Acts 20 - Ohiatonhseratokénti

Ne Macedonia Tánon Achaia Niehiotʼthahí꞉non

¹ Shontóhetsʼte tsi nihiotʼtsirótakwe, Kór wahsakohiataróhroke ne rathikweʼkónne tánon sahsakonikonraʼnírate thó꞉ne thonsahsakonónweron. Ethò꞉ne thonʼsahontetʼkhási Macedonia niaháre.

² Hiahathohetsʼtánion neh kanakeraserákons ó꞉ni sakonikonrahníratsʼte nonkwesónhas tsi niwéso sakoteriwahnotánisʼkwe. Ehʼthóhʼne Achaia iahárawe.

³ Thóh nónwe áhsen niwennítake thóh renteróntakwe. Rahtateweiennéntaskwe ne Syria nonʼniáre nók sahariwáronke ne Sitaeró꞉nons tsi nihonatenikonronnihátie nahonwanonwariákon; sók kíʼ iathoriwaiéntase Macedonia nionsáhre.

⁴ Sopater nehne Pyrrhus roiénha, Berea non nihanákere, neh wahiaterósen; tánon ó꞉ni ne Aristarchus ó꞉ni ne Secundus, nehne Thessalonica non nihanákere; Gaius nehne Derbe nihtawénon; Tychicus ó꞉ni ne Trophimus, tho nithonenon tsi watonhontsaien ne Asia; ó꞉ni ne Timothy.

⁵ Wahathihénte tánon Troas non tahionkihiáterahraʼte.

⁶ Philippi nónwe tahiakwaténni wahakwatʼtsiróten sonthóhetste ne wentanóronskwe ne iáh tewatʼtenkwáton kanátaro, tánon wísk nónta onakènke Troas nónwe iathonsahiakwatátʼken, tsiaʼiáksera thoʼnónwe niʼiákwesʼkwe.

Neh Nonakènkha Ne Kór Sahanatarénen Ne Troas

⁷ Nenthákʼtha okarasnéha skátke wahakwatsiataróhroke naiakwahiátaraʼne. Kór wasakoteriwahnót꞉thase nonkwesónha kwáh tsi nióre nashóntʼten, neh tsi entiórenʼne enshaténʼni.

⁸ Wéso kahaseróhthonkwe ne kanotʼtsioharáke tsi nónwe nihionkwatʼkennishónʼonʼne.

⁹ Nithonʼhión꞉a Eutychus ronwáiats tsi kanonsthonkwakáronte renskwárakwe, ne Kór tsi nihoteriwahnó꞉the, ne Eutychus kwáh éhtho tsi nahoserentáraʼne, tsi nióre ne kwáh iahótaʼwe tánon hiahaiátenʼne nehne ásenn natehionákʼtaʼne nitiótʼte tsi nióre nonwentsiáke. Satonsahonwahiátakwe rawenheionkówa.

¹⁰ Nók Kór iahásnente tánon wahokétsko ó꞉ni wahoniása. “Tóhsa tesewatatenikonráhnen,” wahénron, “Sekon nirón꞉nhe!”

¹¹ Thóne kanotioharáke nionsáre, watanatáriake, tánon wahanataráke. Ionsahatasónteren sahateriwahnóten tsi nióre iahórenne, thóne sahaténti ne Kór.

¹² Thóne sahonwenterónʼnha ne kenʼnithohiónha tsi thonónshote tánon kwáh íken tsi sahotinikonrahníraʼne.

Ne Troas Tsi Nióre Ne Miletus

¹³ Ónen káti enhiakwatʼtsiróten tsi tenhiakwaiáhiake ne Assos nienhiákwe, nehne Kór ahionkwénon tsi tahionkwahiáiakon. Thóh ní꞉ioht tsi shonkwaróhri ehnahiakwáiere, tioríhwa tsi iáh neh teréhrakwe kahonweiát꞉ke niáre.

¹⁴ Neh sathonsaiakwatát꞉ken ne Assos non, wahakwaterósen tsi watsiakwahiáiake nehne Mitylene niaʼáhkwe.

¹⁵ Tánon thóh non iathonsaiakwahiáiake ó꞉ni iahákwawe ne Chios tsi sahiórenne. Sewennísera onakènke Samos iahákwaʼwe, tánon tsi sahiórenne Miletus iahákwaʼwe.

¹⁶ Kór iathoriwaiéntase naʼínonʼnióre nahathóhetste ne Ephesus, nehne tóhsa Asia nónwe nahonísko. Tehosteríhenskwe ne iáraʼwe ne Jerusalem tsi natehontenónwerons ne wentanórons, tóhka aiotónʼon.

Kór Thonsahsakononweráton Ne Rathiretiárons Nononsatokentíke Ne Ephesus Nónwe

¹⁷ Miletus nónwe ne Kór iasakoteriwaniénthaʼse ne Ephesusʼró꞉nons, sakoriwanonthónʼnis nononsatokentíke rathiretiárons ne tahontátʼken.

¹⁸ Shiahónnewe, wasakawénhaʼse, “Sewateriéntare tsi nikaríwes tewakweʼkónne, neh kwáh shonthontenʼniseratsérente siahákewe nahonthonwentsiáke ne Asia.

¹⁹ Kwak tiwákeronkwe iaweronhatiéhak ó꞉ni wéso tewakʼkhaserén꞉en tsi niwatiotén꞉en neh tsi kenhátsera rahonháke ne Roiá꞉ner neh tsi niwentórekwe nakeriwáhke tioríhwa ótiakes ne Sitaeró꞉nons tehionkaskotániskwe.

