Acts 19 - Ohiatonhseratokénti

Ne Kór Ephesus Nonwe Hiahateriwanóten

¹ Tsi nikaríwes ne Apollos Corinth nónwe íreskwe, ne Kór wahtathawénreh kahnakeraserákon tánon Ephesus nónwe iaháraweh. Thoʼnónwe hiathontátʼken ne rohthiriwiʼióstons

² tánon wasakoriwanóntonse, “Wahʼtsisewahiatórenʼne ken ne Ronikonratokénti nónen sontesewéhthakwe?” “Akwékon iáh nonwénton tetionkwariwarónken nakaiéntake ne Ronikonratokénti,” wahtathiriwaseráko.

³ “Thóh kíʼ niáreʼkwe niʼioh thónhak, Nahóten wahkénthonwe neh sehsewatenekwáhesthe?” Ne Kór wahariwanónton. “Ne Sawátis rahotenekwahesthátsera,” wahthathiriwaseráko.

⁴ Kór wathariwaseráko, “tsi sakohnekwahéstakwe ne Sawátis, sakoretsiáronskwe naonsaiontatréwaʼte ó꞉ni aonsaiakoterakéwase ne karihwáneren; tánon sakorohríhakwe Israerʼró꞉nons nahontahonwétakwe ne tenhiathasonteráko—nehne kwáh, Ié꞉sos.”

⁵ Neh sahónronke kí꞉ken, wahontenekwáheste thóh rahosénʼnakon ne Roiá꞉ner Ié꞉sos.

⁶ Kór waʼtesakonisnonsáren, tánon neh Ronikonratokénti wahʼsakotsiénhase; kwáh thiʼwennasathénion tsi sahontatiónko ó꞉ni neh wahathiʼthárakwe tsi nontáweh ne Rawenní꞉ioke.

⁷ Kákʼnon neh tékeni-iawénre nihátikwe.

⁸ Ne Kór ononsatokentíke niaháre ó꞉ni áhsen niwennítake nikaríwes kwáh íken tsi wasakotewennaníratʼtse nonkwesónhas, tehothiriwatíronte ó꞉ni rahteniéntʼtha niasakonikonrénhawe tsi nòkwa ne Rawenni꞉io Rahonakerásera.

⁹ Nók ótiakes kwáh íken tsi rohthinontsistanírons iáh tetʼthonnétakwa, tánon kwáh akohénton nónkwe kariwáksens wahonthónnionwe tsi Nahoténsons ne Roiá꞉ner Rawenestánion. Sók kíʼ ne Kór sahsakotsiathontákwase tánon iasakohiaténhawe ne thoʼnetákwens, tánon kwáh tsi niatewenniseráke tsi watathiriwatironʼthónko thóh kahnónskon nofarakon ne Tyrannus.

¹⁰ Tehioseráke kí꞉ken thóh nihiothónne, neh nahónton kwáh tsi niaʼteionkwétake neh nónwe niʼienákere nahonthonwentsiáke ne Asia, rathikwékon ne Sitaeró꞉nons ó꞉ni ne iáh tehatiʼsitaeʼró꞉nons nahónronke ne Roia꞉ner rahowennahókons.

Ne Sceva Sakoienokónhas Wahonteniénten Nahonsahonwathíʼhiatinekenkwe Ne Rathinesonrónons

¹¹ Ne Rawenni꞉io niaʼtehioríwake tsi nihaieránions ne ioriwanerakwathénions rahonháke ne Kór.

¹² Iehióhe ne iotʼtsinionkeráthas ó꞉ni nateniʼiónthas ne rátsʼtakwe sakotsʼténni ne iakononwákʼtanis, tánon kíʼ ne rahothinonwakʼténtseras tiohiakén꞉en, ó꞉ni ne rathinesonrónons sonwatihiathinekénʼhen.

¹³ Ótiakes ó꞉ni ne Sitaeró꞉nons neh tehontawénries tánon sonwathihiatínekens ne rathinesonrónons wahonteniénten ne Roia꞉ner Ié꞉sos raosénna áhonste tsi ehʼnahatíʼiere. Wahonwennénhase ne rathinesonrónons, “Wakonróri rahosénnakon ne Ié꞉sos, tsi nikáien ne Kór roteriwanotánis.”

¹⁴ Tsiátak nihontatekénhas kí꞉ken neh thóh nihathiʼiéraʼkwe, neh sakoienokónhas ne Sitaeró꞉non ne kwáh éhneken thótʼte ratsihentowánen nehne Sceva ronwáiats,

¹⁵ Nók ne rathinesonrónons wahonwennénhase, “Riʼientéri ne Ié꞉sos, tánon ó꞉ni riʼientéri ne Kór; nók níse—ónhka níse?”

