2 Samuel 5 - Ohiatonhseratokénti

Táwit Waonwaiataráko Nasakotenontí꞉ioste Tsi Nikanakerásera Ne Israerʼronónke

¹ Eʼthóhʼne ratikwé꞉kon tsi niotitsió꞉kwakes ne Israerʼronónke wahonwaiatórenhne Táwit thóh nón꞉we Hebron, tánon wahonníron, “Satkátho, ní꞉i tánon nonkwatsákes neh saonkwashót꞉tseras.

² Asèken kwáhʼthóh tsi nikarí꞉weskwe, tsi náhe ne Saul shonkwanontí꞉iokwe, kwáh í꞉se tethesehiatinekénʼen Israerʼró꞉nons tánon thontasehiaténhawe. Ne Roiá꞉ner ièn꞉ni ónhka nenhsakotenhnikón꞉rahren nakonkweʼtashón꞉ahs Israerʼró꞉nons, í꞉se ne kwáh ensatkóraste NÍsraerʼronónke.”

³ Káti ratikwé꞉kon ne thoʼtíions NÍsraerʼronónke tahón꞉ne raohén꞉ton ne ronnontí꞉io ne Hebron nón꞉we; tánon ne Ronnontí꞉io wahrón꞉ni ne kaianerénhsera skátne ne ronónhsa thóh nón꞉we ne Hebron raohén꞉ton ne Roiá꞉ner, tánon wahonwaiataráko Táwit nahonontí꞉ioke kanakeraserakwé꞉kon Israerʼronónke.

⁴ Ne Táwit áhsen niwáhsen satehaoseriʼiákon shontahatásawen nahatenontí꞉ioste, tánon kaié꞉ri niwáhsen niʼioseráke ronontí꞉iokwe.

⁵ Ne Hebron nón꞉we washatenontí꞉ioste kwáh kanahkeraseraʼkwé꞉kon ne Judah ne ne tsá꞉ta niʼioserákekwe tánon iáh-iák niwenhnítake; tánon thóh nón꞉we ne Jerusalem wahatinontí꞉ioste kwáh kanakeraseraʼkwé꞉kon ne Israerʼronónke ó꞉ni ne Judah ne ne áhsen niwáhsen-áhsen niʼioserákeʼkwe.

Jerusalem ne wakonwanathonkwe kanatakweni꞉io

⁶ Ne ronnontí꞉io tánon ne raonkweʼtashón꞉ahs wahatinenhraserónhni tsi niahónhne Jerusalem iasakonatsatónhti ne Jebusites, ne thóh ratinákerehkwe tsi ionwenhtsá꞉ien, ronón꞉ha wahonwénhase ne Táwit, “Ní꞉se iáh kén꞉en tahontáse, iekaníhare ne teieronhwékon ó꞉ni ne iontsinhokátha kwáh tenhtsesakaraténi”—tsi nihonnontónhnionskwe, “Ne Táwit iáh tahakwéni ne kén꞉en nahontáhre.”

⁷ Iáh kíʼ othénon teioriʼontákwen ne Táwit wahaiéna ne tekanatanát꞉ton ne Zion, nón꞉wa ne ne kanatowanénhke ne Táwit.

⁸ Táwit ráwenh nètho wenhniserátekwe, “Ónhka akén꞉hake ne thénen ahonwatiʼién꞉te ne Jebusites, tsi rontonréhtha nón꞉we nihonwatí꞉ient tsi iensakonatsiatónhti ne iontsinhokátha ó꞉ni ne teieronhwékon, ne ne tsi nihá꞉ti ne ronwásons Táwit.” Thóh nón꞉we niwáton, “Ne teieronwékon ó꞉ni ne iáh tèhiens kwáh kíʼ iáh tsaiontáweiaʼte ne Roiá꞉ner raonónskon.”

⁹ Ne Táwit rotsienawáston ne tekanatanát꞉ton watenhén꞉raien, tánon ne wahasénhnon ne raonatowaʼnénhke ne Táwit. Ne Táwit wahanatonniánion akwé꞉kon naktón꞉tsies thóh tontásawen ne Millow kanaskwákon.

¹⁰ Tánon ne Táwit kwáh í꞉ken tsi wahashátstenhne tsi wasakohenténhse, asèken ne sakoiá꞉ne ne ratironhiakeró꞉nons, tsi nikweʼkón꞉ne ne raónha.

