2 Samuel 6 - Ohiatonhseratokénti

Ne Táwit Iahanorokwénhawe Nateriwaseronniátshera Thóh Jerusalem

¹ Ne Táwit shé꞉kon sahshakoiatahróhroke ne ronwatiʼiatarákwen ronnón꞉kwe NÍsraerʼronónke, áhsenʼniwáhsen tewenhniawehehtserásen niháti.

² Ne Táwit tánon ratiʼkwé꞉kon ne raotiʼtsió꞉kwah ronterí꞉ios ne ratikweʼkonhátsies iahón꞉ne tánon thóh tahonténhti Baale-judah, ne ne thóh nón꞉we nontahatíhawe ne raoneró꞉kwah nateriwasheronhniátsera ne Ní꞉io, tsi neh konwanatón꞉kwah ne Sakoiá꞉ner ne tsi ronónha thóh ratitskwahrón꞉nions éhʼneken ne niʼnikonhrare iotokentis.

³ Iahatíhawe ne raoneró꞉kwah nateriwaseronniátshera ne Ní꞉io thóh wahonnètha ne oserétahse ne tékeni teiokakwénhtonhte wenhnísereske, tánon thóh tahatiʼiákenhwe tsi ronónshote ne Abinadab, thóh ronhnonshóthakwe tsi ionhniá꞉here. Uzzah tánon Ahio, tánon ne iathatekénha ne ne sakohiohokón꞉ahs ne Abinadab, ronónha konwatorihátsie noserehtá꞉se ne tekeniteiokakwénhtonhte wenhníseres

⁴ ne ne Ahio ahohénton í꞉reh.

⁵ Táwit tánon ratikwé꞉kon NʼIsraeró꞉nons teotinonniakwenhátsie ó꞉ni teotirihwakwenhátsie raohén꞉ton ne Roiá꞉ner kwáh tsi nihotishaststénhsera, ratiʼrenhnotáhtsie ó꞉ni rotinakwahehátsie ó꞉ni ronaterenhnotátsie ne onowakówah ó꞉ni ne kén nikanakwáhas ó꞉ni ne ionterakarehrasthákwah ó꞉ni ne teiotwasakweʼnón꞉ni.

⁶ Nó꞉nen shiaʼhónhnewe ne tsi iewahét꞉ta kaswenhkaraʼkwenhtaron ne Nacon nón꞉we, ne Uzzah iathatsá꞉neste tsi kanorokwáhere ne raoteriwaseronniátshera ne Ní꞉io tánon wahaiéna, asèken ne teotiná꞉kares tsi nihón꞉ne iahowakonhá꞉tsie.

⁷ Kwáh ók꞉saʼok ne Roiá꞉ner wahonhákwase ne Uzzah; tánon ne Ní꞉io kwáh thonónhwe wahononwarhiákhon tsioríwa tsi iathatsáneste tsi kanorokwáhere nateriwaseronniátshera; tánon thóh warénheie ákta tsi kanorokwáhere ne raoteriwaseronniátshera ne Ní꞉io.

⁸ Ne Táwit wahonhákwen tsioríhwa ne Roiá꞉ner tsi wahoréhwate ne Uzzah; káti neh nón꞉we ne skonwanatónkwah Perez Uzzah, shé꞉kon nón꞉wa nikaháwis neh ne kéntons karehwathátshera.

⁹ Ne Táwit wahotsánike ne Roiá꞉ner nètho wenhniserátekwe; wahén꞉ron, “Ónhní꞉ioht ne raoneró꞉kwah nateriwaseronniátshera ne Roiá꞉ner ne í꞉i akatenhnikonrá꞉ren?”

¹⁰ Káti ne Táwit iáh tehothontáton niahóhake noneró꞉kwah ne raoteriwaseronniátshera ne Roiá꞉ner ne raón꞉ha ahatenhnikonrá꞉ren thóh tsi kanatowaʼʼnénhke ne Táwit; khèkhok ne Táwit thóh niahá꞉hawe tsi thohnónshoʼte ne Obed-edom ne ne Gitró꞉non.

¹¹ Nateriwaʼseronniátshera oneró꞉kwah thóh kaiéntakwe raonóns꞉kon ne Obed-edom neh náhsen niwenhnítahke nikaríweskwe; tánon ne Roiá꞉ner wahoiatahtériste ne Obed-edom tánon ratikwé꞉kon tsi nihawatsíra.

