Acts 11 - Ohiatonhseratokénti

Tiér Wahtateriwaréniaʼte Ne Tsi Ionterenʼnaienthákwa Thóʼnon Ne Jerusalem

¹ Ne ratikweʼkónne ó꞉ni ronátiakes ne thonethákwens tsi niwatenáskwa ne Judea wahatiriwáronʼke ne iáh tehatiʼsitaeʼró꞉nons tahonʼnéthakwe ne Rawení꞉io rahowén꞉na.

² Nónen ne Tiér Jerusalem shiaháre, tsi nihiákon ne ieriwanónweskwe nahonwatiwarakwétaron ne iáh tehatiʼsitaeʼró꞉nons wahonwariwákwase, hiontónnions,

³ “Ietienatarenawí꞉ne ne iáh tehonwahwarakwétaron neh iáh tehasitaerónon, kwáh ó꞉ni wathisewátonte!”

⁴ Sók kíʼ ne Tiér kwáh tahariwásahate wahatróri tsi niʼiawén꞉en, neh kwáh tsi tiotásawen:

⁵ “Tsi nikaríwes wakaterenʼnaiéntakwe ne kanátakon ne Joppa, Kwáh wahkatʼkátho knahótenk tahiosnentonhátie kwáh neh teskaieróntare tsi ní꞉ioht ne wasirowánen kaiéri naʼtekahiósaien thahiónsente karonhiáke, tánon tiatákʼtha watʼkátaʼne.

⁶ Kwáh ákta tsi hiakenhénʼion nasírakon ó꞉ni wakhéken ne ienáskwaiens ó꞉ni ne kontírios, oniaresónhas, tánon niatekatsitenserákes.

⁷ Ehʼthóhʼne wakewenʼnáronke ionkénki, ‘Testann, Tiér; shèrio tánon tesatskáʼon!’

⁸ Nók wakíron, ‘Oriwíʼhio tsi iáh, Saiáner! Iáh nonwénton ne iáh tehiotʼkwéniens thóka ó꞉ni ne iohetʼkén꞉en tsehiotawehiáton ne tsikʼsakáronte.’

⁹ Sók áreh nowénna sontáʼti ne karonhiáke nathóntawe, ‘Tóhsa neh sanonthónʼnionf neh thènen iáh thahiotʼkwenienstónhake ne Rawenni꞉io ahawénken iotkwéniens.’

¹⁰ Ásen niʼioriwáke kí꞉ken thóh naháwenʼne, ehʼthóne karonhiáke ionsontʼtharátaʼte.

¹¹ Kwáh thóh sikaháwi ásen niháti neh ronónha thonwanateniéton ne Caesarea wahónʼnewe tsi nónwe nikanónsohte ehnónwe nikiteróntakwe.

¹² Ne Rawenni꞉io wahatʼróri neh ahiakwaterósen tóhsa ó꞉ni nakaterahiátaʼkwe. Kiʼ iá-iak niháti atatekénseras neh thoʼnethákwen ne Joppa nónwe nithonénon wahonkwarískote tsi niahákwe ne Caesarea, tánon iakwakwékon hiahakwatáwehiate ne Cornelius rahonónskon.

¹³ Wasonkwaróri tsi ní꞉ioht tsi róken ne raronhiakerónon rátakwe ne rahonónskon, tsi wahonwénhase, ‘Ónhkak Joppa nónwe hiaseʼiatóri nahonwahiatisákʼkha ne rónkwe Simon Tiér ronwáiats.

¹⁴ Neh enhiatewenʼnontákwen níse tánon ratikwékon ne sawátsire entsisewaniákenne.’

¹⁵ Tánon nónen sontakatásawen nakatáti, ne Ronikonratokénti waʼtesakothásente kwáh tsi ní꞉i níʼhion kwahiatawén꞉en ne tsi tiotásawen.

¹⁶ Ehʼthóne sakehiáraʼne tsi niháwen ne Ronikonratokénti: ‘Sawátis onékanos tsi rotenekwahéston, nók níse ne ensewatenekwáheste ne Ronikonratokénti.’

