Acts 21 - Ohiatonhseratokénti

Kór Jerusalem Niaháre

¹ Thonsahiakhinónweron tánon tonsahiakwatetkhá꞉si. Wahatʼkwatsiróten tsi watsiakwahiáʼiake kwáh hiahakwatʼtakwaríshiaʼte, Cos iahákwaʼwe; tsi ó꞉ia sahiórenʼne Rhodes nónwe iahákwaʼwe, tánon thóh nónwe ionsaiakwatásawen Patara niaʼhákwe.

² Thóh nónwe iahakwahonwatʼtsénri kahonwehiowánen tekahiáiake nehne Phoenicia niahawenonhátse thóh kíʼ iahakwathíta, tánon wahakwatʼtsiróten.

³ Tsi tehionkwaiahiakonhátie kharehónen wahakwatʼkátho Cyprus, sók kíʼ sénha entiéne niahakwaiérate neh Syria iahiákwaʼwe. Tyre nónwe iahakwarároh, thóh nónwe wahonnetakwaniónko noreniaʼshónhas ne kahónwakon tsi nahóten watakhé꞉ne.

⁴ Thóh nónwe wahakhihiatatʼtsénri ne thoʼnetákwens tánon tsiaʼiáksera skátʼke iákwesʼkwe. Ne rahosasténsera ne Ronikonratokénti wahoróri ne Kór tóhsa Jerusalem niáre.

⁵ Nónk nónen shakáhewe ne tahonsaiakwatetʼkhá꞉si, sók kíʼ thonsaiakwatʼtáhakwe. Rathikwékon, ó꞉ni ne rontatʼronahasónhas ó꞉ni ne sakothiʼioʼokónhas, wahakwaterósen tsi sahiakwaiákenʼne ne kanátakon atsiákʼtha niaʼhákwe, thóh nónwe iakwakwékon watsiakwatentʼtsóten tánon wahakwaterénnaien.

⁶ Ehʼthóhʼne tsakwahiatátʼtsion tonsaiakwatatenónweron, thóh꞉ne kahonwehiowánenʼne iahakwathíʼta iakhihiateróron tsi sahonténti.

⁷ Watsiakwaiáhiaʼke, hionkwatʼtsirótatse tsi nontáhiakwe ne Tyre tsi nióre ne Ptolemais, thóh nónwe watsiakwatátken ne thoʼnetá꞉kwens tánon sewennísera skátʼke iákwesʼkwe.

⁸ Tsi ó꞉ia sahiórenʼne sahiakwaténti tánon Caesarea iahákwaʼwe. Thóh rahonʼnónskon iahakwatáwehiate ne rateriwanó꞉ta Philip ronwáiats, raónha ne saiátat ne tsiátak niháti ronwathiʼiatarákwen nahontsʼniénons ne Jerusalem nónwe.

⁹ Kaiéri nihohiatasetseraiéntakwe konteriwanó꞉thakwe ne Rawenni꞉io rahoteriwanothátsera.

¹⁰ Ónen tóhka nónta thóh sihiákwes ónen wárawe ne Agabus ronwáiats nehne ieharíwakens Judea nontáre.

¹¹ Washonkwahiatórenʼne, Kór rahotsatá꞉nha wahatháwah, wahatathasitánerenke ó꞉ni neh rahtsaná꞉kes, tánon wahénron, “Kén nahóten ráthon ne Ronikonratokénti: Ne rahotsiathá꞉na kí꞉ken thóh kí꞉ken ní꞉ioht tsi enhonwánerenke ne Sitaeró꞉nons ne Jerusalem nónwe, tánon nehne iáh tehathisitaerónons ienhonwanatʼtsakwarísiaʼse.”

¹² Sahonkwatʼthón꞉tene kí꞉ken, I꞉i tánon nonkwátsakes wasakwaniténtaʼse ne Kór tóhsa Jerusalem niáre.

¹³ Nók wahtariwaseráko, “Nisewatsérah, kíʼ ní꞉ioht tsi tesewasénthos ó꞉ni teskweriasarítha? Iáh nek khók tèʼken tsi wakatateweiennentáʼon nahionkʼnerénken ne Jerusalem nónwe nók kíʼ ó꞉ni ne kwáh thóh nónwe iakíʼheie ne rahoriwá꞉ke ne Roia꞉ner Ié꞉sos.”

¹⁴ Iáh tehionkwakwénion ne tasakwanikonrakénnion, sók kíʼ wahakwátʼkaʼwe tánon wahakwénron, “Káti tsi nithonikonrihióʼon ne Roia꞉ner thóh ni꞉iá꞉wen.”

