Acts 16 - Ohiatonhseratokénti

Ne Timothy Kór Tánon Silas Nènne Wahontenrósen

¹ Kór, Derbe tánon Lystra nónwe iatatháwenre, thoʼnónwe ne Roriwiʼióston Timothy ronwáiatsʼkwe nihanákerekwe. Ne ronisténha, iakoriwiʼióstonʼne nònne, ieʼsitaeʼronon, nók ne roʼníha Greek nenne nahahiathóʼtenne.

² Rathikwékon ne thonethákwen thonónwe ne Lystra ó꞉ni ne Iconium tehonwarensáronskwe ne Timothy.

³ Kór rèhrakwe iahohiaténhawe ne Timothy, neh nahónton ahowarakwétaron. Neh aoríhwa thóh naháiere tioríwa ne ratiʼsitaeʼronons neh nónwe nihathinakerénion rohnatheriéntare ne Timothy roʼníha tsi Greek nahahiatóten.

⁴ Tsi niaháne ne tsi kanataiéntons, wahonwathironkáten ne thonethákwens tsi nikaianerenserótens ne ronteriwanótʼtas ó꞉ni ne rathiretiárons iatehothiriwaiéntaʼse thóh nónwe ne Jerusalem, tánon wahonwathiróri nahontewénnarakwe kí꞉ken kaianerénseras.

⁵ Nekáti nonkwesónhas ne nononsatokentíke non nihatihiátare kwáh kíʼ wahatisátsʼtenʼne tsi ontehiáron ne tewethákwen ó꞉ni kwáh tsi niatewenniseráke tsi sénha wahonatiokowáʼnhaʼne.

Tsi Nahóten Ne Kór Wahatkátho Neh Nónwe Troas

⁶ Iahiathóhetste tsi tiohóntsiaien ne Phrygia ó꞉ni ne Galatia tioríhwa ne Ronikonratokénti iáh tesakoriwáwi nahonateriwanótake tsi kanakeraseráien ne Asia.

⁷ Siahónnewe tsi karistathátse ne Mysia, wahonteniénten niahontáwehiate ne Bithynia ahonakeraserákon, nók ne Rahonikonratokénti ne Ié꞉sos iáh tesakoriwáwi.

⁸ Kwáh kíʼ hiahonthohétstaʼkwe ne Mysia tánon Troas niahónne.

⁹ Neh tsiniwasóntes ne Kór wathotserionhnionse wahóken ne Macedoniaró꞉non thóh írate tánon ronekénnis, “Macedonia nontáse tánon takwaiénawas!”

¹⁰ Kwáh tsi niʼiosthóre ne Kór iathakaraientane, wahakwatateweniennéntaʼne ne Macedonia niahiákwe, tsioríhwa tsi hiationkwariwaiéntaʼse tsi Rawenn í꞉io wahshonkwánhaʼne niahiakhehiateriwanótʼtase ne kariwí꞉ios nonkweshónhas neh nónwe.

Ne Philippi: Nónwe Ne Lydia Watʼkonhionnaténi

¹¹ Sahiakwatʼthonwáreke tsi thontahiakwaténti ne Troas nónwe tánon wahaʼkwatʼtsiróten iahakwatʼtakwaríshiaʼte iatsiakwahiáiake ne Samothrace, tánon nó꞉ia sahiórenne Neapolis niahákwe.

¹² Thóh hionsahiakwatásawen hiahakwatenatórenne ne Philippi, nehne kanatowánen ne tiotserénton nahonthonwentsiáke ne Macedonia; nehne Roman nahatihiathóten neh nónwe rathiná꞉kereh. Tóhkaʼ nónta ehnónwe nihiákweskwe.

¹³ Tánon tsi wahawentatokéntaʼne wahakwahiákenne ne kanátakon tánon wahakwaniatarósereh, ehnónwe wahákwereh thoʼkanónwa thoʼnónwe ne Sitaeró꞉nons rontiataróhroks nahonterénnaien. Wahakwátsien tánon watsiakwatarónnion ne tsionatʼthonwísens neh ionatiataróronʼne.

¹⁴ Tiehiáta ne wahonkhiwennáronke Lydia hiontátsiats nehne Thyatira nitiakawénon, neh iontʼkéronskwe ne ariwakonnéha niwashokótens noniataráhas. Nétho hiakónkwe ronwasénnaiensʼkwe ne Rawenni꞉io, tánon ne Roiá꞉ner wahanonthónko nakaweriáne nahiontennikonráren tsi nahóten ráton ne Kór.

