Acts 10 - Ohiatonhseratokénti

Tiér Tánon Ne Cornelius

¹ Saiáta Cornelius ronwaiátskwe Caesarea non nihanákerekwe, raónha ratiokwakweʼní꞉iokwe ne Romeʼró꞉nons rahononkwetaʼsónhas ronterí꞉ios nehne ronwatinathónkwaʼkwe “Ne Tariʼien kentiókwa.”

² Roriwiʼiostón꞉ne; raónha ó꞉ni ne rahowátsire ronwasénʼnaienskwe ne Rawení꞉io. Kwáh ó꞉ni wéso tsi sakoienawaséhaʼkwe ne Sitaeró꞉nons tsi ratinákere ó꞉ni thoʼkontákwenʼne tsi Rawení꞉ioke iehoterénʼnaien.

³ Kákʼnon ne ásen sihiowistahehátse ne iothohétston néntie nónen sahotenesten, kwáh wèh꞉ne tsi wahóken ne Rawení꞉io rahoronhiakerónon tahatáwehiaʼte tánon wahawénhase, “Cornelius!”

⁴ Iathotʼkáneren ne raronhiakerónon katerontserákon tánon wahénron, “Nahóten, Sénʼshion?” Ne raronhiakerónon watariwaseráko, “Ne Rawení꞉io rawerentí꞉ios ne saterén꞉naient ó꞉ni tsi nisahióte ne kenténron, ónenki rotateweiennentáʼon tahiariwaserákwaʼse.

⁵ Ónenki tóhka niháti ronónkwe Joppa iasehiatóri tehonwaʼiatatókent ne rónkwe Simon Tiér ronwáiats.

⁶ Iehonatarénen tsi thoʼnónsote ne ranakensahserónni Simon ronwáiats, ákta ne kaniatarakhekówa non nihononshote.”

⁷ Ehʼthóhʼne ne raronhiakerónon ahéren sáreʼthe, thóhʼne ne Cornelius tenihiáse ne rahonkwetaʼsónhas hiasakónonke ó꞉ni saiátat ne raterí꞉ios, tánon ó꞉ni saiáta ne roriwiʼióston nehne kwáh raónha tiókonte tehoriwásnieʼse.

⁸ Wasakoróri tsi naháwenne sók Joppa nónwe hiasakoténieʼte.

⁹ Nóhia sahiórenne, tsi wahonathaiʼtákene ónen ákta sihónne ne Joppa, Tiér karonkwénake hiaharátʼten káknon ne éntie síkare nahaterénʼnaien.

¹⁰ Wahathonkáriake tánon wathontonhóntioʼse ne tahatskáʼon; tsináhe ratikwatákwaʼskwe ne khákʼkhwa, tsi ní꞉ioht ne aotetʼtsenen.

¹¹ Tsi ní꞉ioht wahatʼkátho watewateronhiakʼkhási tánon tsi ní꞉ioht ne wenʼniatarowánen tahiotsʼnentonhátie kwáh tehiotekerónte tsi wakaiéntaʼne nonwentsiáke.

¹² Thoʼkontihiáti ne kwáh tsi niatekariótakes, oniaresónhas, ó꞉ni niaʼtekatsitenserákes.

¹³ Rawenni꞉io wahoróri, “Téstann, Tiér; sèhrio tánon tesatskáʼon!”

¹⁴ Nók ne Tiér wahénron, “Kwáh iáh, Saiáner! Iáh nonwénton thènen tewakékon ne iáh tehiotekwatʼkwéniens ó꞉ni ne wahétken.”

¹⁵ Sók sékon ne Rawenni꞉io sahotháraʼse, “Tóhsa ne sanonthónnionf nahóten ne iáh tahiotʼkwenienstónhake tsi nahóten ne Rawenni꞉io ro꞉son iotʼkwéniense.”

¹⁶ Ásen niahónteratsʼte kí꞉ken thóh naháwenne, tánon etʼthóhʼne karonhiáke nionsahatíhaʼwe tsi nahóten neh tsiosenʼènne.

¹⁷ Tsináhe ne Tiér neh ranonthonniónkwasʼkwe tsi nahóten kéntons ne rotʼkáton, neh ronnónkwe ne Cornelius tesakothórion wahonwatiróri tsi nónwe nihonónsote ne Simon, tánon ónen kwáh ohénton rónʼnete ne tsi iotenhenrakáronte.

¹⁸ Hiathotihénreʼte tánon wahatiriwanónton, “Kén꞉en ken ronatharénen neh Simon Tiér nihosennóten?”

