Acts 26 - Ohiatonhseratokénti

Kór Tahathátene Rahohénton Ne Agrippa

¹ Agrippa wahawénhase ne Kór, “Saianerenseráien ne kwáh iatesiáti asatathatiá꞉se.” Kór wahanentʼtsakwarishiónko tánon ken ní꞉ioht tsi tahatáteʼne:

² “Sanontí꞉io Agrippa! Kwáh íken tsi wakateraswí꞉io nónwa wenniseráte tsi nentʼkatátene ne sahénton ne tsi nahorihoténsons kíʼ Sitaeró꞉nons ionkeriwárhos,

³ Sénha tsi kwáh akwékon seriwaientéri tsi nihothiʼianerenserótens ó꞉ni tsi natehóntere ne Sitaeró꞉nons. Konriwanontónnis, káti, nahisanikonkátsʼteke tsi haskatahónsatate.

⁴ “Rathikwékon ne Sitaeró꞉nons ronateriéntare tsi ní꞉ioht tsi wakatenniseraténionkwe kwáh tsi niʼió꞉re ne sitewatiónha. Ronateriéntare tsi ní꞉ioht tsi wakathonʼnaténtion tsi náhe sikónnhe, neh kwáh í꞉i akenakeraserákon ehthóne ne Jerusalem nónwe.

⁵ Kwáh tsiókonte tsi ronateriéntarakwe, tóhkaʼ rónʼnereh ahontʼróri, neh kwáh tsiotserentákwen, thóh nónwe nitiátarakwe ne kwáh rothiriwaníron tsi nihionkwariwiʼiosthontseróten, nehne Pharisees.

⁶ Tánon nónwa ónen kén꞉en ìkete ne tahiontiatórete tsoríhwa tsi neh wakérare tsi nih sakorahrasténni ne Rawenni꞉io nonkwasotʼtserakén꞉ens—

⁷ Ne kwáh thóh ní꞉ioht ne tékeni-iawénre nihothitiókwake non tionkwetasónhas tsi rothiráhrekwe nahathiʼiéna, tsi nihonwasénnaienskwe ne Rawenni꞉io kwáh niatewenniseráke ó꞉ni iatehiokarahtseráke. Tánon ne karihónnis kí꞉ken haskanéktsera, Sanontí꞉io, tsi hionkeriwárhos ne Sitaeró꞉nons!

⁸ Nontiéren tsi níhtion ne kén꞉en ísewes sewariwaiéwas nahontesewétakwe ne Rawenni꞉io tsi sesakokétsʼkwas ne iakawenhéion?

⁹ “Kwáh iatetiáti wakéron tsi kwáh iatenkatátʼtiahate akatʼkónten tsi nòkwa ne Ié꞉sos Nazarethronon rahoriwasónha.

¹⁰ Kwáh thóh niwatiéren ne Jerusalem nónwe. Iontianerenseráwi ne rathitsihenstowánens tánon ronatiokowánen ne Rawenni꞉io rahonkwetaʼsónhas khenóton; tánon nónen sahonwathiríwente nahonníheie, í꞉i ó꞉ni wakeriwanónwe꞉ne.

¹¹ Wéso ioriwá꞉ke wakatennáʼon nononsatokentíke ahonwathiréwate ó꞉ni wakatheniénten nahonthonní꞉en tsi nithoʼnetákwen. Thóh niʼió꞉re tsi ionkenakónniskwe, nóia tknanataiénton niewakénon nakheronhiákente.

Kór Wahatʼróri Tsi Natehotonnnhaténion Tsi Tahawe꞉takwe Ne Ié꞉sos

¹² “Ne kí꞉ken iorihonníʼon tsi Damascus niewakénon kwáh watianerenseraientátie ne tsi niʼiontianerenseráwi ne rathitsihenstakweʼní꞉ios.

¹³ Neh owahakéson ne entié꞉ne síkare, Sanontí꞉io, wakatʼkátho sénha teioswátʼte tsi ní꞉ioht ne karákwa, tsi karonhiáte nontáwe tánon wationkwá꞉wanake neh ronhnónkwe ne skát꞉ke ionkwatʼtahitákene.

¹⁴ Iakwakwékon ohontsiáke iahakwahiatiénen꞉ne, tánon onhkahonshónkote tsi wahonkénhase ne Hebrew nakawennóten, ‘Saul, Saul! Nontiéren tsi takeronhiakéntha? Ísek khók satatʼkarewátha tsi thisanákwens, tsi ní꞉ioht ne tehotinakáres tsi ronraséntʼtos ne rahotsenenhókons rahonakáreh.’

¹⁵ ‘Ónhka níse, Saia꞉ner?’ Wakeriwanónton. Tánon ne Roia꞉ner waʼtarihwaseráko, ‘Í꞉i ne Ié꞉sos, tsi nikáien ne etskenrenserónʼnis.