¹⁵ Ónen kwáh éhʼtho tsi nikaríwes thoʼnónwe shihiákwes, sahiakwaróhroke nonkwakwenkʼshónhas tánon Jerusalem niaʼhákwe.

¹⁶ Thokaráh niháti ne rathikweʼkón꞉ne ne Caesarea nithonénon wahakwatenrósen tánon tsi thoʼnónshote ne Mnason niahonkhihiaténhawe neh tsi thoʼnónwe nen hiakwatáwehiate, nehne Cyprus non thiʼtawénon, nehne kwáh wahónʼnise shiʼtawetákwen.

Ne Kór Sak Iahonatarénaʼse

¹⁷ Shahákwaʼwe ne Jerusalem, ne thoʼnetákwen kwáh íken tsi watsionkihiaróhton.

¹⁸ Nó꞉ia sahiórenʼne Kór wahakwatenrósen ne Sák ahshakwatʼkenséra; tánon rathikwékon ne ionterennaientákwa rathiretsiárons thóh rathihiátare.

¹⁹ Kór wahtesakonónweron tánon akwékon wahatʼróri tsi nahoténsons ne Rawenni꞉io rohioténʼen ne rahonháke tsi nókwa ne iáh tehatiʼsitaeʼró꞉nons.

²⁰ Nónen sahonwatahonsatáko, ratikwékon waʼthonwanonweráton ne Rawenni꞉io. Ehʼthóhʼne wahonníron, “Tewatatéken Kór, satʼkáthos thóh naʼtewenniawehetserásen nihiákon ne Sitaeró꞉nons taʼiakétakwe, tánon tsi nihathiriwakweniénstha ne kahianerénsera.

²¹ Kwáh ratikwékon ronwathiróhri níse tsi kwáh ratikwékon ne Sitaeró꞉nons sherihonniénni neh thóh non nihathinákere ne iáh tehatiʼsitaeʼró꞉nons rahothinakeraserákon nahontewénteʼthe ne Mahís rahohianerénsera, sheʼróris ne tóhsa hahonwathiwarahkwétaron ne rathitksahokónhas tóhsa ó꞉ni ahathísere ne Sitaeró꞉nons tsi nihothirihótens.

²² Kwáh oriwí꞉io tsi enhatiriwáronke tsi kén꞉en í꞉soh. On꞉káti ónthe naiakwáiere?

²³ Kén ní꞉ioht tsi tehionkwathonwentióni naisewáiere. Kaiéri niháti roʼnónkwes kén꞉en rónʼnes rahohénton ne Rawenni꞉io rothiriwaniráh꞉ton.

²⁴ Hiasewatheró꞉sen tánon ietʼtsihiatsiátaras tsi nenshonthonnakanón꞉ni tánon sewakáriak tsi nenhontʼkarónni; etʼthóhne enwáthon ahkwékon enhonwathinónkare ne rathinontsínes. Thóh ní꞉ioht tsi akwékon enhiakoteriéntaraʼne tsi kwáh iáh thóʼkensʼke thèken tsi nahoténsons ietʼtsiróri tsi nókwa níse, nók kíʼ kwáh iatesewahiáti thóh tiónʼnhe tsi sewatewenʼnarákwa ne Mahís raoianerénsera.

²⁵ Nók kíʼ ne iáh tehatiʼsitaeʼró꞉nons tsi niháti ne tahonnétaʼkwe, iehiakhihiathónni iahkhiróris tsi iaʼtehionkwariwaiéntaʼse nehne tóhsa thènen ahónneke tsi nahóten ne kahiatónni konwahráni, ó꞉ni nonekwénsa, ó꞉ni neh kário ne konwathoriotʼthákwen, tánon aéren rónʼnet tsi nókwa ne kentésera.”

²⁶ Sók kíʼ ne Kór tsi sahiórenʼne iaʼsakohiaténhawe ne ronnónkwes wahateriwaténtsiaʼte skátʼke sahonthonnakanónni. Ehʼthóhʼne Ononsatokentíke iahatáwehiate iaharíwaien tohsékon niwenniseráke iotaténron nahonsahionthonnakanónni, etʼthóhne nah tatewenniʼiótsera enhonwathítatʼtse ne sathihiatát꞉tion.

Kór Wahthonwanéntsʼtherenʼke Ne Kanónsʼkon Ne Ononsatokentíke

²⁷ Nók kwáh ónen thówah sahontók꞉ten ne tsiátak niwenniseráke, tóhkaʼra niháti ne Sitaeró꞉nons nehne nahontonwentsiáke ne Asia nónwe nithonéʼnon wahonwáken ne Kór thóh kanónskon Nononsatokentíke. Kwáh onkwetakwékon tsi wahsakothitsirónnien tánon wahonwaiéna ne Kór.