¹⁹ Tiér sékon neh nihatheniéntha nahonikonraiéntaʼne nahóten kéntons tsi nahóten rotʼkáthon, nónen ne Ronikonratokénti sahénron, “Satahónsatat! Ásen niháti ronónkwe kén꞉en rónʼnes iesahiathísaks.

²⁰ Káti satateweienéntann tánon hiasásʼnent, tánon tóhsa serahiátat nahiʼsewatenrósen Asèken Í꞉i thekhehiathó꞉rion.”

²¹ Sók kíʼ ne Tiér hiahátsʼnente tánon wasakawénhaʼse ne ronnónkwe, “Í꞉i neh kónkwe ne takwahiathísaks. Nontiéren tsi kén꞉en tésewe?”

²² “Ranenrakweʼní꞉io Cornelius tasonkwatóri,” watatiriwaseráko. “Tronkwetaiéri roʼsénnaiens ne Rawenni꞉io tánon ó꞉ni kwáh íken tsi éneken tsi ní꞉ioht tsi ronwariwakweniénstha ne Sitaeró꞉nons. Ne Rawenni꞉io rahoronhiakerónon wahoróri ne iahianatarénaʼse ne tsi thonónsohte, neh nahónton nahothónteʼne tsi nahóten sáien nasíron.”

²³ Tiér wasakohónkaron ne ronnónkwe hiaʼontáwehiate tánon ó꞉ni thóh ahonnónwete. Tsi sahiórenhne wahatatewehienentane tanon wahontenhrosen; tokara niháti ne thonhnetakwen ne Joppa nithonenon skatne niahónhne.

²⁴ Nóhia sewenniserátekwe Caesarea hiahárawe, tsi nónwe ne Cornelius thóh ráhrekwe, skátʼke ne rontátenonkwe ó꞉ni ne kwáh ákta rontenrosónhas tsi nikáien ne sakohonkaráwi.

²⁵ Ne nónen ne Tiér thó꞉wa shahatáwehiate, Cornelius watʼhiatátken, rasitáktha wahahiatiénenne, tánon rahohénton watatʼtiakéte.

²⁶ Nók ne Tiér wahaʼón꞉nien tonsahátaʼne. “Téstann,” wahénron, “Í꞉i kwáh thiʼkonkwé꞉a.”

²⁷ Ne Tiér iahakóntaʼkwe Cornelius thohthíthare tsi tiahiatáweiaʼte ne kanónskon, thóh wasakohiatatʼtsénri iakotiokowánen iakotiataró꞉ron.

²⁸ Wasakawénhaʼse, “Kwáh í꞉se tionháke sewateriéntare ne Sitaeró꞉non rahoriwiʼiostóntsera tsi iáh tehiówenk ne hiatahiátiesʼte ne iáh tehatiʼsitaeʼrónons. Nók ne Rawenni꞉io rakenatónni neh tóhsa ne akanonthónnionwe nónkak kwáh iáh tehiakotʼkwéniens tóhka ó꞉ni iáh tehiakohiánere.

²⁹ Káti nónen siaskínonke, kwáh iáh thènen tatewakerihóron. Konriwanontónnis káti nontiéren tsi iaskínonke?”

³⁰ Wahénron ne Cornelius, “Ne kíʼ ne káknon neh kaiériʼnónta tsináhe wakaterenʼnaiéntakwe nakenónskon ne ásen nitiowistáhe iothohestonnéntie. Thontaiawénstsi rónkwe tehiostarátʼthe roktseronʼniáton akʼkénton wahtáthane

³¹ tánon wahénron: ‘Cornelius! Rawenni꞉io wahothóntene ne saterénʼnaient tánon ratʼthókas ne sahioténseras ne kenténron.

³² Ónhkak hiasehiaténiet Joppa ronwahiatisákha rónkwe Simon Tiér ronwáiats. Iehonatharenáwi ne Simon ne ranakenshaserónnis, ákta ne kaniatarakekówa nonnihononshote.’

³³ Kwáh káti óksak í꞉se iakónnonke, ó꞉ni kwáh í꞉seʼsonwesénʼtsera tsi kén꞉en nontáse. Ónen káti tewakwékon kén꞉en ítewes rahohénton ne Rawení꞉io, hionkwárare nahionkwatʼthóntene tsi nahóten asíron tsi nihiaróri ne Roiá꞉ner.”

Tiér Wahatʼretiáron

³⁴ Tiér tahathásawen wahatʼretáron: “Ónen kíʼ wakenikonraiéntas tókensʼke ne Rawenni꞉io kwáh akwékon satetʼtiót꞉te tsi nisakotiéraʼse.

