Acts 22 - Ohiatonhseratokénti

¹ “Tewataʼtékens kaniseras, takwatahónsatat tsi nentʼkatátheʼne ne sewahénton!”

² Neh sahonwatʼthóntene tsi Hebrew niwaronkatʼtseróten róhthare ónen sénha sakʼtahontatónni; tánon ne Kór iahatasónteren:

³ “Ksitaeronon, Tarsus nónwe Cilicia aotonhontsake tewakenakeráton, nók kén꞉en Jerusalem wahkathehiáron Gamaliel non niʼwakateweiénston. Kwáh íken tsi ioníron tsi wakateweiénston ne ietʼthisotʼtahokonkén꞉en rahothihianerénsera ó꞉ni kwáh éhʼtho tsi niʼiʼriwakweniénstha ne Rawenni꞉io tsi kiʼniseʼní꞉ioht ne kén꞉en isewes꞉nónwa wenniseráte.

⁴ Kehiathónton nonkwesónha nónka iésere ne kí꞉ken nahorihóten. Tsi iontatenothónkwa iekhenó꞉thonskwe ne roʼnónkwes ó꞉ni ne konnónkwes.

⁵ Ne Raʼtsihenstowánen tánon kwáh rathikwékon ne rathitsiénhaiens enhathiriwanírate tsi kwáh thóʼkenske tsi nahóten katónnions. Iehionkʼkhiatónni natatekénseras ne Sitaeró꞉nons ne Damascus nónwe nihatinákere, sók kiʼthoniá꞉hake nakheʼiéʼna nónkwe tánon oronkwása takhenénsterenke kén꞉en Jerusalem natahontakhehiaténhawe nahonwathiréwathe.

Kór Wahatʼróri Tsi Niʼiawén꞉en Tsi Roʼtheriwaténion

⁶ “Tsi niwakhatahiʼtákheʼne ó꞉ni ákta wakethonhátieʼne ne Damascus, kák꞉non ne entieʼsíkare thonʼtaiawénstsi ne kwáh teʼioswát꞉te watsiosʼwát꞉theʼne ne tiaták꞉tha.

⁷ Ohontsiáke watsiataiéntaʼne ó꞉ni onkaonshónkoʼthe hionktaráni, ‘Saul, Saul, onhʼnihiotséren tsi takeronhiakéntha?’

⁸ ‘Ónhka níse, Saiá꞉ner?’ Wakeriwanónton. ‘I꞉i Ié꞉sos ne Nazarethrónon, tsi nikáien ne tse ronhiakéntha,’ wahakénhase.

⁹ Ne roʼnónkwe ne skátʼke iákwene wahontʼkátho ne kaswatʼthétsera, nók iáh kíʼ tehonatʼthontéʼon nónka hiontʼtarániʼkwe.

¹⁰ Wakeriwanónton, ‘Onhnátiere, Saia꞉ner?’ tánon ne Roia꞉ner wahakénhase, ‘Téstann tánon Damascus niaháse, tánon thoʼnónwe entsiesakóri kwáh oriwakwékon tsi nihotenikonríson ne Rawenni꞉io tsi nahiʼsahióten.’

¹¹ Watʼkerónweke ne takarihónniaʼte ne kaswatʼthetserowánen, sók kíʼ ne hionkwatherosentá꞉tieʼne wahonkenentʼtsíne tsi niahonkasárine ne Damascus.

¹² “Thóh non kanátakon renteróntaʼkwe ne Ananias ronwáiatsʼkwe, roriwiʼiósthonʼne rathewennarákwaʼkwe nonkwaianerénsera tánon kwáh íken tsi ronwakweʼniénstakwe neh Sitaeró꞉nons neh nónwe nihathiná꞉kerehkwe.

¹³ Wahatsiatórenʼne, tsiatákʼtha wahtátaʼne tánon wahénron, ‘Tsiatathéken Saul, sékon sáskenk!’ Kwáh thóh nikaháwi sakʼkén꞉ne tánon wahthihiatʼkáneren.

¹⁴ Wahénron, ‘Neh Ronwaní꞉io ne ietʼthisotʼthonʼokonkén꞉en iahiatarákwen nahisathókense tsi nihonikonróten, nahóken ne rohthonkwetakwaríshion rahonhátsera, tánon natsewénʼnaronke tsi nenʼhiatháraʼse.

¹⁵ Í꞉se entseriwaníratʼtse tsi nenseroriánion tsi nahoténsons satʼkáton ó꞉ni sarónken.

