2 Samuel 3 - Ohiatonhseratokénti

Abner Iahotiátarahse Ne Táwit

¹ Wateriʼioserehsonhne tsi natehón꞉terekwe raotiwátsires ne Saul tánon ne Táwit; Ne Táwit kwáh í꞉ken tsi tahashaststénhsere, ók ne raotiwátsire ne Saul tahonaseronnenhtonhátie nenhʼnéʼeh tsi nihatisháststekwe.

² Ratiksaʼokón꞉ahs wahowiraientáseron ne Táwit thóh nón꞉we Hebron: ne thakowánenh ne ne Amnon, Ahinoam ne ronisténha ne ne Jezreelró꞉non nakaiató꞉ten;

³ ne tekeníhaton roién꞉ha ne ne Chileab, Abigail ne ronisténha, ne ne Nabal rotiniá꞉konhne, Carmel nón꞉we nitsiawénon; nasén꞉haton, roién꞉ha ne ne Absalom, Maacah ronisténha, ne sakoién꞉ha ne Ronnontí꞉io Talmai ne Geshur nón꞉we;

⁴ ne kaieríhaton niérate ne roién꞉ha, ne ne Adonijah Haggith ronisténha; ne wískhaton niérate roién꞉ha, ne ne Shephatiah Abital ronisténha;

⁵ tánon ne iáh-iákʼkhaton niérate roién꞉ha, ne ne Ithream, ne ne Táwit ró꞉ne Eglah roién꞉ha. Ronónha kí꞉kens ne Táwit rowiraientáseron ne Hebron nón꞉we.

⁶ Tsi nikarí꞉weskwe wateriʼioseráien꞉takwe tsi natehón꞉tere ne raowátsire ne Saul ó꞉ni ne Táwit, ne Abner ne warón꞉niate nahasháststenhne tsi rawatsíraien ne Saul.

⁷ Nón꞉wa ne Saul thateniʼiá꞉se tsi niká꞉ien ne ne konwáiats Rizpah ne ne akoién꞉ha ne Aiah. Tánon ne roʼníha ne Ishbaal tánon ne raón꞉ha wahawénhase ne Abner, “Nontiéren ní꞉se tsi wetsá꞉rate ne rakení꞉ha thatenihiá꞉se?”

⁸ Ne raowenhnahó꞉kons ne Ishbaal wakakwéni ne Abner kwáh í꞉ken tsi waonákwen; wahén꞉ron, “Í꞉i kén ne érharh wakenontsistontákwen ne Judah aorihwáke? Nón꞉wa wenhniseráte iewakʼkhontákwen wakenestonhátie tsi wakateriwatokénstons tsi rawatsíraien ne Saul, ó꞉ni ne rontahtekenʼokón꞉ahs, ó꞉ni ne raoterohserashón꞉ahs, tánon iáh tsekonhiatiaʼkwahríshion raonhá꞉ke ne Táwit; tánon nék kík sá꞉ka takerihwáros nahonkení꞉kon ne kariwahetkénsera ahonháke kí꞉ken iónʼkwe.

⁹ Káti aiá꞉wens ne Ní꞉io thóh nahoiérase ne Abner tánon aiá꞉wens iahá꞉ieste! Asèken tsi nahóten ne Roiá꞉ner rorahratsténhni ne Táwit, ní꞉i kwáh kiʼ enkerihwaiérite ne raonhá꞉ke,

¹⁰ ne tsi tentsenhnaténi ne kanakerásera tsi rawatsíraien ne Saul, tánon enhinontiʼiotserónhnien ne Táwit thóh nón꞉we Israeronónke ó꞉ni tsenwakwé꞉kon ne Judah, thóh entewatáhsawen Dan tsénwaʼwe ne Beer-sheba.”

¹¹ Tánon ne Ishbaal iáh tehokwéʼnion tahoriwaserakwéni ne Abner shé꞉kon ne tiowénhna, tsioríhwa tsi nihotsániskwe.