²⁸ “Sewahsitaeronons!” wathoʼthihénreʼte. “Takwaienáwas! Neh kí꞉ken ne rónkwe kwáh tsikʼnonwésons nierètha kwáh tsi niatehionkwétakes tsi sakorihonniénʼnis nahonwathíson ne Israerʼró꞉nons, ó꞉ni ne Mahís raoianerénsera, tánon kí꞉ken Ononsatokénti. Tánon ónen nónwa kwáh tasakohiathínionte ne iáh tehatiʼsitaeʼró꞉nons ne kén꞉en Ononsatokentíke ó꞉ni ahakarónni neh kén꞉en watenátaien!” (

²⁹ Tsoríhwa tsi ne kíʼ wahonníron thon wáhken ne Trophimus ne Ephesus kanátakon skátʼke ne Kór, tánon wahónʼnere ne Kór Ononsatokentíke iehohiathiʼniónton.)

³⁰ Kwáh kanatakwékon wathonanithónʼnien, tánon nonkwesónhas rathikwékon iathonwaráhthate, wahonwaiéna ne Kór, tánon wahonwahiatísere tsi sahonwahiathínekenwe Nʼononsatokentíke. Kwáh óksaʼk onthenóton Nʼononsatokentíke.

³¹ Ne kentsiokwáksen ronteniéntʼthakwe nahonwanonwariákon ne Kór, nónen siahonwateriwaniétase ne Romeʼró꞉nons raterihioserakweʼní꞉io tsi kwáh kanatakwékon ne Jerusalem tsi iotʼtsirakéts꞉kwen.

³² Kwáh óksaʼk ne raterihioserakweʼní꞉io iaʼsakohiaténhawe ne ronaterihóntons ó꞉ni ne ronterí꞉ios tánon iathontsʼkénni tsi tsionkwéne. Nónen nonkwesónhas sahonwáken skátʼke ne ronterí꞉ios, wahóntʼkaʼwe tsi ronwanonwenseráhrios ne Kór.

³³ Ne raterihioserakweʼní꞉io Kór tsítres niaháre, Wahoiéna, tánon wahahónnien tekaronkwáʼsake tahonwanenstérenke. Ehʼthóhʼne wahariwanónton, “Ónhka kí꞉ken rónkwe, tánon onhʼóni niʼohtsiéren?”

³⁴ Wahtsionteriwathihánion nonkwesónhas. Thóh nióre tsi tehionithónni neh raterihioserakweʼní꞉io iáh tehoriwahtsénrion onkwa naháwenʼne, sók kíʼ wasakó꞉nhaʼne ne rahonkwetaʼsónhas ahtenhénrakon niahonwaiaténhawe ne Kór.

³⁵ Tsi ierahtensthákwa khók nióre niahón꞉ne, tánon etʼthóhne ne ronterí꞉ios tsiahonwahiaténhawe tsioríhwa ne kentsiokwákʼsen tsi nióre tsi thóh nathonʼnók꞉the.

³⁶ Rathikwékon ronwásere tánon tehothihenréthaʼne, “Tsenonwariákon!”

Kór Rahonʼwáha Tahatátene

³⁷ Neh ronterí꞉ios ónen kwáh thóhʼwah siahonwahiathiniónton ne Kór ne tsi watahénrothe, wahothárase ne raterihioserakweʼní꞉io: “Ahónton kén ne thènen akíron ne sonháke?” “Sahtátis kén ne Greek, kwáh kén?” ne raterihioserakweʼní꞉io wahariwanónton.

³⁸ “Iáh káti í꞉se tèken néhʼtho Egyptró꞉non ónen kwáh kén náhe tiothohétston, wahatsirakétsko tánon kaiéri niwenʼniawehetserásen niháti wahsakohéntense kahentakeʼkówa niahónne rathihonrenhawánion ne tehontenahtharíhtha?”

³⁹ Kór watariwaseráko, “Ksiʼtaeronon, Tarsus nónwe tewakenakeráton nehne Cilicia, thóh nónwe nikʼsénnare ne kwáh kasennowánen kanáta. Ahsatʼthontátʼtseke akhétarase nonkwesónhas.”

⁴⁰ Ne raterihioserakweʼní꞉io wahoríʼon, sók kíʼ ne Kór tsi ierahtasthákwa wahtáthaʼne tánon wahthanentʼtsateníʼon ne nónkwe tathahionthóʼtate. Nónen sakʼthónton, Kór nehne Hebrew nakawennóten wasakotháraʼse: