Acts 13 - Ohiatonhseratokénti

Barnabas Tánon Saul Wahonwatihiataráko Tánon Hiahonwanathénieʼte

¹ Tsi niháti ne ronteriwanótʼtha ne kariwí꞉ios ó꞉ni neh sakotirihonʼnién꞉nis ne tsiakawetákwen neh nónwe ne Antioch: Barnabas, Simeon (ronwanathónkwa rahóntsi), Lucius (ne Cyreneró꞉non), Manaen (rahiátaʼre ne Herod rahokoraserákon ne Galilee) neh nònʼne sáka ne Saul.

² Tsi nikaríwes ronaterenʼnaiéntakwe rahonháke ne Roiá꞉ner ó꞉ni ronentontiéton, ne Ronikonratokénti wasakawénhaʼse, “Tesewatetʼkháshion ne Barnabas tánon ne Saul nì꞉i akeriwáke, neh nahotihióten tsi nikhehiatarákwen.”

³ Wahonnenthóntiete ó꞉ni wahonterénʼnaien, wathonwaʼnanisnonsahéraʼse, tánon iahonwanaténieʼthe.

Cyprus Nónwe Iahonwanathénieʼte

⁴ Neh tsi Ronikonratokénti iesakothórion, ne Barnabas tánon ne Saul Seleucia niaháne, tánon thoʼnónwe hionsahiaténti wahiatʼtsiróten tsi watʼnihiáiake hiahánewe tsitkawenóte ne Cyprus.

⁵ Siʼiahánewe ne Salamis, ononsatokentíke non nahiateriwanóten ne Rawenni꞉io rahowénʼna. Sawátis Mark skátke ratikwekonhátie nahatsniénon ne kahioténsera.

⁶ Kwáh iathatinowekwí꞉iake ne tsit kawénote ne Paphos, thoʼnónwe hiathontátken ne rónkwe Bar-Jesus ronwáiats tehatserónnions, rasitaeʼrónon akénhake iehariwákens.

⁷ Neh ronaténrokwe ne rakóra neh non niʼkawenóte, Sergius Paulus nehne ratʼthót꞉khawe rónkwe. Ne rakóra hiasakónonke ne Barnabas tánon ne Saul ne rahohénton tsioríhwa tsi raskánekskwe nahothónteʼne ne Rawenni꞉io rahowénʼna

⁸ Nók neh tehatserónnions Elymas wathateriwahrénho (neh tehasennásere ne Bar-Jesus nehne Greek ahronkkhátsera), raónha rohiothatíhakwe ne rakóra nehne tóhsa ahontarétakwe ne tewethákwen.

⁹ Ethò꞉ne ne Saul—neh nónne tehasennásere ne Kór—kwáh rahiatanánon ne Ronikonratokénti; kwáh hiathotʼkáneren ne tehatserónnions

¹⁰ tánon wahénron, “I꞉se iaiénha nótkon! Í꞉se neh seriwásons tsi nahoténson ne ioʼianere. Kwáh tiatanánon tsi nahóten ne kariwáksens taseiéron, tánon tiókonte satheniéntha nonówen asónni ne Roiá꞉ner rahoriwakwarishióntseras!

¹¹ Ne Roiá꞉ner kwáh ónenk enhiaréwathe; tenserónweke tánon kwáh thóh tsi nikaríwes iáh tahonsahsatʼkátho ne teioswátʼthe.” Kwáh osákak ne Elymas tahosaténhne onteró꞉roke rakáraʼke, tánon wahréson aktóntses ratenénhta nónhkak asakoiatatʼtsénhri nahonwanenhtsí꞉ne.

¹² Nónen ne rakóra sahatʼkátho tsi naháwenʼne, tarétaʼkwe; Asèken kwáh éhʼtho tsi nihoriwanerákwaskwe tsi nòkwa ne Roiá꞉ner.

Thoʼnónwe Ne Antioch Ne Pisidia

¹³ Kór tánon ne rontenrosónhas wahontʼtsiróten Paphos non tahonténti tánon Perga niahónne, nehne Pamphylia kanatowánen, thoʼnónwe ne Sawátis Mark nathonsahontetkháshion Jerusalem nionsáre.

¹⁴ Perga ionsahiaténti tánon iahánewe Antioch ne Pisidia nónwe, tánon tsi wahaʼwentatokéntane ononsatokentíke iahiatáwehiate tánon iaʼhiátsien.

¹⁵ Sontewennaʼnotháko ne Mahís rahoʼianerénsera ó꞉ni tsi nihothihiatónnion ne rothitokenséhawe, nohénton iehonnéton nononsatokentíke wahonwatiriwanóntonse: “Tewatenrosónhas, tehionkwatonwentióni naietʼtsiretsáron nonkwesónhas tóhka thènen sení꞉ien ne kanikonrahnirátʼtsera ne rahotiriwá꞉ke.”

¹⁶ Kór wahthátaʼne, ratsianáke wáhratste tsi wasakothokáten ne tóhsa ahontsarókwate, tánon tahatásawen wahatʼretsáron: “Tewathatékens Israerʼró꞉nons ó꞉ni se wakwékon ne iáh tesewasitaerónons kén꞉en tsi entsisewasénnaiens ne Rawenni꞉io: takwatahónsatat!

¹⁷ Ne Sakoní꞉io nonkwesónha nIsraeʼronons ronwahiatarákwen nonkwasótʼtseras ó꞉ni wasakahónnien nonkwesónha nahonatiokowána tsi nikaríwes thóh iehatinákerekwe ne Egypt. Rawenni꞉io thontasakohiatínekenwe ne Egypt neh tsi nihosastenserowánen,

¹⁸ Tánon káti kaiéri-niwásen niʼioseráke nikaríwes sakonikonraráhtieskwe ne kahentakekówa.

¹⁹ Tsiátak nihothitiókwaʼke wasakhó꞉tonte tsi watonwentsiáʼien ne Canaan, nók nonhóntsia rahonkwetaʼsónha wahsakáwen.

²⁰ Kákʼnon neh kaiéri tewenʼniáwe wísk-niwásen nihioseráke kíʼ thóh nahawénseron. “Wasakahonkwetawíʼon, ne rathiriwénthas tsi nióre ne rotokenséhakwe Samuel.

²¹ Tánon nʼónen sahathiriwanónton ne Kanontiʼiótsera, ne Rawenni꞉io Saul wasakahonkwéton nehne Kish roiénha tánon nehne Benjamin raotiʼtiókwakon non nitawénon, nehne raónha asakonontí꞉ioʼke ne kaiéri niwásen niʼioseráke.

²² Nónen ne Rawenni꞉io Shonsahorihontáko ne Saul, Sók ne Rawenni꞉io Táwit sahonontí꞉ioste. Kén nahóten ne Rawenni꞉io wahénron tsi nòkwa ne raónha: ‘Waketʼtsénri nètho Táwit nehne Jesse roién꞉a nehne thóh niʼionkwethoten kenónwes, ne rónkwe akwékon thóh nenháiere tsi nenʼínaʼne.’

²³ Rahónha ne Ié꞉sos, thoʼnónwe nithotʼwatsirínon tsi tahawatsiratátie ne Táwit, tsi nikáien ne Rawenni꞉io rohiatarákwen nasakoniákente Nisraeronons, kwáh tsi nihorarátston.

²⁴ Nohénton ne Ié꞉sos sontahathásawen ne rahohioténsera, Sawátis wasakoteriwanót꞉thase ratikwékon Nisraeronons neh tsi ioteriwíson tahonsahonkʼkaraténi tsi nihotiriwáneren tánon nahontenekwáheste.

²⁵ Tánon tsi ónen thóʼwah ne Sawátis ahaweienéntaʼne ne rahohioténsera, wasakawénhaʼse nonkwesónhas, ‘Ónhka ónte ísewere ni꞉i akénhake? Iáh í꞉i tèken ne tsi sehwárare. Nók sewatahónsatat! Rakʼnonterátie, iáh tewakeríhonte néok ó꞉ni ne taihiatháshion.’

²⁶ “Tewatatékens Israerʼró꞉nons, NʼAbraham nitisewatʼwatsirínon, tánon sewakwékon ne iáh tesewasitaerónons ne kén tsi sewasénʼnaiens ne Rawenni꞉io: I꞉i se onkwariwáke kí꞉ken kahiatakenátsera tsi tewateniéton!

²⁷ Nonkwesónha ne thóh ratinákere ne Jerusalem ó꞉ni neh sakotihéntense iáh tehonaterientarakwe tsi raónha ne Sakohiatákwas, iáh ó꞉ni tehotinikonraientáʼon ne rotitokenséhakwe rahotiwennahókons tsi nihiotewenʼnánote nononsatokentíke niaʼtewentathokentiʼtseráke. Kwáh káti ó꞉ni neh wakarihónni ne rotitokenséhakwe raotiwennaʼókons ne thóʼkenske ahónton ne tsi wahonwaréwate ne Ié꞉sos.

²⁸ Tánon kíʼ ó꞉ni tsi iáh thénen tehotiriwatʼtsénrion nahonwariwéntakwe narénheie, Pilate wahonwariwanóntonse nahononwariákon.

²⁹ Tánon nónen akwékon éhʼtho nahatí꞉iere tsi niwáton nohiatonseratokénti neh raónha rahiatáthake, thon tahonwahiáthenʼte ne kaiásake tánon osónwakon hiahonwahiatáren.

³⁰ Nók Rawenni꞉io sahokhétsko ne kenheʼiát꞉ne,

³¹ Tánon tóhka niwenniseráke sahsakothoʼtháshase tsi niháti ne skátʼke tehonatʼthahákwen ne Galilee tsi nióre ne Jerusalem. Nónwa ronónha ronwariwanirátis tsi nòkwa ne Israerʼró꞉nons.

^32-33 Tánon kén꞉en iákwes nakwarihowanáten ne kariwí꞉ios: Tsi nahóten ne Rawenni꞉io sakorahratsʼténni ne Sitaeró꞉non rahotisótʼtseras tsi nenháiere, ónen kiʼ éhtho nasonkwatiérase tsi ehʼ nitionkwatʼwatsirínon ó꞉ni nakorénsons, tsi sokhétskwen ne Ié꞉sos nahonsarónʼnheke. Tsi nikahiáton ne tekeníhaton ne tehariwakwátha, ‘I꞉se ne konhiénha; ónhwa wenhniseráte í꞉i ne ianíha wakáton.’

³⁴ Tánon kén nahóten ne Rawenni꞉io wahénron tsi sahokhétsko ne kenheiát꞉ne, iáh nonwénton tiahohiatátʼken nosónwakon: ‘Entʼkónhion ne iotokénti ó꞉ni ne oriwiʼioʼónwe kahiataterítseras Tsi niʼihiarahratsténni ne Táwit.’

³⁵ Tsi nihioriwiʼioʼónwe tsi niháwen nakʼtenónwe naʼteriwanothátsera, ‘Iáh thasatʼthóntate ne roriwathóken sahnátsera nahohiatátʼken natsathonkwákon.’

³⁶ Asèken ne Táwit thóh nihoiéren ne Rawenni꞉io tsi nihotenikonrónni ne rahonháke, tánon thó꞉ne warénheie, tsi wahonwahiatátha wahthontsiontonkwanéken ne rahosóktseras, tánon ne rahoierónta wahótʼken natsiatonkwákon.

³⁷ Nók iáh neh kiʼ ehtoʼtaiawén꞉en tsi nikáien ne Rawenni꞉io shokétskwe ne kenheiátne.

^38-39 Sewakwékon, tewatatékens Israerʼró꞉nons, kwáh nahioriwíʼioke aisewateriéntaraʼne kwáh rahonháke ne Ié꞉sos nónwe niʼietʼtsiʼhiateriwanóthase nahonsakanikonrén꞉en ne kariwáneren; kwáh aisewateriéntaraʼne nónka nentonwétakwe ne rahonháke tsi kwáh akwékon tiakotatewennihióʼon tsi nòkwa ne karihwáneren tsi ní꞉ioht ne Mahís rahoʼianerénsera iáh tehiokwénion nahonseshanerénsion.