¹⁶ Tánon kíʼ ónen, nontsiéren tsi sénha asateráhrathe? Téstann tánon satenekwáheste tánon sahsenó꞉hare ne sariwanerahákʼtseras tsi nienʼtsiaterennaiénhase.’

Roiá꞉ner Wahó꞉nhaʼne Ne Kór Nasakotheriwanótʼthase Ne Iáh Tehatisitaerónons

¹⁷ “Jerusalem nionsáke, tánon tsi nikaríwes wahkaterennaiéntaʼkwe nononsatokentíke, wahkatʼkátho,

¹⁸ Thóh wahíken ne Roiá꞉ner, tsi nahatʼróri, ‘Tesasteríhen tánon aherénsasek ne Jerusalem iosthórek, tsioríhwa nonkwesónha ne ken nónwe tsi iáh tahontahonʼné꞉thakwe tsi nahóten sáton nakeriwá꞉ke.’

¹⁹ ‘Saiá꞉ner,’ watʼkeriwaseráko, ‘kwáh íken tsi ronatheriéntare tsi ononsatokentíke niewakénon tánon wahkheié꞉na ó꞉ni waʼkhenonwenserhário tsi niháti ne tsesetá꞉kwen.

²⁰ Tánon neh iariwanirátiskwe Stephen sahonwanonwariákon, kwáh thóh Íkeskwe, wakeriwanónweʼne tsi wahonwásehthe ó꞉ni wahkakhitarón꞉ne, ne tehontewehiarákwas ne sakonaséthas.’

²¹ ‘Wáhs,’ ne Roiá꞉ner wahakénhase, ‘Asèken ahínon nióre ienkonʼiathénieʼte tsi tathinákeres ne iáh Tehatisitaerónons.’”

²² Nonkwesónha ronwatahónsatheʼkwe ne Kór tsi nióre ne kí꞉ken sahénron; nók etʼthóhʼne tahontásawen kwáh tsi nihatiwénʼna tehothihenrétha, “Ahéren tsi sewahiatenháwit! Tsíʼsewanonwariákon! Iáh thatehoténtion narónʼnheke!”

²³ Tánon tehothihenrétha, rahonatseriónniat tehathiteníʼons, tánon ohkénra éhneken iehonáties.

²⁴ Tánon ne Roman ratiokwakweʼní꞉io wahaténnaʼne niahonwaiaténhawe ne Kór natenhénrakon, ó꞉ni wasakoróri nahonwanonwáhreke neh nahontáwe nahatiriwatʼtsénri nontiéren ne Sitaeró꞉nons tsi thóh ní꞉ioht tsi tehotihenréthaʼkwe ne rahonhá꞉ke.

²⁵ Nók kíʼ nónen sahonwánerenke nahonwanonwáreke nó꞉kwire, Kór wahawénhase ne ranenrakweʼníʼio natʼta rátakwe, “Saianerenseraiénʼken nókwire ahtshenonwáreke ne Roman naronkwethóʼten akwékon iáh tatehonwaiatoréton nahoteriwatewáton?”

²⁶ Sahothóntene kí꞉ken ne rahnenrakweʼníʼio, rahsennowánen iahoriwanóntonse, “Onʼnisatiéra? Thíken rónkwe Roman naronkwethóʼten!”

²⁷ Sók kíʼ ne rasennowánen iahoriwanóntonse ne Kór, “Takʼróri, Roman ken nasonkwetóten?” “Hen,” watariwaseráko ne Kór.

²⁸ Ne rasennowánen wahénron, “Í꞉i ó꞉ni ne wakatónʼon tsi kawistowánen watʼkariákon.” “Nók ní꞉i thóh ní꞉ioht tsi wakenakeráthon,” tsi watariwaseráko ne Kór.

²⁹ Kwáh ók꞉sak tsi nikáien ne ronnónkwe nahonwariwanontonniónʼni ne Kór onàken sahónʼnete; tánon ne rasennowánen wahoteronʼiénten sahátʼtoke ne Kór tsi Roman naronkwetóten tánon ó꞉ni tsi kwáh oronkwása tehonensterénʼne.

Kór Tahatátene Rahotihénton Ne Rathitsiénhaiens

³⁰ Ne rasennowánen tehotonwentióʼnikwe kwáh oriwíʼio ahariwatʼtsénri onʼnahóten ronwariwároskwe ne Sitaeró꞉nons ne Kór; Káti noiasaiórenʼne thonsahonwanensteráko ne Kór ó꞉ni wasakónahne ne ratitsihenstowánens tánon kwáh ratikwékon ne rathitsiénhaiens nahontʼkennísa. Ehʼthóhʼne iahohiaténhawe ne Kór tánon wahahónnien rahothihénton wahthátaʼne.