2 Samuel 8 - Ohiatonhseratokénti

Ne Ne Táwit Raoteriʼióseras

¹ Ó꞉nenh kwáh nenhná꞉he onakènhke, ne Táwit iashakotsatónhti ne Philistines tánon washakosénhni; tánon iahontótʼten tsi thotiniarotaronhne ne tsi ionhontsá꞉ièn.

² Ne raónha kwáh nonʼné꞉eh washakosénhni ne Moabites ó꞉ni, washakahónhnien nohontsáke ahontsiatahkwenhtáro, washakotenienténhnion áhsen níkon washeriʼietowáhnen wahasheriʼietakéron; tsi nihá꞉ti ne tsi natetsá꞉tereh ne tewasheriʼietakes washakononwarhiakhónhnion, ók tsi nihá꞉ti ne ahsénhaton iewasheriʼiétahien washakoríhon nenhné꞉eh nahonnónnheke. Tánon ne Moabites neh wahón꞉ton ne Táwit raonkwetashonhas ó꞉ni nahatíhawe nowísta nahonwakáriaksehake.

³ Ne Táwit kwáh ó꞉ni nonʼné꞉eh waononwariákhon ne Ronnontí꞉io Hadadezer ne ne roní꞉ha ne Rehob ne Zobah nón꞉we nihanákerehkwe, ne raónha tsi niahá꞉reh nahonsahakwahtáko ne raoshaststénhsera ne tsitkaniatarathátsie ne Euphrates.

⁴ Ne Táwit washakoienenháton énska tewenhniawehetsheráhsen tánon tsá꞉ta tehonhnienhniáwe nihá꞉ti ne rotisátens, tánon tewáhsen tehonhnienhniawehetsheráhsen niháti ne thakésons tsi ronterí꞉ios. Ne Táwit waharehniá꞉nion ne raotiʼtsinonhiátons ne ratiʼtsirahokwáhkes ratiʼkwékon ne kosátens ronwatiʼiatanihiónt꞉tha notsiónkwas, ók washakáwenhre iatekaiéri tsi nihá꞉ti nénska tewenhniáwe nikaseréhtakes notsiónkwas.

⁵ Nó꞉nenh ne Aramró꞉nons ne Damascusró꞉nons wahón꞉newe nahonwasniénon ne Ronnontí꞉io Hadadezer ne Zobahró꞉non, ne Táwit wasakononwariakhónhnion tewáhsen-tékeni tewenhniawehetsheráhsen niháti ronónkwe ne ne Aramró꞉nons.

⁶ Eʼthóhʼne ne Táwit wasakó꞉teron ne ronterí꞉ios tsi nón꞉we nihathiteróntons ne Aramró꞉nons ne Damascusró꞉nons; tánon ne Aramró꞉nons ne wahón꞉ton ratinhá꞉tshera raohén꞉ton ne Táwit tánon tahatihásheron nowístas. Ne Roiá꞉ner taháwen naʼtesenhniétsheras ne Táwit ne kwáh tsikʼnonwéson niénhʼhenreh.

⁷ Ne Táwit washakokwenháton ne owistanórons í꞉kens ne teioniatasthákwa ne ne ratihawinóntsene ne raonhatsherashón꞉ʼahs ne Hadadezer, tánon thóh niahatíhawe Jerusalem.

⁸ Thóh tontáhsawen ne Betah tánon ne Berothai, ne ne raonatahtón꞉has ne Hadadezer, Ne Ronnontí꞉io Táwit tahahá꞉seron iawetowáhnens ne teiotʼtsinokwáhronte nathésa karístahtsis.

⁹ Nó꞉nenh ne Ronnontí꞉io ne Toi ne ne Hamathró꞉non waharihwáhronhke nètho Táwit tsi sakosénhnion ieshakosaháton ne Hadadezer raotsió꞉kwa ronterí꞉io,

¹⁰ Ne Toi iahó꞉tori ne roién꞉ha Joram tsi thénteron ne Ronnontí꞉io Táwit, ne ne tahonónweron tánon tahorénhsaron tsioríhwa tsi ronaterí꞉io ne Hadadezer tánon rosénh꞉nion. Nón꞉wa ne Hadadezer iotkáte ronaterí꞉iokwe ne Toi. Joram tahohawíten niaʼtekonshón꞉ahs kawistará꞉kens, owistanó꞉rons, tánon ne athésa niwashokóten karístatsis;

¹¹ ne kí꞉ken ó꞉ni ne Ronnontí꞉io wahatonhnahérase raohénton ne Roiá꞉ner, tsi ne aónstonke nó꞉nen enonterénhnaien, skát꞉ne ne kawistaráken ó꞉ni nowistanó꞉ron ne sakhokwenháton ne thiononhontsaténions ne sakosén꞉nion.

¹² Thóh nithoháseron Edom, Moab, ne ne Ammonró꞉nons, ne ne Philistines, Amalek, tánon tsi nètho haséhron ne ronenhskwenháton ne Ronnontí꞉io Hadadezer ne ronikénʼen ne Zobah.

¹³ Ne Táwit wahasenhnowanenah nó꞉nenh shonsárahwe, ne raón꞉ha wasakononwariakónhnion shatékon iawénhre tewenhniawehetsherásen niháti ne Edomites thóh ahonráhkwahkon ne tsioiótsis.

¹⁴ Thóh washakóteron ne ronterí꞉ios thóh nón꞉we Edom; kwáh tsitnonwéhsons akwé꞉kon ne Edom tsi wasakóteron ne ronterí꞉ios, tánon ratikwé꞉kon ne Edomites ne wahón꞉ton ne Táwit raonhatsherashón꞉ahs. Tánon ne Roiá꞉ner tahá꞉wenh natesenhniétsheras ne Táwit ne kwáh tsikʼnonwéson nienhénreh.

Ne Táwit Raonkwetaʼshón꞉ahs

¹⁵ Káti ne Táwit wahatenontí꞉ioste tsi niwatenáskwah ne Israerʼronónke; tánon ne Táwit ne wahateriwathéntsiate nateriwakwarishióntshera ó꞉ni tkarihwaiéri rononhá꞉ke ne raonkwetaʼshón꞉ahs.

¹⁶ Ne Joab ne ne roní꞉ha ne Zeruiah neh sakoteriwatsterístase ronterí꞉ios; Jehoshaphat ne ne roní꞉ha ne Ahilud ne sakohiatónhniskwe;

¹⁷ Ne Zadok ne ne roʼníha ne Ahitub tánon ne Ahimelech ne ne roʼníha ne Abiathar nitsihénstatsi í꞉ken; Seraiah neh sakohiatóniskwe;

¹⁸ Ne Benaiah ne ne roʼníha ne Jehoiada neh sakohentenhséhakwe ne Cherethites tánon ne Pelethites; tánon ne Táwit roién꞉ha ne ratsihénstatsi kènhne.