Acts 24 - Ohiatonhseratokénti

Ne Sitaeró꞉nons Rahohénton Ne Rakora Wahonwariwárho

¹ Wísk nónta onakènke ne ratsihenstowánen Ananias Caesarea niaháre rónʼnene ne rotikstenokónhas ó꞉ni ne tehariwakénas Tertullus ronwáiats. Rahohénton ne Rakora Felix watathítane tánon wahonwariwárho ne Kór.

² Ehʼthóhʼne iahonwénnonke ne Kór, ó꞉ni thóʼne tahatásawen ne Tertullus wahatehʼnonkónni tsi nahoriwárho, ken nahénron: “Tsenʼnowánen, neh tsi nisatenikonratʼthó꞉ka tsi niskwahéntense neh wahonkwáhawe karíhwes tsi skénʼnon íken, tánon wéso teʼiothatáwi tsi ní꞉ioht tsi tsiónnhe neh ioianerastákwen nonkwanakerásera.

³ Kwáh tsik nonwéson tsi iakwariwakweniénstha tánon ó꞉ni kwáh tiókonte, tánon kwáh íken tsi tekwanonwerátons.

⁴ Iáh tèkere sóhtsi wéso akatiénawasʼte ne sáwenk kawistáheks, nók káti, konnekénʼnis kanoronkwatserákon tsi hasatahónsathaʼte, tsi nahóten enkíron kenkʼní꞉ionhs.

⁵ Wahʼsakwahiatatʼtsénri kí꞉ken rónkwe kwáh íken tsi iót꞉teron tsi ní꞉ioht tsi rotakónta; kwáh owentsiakwékon tsi sakotsironniénnis ne Sitaeró꞉nons tánon raónha sakohéntense ne Nazarenes kentiókwa.

⁶ Tánon ó꞉ni wahatheniénten nahsakohetʼkénten Nʼnonsatokentíke, nók kíʼ wasakwaiéna.

⁸ Nók tóhkaʼ entieriwanonthonniónhase kí꞉ken rónkwe, kwáh í꞉se ensateriéntaraʼne oriwakwékon tsi nahoténsons sakwanonthánaks.”

⁹ Ne Sitaeró꞉nons kwáh ne sáka tsi wahonwariwárho ne Kór tánon wahonníron akwékon thoní꞉ioht.

Kór Tahatáteʼnhe Rahohénton Ne Felix

¹⁰ Ehʼthóhʼne ónen ne rakóra iahotiáton ne Kór nahatáti, tánon ne Kór wahénron, “Wakateriéntare tsi ónen karíhwes siseriwénthase neh kén nónwe niʼkentiókwaien, tánon káti kwáh wakatʼtsennónni tsi ahontakatáteʼnhe ne sahénton.

¹¹ Tsi kwáh í꞉se ensahteriéntaraʼne, iáh ísiʼnon ne tékeni-iawénre nónta tsi náhe tkènʼne Jerusalem niaháke nah katerennaiénʼnha.

¹² Ne Sitaeró꞉nons iáh tehiónkʼken ne ónhka tahionkeniriwathiróntake nʼononsatokentíke, iáh ó꞉ni tehiónkʼken nakhetsironniénnike nonkwesónha, iáh nononsatokentíke iáh ó꞉ni nakʼtéson nonwéson ne kanátakon.

¹³ Iáh ó꞉ni tahatikwéni naiesariwaníratʼtse tsi nihionkeriwáros.

¹⁴ Ken kíʼ nahóten enkeriwanírate ne sahénton: Neh risénnaiens ne Rawenni꞉io tsi nikáien ne ietʼthisotʼthonkonkén꞉en ronwasénnaienskwe, tsi íkʼsere tsi nihónen tóhsa tasétat nahóten ne iáh thóʼkenskeʼ tèken. Nók kíʼ akwékon tewaketákwen tsi nikaiáton ne Mahís rahoianerenserákon ó꞉ni tsi nihotihiatónnion ne roʼnatiatatʼkonkwe.