³⁵ Tsi nihiákon ne ronwatsiánis tánon thóh niʼiehéra ne tkariwaiéri neh rawerientiʼióstha, iáh tewatsʼterístha onhnaienekwenshoténha꞉ke.

³⁶ Sewateriéntare tsi niwateriwanothatseróten iesakothenietén꞉ni nIsraeʼrónons, ratʼroríhawe ne kariwí꞉ios neh skén꞉non raonháke ne Ié꞉sos Kerístos, tsi nikáien neh akwékon Tseʼsakoiá꞉ner.

³⁷ Sewateriéntare tsi nihiorihowánens tsi niʼiawénseron nahonthonwentsiáke ne Judea, Galilee nónwe tiotásawe neh nónen ne Sawátis sahateriwanotháko ne atenekwahesthátsera.

³⁸ Sewateriéntare tsi nókwa ne Ié꞉sos Kerístos ne Nazarethro꞉non, tánon ó꞉ni ne Rawenni꞉io tsi nihohiatanorónston nikwékon ne Ronikonrarokén꞉ti ó꞉ni ne kaʼsatsténsera. Kwák tsikʼnonwéson niehawénon, ioʼiánere tsi nihotieránion ó꞉ni akwékon sesakotsientonhátie tsi nihiákon nehne iakotsenawáston nonesonrónon rahosatsténsera, Asèken nikwekón꞉ne ne Rawenni꞉io.

³⁹ Í꞉i akwékon iakwariwanírats tsi nihotieránion tsi wathonwéntsiaʼien ne Judeaʼronon꞉ke ó꞉ni ne Jerusalem. Ehʼthóhʼne kahiasáke wahonwanonwaróten tsi wahonwário.

⁴⁰ Nók Rawenni꞉io sahokétsko náhsen nónta onakén꞉ke tánon neh wakarihón꞉ni nahonsahataténesʼthe,

⁴¹ iáh tsík ónka tèken, nek khók tsi nikáien ne ronwáken nehne Rawenni꞉io ohénton tesakohiatarákwen, neh káti, tsi nihiátion neh skátʼke tehionkwatskáʼon ó꞉ni ionkwanekíren, sathontahatʼkétsko ne kenheiátʼne.

⁴² Tánon wasonkwarihónten nahiakhihiateriwanóthase ne kariwí꞉io nonkwesónha tánon ó꞉ni nahiakwatʼróri tsi rahónha ne Rawenni꞉io rohiatarákwen ne tasakohiatórete ne hiakón꞉ne ó꞉ni ne iakawenhéion.

⁴³ Rahthikwékon ne ronatiaʼtatkonkwe ronwatharákwen, ronthónhakwe tsi nihiákon nenʼthonkwétakwe, ó꞉ni entiakoterakéwase nakoriwaneraháktsera thóh kasatstenserákon ne rahosén꞉na.”

Neh Iáh Tehatisitaeró꞉nons Wahathihiatánaʼne Ne Ronikonratokén꞉ti

⁴⁴ Tsi náhe sékon ne Tiér rotretiáronkwe, ne Ronikonratokén꞉ti wasakohiatórenʼne tsi nihiákon iakotahónsate tsi rotheriwanóthe.

⁴⁵ Ne ratiʼsitaeʼroʼnons tsi niháti ne Joppa non nithonwáseron ne Tiér, wahothineráko ne Rawenni꞉io tsi nasakohiataʼnóronste non꞉ne ne iáh tehatiʼsitaeʼró꞉nons tsi nontasakáwen ne Rahonikonratokén꞉titsera.

⁴⁶ Asèken wahonwathiʼwenʼnáronke thí waronkhatserá꞉te tsi rothí꞉tare ó꞉ni ronwasenʼnahkaratháton ne Rawenni꞉io tsi nihosatstenserowánen. Tiér tahathá꞉ti:

⁴⁷ “Kí꞉ken ronónkwe wahonatsiénhase ne Ronikonratokénti, kwáh tsi Í꞉i nihionʼkwahiatawén꞉en. Ónhka, káti kén, ahiekwéni ne tahonwathítasʼte nonékanos ahontenekwáheste?”

⁴⁸ Sók kíʼ wasakónaʼne nahontenekwáheste rahosénʼnakon ne Ié꞉sos Kerístos. Ehʼthóhʼne wahonwariwanóntonse neh skátʼke ahonʼnéseʼke thoʼkára niwenʼniseráke.