¹⁵ Tánon nakaónha ó꞉ni ne skátke konthiteróntakwe nakonnónskon sakontenekwáheste, wahonkhihónkaron, “Kásewe tsi tewakenónsohte sewatáwehiat tóhka wesewátʼthoke kwáh seh oriwiʼioʼónwe tsi thiʼietákwen ne Roia꞉ner.” Tánon kíʼ wahtionkhinikonrakénni neh iahiákwe tsi tsakononhshote.

Kór Tánon Ne Silas Wahonwathinóton Neh Nónwe Ne Philippi

¹⁶ Énskat weniserátekwe tsi niahonkweʼnonhátiene tsi tionterennaientákwa, wahonkhinontérane nitiakohión꞉a nehne ienáskwa ótkon iakotsiénni neh kakwénieskwe ne iaieriwáken. Kawistowánen ronwaʼwistonnienníhakwe ne sakotiatakweniʼióstonne neh tsi hiontʼhiathonseratʼkenséhakwe.

¹⁷ Wahonwásere ne Kór tánon nonkwátiakes, tehiakohenrétane, “kíʼ ronʼnónkwe neh ronwahiótense nahonwa꞉a tohsatstenserowánen Rawenni꞉io! Neh rontʼróris onʼní꞉ioht tsi ahonsahseniákenʼne!”

¹⁸ Kwáh tóhka nónta kíʼ tsi thóh nahéiere, tsi nióre ne Kór wahthateriatít꞉kon wahtatkaraténi tánon wahawénhase nótkon, “Rahosénnakon ne Ié꞉sos Kerístos wakonróri thontatsiáken ne ahkahónhake!” Nótkon kwáh óksaʼk thontahakáienʼne nakahónhake.

¹⁹ Ne konwahtsiatakweniʼióston sahóntʼthoke tsi iáh ónen teshonathesénnaien nahonsahiakowisthónnien, wahthonwathinenstéh꞉renke ne Kór tánon ne Silas tánon wahonwathihiatísere tánon rathikórahʼne niahonwathihiaténhawe nehne tsi nónwe ne kwáh iontieronʼniátha nonkwesónha.

²⁰ Rahothihénton ne Romeʼró꞉nons rahthikóras niaʼhonwathihiaténhawe tánon wahonníron, “Ratiʼsitaeʼronons kí꞉ken, tánon rohthitsironnihátsies nonkwanátakon.

²¹ Neh sakothirihonniénnis ne kariwiʼiosthóntseras tsi neh nikariwásthon nonkwahianerénsera; Romeʼró꞉nons nitewahiathótens, iáh tehionkwaríwaien nahitewaiéna kí꞉ken kariwiʼiosthóntseras iáh ó꞉ni sékon nek khók nahitewatéweienste.”

²² Tánon nonkwesónha wahontiátaren tsi hiahonwanatsiathónti ne Kór ó꞉ni ne Silas. Ethò꞉ne ne rathishótar wahathiratiónko ne rahonatʼtserón꞉niat ne Kór tánon ne Silas ó꞉ni wahonwathíʼnhane nókwireh ahonwathinonwáreke.

²³ Nónen kwáh éhʼtho tsi nahonwathirióshion, tsiontatenonthónkwa hiahonwathihiatónti, tánon wahonwaróri ne shakonóthons kwáh ioriwanirónhak tsi shakonóthon.

²⁴ Sahariwaién꞉na kí꞉ken, ne sakonóthons nehne kwáh sahthekanonsíhe nónwe nihionáktaien nasakonóthon tánon nehne kwáh kakonrektsiowánens nóiente thóh wahsakoshitánerenke.

²⁵ Kák꞉non ne sihwasóntʼthen ne Kór tánon ne Silas ronaterénnaien ó꞉ni tehonwariwákwaʼse ne Rawenni꞉io, tánon ne ronátiakes ne rathinóton ronwanatahónsate.

²⁶ Thontaiawénstsi tehiotenonhianíton tsi ní꞉ioht tsi watsiahonontsíshionkwe, kwáh onthoʼriáneron tsi tkenstsʼkwáhere neh tekenstenrhothákwen ne tsi iontatenothónkwa. Kwáh ók꞉sak akwékon ne tsi ionohentónnion ontenothonkwenháton, tánon noronkwása akwékon ontʼnerienʼshiónko ne rathinerénksthonne ne rathinótons.