¹² Ne Abner iasakotó꞉ri ratirihwakaréhnies raonháke ne Táwit thóh nón꞉we Hebron, rontón꞉nions, “Ónhka akahonhóntsa í꞉ken? Shón꞉ni ne sateriwaseronniátsera skát꞉ne ní꞉i, tánon ní꞉i kwáh entʼkonhiatswanónhna tsi entekheiaténhawe ratikwé꞉kon Israerʼró꞉nons shonháke.”

¹³ Wahén꞉ron, “Ioiá꞉nere; kwáh enkónhni nateriwaseronniátsera skát꞉ne ní꞉se. Ók tsoríhwa khók enkonrihwanóntonhse ní꞉se: ní꞉se kwáh iáh nonwénhton thasataténeste nakʼkénhton nék khók tokàken entesheʼeeʼiaténhawe ne Saul sakoién꞉a Michal nó꞉nen ní꞉se entése nahontaskatʼkénhsera.”

¹⁴ Ehʼthóhʼne ne Táwit iasakotóri ratirí꞉wakarenies raón꞉hake ne Saul ró꞉ièn Ishbaal, rontón꞉nions, “Tontasheiátkaf ne ionkeniʼniákon Michal, tsi ahón꞉ha iontsateriwaserónhni ne tsi nihkakahriaktsherónhni ne ne énska-tewenhniáwe ní꞉kon ne kané꞉hons ronwatiwarakwétaron ne Philistines.”

¹⁵ Ne Ishbaal iasakoténieʼte ne raonkweʼtashón꞉ʼahs neh nakonwenhnónksa tánon éhren akonwahiatenhsáwite tsi nateniterón꞉tahkwe ne ró꞉ne Paltiel ne ne roiénha ne Laish.

¹⁶ Ók ne ró꞉ne tahné꞉tahkwe nahón꞉ha, tehasentʼthósere tsi ahonáken í꞉reh kwáh tsi nihió꞉hase tsi niió꞉re ne Bahurim. Ehʼthóhʼne ne Abner wahawénhase, “Wáhs sashaténti!” Káti sahá꞉kete.

¹⁷ Ne Abner iasakoteriwaniéten ne thotí꞉ions ne Israerʼronónke, rahtón꞉nions, “Asèken kwáh thóh tsi ná꞉he tsiotohétston ní꞉se tsi tsiatísaskwe ne Táwit tsi neh ianontí꞉io ní꞉se.

¹⁸ Ó꞉nen kíʼ iaʼkáhewe ne khashé꞉re; asèken ne Roiá꞉ner tsi roraratsténhni ne Táwit: Raonháke nakenhá꞉tshera Táwit ní꞉i kwáh enkhenónsthaʼte nakonkweʼtashón꞉ʼahs NʼIsraerʼró꞉nons tsi nòkwah ne rontsshanákes ne Philistines, tánon tsi nòkwah ne ratikwéʼkon ne ronwatísons.”

¹⁹ Ne Abner kwáh raón꞉ha wasakothárahse ne Benjaminites; ehʼthóhʼne ne Abner iahá꞉re naoró꞉ri ne Táwit thóh nón꞉we Hebron tsi ratikwé꞉kon NʼIsraerʼró꞉nons ó꞉ni tsi rawatsiraʼkwé꞉kon ne Benjamin tsi iathotiriwaién꞉tahse ne thóh nahatí꞉iere.

²⁰ Nó꞉nen ne Abner shiaʼhárawe ronhnaterohséntahtse ne tewáhsen niháti ronhnón꞉kwe raonháke ne Táwit thóh nón꞉we Hebron, Ne Táwit waohtenhnʼiót꞉thase ne Abner tánon ne ronnón꞉kwe ne ratikweʼkonhátsiene.