⁴⁰ Satatenikónrahrak, káti, nehne tsi nahóten rónen ne rotithokenséhakwe neh tóhsa níse thóh nahisahiátawen:

⁴¹ ‘Sewatahónsatat, í꞉se ne tesewariwarítha! Kwáh sewaneráko tánon sewahiatáton! Asèken tsi nikatiéra nónwa wenniseráte neh nahóten ne iáh tahontesewéthaʼkwe, sékons ó꞉ni nónen nónkak aietʼtsinikonraientáten!’”

⁴² Tsi sohtihiakenhenhátie nononsatokentíke ne Kór tánon ne Barnabas, nonkwesónhas sahonwatihónkaron neh sékon tahóntaʼne nóhia ientsawentatokéntane tánon sékon ahonsahonwatiróri kí꞉ken nahorihoténsons.

⁴³ Nónen nonkwesónha sathonsahonréni tsi nihonatsiataróronne, Kór tánon ne Barnabas ronatiokowánen ne Sitaeró꞉nons ó꞉ni ne iáh tehatiʼsitaeʼró꞉nons ronwathinonterátie tsi niháti ne ronateriwiʼiostontseraténion nehne Judaism iehonatsiátare. Ne Kór tánon ne Barnabas wahonwatithárase ó꞉ni wahonwatiretsiáron niahontasónteren thóʼnon nihonónʼnhek rahotenretserákon ne Rawenni꞉io.

⁴⁴ Nóhia saiawentatokéntaʼne kwahthóhwah kanenrakwékon táien nahiontahónsatathe ne Roiá꞉ner rahowennahókons.

⁴⁵ Nónen ne Sitaeró꞉nons sahsakothíken nonkwesónhas kwáh wahatihiatánane ne kanosáhtsera; wahtathiriwatirónten ne Kór tsi nahóten rotharákwenne tánon wahonwakenrenserónni.

⁴⁶ Nók ne Kór tánon ne Barnabas onensénha wahiatewennanírate tsi wahiatáti: “Kwáh tehiothonwentióhonne ne í꞉se ahontesewatierénton naʼietsiʼhiaronkaténni ne Rawenni꞉io rahowénna. Nók kiʼ tsi wesewakénron ó꞉ni í꞉se wesewatatréwate ne tsi iáh tsiatekaiéri tsi nisewahiáneren naisewaiéna ne ionnheʼónwe atónʼnhets, enskwatewéntethe káti tánon nehne iáh tehatisitaerónon nonʼnientsiákeʼne.

⁴⁷ Asèken thóh ní꞉ioht tsi sonkwatsiatáti ne Roiá꞉ner: ‘Í꞉se ne kaswatʼthétsera konʼhiónni tsi nòkwati ne iáh tehatiʼsitaeʼró꞉nons, eh꞉nahontáwe oʼontsiakwékon aieniákenne.’”

⁴⁸ Nónen ne iáh tehatiʼsitaeʼró꞉nons sahonatʼthóntene kí꞉ken, wahontʼtsennónni ó꞉ni wathontenonweráton ne Roiá꞉ner rahowennahókons; tánon tsi nihiákon ne tionthatáwi ne ionnheʼónwe atónnnhes tahiakétakwe.

⁴⁹ Ne Roiá꞉ner rahowennahókon kwáh tsi nikanakerásera tsi watewaréni.

⁵⁰ Nók neh Sitaeró꞉nons wahatitsirónni tsi tahonténrowe ne ratisennowánens ne kanátakon ó꞉ni ne iáh tekontisitaerónons neh iotikwatsénions tionatʼthonwísens ne ronwasénnaiens ne Rawenni꞉io. Tahontásawen niahonwanatsiatónni ne Kór tánon ne Barnabas tánon sahonwatihiatínekenwe ne kanakeraserákon.

⁵¹ Ne iateriwanótʼtha sahiarasitókeʼwe tsi sahiatén꞉ni neh non nikanátaien nahonwenenésten nonkwesónhas ne tsi iáh tehiakoienahon ne kariwí꞉ios, nók Iconium niaháne.

⁵² Ne iakoriwiʼióstons neh nònne Antioch kwáh iakotonʼnáhere ó꞉ni ne Ronikonriiostokwáh iehiatanánon ne Ronikonratokénti.