¹⁶ Nók thonsástann. Wakonhiatórenʼne nakoniataráko nastsió꞉tense. Enseróri nakorénshons tsi ní꞉ioht tsi wahsékʼken nónwa wenniseráte tánon tsi nahóten enkonnatónhase ne ken enhiotséte.

¹⁷ Entʼkónne tsi nókwa ne Israerʼró꞉nons ó꞉ni ne iáh tehatiʼsitaeʼró꞉nons tsi nienkoniaténiethe tsi non nihónnes.

¹⁸ Tensekakwarísi ó꞉ni tonsashekaraténi tsi non natetiókaras tsi teioskwátʼte niehónne tánon shèkwa ne Raneshonrónon rahosatsténsera nók Rawenni꞉io rahosatsténsera tontashéhion, káti tsi entionkétakwe ne rahothiriwanerahákʼtsera enskanikonrén꞉en tánon enhatiʼiéna neh skátʼke ahonnéseke tsi niháti ne Rawenni꞉io sakohiatarákwen.’

Kór Wahatʼróri Tsi Nihohiotenserhó꞉ten

¹⁹ “Káti, Sahnontí꞉io Agrippa, oriwiʼioʼónwe tsi wakatewénnarakwe tsi nakatʼkátho ne karonhiáke nontáwe.

²⁰ Tontsérente nehne Damascus nónwe etʼthóhne Jerusalem non etʼthóhne kwáh kanakeraserakwékon ne Judeaʼronon꞉ke tánon tsi nowéson ne iáh tehatiʼsitaeʼró꞉nons, wakhehiateriwanótʼtase tsi ónenk tsi ensontatʼréwate ne rahothiriwanerahákʼtseras tánon Ni꞉ióʼne nókwa niehónne tánon thóh nihatí꞉ier tsi ronnèʼnest tsi shonatatʼrewáton.

²¹ Neh wakarihónni ne Sitaeró꞉nons wahontiéna nononsatokentíke shekíteron, tánon wahontheniénten nahionkenonwariákʼkon.

²² Nók tsi nióre nónwa wenniseráte Rawenni꞉io ratienawasehaties, tánon káti kén꞉en ìkete sewakwékon kwaróris, kwáh akwékon satahiotónhake. Tsi nahóten káton kwáh neh sahoríwa tsi nihónen ne roʼnatiatátkonʼkwe ó꞉ni ne Mahís tsi niháwen tsi neniáwenne:

²³ Nètho Kerístos ónenk tsi enharonhiáken tánon raónha tentʼthatiérente tentʼtatʼkétsko ne kenheiát꞉ne, nahsakorihowanháten nahoswatʼthétsera ne kaiatakenhátsera ne Sitaeró꞉nons tánon ne iáh tehathisitaerónons.”

²⁴ Tsi thóh ní꞉ioht ne Kór tahatátene, Festus iahotewennaiéntonwe, “Sanahʼkwén꞉en, Kór! Sóhtsi satʼthiatonseraweienston ne sanakonniá꞉tha!”

²⁵ Kór waʼtarihwaseráko, “Iáh tewakenakwén꞉en, Sanontí꞉io! Neh wakʼtarákwen ne kwáh orihwí꞉io.

²⁶ Sanontí꞉io Agrippa! Enkʼkwéni nakonthárase ne kwáh ahioriwaníronke, tsioríhwa tsi seriwaientéris kí꞉ken nahorihoténsons. Kwáh wakateriéntare tsi kwáh tsentères ne tsioriwátʼtions, kíʼ tsi nahawénseron iáh tsi tehiotenontáwehe nontewaséhtonʼne.

²⁷ Sanontí꞉io Agrippa, tesetákwa ken ne roʼnatiatatkonkwe? Wakateriéntare tsi tisetákwen!”

²⁸ Agrippa wahawénhase ne Kór, “Tsi kenk niʼiónsʼsa ne kawistáhes ísere ken enskónʼnien nakeriwíʼiosʼte?”

²⁹ “Tóhka kenk nikaríwes tóhka ó꞉ni karíhwes,” Kór waʼtarihwaseráko, “Rihiaterennaʼiénnis ne Rawenni꞉io níse tánon ne ronátiakes neh ionkatahónsate nónwa wenniseráte thóh nahonʼnonkwethótenne tsi ni꞉i ní꞉ioht—nekʼkhók kíʼ ne tóhsa tahathinenstéren noronkwása!”

³⁰ Ehʼthóhʼne ne Ronnonti꞉io, ne rakóra, Bernice, ó꞉ni rohʼnátias wathatítaʼne,

³¹ tánon shonsahonténti wathontaténhase, “Kí꞉ken rónkwe iáh thènen tehoníkon ne tahiotonhontióʼon narénheie tóh kaʼ ó꞉ni nahatenóton.”

³² Tánon ne Agrippa wahawénhase ne Festus, “Ahiotónʼon kí꞉ken rónkwe nahonsahonwatʼkáwen tóhka iáh tahoriwanonthónni ne Rakorakówa rahónha tahahiatorete.”