Acts 6 - Ohiatonhseratokénti

Ne Tsiátak Niháti Rontsniénons

¹ Kwáh kén náhe onakènʼke, tsi wahonatiokowánaʼne ne thonetakwen, okʼtsíro tsi natehóntere nehne Sitaeró꞉nons neh ne ronhrónkʼkhas ne Greek ó꞉ni ne Sitaeró꞉nons neh ne ronhrónkʼkhas ne Hebrew. Neh ne ronhrónkʼkhas ne Greek wahonʼníron neh rahononkwetaʼsónhas ne ionatereʼons iáh tekontiʼienas tsi natehonreniata nowísta ne ionateréʼons ahotiriwáke.

² Sók kíʼ ne tékeni iawénre niháti ne ratikweʼkónʼne hiahonwatinónkon kwáh kanenrakwékon ne thonʼnetákwens tánon wahonʼníron, “Iáh tetʼkariwaiéri naiontʼkénraʼte nahonteriwanótake ne Rawení꞉io rahowén꞉na kék neh kén nakaiéren nowístas.

³ Éhʼthoh káti, tewatenrosónhas, tsiátak niháti ietʼtsiʼiataráko tsi naʼtesewátere nehne kwáh ronwatiʼientéri nahatiʼhiatananónhake ne Ronikonratokénti ó꞉ni kanikonraienthátsera, tánon ronónha enʼhiakhihiatakweʼní꞉iosʼte kíʼ nahorihótens.

⁴ Nonkwátsiaks, neh káti, hiatenʼiakwatatʼtiáhate tsi nókwa ne aterénnaient ó꞉ni ne ateriwanothátsera ahohioténsera.”

⁵ Kwáh kentiokwakwékon wahakaweʼrientí꞉io tsi nahatítaʼte ne ratikweʼkónʼne, sók kíʼ Stephen wahonwahiataráko, thóh rónkwe kwáh íken tsi tawetákwen, ó꞉ni ne Ronikonratokénti, tánon Philip, Prochorus, Nicanor, Timon, Parmenas, ó꞉ni Nicolaus, tánon ne iáh teʼasitaerónon ne Antioch nithawénon neh꞉ne iáh wahónʼnise tsi néhe Judaism non nishotsiátare.

⁶ Ne kentiókwa watonwanateróseron ne ratikweʼkónʼne, wahonterénʼnaien tánon wathonwananisnónsaren.

⁷ Tánon káti ne Rawení꞉io rahowénʼna ionsontasónteren tonsonʼréni. Ne ronteriwanótha ne Jerusalem nónwe takanenrakwátaʼne tsi nahonatiokowánaʼne, ó꞉ni kwáh éhʼtho tsi niháti ne ratiʼtsihénstatsis wahatiʼiéna ne tewetákwen.

Tsi Wahonwaiéna Ne Stephen

⁸ Ne Stephen, thóh rónkwe kwáh íken tsi iawethowánen ne Rawení꞉io tsi rohiatateríston ó꞉ni kwáh rasatstenseranáh꞉non, iorihowánens tsi nihoieránions ne ioriwanerakwathénions nonkwé꞉ne.

⁹ Nók ótiakes ne ronónkwe ronwariwakweníhaʼkwe nononsatokentíke ratiʼiátare ó꞉ni neh Freedmen ronwatinathónkwa, ó꞉ni ne Cyreneró꞉nons tánon ne Alexandria. Rononha tánon ne ronátiakes ne Sitaeró꞉nons ne Cilicia nón nihatinákere tánon ne Asia tahontásawen wathatiriwakéna ne Stephen.

¹⁰ Nók ne Ronikonratokénti tsi nikowánen natʼthokhátsera taháwen ne Stephen nónen enhatáti, iáh tehatikwéniensʼkwe ne tahontahonwahwennóko.

¹¹ Sók kíʼ tohkára niháti ne ronʼnónkwes wahonteriwaserón꞉ni nahonʼníron, “Wahonkwathónteʼne rotkónte ne Mahís ó꞉ni ne Rawení꞉io!”

¹² Neh wakarihón꞉ni wahtionnikonráren nonkwesónha, ne rotikstenhokónhas, ó꞉ni ne sakotirihonʼnién꞉nis ne kaianerénsera. Wahonwahiéna ne Stephen tánon rahotihénton ne ratitsiénhaiens niahonwahiaténhaʼwe.

¹³ Ehʼthóhʼne iahonwatiʼiatínionte ronónkwes nahonwanowénthase. “Ki꞉ken rónkwe,” wahonʼníron, “tiotʼkonhónwe rakenrenserón꞉nis nonkwanonsatokénti ó꞉ni ne Mahís rahohianerénseras.

¹⁴ Ionkwatʼthontéʼon tsi ráwen nètho kí꞉ken Ié꞉sos ne Nazarethʼronon tsi enhanonsarí꞉shion nononsatokénti tánon akwékon tenhatáton tsi nitionkwarennahón꞉ne tsi nitesonkwáwi ne Mahís!”

¹⁵ Ratikwékon ne thóh ratikskótonkwe ne ratitsiénhaiens hiatonwatʼkáneren ne Stephen tánon wahontʼkátho kwáh thóh nihakonshó꞉ten tsi ní꞉ioht ne raronhiakerónon.