¹⁶ Néhʼtho rónkwe tsi nikáien ne rotsiénni ne ranesonrónon iasakotsiatónni tánon wahsakosénni tánon wasakokaréwaʼte ó꞉ni waharatiónko ne rahonatʼtserónnias thóʼne káti sahontèko tsi nónwe nihonónshoʼte.

¹⁷ Rathikwékon ne Sitaeró꞉nons ó꞉ni ne iáh tehatiʼsitaeʼró꞉nons tsi niháti ne Ephesus nónwe nihathinákere wahathiriwáronke kí꞉ken; kwáh rathikwékon wahonateroniénten, tánon ne raosénna ne Roia꞉ner Ié꞉sos ónen sénha wakarihowàhnha tsi ní꞉ioht tsi watʼkonwarénsaron.

¹⁸ Iakotiokowánen ne tsiakawetákwen wahakokéthoʼte, onhkwétake ieriwaníratsʼkwe ó꞉ni rontʼróriskwe akwékon tsi nihonatieráhnion.

¹⁹ Rohnatiokowánen ne ken niehathiʼiérakwe nataennaráhtsera, tahathíhawe ne rahothihiatonserasónhas tsi neh rónstakwe tsi nihontiérahkwe tánon ahkohénton nónkwe thóh wahóntsiahate. Tahonsehtánion tsi nikanóron ne rahothihiatonserasónhas, tánon tsi niakanontáraʼne wísk-niwásen tewenniaweheʼtserásen neh kawistarákens kwénis.

²⁰ Nakwékon tsi nahawénseron kwáh iohsátsthe tsi tahiakéthakwe nonkwesónhas, tánon káti nehne rahosatsténsera ne Roiá꞉ner, nateriwanothátsera khék watewaréhni ó꞉ni kasátsthe tsi onteiáron.

Tsi Nontʼtsíro Ne Ephesus Nónwe

²¹ Sonteweiennéntaʼne tsi nahawénseron, Kór ne tsi Ronikonratokénti rosárine, iathoʼriwaiéntaʼse ne Macedonia tánon Achaia nónwe iatahathawénreh tánon thóh ienkaniʼiónten Jerusalem nienʼhénre. “Nó꞉nen iénkewe neh nónwe,” wahénron, “ónenk ó꞉ni tsi ienke Rome.”

²² Kati Timothy oni Erastus iasakoteniete, ne ne teniʼiase ne rowasnienonskwe, Macedonia ne nonwe niaháne, tsi nahe ne raónha saonisko tsi watonhontsaien ne Asia.

²³ Nehne kwáh éhtho nikaháwi kowánen hontʼtsíro ne Ephesus neh tsi Nahoténsons ne Roiá꞉ner Rawenestánion.

²⁴ Saiátat ne ranisnonsawitserón꞉nis Demetrius ronwáiats ronatiokowánen wahsakónaʼne ne ronnisnonsawitserónnis kawistaráken áhonste tsi ahathiʼnorohkonniánion tsi non nahonthetaháseke ne kahiatónʼni Artemis, tánon ne rahohioténseras kwáh íken tsi wéso wahthonténtsa ne wahothihióten.

²⁵ Sók kíʼ kwáh rathikwékon wasakohiataróhroke ó꞉ni tsi niháti nehne sahothihioténseras tánon wasakawénhaʼse, “Tsiónkwe, sewateriéntare nonkwatsioʼkowátsera thóʼnon nitewétha kíʼ nakahiotenseróhten.

²⁶ Ónen, káti kwáh iatesewahiáti wesewatʼkátho ó꞉ni wesewatʼthóntene, iáh kén꞉en khók Ephesus tèken nók kwáh thóh wáhtsik nonwéson ne Asia, kí꞉ken rónkwe Kór, tasakonóntonse ó꞉ni iakotsiokowánen wasakoriwaténi tsi nihariwáhsaste nahóten nosnónsa iohiathonniseríson iáh kíʼ niʼioʼokónhas tèken.

²⁷ Thóh non nihiótʼteron, káti, nonkwahioténsera enhiosennákʼsenʼne. Iáh Thókʼkhók thèken, Thóh ó꞉ni non niʼhiótʼteron néhʼtho naononsatokénti ne kahiathónʼni Artemis kwáh iáh thènen tahonsakénhake tánon enwáh꞉thon tsi nikasenʼnowánen—néhʼtho kahiatónʼni kwáh tsi niatehionkwétake ne Asia ó꞉ni kwáh ohontsiakwékon tsi konwasénnaiens!”