¹² Tsi niwatró꞉ri ne Ronnontí꞉io Táwit, “Ne Roiá꞉ner tsi sakoiathaʼteríston tsi nihawatsíra ne Obed-edom tánon akwé꞉kon tsi nahó꞉ten ahoién꞉take ne raón꞉ha, ne iorión꞉nion ne raoneró꞉kwah nateriwaseronniátshera ne Ní꞉io.” Káti ne Táwit iahá꞉re tánon tahá꞉hawe ne raoneró꞉kwah ne raoteriwaʼseronniátshera ne Ní꞉io ne tsi thohnónshaʼte ne Obed-edom thóh niahá꞉hawe kanatowanénhke ne Táwit tsi nihotonhnáhereh;

¹³ tánon nó꞉nen tsi nihá꞉ti ne ratinhorokwenháwine ne raoʼteriwaseronniátshera ne Roiá꞉ner tewáhsen-wísk (mile) niió꞉re shieʼoné꞉non, ne Táwit wateshakótaste tsi nikarí꞉wes wahó꞉tenaskwatsahaten ne Roiá꞉ner ne ne teoná꞉kares tánon ne ró꞉rehsen tionhnónskwaron rátsinn.

¹⁴ Ne Táwit wathanónhniakwe raohén꞉ton ne Roiá꞉ner kwáh tsi nioshaststénhsera; ne Táwit neh teotsiakwaráhnen ne waniatarí꞉io ateniióntha.

¹⁵ Káti ne Táwit tánon ratikwé꞉kon NʼIsraeró꞉nons tahatíhawe ne raoneró꞉kwah ne raoteriwaseronniátshera ne Roiá꞉ner tsi nateotihenré꞉tha, tánon tsi nikawénhnhote ne ieonrawátstha.

¹⁶ Ne raoneró꞉kwah ne raoteriwaseronniátshera ne Roiá꞉ner tsi ónh꞉we ne kanatowanénhken ne Táwit, Michal ne ne sakoién꞉ha ne Saul thontketóten tsi iononstonkwahkáronhte, tánon wahó꞉ken ne Táwit tehanitionkwahkwánions tánon teononniákwen rahohénton ne Roiá꞉ner; tánon nahón꞉ha wahokénron nawerhiá꞉ne.

¹⁷ Tahatiʼiónte ne raoneró꞉kwah nateriwasehronniátshera ne Roiá꞉ner, tánon thóh wahá꞉tien tsi nón꞉we niionát꞉te, atohsehrákon nètho Táwit rotohsehró꞉te ne ne aorihwáke; tánon ne Táwit wateskónten tánon neh washakotátʼtse ne otsiokwahtokénti raohén꞉ton ne Roiá꞉ner.

¹⁸ Nó꞉nenh ne Táwit sahá꞉sa tsi roteskón꞉tahkwe tánon tsi washakótatʼtse ne otsiokwahtokénti, washakoiathatériste nonkweʼókons thóh raosénhnakon ne Sakoiá꞉ner ne ratironhiakerónons,

¹⁹ tánon wateshakorehniáten ne káhkhwa tsi ratinakeréhnion onkweʼtakwé꞉kon, ne ne kwáh kentsiokwakwékon NÍsraerʼronónke, thaʼtetsarónhkwen ronʼnón꞉kwe tánon ne konnón꞉kwe, satiʼiatátʼtions tasaká꞉wen énska teiotenatarakweʼnón꞉ni, kén nikawahrá꞉ha, tánon énska ne tkanén꞉hara watenátaronte. Ehʼthóhʼne ratikwé꞉kon nonkweʼókons tsi thotiʼnonshó꞉tons nionsaón꞉ne.

²⁰ Ne Táwit ionsáhreh ne tahonsahontátʼken ne raowá꞉tsireh. Ók ne Michal ne ne sakoién꞉ha ne Saul takaiá꞉kenʼne ne tahiatátken Táwit, tánon wakén꞉ron, “Kwáh ne ronnontí꞉io NÍsraerʼronónke wahatatʼtsenówanate nón꞉wa wennhniseráte, tsi wahathatenotstón꞉ni ahotihénton ne raonhatserashón꞉ʼahs konnón꞉kwe, tsi ní꞉ioht ne kwáh tsikhónkak ne teotenonwahroʼrítonhte rónkwe nontiérenk ahathatenhostónhni!”

²¹ Táwit wahrénhase ne Michal, “Kwáh raohén꞉ton ne Roiá꞉ner, raón꞉ha ratiataráhkwen tsi ní꞉ioht ne ianí꞉ha tánon ratikwé꞉kon tsi nihawatsíra, ne nahatiataráko nahonkenontí꞉ioke tsi niwatenáskwah NʼIsraerʼronónke, ne raonkwetaʼshón꞉ahs ne Roiá꞉ner, nètho tsi watkenónhniakwe raohén꞉ton ne Roiá꞉ner.

²² Kwáh kíʼ shé꞉kon sén꞉ha enskathatéhate tsi nón꞉wa ní꞉ioht, ní꞉i aón꞉ton nakanontón꞉nionhwe iáh othènon tekeriwástha, ók kíʼ thí꞉ken konhnón꞉kwe tsi kwáh éhʼneken tsi enionkanontónhnionhse!”

²³ Tánon ne Michal ne sakoién꞉ha ne Saul iáh teiowiraientáʼon tsik tsakénheʼie.