Acts 23 - Ohiatonhseratokénti

¹ Kór kwáh iahatakwaríshiaʼte tsi iatesakotʼkáneren ne rathitsiénhaiens tánon wahénron, “Tewatatéken Israerʼró꞉nons! Nakweriáne kwáh oriwiʼiohónwe tsi tehioskwátʼte tsi ní꞉ioht tsi konʼnhétie rahohénton ne Rawenni꞉io tsi nióre nónwa wenniseráte.”

² Ne ratsihenstowánen Ananias wahsakónaʼne neh raiatákʼta ronnétahkwe ne Kór nahonwaskwentáiake.

³ Kór wahawénhase, “Oriwihioʼónwe ne Rawenni꞉io tsi eniaiénte—í꞉se ne karáken kanekáron nasontáke! Thóh tsitsʼkwáhere ne tastiatórete tsi nikaianerenseróten, akwa kis ó꞉ni téhsas ne kaianerénsera tsi washénaʼne nahióntsienthe!”

⁴ Ne ronnónkwe ne rahiatákʼta ronnétakwe ne Kór wahonwénhase, “Tsieʼnikonrakarewátha ne kwáh éneken tótʼte ne Rawenni꞉io rahotsihénstatsi!”

⁵ Kór wahtariwaseráko, “Tewatathékens Israerʼró꞉nons, Iáh tewakateriéntaraʼkwe tsi Ratsihenstowáne néhʼtho. Noriwatokénti wáhton, ‘Iáh tesaríwaien ne thénen ahtsiénhase ne sakohkóra ne sonkwetaʼsónha.’”

⁶ Ne Kór sahatʼkátho ótsiakes nonkwesónha Sadducees nahatihiatótens ótsiakes ó꞉ni Pharisees, iasakonáton ne rathitsiénhaiens, “Tewatathékens Israerʼró꞉nons! Pharisees natiathóten, neh rahtsiénha Pharisees nahahiathóken. Kén꞉en tehiontiatorétha neh tsi Íkʼkhawe ne tewetákwen ne iakawenhéion entiontónnhethe.”

⁷ Tsi niʼiostóre tsi ne wahénron, ne Pharisees ó꞉ni ne Sadducees tahontásawen watathiriwakéna, tánon wathonʼnitiokwakʼkháshion. (

⁸ Asèken ne Sadducees ronthónʼnions tsi iáh thatahontahiontʼkétsko ne kenheiátne, iáh ó꞉ni tekáien ne raronhiakerónon, iáh ó꞉ni natónʼnhets; nók ne Pharisees kwáh nenne oriwakwékon tonnethákwen.)

⁹ Takaristʼstowanénsere, tánon kíʼ ótiakes ne kaianerénsera sakotirihonniénʼni nene Pharisees raotiʼtiokwákon nonnihathiʼiátare wathatítaʼne tánon kwáh íken tsi iosátsthe tsi waʼthonthiriwarénho: “Kwa iáh ne tsoríhwa tehiakwariwatʼtsénries neh thènen ahoníkon kí꞉ken rónkwe! Tóhka ó꞉ni knakasastenseroten tóhkaʼ ó꞉ni kwa thoʼkenske raronhiakeronon watʼnitharen!”

¹⁰ Tsi tehothiriwatironte ónen sénha wahkatsirowána, neh rahnenrakweʼní꞉io wahóteronne nontiérenk ne Kór ahonwahiataratiónko. Sók kíʼ wasakónahne ne ronterí꞉ios kanénrakon nienʼhón꞉ne, ienshonʼwén꞉nok ne Kór, tánon ahtenhénrakon nieʼsonwahiaténhaf.

¹¹ Neh tsi niwasóntes ne Roiá꞉ner rahiatákʼta ne Kór watáthaʼne tánon wahénron, “Tóhsa sateron! Takeriwanirati ne ken nónwe Jerusalem, tánon kíʼ kwa sateriwaienni ne thóh niáshere ne Rome nónwe.”

Ne Sitaeró꞉nons Tsi Nahontenikonrónni Nahonwanonwariákon Ne Kór

¹² Nóia sahiórenʼne ótiakes ne Sitaeró꞉nons wahontʼkennísa tánon nahontenikonrónni. Kwáh wahonráraste tsi iáh thènen tathahonskáʼon iáh ó꞉ni tahatinikíra tsi nío꞉re ienhonwanonwariákʼkon ne Kór.

¹³ Ísinon ne kaieriʼniwásen nihionkwetákene tsi skátʼke wahontenikonrónni.

¹⁴ Ehʼthóhʼne ratsihenstowánenke tánon ne rotikstenhokónhas niahónne wahonníron, “Kwáh ioriwaníron tsi skátʼne ionkwatathararasténni tsi iáh thènen taiákwaʼke tsi nió꞉re iensakwanonwariakʼkon ne Kór.

¹⁵ Ónen káti, í꞉se tánon ne sewatsiénhaiens iatsisewateriwanié꞉ten ne ratiokwakweʼní꞉io ne Roman sewahénton nithoʼhiaténhaf ne Kór, tsi neh akénhake ne kwáh oriwihiohónwe tesewathonʼwentióni ne tkaiéri tsi ní꞉ioht tsi ahisewariwatʼtsiénri tsi nòkwa ne rahónha. Nók kíʼ ionkwatateweiennentáʼon nahsakwanonwariákʼkon nohénton kén꞉en árawe.”