²⁸ Neh kentiokowánen sahakothónʼthene tsi nahóten wahénron ne Demetrius, kwáh íken tsi wahakonáhkwen tánon tahontásawen wahthotihénrete, “Kasennowánen ne Artemis ne Ephesus!”

²⁹ Tsi nontʼtsíro kwáh kanatakwékon wahtewaréni. Ne kentiokwáksen wahonwathiʼiéna ne Gaius ó꞉ni ne Aristarchus, tenitsiáron Macedoniaró꞉nons natenihiatóten skátʼke tehonatawerienháties ne Kór, tánon wathonwatisteríhathe tsi ronkʼkennisahátha niahonwathihiaténhawe.

³⁰ Ne Kór nehne rhé꞉rahkwe nakohénton nónkwe niáre, nók neh ronteriwanhót꞉thas iáh tehonwariwáwi.

³¹ Óʼtsiakes ne kakorásera konwahiótense, nehne raónha ronténros, ó꞉ni hiahonwateriwaniénthaʼse ronwaniténthase ne tóhsa ahathatenésten ne tsi ronkʼkennisahatákwa.

³² Thóh náhe tsi nikaríwes rohnatʼkenníson iotʼtsírohkwe: ótsiakes nonkwesónhas énskat khók tsi nahóten teʼiakohenrétha, Asèken neh iakotiokowánen ne iáh tehiakoteriéntare nontiéren tsi wahontsiataróhroke.

³³ Ótsiake kíʼ thóh ní꞉ioht tsi iahéʼhewe Alexander rahoríwa, neh tsi ne Sitaeró꞉nons wahonhiónnien ne ohénton niáre. Ehʼthóhʼne ne Alexander wahtanentʼtsateníʼon nónkwe tathahiontó꞉thate, tánon wahatheniénten nasakothárase nonkwesónhas neh rontenróhsons tsi iáh rohnónha tehothiríwa tsi naháwenʼne.

³⁴ Nók nónen sahóntʼthoke tsi rasitaerónon, kwáh rathikwékon skaríwa wahonnónʼni tsi wahthothihénrete nehne tékeni wahtkawistáheke: “Tsi nihionʼkwetohwánen ne Artemis nehne Ephesus nónwe!”

³⁵ Kharekíʼ ónen wahariwakwéni ne sakohiatónni ne kanáta wasakóristhe nonkweʼókon. “Tiónkwes ne Ephesus nesewahiathótens!” wahénron. “Kwáh tsi niatehionkwétake tsi iakoteriéntare tsi kanátaien ne Ephesus neh kanikónrareh nahononsatokénti ne kakowánen Artemis ó꞉ni neh kanenhianóron ne tiosén꞉en ne karonhiáke.

³⁶ Iáh ónhka taiekwéni nahionthonní꞉ien kíʼ nahorihótens. Neh káti aoríhwa, ónenk tsi tatensewathótaʼte ó꞉ni tóhsa thé꞉nen nasewáiere ne iáh thé꞉nen tsatewanonthonniónʼon.

³⁷ Ken taietʼtsihiaténhawe kí꞉ken roʼnónkwe iawerohátsien tsi iáh theʼténen tehothinénskwen nononsatokentíke tóhka ó꞉ni thé꞉nen wahétʼken akonwénni nokwahiatónni.

³⁸ Tóhka neh Demetrius ó꞉ni ne rahonkwetaʼsónhas ne rahthinátseras, nónkak thé꞉nen ahsakothiriwarhóseke, iathewenniseráke ne rohnatherihóntons róntsiens ne tsi theʼiehiáthoriethákwa ne thé꞉nen ahatikenʼénion noriwasónhas; thóh nieatíhaf.

³⁹ Nók tóhka sénha théʼnen naʼtesewathonwentióni, ónenk tsi onʼkwéne nónwe niatenkariwaientáʼon.

⁴⁰ Asèken tsi nahawénʼnen nónwa wenniseráte, thóh non nihiótʼteron Í꞉i entionkhíraʼse tsi ontheristhónni tánon iáh tahitewakwéni nahiohiaʼneréhake tsi ahitewanikonraiénthate.”

⁴¹ Siahása tsi nahóten wahathónnionwe, wahanóton natʼkennisahátsera.