²¹ Nó꞉nen ne Abner wahawénhase ne Táwit, “Takeríhon ne iá꞉ke tánon akheiaʼtaróhroke ratikwé꞉kon NʼIsraerʼró꞉nons rahohénton natiá꞉ner ne ne ronnontí꞉io, ne nahón꞉ton nahonnónhni nateriwaseronniátshera skátne ní꞉se, tánon nètho ní꞉se ahón꞉ton asatenontí꞉ioste kwáh akwé꞉kon ne seriá꞉ne tsi nitesaskáneks.” Káti ne Táwit sahót꞉kawe ne Abner, tánon éh꞉ren sárehte skénnok thí꞉ken.

Ne Abner Wahonwanonwariákhon Ne Ne Joab Thóh Nahá꞉iere

²² Kwáh thó꞉ne ne raonhatserashón꞉ahs ne Táwit wahón꞉newe skátne ne Joab thóh nontahón꞉ne tsi rotinenhrentón꞉ne, ratihá꞉wine wé꞉so ne rotinenhskwenhátie. Ók ne Abner iáh thóh tenikweʼkón꞉kwe ne Táwit ne Hebron nón꞉we, asèken ne Táwit shotekwáhton, tánon éh꞉ren sawéton kwáh skénnok thí꞉ken.

²³ Nó꞉nen ne Joab ó꞉ni ratikwékon ne ronterí꞉ios ne rathiʼkweʼkonhátsiene sahón꞉newe, wahonwaró꞉ri ne Joab, “Ne Abner ne roiénha ne Ner thaʼwénon ronontí꞉ioke, tánon ne raón꞉ha shotekwáhton, tánon éh꞉ren sawéton kwáh skénnok thí꞉ken.”

²⁴ Ehʼthóhʼne ne Joab iahá꞉re ronnontí꞉ioke tánon wahénron, “Onh nashá꞉tiereh? Ne Abner wahiaiatórenhne; ónh nontsiéren tsi shatsatékwahte, káti nètho éhʼren sárehte?

²⁵ Saterientá꞉reh nètho Abner ne roién꞉ha ne Ner tsi thawé꞉non ne nahianikonráhten, tánon nahoterientáhrane akwé꞉kon tsi nisatieráhnions ó꞉ni tsi nón꞉we nieshé꞉tha ó꞉ni nahoterienhtáhrane tsi nishatiéra.”

²⁶ Nó꞉nen ne Abner éhʼren shá꞉rehte tsi nón꞉we níreskwe ne Táwit, iasakotó꞉ri ratirihwakarénies nahonwáhsere ne Abner, tánon thóh nathontahonwahiaténhawe tsi tsionáwerote ne Sirah; ók ne Táwit iáh ne teoterientáhrahkwe nètho.

²⁷ Nó꞉nen ne Abner shionsáre ne Hebron, ne Joab wahotsathatískwahte tsi nieiawénon ne iotenhenrakáronte ne tahnithára rahonwá꞉khok, tánon thóh nón꞉we nahó꞉hase ranekwéntahke. Káti warénheʼie tsi nahanékwah neh káti iatonhsáneke ne raonekwénhsa ne Asahel, ne ne Joab iathatekenhkénʼen.

²⁸ Ehʼthóhʼne ó꞉nen, ne Táwit sahariwáronke, wahén꞉ron, “Ní꞉i tánon nakenakerásehra kwáh tsi nènhwe tsi iáh teionkehnihníkon raohén꞉ton ne Roiá꞉ner ne ne raonekwénhsa akarihón꞉ni ne Abner ne roién꞉ha ne Ner.

²⁹ Aiá꞉wenhs ne kaní꞉tsera aká꞉rahne ne ranontsí꞉ne ne Joab, ó꞉ni ratikwé꞉kon ne roní꞉ha raowáhtsire; tánon aiá꞉wenhs ne raowáhtsireh ne Joab iahiokontáhkwen ne ahotironhiá꞉kenke ne iokhas kanhratariné꞉tsera, iakotstawis, khéhs nón꞉kak ne ahoienawákon ne iehseriʼieʼtonniátha, khéhs thóh iahaiatiénenhne tsi waterí꞉io, khéhs ahothikwanorónsten!”