¹⁵ Kwáh nesáka tsi tewaketákwen tsi kíʼ ní꞉ioht ne ronónha, kwáh akenáton, kwáh onkwetakwékon, satèhiot ne tionkwetaiéri ó꞉ni ne ionkwetákʼsen, tenhtiontʼkétsko ne kenheiátʼne.

¹⁶ Káti tiotʼkonónwe iatewakatatʼtiaháton ne kwáh akeriasihióhake rahohénton ne Rawenni꞉io ó꞉ni nonkwesónha.

¹⁷ “Tsi tóhkaʼ niʼioseráke wakenakerákwenʼne ne Jerusalem, Thóh iékeskwe hiatèkon iakhehawítase nakonkwetaʼsónha tánon iakhehiawíʼon.

¹⁸ Neh káti tsi nikaríwes ehʼniwatierenhátie ononsatokentíke iahontiatatʼtsénri, kíʼ hiatʼkhóten tsi sakatonnhakanónʼni. Thiʼwakonhákok iáh ó꞉ni thènen tatekanikonrahrakʼtseráien.

¹⁹ Nók tóhkaʼ niháti ne Sitaeró꞉nons Asia nónwe nithoʼnénon thóh rónneskwe; kwáh kíʼ ronónha tehiotonwentióʼon ne sahénton nahontahón꞉ne tánon ionkeriwáhro tsi nihionkátʼkonte.

²⁰ Thóka ó꞉ni tsi niháti ne kén꞉en rónʼnes rontʼróri onhʼní꞉ioht tsi rahthiʼtsénries nahonkeníkon, shiatékʼtaʼne ne rahonthihénton ne rathitsénhaiens—

²¹ Neh khók tsoríhwa tsi nahóten wakíron ne rahothihénton shiekeʼtha: ‘Ónwa wenniseráte ne teskwaiatorétha tsi nitewakethákwen ne iakawenhéion tsi entiontónʼnhete.’”

²² Ehʼthóhʼne ne Felix, tsi kwáh thóh kén꞉en rariwaientéri tsi nikarihóten, wahanóton ne teiehiatorethákwa. “Ne raterihioserakweʼní꞉io Lysias sárawe,” wasakawénhaʼse, “i꞉i tentiatórete ne sariwasónha.”

²³ Ne karíton ne ronikónrare ne Kór wahorihónten kwáh ákʼtha tsi rotennikonráren, nók wasakoríʼon ne Kór rontenrosónhas ne tahonwariwásnieʼse.

Kór Rahothihénton Ne Felix Tánon Ne Drusilla Wahatáti

²⁴ Tóhka nónta onakènʼke Felix tasakohiaténhawe ne róne Drusilla, iehsitaerónon nahehiathó꞉ten. Kór iahonwénʼnonke tánon wahonwatahónsathate tsi nahatʼróri ne tawetákwen rahonháke ne Kerístos Ié꞉sos.

²⁵ Nók tsi náhe ne Kór rotarakwenhátie ne kaiáneren, nakahónha ahontaieniarótaroke, tánon tsi táweh nennísera ne kaiatorethátsera, Felix wahóteronne tánon wahénron, “Ónen kíʼ ahónton nahéren ahonsásethe. Sékon nienskónnonke nónen enwakatesenʼnaiéntaʼne.”

²⁶ Tánon kiʼó꞉ni roráhrekwe ne Kór ahowíston; tánon neh akarihónni iotʼkáte ienhonʼnóntseke ne tanitháren.

²⁷ Shonthóhetste ne tehioseráke, ne Porcius Festus tonsahonakʼthákwen ne Felix tsi rakóraʼkwe kènʼne. Felix rérahkwe nasakonikonraiérite ne Sitaeró꞉nons sók kíʼ wahonóton ne Kór.