²⁷ Ne sakonótons hiahaiésthaʼkwe, tánon ne sahatʼkátho ne ionohenthónʼnion ne tsi iontatenothónkwa tekanonhontséseron, wáhrehre ne rathinóthons shothiniakén꞉en; sók kíʼ tahasarhótsiate nasarekówa nahathatenonwariákon.

²⁸ Nók ne Kór kwáh tsi nihawénna tehohenrétha, “Tóhsa satatkaréwat! Kén꞉en hiákenes!”

²⁹ Ne sakonóthons kahásera wahariwanónton, iahathaweiásthakwe, tánon hiasiták꞉tha ne Kór tánon ne Silas wahahiatiénenʼne tsi nihoteronienténni.

³⁰ Tánon shasakohiatínekenwe ó꞉ni wasakoriwanóntonse, “Thesenénshion, onhnátiere nakeniákenʼne?”

³¹ Watʼthiriwaseráko, “Tatʼtsétat ne Roia꞉ner Ié꞉sos, tánon ensehseniáken꞉ne—níse tánon ne sawáh꞉tsire.”

³² Ethò꞉ne wahonwateriwanótʼthase ne Roiá꞉ner rahowennahókon ó꞉ni tsi niháti neh thóh kanónskon rathiteróntakwe.

³³ Nehne kwáh thóh sikaháwi ne tsi niwasóntes neh sakonótons hiasakohiaténhawe tánon wahanóhare tsi nónwe nihonatʼkarewatánions; tánon ne rahónha ó꞉ni rathikwékon ne rahowátsire kwáh óksak wahontenekwaheste.

³⁴ Ethò꞉ne tsitʼthonónsote niáaʼsakohiaténhawe ne Kór ó꞉ni ne Silas tánon wasakónonte. Rahónha ó꞉ni neh rahowátsire kwáh tiehothiriwaiéwas tsi nihonatʼtsennónni, neh aoríhwa tsi ónen thonwetákwen ne Rawenni꞉io.

³⁵ Tsi ó꞉ia sahiórenne ne Roman rathikorásons karíton iahonwanathóri niahatiriwénhawe, “Saietʼtsihiát꞉kaf thí꞉ken ronnónkwe.”

³⁶ Sók kíʼ ne sakonóthons wahoróri ne Kór, “Neh rathikorásons tahonteriwánieʼte níse tánon ne Silas nahonsetsiatatewenní꞉ione. Enwáton nahonsetsiaténti, káti, ó꞉ni wáhs skénnen tsi sahtsiaténti.”

³⁷ Nók ne Kór wasakawénhaʼse ne rathiríthons, “Iáh tehiotetʼtsénrion neh thènen tahionkeniniósken꞉en, nek khikʼsáka wahonkhinonwáreke neh tsi ionkwéne—tánon Romeʼró꞉nons nahakenihiathóten! Ethò꞉ne tsi tiontatenothónkwa hiahonkhihiatónti. Tánon kíʼ ónen rónnere ahtaséthonke tsi ahonsahionkhiʼiatékwaʼte? Kwáh seh iáh! Nehne Romeʼró꞉nons rathiriwakweʼní꞉ios kén꞉en nenk thónne tánon ronónha entionkʼkhinothónko.”

³⁸ Neh rathirítons ionsahsakothiróri kwáh neh sahoríhwa kí꞉ken ne Romeʼró꞉nons rathisennowánens; tánon neh sahatiriwáronke ne Kór ó꞉ni ne Silas tsi Romeʼró꞉nons natenihiathóten, kwáh íken tsi wahothiterónne.

³⁹ Sók káti thóh niahónne tánon sahonwanatatʼrewáten; ehʼthóhʼne kíʼ ónen sahonwathinotónko ó꞉ni wahonwathiriwanóntonse naerehʼahonsánete neh kanátakon.

⁴⁰ Kór tánon ne Silas sahiatenothónko nók Lydia tsi tsiakonʼnónshote nionsáne. Thóh káti nónwe nathontátken ne thonnetákwens, neh wahonwathiʼtharákwen ne kanikonranirátʼtsera, tánon sahiaténti.