokénti wasakotsiénhase.

¹⁸ Simon wahatʼkátho ne Rawení꞉io tasakáwen ne Ronikonratokénti ne thoʼnetáhkwens neh ratikweʼkónʼne sathonʼwananisnonsahérase. Sók kíʼ owísta wasakotátʼtse ne Tiér tánon ne Sawátis,

¹⁹ tánon wahénron, “Taskénon nonʼní꞉i kí꞉ken kasatsʼténsera, neh káti nónka takehianisnonsahérase ensakotsiénhase ne Ronikonratokénti.”

²⁰ Nók Tiér wathoʼriwaserákwase, “Kwáh níse tánon ne sawísta onéson niaháse, ne tsi sanonthónʼnions enwáton nasnínon ne Rawení꞉io rahotathawítsera!

²¹ Iáh thetewakwékon iáh ó꞉ni teshiátare nonkwahiotenserákon, tsioríhwa ne seriáʼne tsi iáh tetʼkariwaiéri ne rahohénton ne Rawení꞉io.

²² Sahsatatréwat, káti, kí꞉ken tsi nikariwahétken ne sáwenk, tánon hiasaterénʼnaien rahonháke ne Roiá꞉ner nahónton nahonsahianikónrense tsi niwanonthonniontseráksen kí꞉ken.

²³ Asèken katʼkáthos kwáh tsatanánon ne wahétʼken ó꞉ni kanoshátsera tánon sahiathotaréhon ne kariwanerahaktserákon.”

²⁴ Simon wasakawénhaʼse ne Tiér tánon ne Sawátis, “Aitsiatʼthontátʼtseke astiaterenʼnaiénhase rahonháke ne Roiá꞉ner, nehne tóhsa thènen nahontiátawen tsi nahoténsons weseníron.”

²⁵ Neh nónen shanísa tsi iatʼrorihákwe tánon wahiateriwanóten ne Roiá꞉ner rahoteriwanothátsera, ne Tiér tánon ne Sawátis Jerusalem nionsáne. Tsi nionsáʼne wahiateriwanóten ne kariwí꞉ios tsi nihonaháhes tsík nonwéson ne kanatakónsons ne Samaria.

Philip Tánon Ne Ethiopian Rasenʼnowánen

²⁶ Ne Roiá꞉ner rahoronhiakerónon wahawénhase ne Philip, “Satateweienʼnéntan tánon entié꞉ne niaháse nehne wahohatátie tsi nitsawénon ne Jerusalem tánon ne Gaza nieʼiawénon.”

^27-28 Sók kíʼ ne Philip wahatateweienéntaʼne thóh wárete. Kí꞉ken Ethiopian rasennowánen tehonwatiʼnenhiatákwen neh roteríhonte tehatwistanonʼna꞉áhni ne ionontí꞉io ne Ethiopia, sahotentionhátie. Jerusalem iéreskwe hiahosénʼnaien ne Rawenni꞉io tánon shotentionhátie wenníseres rohonwísere. Tsi rohonwísere, neh rowenʼnhanothátie ne Isaiah rothókense tsi ninikaʼhiatón꞉nions.

²⁹ Ne ronikonratokénti wahawénhase ne Philip, “Wáhs ákta saténti nètho wenníseres.”

³⁰ Philip ákta niaháre tánon wahothóntheʼne tsi nihowenʼnanothátie ne rothókense Isaiah tsi nihohiathón꞉nions. Wahoriwanónthonʼse, “Sanikonraiéntas kén tsi nahóten sawennanothátie?”

³¹ Neh rasenʼnowánen watariwaserko, “Onhʼní꞉ioht tsi ahonkenikonraiéntaʼne tòkah iáh ónka tahionkenikonraientháten?” Sók kíʼ wahohónkaron ne Philip tahiathíta ne wennísereske.

³² Neh kí꞉ken nahowenʼnasónhas nohiatonseratokénti tsi nónwe nihowennaʼnotátie: “Kwáh neh teshiatiéren ne teiotinakarontónha iakonwahiaténhawe nakonwanonwariákhon, Tsi ní꞉ioht ne teiotinakarontónha owíra kwáh thatehiothóte nónen konwanonwérias. Iáh neh tsiowén꞉na teháwen.

³³ Kwáh íken tsi wahonwatéhathe, tánon iáh ónhka tehiotetʼtsénron nahontahonwanéhon. Iáh ónhka taiekwéni nahiontʼróri tsi niaʼotʼtkwatsirínon, tsioríhwa ne tsi rónnhekwe nohontsiáke iahontókʼten.”

³⁴ Ne rasennowánen wahoriwanónthonse ne Philip, “Takróri, ónhka róthons kí꞉ken rotokenséhakwe? Rahonháaʼkhok káton ónhkak akóren?”

³⁵ Ehʼthóhʼne ne Philip tahatásawen wahanikonraiéntaʼte; thóh tahatásawen kí꞉ken owennasónhas ne oriwatokénti, wahoróri ne Kariwí꞉ios tsi nòkwa ne Ié꞉sos.

³⁶ Tsi nihonatʼthaʼítake, hiahánewe tsi nónwe tkanèko, nók wahénron ne rasennowánen, “Kén꞉en kahnèʼko. Nahóten nahontsiotát꞉tie nakatenekwáheste?”

³⁸ Ne rasennowánen wahaténʼnaʼne takátaʼne ne wenníseres, tenitsiáron Philip ó꞉ni ne rasennowánen hiaʼiatéskowe, tánon ne Philip wahonekwáheste.

³⁹ Nónen ne sonsahiateskóh꞉ko, ne Rahonikonratokéntitsera ne Roiá꞉ner ahéren sahohiatenháwiʼte ne Philip. Ne rasennowánen iáh nonwénton tesʼshóken, nók sahatʼthaʼítha, kwáh íken tsi rotʼtsenʼnón꞉ni.

⁴⁰ Philip Azotus neh nonnionsáre; thó꞉ne Caesarea, nionsáre, tánon tsi niaháre roteriwanothátie ne kariwí꞉ios ne kwáh tsi niaʼtekanatákes.