2 Samuel 4 - Ohiatonhseratokénti

Ne Ishbaal Ronwanonwarhiákhon

¹ Nó꞉nen ne Saul roién꞉ha Ishbaal sahariwáronhke nètho Abner tsi thawehéion thóh nón꞉we Hebron, wahanikonrók꞉ten, tánon onhkweʼtakwé꞉kon ne Israerʼronónke waonhnikonrók꞉ten.

² Ne Saul roién꞉ha tékeni tehahonkwetaién꞉takwe nohén꞉ton ienítakwe ne ratinenhrakáriaks raotitsió꞉kwa; tsi nihosenhnóten ne saiá꞉ta Baanah, tánon nó꞉ia Rechab. Ne ne sakoiohʼokónʼa ne Rimmon ne ne Benjaminró꞉non Beeroth nón꞉we nihanákerehkwe—asèken ne Beeroth áhio Benjamin ahó꞉wenk.

³ (Nón꞉wa nonkweʼókons ne Beeroth thóh iehonatekwáhsen Gittaim tánon thók tsehatinákere shé꞉kon nón꞉wa wenhniseráte).

⁴ Ne Saul roién꞉ha Jonathan ronekenterontseraién꞉takwe nenhnéʼeh roshiʼtakenhéion. Wísk natehaoseriʼiákon nó꞉nenh noríhwa tsi nòkwah ne Saul ó꞉ni ne Jonathan thóh nontáhwe Jezreel. Ne teiósnie wathoiáthakwe tánon onhtèko; tánon, nahón꞉ha watsiósteríhen nakaniá꞉kenʼne, tsi nahá꞉wenhne tahaiátenhne tánon wahashinátsenhne. Tsi nihosenhnóten Mephibosheth.

⁵ Nón꞉wa ne raonekenterontserashón꞉ahs ne Rimmon ne ne Beerothró꞉non, Rechab tánon Baanah, tánon kák꞉non ne kwáh siʼiorakwahtarí꞉en ne tsi niwenhnísereskwe iahón꞉newe tsi thohnónshote ne Ishbaal, tsi ná꞉he nenhné꞉eh ne raón꞉ha nénhtie ní꞉kare ratorísens.

⁶ Ne tsionthonwísen ne tewatenhohanónhna waoserenhtáraʼne tsi nikaríweskwe waséhwaskwe noná꞉tsa tánon iahó꞉tahwe, káti ne Rechab tánon ne Baanah iahiatáweiate.

⁷ Tsi iahiatáweiate ne kanónskon tsi ná꞉he ne raón꞉ha thóh raiatiónhnikwe wenhnitskwaʼrátsereske thóh tsi ranonwétstha; iahonwatsatónhti, wahonwanonwarhiákhon, tánon wahonwanontsístsiaʼke. Ehʼthóhʼne ionsaníhaʼwe ne raonnóntsi tánon thóh nòkwah ionsahiathahítha tsi nieiawénon ne Arabah kwáh asontahkwékon.

⁸ Ianí꞉hawe ne raonón꞉tsi ne Ishbaal ronnontí꞉ioke ne Táwit thóhnónwe Hebron tánon wahonwénhase ne ronnontí꞉io, “Kòh kí꞉ken raonón꞉tsi ne Ishbaal, ne roienkénʼen ne Saul, ne tetsatátʼtionskwe, raón꞉ha réhsakskwe ne tsi són꞉nhe; ne Roiá꞉ner sahokáriakʼse natiá꞉ner ne ne ronnontí꞉io nón꞉wa wenhniseráte raonháke ne Saul ó꞉ni ne raowáhtsire.”

⁹ Ne Táwit watoriwaserákwahse ne Rechab ó꞉ni ne iathatekénha Baanah, ne sakoiohʼokónʼahs ne Rimmon ne ne Beerothró꞉non, “Tsi kíʼ ne Roiá꞉ner tsi nirón꞉nhe, raón꞉ha shononstáhton ne tsi kón꞉nhe kwáh tsi niʼiorihwákes noiót꞉terons,

¹⁰ Nó꞉nenh ne tsi niká꞉ien ne rakró꞉ri, ‘Satkátho, Saul rawenhé꞉ion,’ iawerohátien tsi kariwí꞉io tháhaskwe, Wahiʼiéna tánon wahinonwarhiákhon thóh nón꞉we Ziklag—neh kí꞉ken watirihwaserákwase tsi tahí꞉ion ne raón꞉ha ne ne kariwí꞉ios raówenk.

¹¹ Thóh káti shé꞉kon ní꞉kon, nó꞉nenh ne ronkwetahét꞉ken róhrio ne thronkweʼtaié꞉ri tho raonaktáhke ne kwáh raón꞉ha raonónskon! Tánon nón꞉wa iáh kén takeriwanón꞉ton ne raonekwénhsa ne í꞉sawe satshanáke, tánon naiesáthonte ne tsi ionwenhtsá꞉te?”

¹² Káti ne Táwit wahoriónten ne kén nithoiónha, tánon wahonwahtiʼnonwarhiakhónhnion; waonwatiʼtshaniákhon tánon ne ronshitákes, tánon thóh wahonwatiʼiatanihiontón꞉nion ákta tsi ioná꞉werote ne Hebron nón꞉we. Ók ne raonóntsi ne Ishbaal iahatíhawe nenhʼné꞉eh tánon thóh iahatihiatháta raotsaʼtonkwáhkon ne Abner thóh nón꞉we Hebron.