³⁰ Káti ne Joab tánon ne iatahtekénʼha Abishai wahonwásehte ne Abner tsioríhwa tsi raón꞉ha rononwarhiá꞉khon ne rontahtekénʼha Asahel ne tsi waterí꞉iokwe ne Gibeon nón꞉we.

³¹ Ehʼthóhʼne ne Táwit wahawénhase ne Joab tánon ratikwé꞉kon nonkweʼókons ne raón꞉ha ratikweʼkonhátsiene, “Sewaratiónko ne sewatserónh꞉nia, tánon káiare í꞉sewats, tánon tsi sewatiónhnions ne Abner.” Tánon ne Ronnontí꞉io ó꞉naken í꞉rehne tsi rathirontotserenháwine.

³² Iahonwahiatáhta ne Abner thóh nón꞉we Hebron. Ne ronnontí꞉io wathohén꞉rehte tánon wathasént꞉tho rahotsatonhkwákta ne Abner, tánon kanenhrakwékon wationhsént꞉tho.

³³ Ne ronnontí꞉io wahotiónhnionhse ne Abner, ratón꞉nions, “Ahowenkénʼen ne Abner thóh ní꞉ioht tsi ahawenhéion tsi ní꞉ioht ne thothonhnótʼte?

³⁴ Ne shatshanáke iáh tekawanérenhkwe, ne shashitáhke iáh tekaronkwasanérenhkwe; tsi ní꞉ioht ne tieiá꞉ta waheiatsenénhne raotihén꞉ton ne ionkwetahetkénskwa ní꞉se iesanonwarhiákhon.” Tánon ratikwé꞉kon nonkweʼókons tonsahonwasénthose shé꞉kon.

³⁵ Ehʼthóhʼne onkwetahkwékon tahón꞉ne nahonwaréhker ne Táwit ne knahótenk ará꞉ke tsík sénhak shé꞉kon iawenhniserón꞉te; ók ne Táwit kwáh í꞉ken tsi wahará꞉ratste, ratón꞉nions, “Káti aiá꞉wenhs ne Ní꞉io thóh nahatiérase, tánon sénha íshiʼnon, tó꞉kaʼ akatenatahrát꞉kenhse khéhs ne tsík nahó꞉tenk akénhake nohén꞉ton iakará꞉kwenhne!”

³⁶ Onkweʼtakwé꞉kon ahiónt꞉toke, tánon wahakawerientí꞉io; kwáh tsi ní꞉ioht norihwakwé꞉kon ne ronnontí꞉io tsi tesakonikonraiérits nonkweʼtahkwé꞉kon.

³⁷ Káti onkweʼtahkwé꞉kon ó꞉ni kahnakeraserakwékon Israerʼronónke wahakoteriéntahrane nètho wenhniserá꞉tekwe nètho ronnontí꞉io tsi iáh othènon tehotiátaren tsi ronwanonwarhiá꞉khon ne Abner ne ne roién꞉ha ne Ner.

³⁸ Tánon ne ronnontí꞉io wasakawénhase ne raonhatserashón꞉ʼahs, “Iáh kén ní꞉se tesewateriéntahre nètho ronnontí꞉io ó꞉ni tsi nironkwetowáhnen tsi ronwanonwahrhiákhon nón꞉wa wenhniseráte ne Israeronónhke?

³⁹ Ónhwa wenhniseráte iáh othènon teshewaʼkeshastsʼtenhseráien, iawerohátien tsi iontsatahrá꞉kwen wakenontí꞉io; kíʼ ronnónkwe, ne sakoiohʼokónʼahs ne Zeruiah, shó꞉tsi ronhnonkwetáksen nakerihwáke. Ne Roiá꞉ner shesakokárhiaks tsi niká꞉ien ne thóh nenhá꞉iere ne kariwahetkénsera ne tsioianénhaf tsi nironkwetahétken!”