¹¹ Ne Ronnontí꞉io ne Hiram ne Tyre nón꞉we iahoteriwaʼniéten ne Táwit, ne wakené꞉te ne onenhtakwénhte karontasónhas, ó꞉ni ratiʼswenhkarakétas ó꞉ni ne ratinenhiakwétarons ne ne ronónha ronwanonsiʼsenhénhni ne Táwit.

¹² Ne Táwit wahát꞉toke nètho Roiá꞉ner tsi rokwahthakwénhni nahatenontí꞉ioste ne Israeronónke, tánon nètho tsi nihosenhnakaratháton ne raonakerásera ne akorihwáke ne raonkweʼtashón꞉ahs Israerʼró꞉nons.

¹³ Thóh nón꞉we Jerusalem, ne shiahárawe ne Hebron, ne Táwit sén꞉ha ionatsiokowáhnen iasakoiaʼtenháseron ne konhnón꞉kwe ne tahontsasétʼton ó꞉ni ne iotiniák꞉khons; tánon sén꞉ha wahonatsiokowáhna ne raoʼnekenteronhtseraʼsón꞉ahs ó꞉ni ne tsionatʼtonhwísens wahowiraientáseron ne Táwit.

¹⁴ Neh kí꞉kens tsi nihotisenhnó꞉tens ne wahowiraientáserons thóh nón꞉we Jerusalem: Shammua, Shobab, Nathan, Solomon,

¹⁵ Ibhar, Elishua, Nepheg, Japhia,

¹⁶ Elishama, Eliada, tánon Eliphelet.

Ne Philistiaró꞉nons Sahonwatisénhni

¹⁷ Nó꞉nen ne Philistines sahatirihwáronhke nètho Táwit tsi ronwaiatahrákwen nahonhnontí꞉ioke ne Israeronónke, ratikwé꞉kon ne Philistiaró꞉nons iahón꞉ne wahonwaʼiatiʼshá꞉ka ne Táwit; ók ne Táwit waharihwáronhke tánon tho niaháre tsi tewatenhén꞉raien ne tekanatanák꞉ton.

¹⁸ Nón꞉wa ne Philistines thóh nènon tánon wathonréhni thóh ahonrakwákon ne Rephaim.

¹⁹ Ne Táwit wahoriwanóntonhse ne Roiá꞉ner, “Kwáh kén iá꞉ke niakeiaʼtiatónhti ne Philistines? Kwáh ní꞉se entesehiát꞉kaʼwe thóh katshanáke?” Ne Roiá꞉ner wahawénhase ne Táwit, “Wáhs thóh iahá꞉se; asèken kwáh oriwiʼiohónwe ienkheiát꞉kaʼwe ne Philistines thóh satshanáke.”

²⁰ Káti ne Táwit iahá꞉rawe thóh nón꞉we Baal Perazim, tánon ne Táwit washakosénhni thóh nón꞉we. Wahén꞉ron, “Ne Roiá꞉ner tontahrók꞉kaʼwe neh nón꞉we niasahkotiatónhti ne iónk꞉sons nakʼkénton, kwáh ne ne iaweʼnhóton.” Neh kíʼ aoríhwa nètho nón꞉we niwatenátahien ne konwanatón꞉kwa Baal Perazim.

²¹ Ne Philistines wahontewénhthete ne raotiʼiá꞉tons ne thóh nón꞉we, tánon ne Táwit waonkweʼtashón꞉ahs hahatiʼháseron.

²² Shé꞉kon ionsónteratste ne Philistines tontahónhne, tánon thóh nón꞉we natehonahréhnion aonrakwáhkon ne Rephaim.

²³ Nó꞉nen ne Táwit sahoriwahnóntonhse ne Roiá꞉ner, wahén꞉ron, “Ní꞉se kwáh iáh thóh tsiá꞉se; wáhs sehiakwahtáse rahtísonne nontáse, tánon thóh nontáhse tsi ensehiatórenhne ákta nokwáhti tsi iorontótons ne iotshokó꞉tons.

²⁴ Nó꞉nen ní꞉se ensatón꞉tene tsi nihotiʼnenhraseronhnihá꞉tsie ne tsi ioronhthó꞉tons ne iotshokó꞉tons, ehʼthó꞉hʼne kíʼ sathateweienʼnénhtan; asèken ehʼthóhʼne ne Roiá꞉ner sahén꞉ton niehawénon nashakoiatsenenhte ne raotiʼtsió꞉kwas ronterí꞉ios Philistines.”

²⁵ Ne Táwit kwáh kíʼthóh nahá꞉iere tsi nahonáhne ne Roiá꞉ner; tánon washakótonhte ne Philistines thóh tontásawen Geba kwáh tsi niió꞉re ne Gezer.