²⁰ Sewateriéntare tsi kwáh iáh thènen tethewakathotʼthákwen neh thènen ahisewaiénawaʼse tsi niwakateriwanóthe ó꞉ni kwaʼrihonniénni nonkwéne ó꞉ni ne tsi sewentheróntons.

²¹ Ne Sitaeró꞉nons ó꞉ni ne iáh tehatiʼsitaeʼró꞉nons kwáh ne sáka tsi kawennasátsthe tsi ní꞉ioht tsi kheretiáronskwe kwáh shontatʼréwat rahonháke ne Ní꞉io tánon thonʼwétat ne Sonkwaia꞉ner Ié꞉sos.

²² Tánon kíʼ nónwa, tsi riwennarákwa ne Ronikonratokénti Jerusalem niahonkenonhátie, iáh tewakateriéntare onhʼnienwatsiátawen neh nón꞉we.

²³ Thotʼkhók níkon wakateriéntare kwáh tsi niatekanátake ne Ronikonratokénti tsi rakaronkaténniskwe enhionkenóton ó꞉ni tenwatenónʼianithe tsi tenwakenikonráren.

²⁴ Kheʼrenkátiʼken ni꞉i tsi kónʼnhe iáh thé꞉nen satèkena tèken; nek khók níhkere ne hiatakókʼten ó꞉ni niákʼsa kíʼ ken kahioténsera tsi nithakáwi ne Roiá꞉ner Ié꞉sos, nahkateriwatsʼtéristhe, nehne akatʼróhri ne kariwí꞉ios nehne tsi nithoriwaiéri ne Rawenni꞉io tsi nókwa nonkwesónhas.

²⁵ “Ónen kwáh oriwiʼio tsi katʼtóhkas kwáh iáh ónhka tsi nítion neh tionháke nieʼwakénon ne tsi niwakerihowanáton ne Rawenni꞉io rahonakerásera. Kwáh iáh ónhka tsi nítion, iáh nonwénton sékon tahonsaskwáken.

²⁶ Kwa kíʼ thoʼkén꞉en tsi wakeriwaniráhton ne sewahénton neh kén꞉en wenniseráte: tóhkaʼ ónkak tsi nítsion ahisewahiatathónʼon, iáh kíʼ I꞉i tewakeríwa.

²⁷ Asèken iáh thènen theʼtewakathotʼtákwen tsi wakerihowanhá꞉thon noriwakwékon tsi nihotenikonrónni ne Rawenni꞉io.

²⁸ Kwáh káti sewatatennikonráren ó꞉ni kwáh kanenrakwékon tsi nitsisewatakweʼniaʼiénni ne Ronikonratokénti. Thóh nihiotónhak tsi sewatennikonráren ne Rawenni꞉io rahononsatokénti tsi ní꞉ioht tsi sakothinikónrare ne teiotinakarontón꞉a sakotinikónraʼre, tsi raónha rahówenk iotónʼon tsi ronekwáhon ne Roiénha.

²⁹ Wakateriéntare nónen ensewakaténtsion, ne kwáh tehonatenonhianíton nokwáho enietʼtsihiatórenʼne, iáh ó꞉ni tasakothinónstaʼte ne kentiókwa.

³⁰ Ienwatenniseríhewe ótsiakes ne ronnónkwes ne kwáh í꞉se sewentiókwakon enhonnowentánion nehne iasakothihiaténhawe nahonwanatsiatáraʼse.

³¹ Sewanikónrarak, káti, ó꞉ni seweiárak neh tsi wéso nokasí꞉ri, tsi niwenníseres ó꞉ni nokarasnéha, kwáh tsi sewahiatátʼtion kwarihonniénni nehne áhsen niʼioserá꞉ke.

³² “Tánon nonakènkha nateriwanothátsera ne tsi nithoriwaiéri ne Rawenni꞉io ne shonháke ne ensatenʼnikonráren, neh enkakwéni naisahsasténseron ó꞉ni enthíson ne kahiataterítseras tsi nitesakówis ne Rawenni꞉io rahonkwetaʼsónhas.

³³ Iáh thènen tatewakathonʼontsónikwe nónkak akotsokowátsera tóhkaʼ ó꞉ni natʼtserónniat.

³⁴ Kwáh í꞉se sewateriéntare I꞉i katsianáke wakátston tsi watsiotén꞉en natsérite tsi natehionkwathonʼhontióniskwe nakateroserahókon.

³⁵ Kwák tsik nahorihoténsons tsi kwanatónni neh thóh ní꞉ioht tsi ensewatatsiatakéʼnha, ónenk tsi enietʼthiʼiénawase ne iáh tehiakotakaríte, skehiá꞉ras tsi nikawennótens ne kwáh raónha ne Roia꞉ner Ié꞉sos ráwen, ‘Sénha ne wakʼtsennonniatserowánen naséhion tsi ní꞉ioht naiéhson.’”

³⁶ Saharihókʼten ne Kór, wahtatentʼtsióten tánon skátʼke tsi wahonterénnaien.

³⁷ Rathikwékon tehonséntʼthos tsi wahonwaniása tonsahonwanonronkwánion tsi sahaténti.

³⁸ Kwáh íken tsi thóh thiʼnikonrén꞉en tsioríhwa tsi wahénron iáh nonwénton sékon tahonsahonwáken. Sók kíʼ skátʼke niahónʼne tsi nióre tkahonʼhiónthe.