¹⁷ Kwáh tehioswátʼte ne Rawenni꞉io tsi tesakówi ne iáh tehatiʼsitaeʼró꞉nons natathawítsera tsi ní nitesonkwáwi sontatsitewétaʼkwe ne Roia꞉ner Ié꞉sos Kerístos; Ónhka ní꞉i, káti, nakatheniénten taʼítaste ne Rawenni꞉io!”

¹⁸ Neh sahónronke kí꞉ken, wahóntʼkaʼwe tsi ronwariwakwenníhakwe tánon wathonwanonwerónnion ne Rawenni꞉io, ronthónnionsʼkwe, “Ehʼthoh káti Rawenni꞉io tesakówi ne iáh tehatiʼsitaeʼró꞉nons kwáh ahonatesenʼnaiéntake nahonsahontatʼréwaʼte ó꞉ni nahonnónʼnheke!”

Ne Rotiriwiʼióstons Thoʼnónwe Ne Antioch

¹⁹ Ótsiakes ne rotiriwiʼióstons neh tsiatehonarénion tsi nihiorihonʼníʼon ne kakenronniátsera tsi thóh niʼiawén꞉en nónen ne Stephen sahonwanonwariákon thóhnióre nieʼiawénon tsi nióre ne Phoenicia, Cyprus, ó꞉ni ne Antioch, nekʼkhók ne Sitaeró꞉nons ronwahnateriwanotaníhakwe.

²⁰ Nók ótsiakes ne rotiriwiʼióstons, neh Cyprus tánon ne Cyrene non nithonénon, Antioch niahónne tánon hiahonwanateriwanótʼthase ne iáh tehatiʼsitaeʼró꞉nons ronwatirohrihátie ne kariwí꞉ios tsi nókwa ne Roiá꞉ner Ié꞉sos.

²¹ Ne Roiá꞉ner rahosatsténsera tehonatiátatonkwe, tánon kwáh iakotiokowánen taʼiakétakwe ó꞉ni tahonwétakwe ne Roiá꞉ner.

²² Nonkwesónha ne tsi tionterennaientákwa ne Jerusalem wahatiriwáronʼke tsi nontaʼiáwenne ne Antioch, sók kíʼ Barnabas Antioch nónwe hiahonwatóri.

²³ Siahárawe ó꞉ni wahatʼkátho tsi ní꞉ioht ne Rawenni꞉io sakohiatateríston nonkwesónha, wahatʼtsenónni tánon wasakoretsiáron rathikwékon tsi ahotiriwathokénhake ó꞉ni kwáh roneriasakwékon tsi ahontahonwetakwénhake ne Roia꞉ner.

²⁴ Barnabas raónha ne rónkwe kwáh rahiatanánon ne Ronikonratokénti ó꞉ni ne tewetakwen, tánon hiakotiokowánen tahiakétakwe rahonháke ne Roiá꞉ner.

²⁵ Ehʼthóne ne Barnabas Tarsus nionsáre Saul wahohiathisákʼkha.

²⁶ Siahohiatatʼtsénri, Antioch nionsahohiaténhawe, tánon kwáh iaʼhiathoseríke tsi ionterenʼnaientákwa nónwe nihontkenʼnisáhaskwe nonkwesónha ó꞉ni hiakotiokowánen wasakotirihónʼnien. Thoʼnónwe ne Antioch ne kwáh tiotserenthákwen ne tsiakawetákwen Iakoriwiʼióston wahontatenathónkwen.

²⁷ Neh siwatʼtháwi ótsiake ne iehatiriwákenskwe Jerusalem tahonténti tánon Antioch niahónne.

²⁸ Saiáta ne Agabus ronwaiátskwe, wahtátane tánon tsi iahariwáken, neh tsi nontáwe ne Ronikonratokénti tsi nahoróri, kwáh éhʼtho tsi ienhiontonkariákon nonhontsiakwékon. (Nehne Claudius sihakóra kíʼ thoʼnitsawén꞉en.)

²⁹ Neh ratikwekónne hiatotiriwaiéntase kwáh satihiatátʼtion ienhonténiente tsi nenhatikwéni nasakotiʼiénawase ne iakoriwiʼióston ne Judea nónwe niʼienákere.

³⁰ Thóh káti nahatíʼiere, ehʼthóhʼne, iahonwanateʼniénten nowísta ne rathiretsiárons ne tsi tsionterennaienthákwa Barnabas tánon Saul hianíhawe.