¹⁶ Nók neh Kór iatenosénha ronwaiénha wahothónteʼne tsi nihotenikonrónnis; sók kíʼ atenhenrákʼtha niaháre wahoróri ne Kór.

¹⁷ Ehʼthóhʼne ne Kór saiáta iahónonke ne karíton tánon wahawénhase, “Hiatiaténhaf kí꞉ken nithohiónha tsítres ne ratiokwakweʼní꞉io, knahótenk róien nahoróri.”

¹⁸ Ne karíton iahohiaténhawe, tsítres ne ratiokwakweʼní꞉io, tánon wahénron, “Ne ranóton Kór iahakínonke tánon wahakeriwanóntonse nahontahihiaténhawe kí꞉ken nithohiónha ne sonháke, tsioríhwa tsi knahótenk róien nahiaróri.”

¹⁹ Ne ratiokwakweʼní꞉io tahonéntʼtsa tánon ken nióre niaháne, tánon wahoriwanóntonse, “Nahóten sáien nasekʼróri?”

²⁰ Wahénron, “Ne Sitaeró꞉nons ronatenikonríson naʼiesariwanóntonse nenʼiórenʼne ne Kór iatsiaténhawe tsi rathitsienhaientákwa, ánioh ne rathitsiénhaiens sénha tehonathonwentióni nahontakaiérike tsi ahathiriwatʼtsiénri tsi nókwa ne rahonháke.

²¹ Nók tóhsa seiatahónsatat, tsioríhwa tsi isinónwe ne kaiéri-niwásen niháti enhonatasétonke ó꞉ni enhonwaráreke. Ronahrahráston tsi iáh tathahonskaʼon iáh ó꞉ni tahathinikira tsi nióre ienhonwanonwariákʼkon. Ónen ronatateweiennentáʼon tánon rothiráre niaʼtahisariwaiéntase.”

²² Ne rentiokwakwení꞉io wahénron, “Tóhsa ónka sheróri tsi wahsekʼróri kíʼ nahorihóten.” Tánon sahotékwate kíʼ nithoʼhiónha.

Kór Iahonwaténiete Nahatʼkorasthána Ne Felix Nónwe

²³ Ne ratiokwakweʼní꞉io iasakónonke teniʼiáse ne rahonkwéta tánon wahénron, “ientʼtsiweienéntan tékeni tewenniáwe niháti ronterí꞉ios nehne Caesarea niahónne, rontenrósen ne tsiátak-niwásen niháti ne rothisátens ó꞉ni tékeni tewen-niáwe niháti ne rontʼtsikwaró꞉iaks, tánon ronatateweienʼnentahónhak ne tióton nitsiowistáhe nenhiókaraʼwe.

²⁴ Ientʼtsiweienéntan ne kosáhtens ne Kór ahosáten tánon ó꞉ni skénʼnenk tiárawe tsi thénteron ne Rakora Felix.”

²⁵ Ehʼthóhʼne ne rentiokwakweʼní꞉io ken ní꞉ioht tsi wahahiatonserónni:

²⁶ “I꞉i neh Claudius Lysias, iakonhiátonse tsennowánen, Skora Felix: Tekonnonwerátons.

²⁷ Ne Sitaeró꞉nons wahonwaiéna kí꞉ken rónkwe tánon ónen thówa sahonwanonwariákʼkon. Wakáronke tsi Roman nahahiatóten, sók kíʼ thóh niaháke tánon sahiniákente.

²⁸ Tewakathonwentiónine nakeriwatʼtsénri nahóten ronwariwároskwe, hiahihiaténhawe tsi tathitsienhaientákwa.

²⁹ Wakeriwatʼtsénri tsi kwáh iáh thènen tehoiéren tsi natahoténtion narenheie tóhkaʼ ó꞉ni nahatenóthon; tsi ronwariwáhroskwe neh ronwariwanontonniónniskwe ne rahothiʼianerénsera.

³⁰ Sakeriwatʼtsénri tsi tehonwaskotaníhakwe, kwáh óksak iatewakeriwaiéntase nisèke iahihiaténiete. Wakheróri ne ronwariwároskwe sahénton niehathíhaf.”

³¹ Neh ronterí꞉ios thóh nahatí꞉iere tsi nihonwathináʼon. Iahonwénnonke ne Kór tánon neh siwasónta iahonwahiaténhawe tsi nióre ne Antipatris.

³² Nóia sahiórenʼne ne ronterí꞉ios tsi niháti ne thakéson niehónenon sahonnewe tánon nehne rothisátens iahonwahiaténhawe ne Kór.

³³ Caesarea non niahonwahiaténhawe, tahónʼhion ne kahiatónsera ne rakóra, tánon wahonwatiakwarísi ne Kór.

³⁴ Ne rakóra wahawennanóten ne kahiatónsera tánon wahoriwanóntonse ne Kór kaʼnón nithawénon. Nónen sahariwatʼtsénri tsi Cilicia nónwe nitawénon,

³⁵ wahénron, “Enkonhiatʼthóntene nónen ne iesariwáros enhónnewe.” Ehʼthóhʼne wahaténnane nahonwateweniénton ó꞉ni nahonwatennikonráren ne Kór kwáh thóh kakoraserákon.